12. ସୋଡା ଜନିରନ୍।

ମିସରନ୍ ଆରୁମ୍‌ରେଙତଜି ଆସନ୍ ଇସ୍ରାଏଲିୟଞ୍ଜି ଗୋଗୋୟ୍ ସର୍ଡାଏଞ୍ଜି। ଆନିଞ୍ଜି ଆରି କମ୍ୱାରୀଗୋ ଅଡକୋଲଞ୍ଜି, ଡ ଆନିଞ୍ଜି ସନିବ୍‌ଡେୟ୍‌ବର୍ର ଡେସାନ୍ ଜିର୍‌ଗଡେଞ୍ଜି। ଇସ୍ରାଏଲୀୟଞ୍ଜି ଇନିଜି ମିସରୀୟଞ୍ଜି ବେଡେଞ୍ଜି, ଆନିଞ୍ଜି ଅଡକୋନ୍ ତିୟେଞ୍ଜି, ଏନେଲେ ଡ ସୁନାନ୍, ଡ ରୁପାନ୍, ଡ ଆନ୍ନା ଡାବୋଡମନ୍ ଆଜନବ୍ ନିୟ୍ ତିୟେଞ୍ଜି। ଆନ୍ନା ଆଡେସା ଲାଙ୍‌ଲେଡ୍ ମନ୍‌ଡ୍ରାଞ୍ଜି ଈଶ୍ୱରନ୍ ଆଡଅଙ୍ ଡର୍ରଞ୍ଜି ଡ ଆନିଞ୍ଜି ମିସରନ୍ ଉମ୍ ରେଙଲେ ଇସ୍ରାଏଲୀୟଞ୍ଜି ସରିନ୍ ଜିରେଞ୍ଜି।

ଡିନ୍ନାବେଳା ଈଶ୍ୱରନ୍ ଆମଙବାଞ୍ଜି ଅବୟ୍ ଡେଙ୍ଗା ମେଗନ୍ ଆକିନ୍ତାଲ୍ ସରିନ୍ ଆନିଞ୍ଜି ଆଡଅଙ୍ ଅବ୍‌ତଙିଲେ ଓରିଙେନ୍, ଡ ତଗଲ ବେଳାନ୍ ଡେଙ୍ଗା ତଗୋନ୍ ଡେଏନ୍। ଈଶ୍ୱରନ୍ ଆନିଞ୍ଜି ଆମଙ୍ଗ୍ ଡିତାନ୍ ଡକୋଲନେ ଡ ଆଜନୁରଞ୍ଜି ଆଡିଡ୍ ଆନିଞ୍ଜି ତଙରନ୍ ଅବ୍‌ତୁଜେଞ୍ଜି। ଆନିଞ୍ଜି ଆନିନ୍ ସନଲେ ପାଙେଞ୍ଜି।

ବସନେନ୍ ଆତିକ୍କି, ଫରୋନ୍ ଡ ଆମଡ୍ରାଞ୍ଜି ଆବଡିୟମଲଞ୍ଜି ଡ ଇସ୍ରାଏଲୀୟଞ୍ଜି ଆଡ଼ଅଙ୍ ଆରି କମ୍ୱାରୀନ୍ ଡନକୋନ୍ ଆସନ୍ ଇୟ୍ୟମେଞ୍ଜି। ଈଶ୍ୱରନ୍ ଫାରୋନ୍ ଆଡଅଙ୍ ଗୋଗୋୟ୍ ରବ୍ବଡୋଗରେନ୍, ଏଙ୍ଗାଲେ ମନ୍‌ଡ୍ରାଞ୍ଜି ଆବୟନ୍ ଆଜାଡି ଈଶ୍ୱରନ୍ ଡକୋ ଗାମଲେ ଜନାତଜି, ଗନଲୁତଜି, ଅଡକୋଡିନ୍ନା ଆଈଶ୍ୱର ଫାରରୋନ୍ ଡ ଫାରୋନ୍ ଆସନୁମ୍ ସିଲଡ୍ ଗୋଗୋୟ୍ ବୋର୍ସା ଡକୋ।

ତି ଆସନ୍ ଆନିଞ୍ଜି ଆଡଅଙ୍ ଆରି କମ୍ୱାରୀନ୍ ଡନକୋନ୍ ଆସନ୍ ଇସ୍ରାଏଲୀୟଞ୍ଜି ଆତିକ୍କିତିକ୍କି ଫାରୋନ୍ ଡ ଆସିଫାୟୀଞ୍ଜି ଗଙେଞ୍ଜି। ମିସରୀୟଞ୍ଜି ଆଜିର୍ତାଙଞ୍ଜି ଗିଜାନ୍ ଗିୟଲେ ଇସ୍ରାଏଲୀୟଞ୍ଜି ଜନାଏଞ୍ଜି ଡ ଆନିଞ୍ଜି ଫାରୋନ୍ ଆସିଫାୟୀଜି ଡ ଲୋହିତ ସମେୟଁଡ୍ରା ଆମଡ୍ଡିରେଙ୍ ରଏଏଞ୍ଜି। ଆନିଞ୍ଜି ଗୋଗୋୟ୍ ବତଙେଞ୍ଜି ଡ ଆନିଞ୍ଜି ଅବସରଙ୍‌ଲନ୍ ବର୍ରଞ୍ଜି, “ଇଲେନ୍ ଇନି ଆସନ୍ ମିସରନ୍ ଏଅମ୍‌ରେଙଲାୟ୍? ଇନ୍‌ଲେନ୍ ରବ୍ବୁତଲେନ୍!”

ମୋଶାନ୍ ଇସ୍ରାଏଲୀୟଞ୍ଜି ଆଡଅଙ୍ ବର୍ରେଞ୍ଜି, “ବତଙଡଙବେନ୍, ଈଶ୍ୱରନଚ ଲଙେ ଅମଙ୍ଗଗଡ୍ ବେନ୍ ସୁତନେ ଆମ୍ୱେଞ୍ଜି ଆଡଅଙ୍ ଅମେଙତବେନ୍।” ତି ଆତିକ୍କି ଈଶ୍ୱରନ୍ ମୋଶାନ୍ ଆଡଅଙ୍ ବର୍ରେନ,“ମନ୍‌ଡ୍ରାଞ୍ଜି ଲୋହିତ ସମେୟଁଡ୍ରା ଗଡ ଜନୁରନ୍ ଆସନ୍ ବରାଜି।”

ତି ଆତିକ୍କି ଈଶ୍ୱରନ୍ ମେଗନ୍ ଆକିନ୍ତାଲ୍ ପାଙଲେ ଇସ୍ରାଏଲୀୟଞ୍ଜି ଡ ମିସରୀୟଞ୍ଜି ଆମଡ୍ଡି ଡକୋଏନ୍ ଏଙ୍ଗାଲେ ମିସରୀୟଞ୍ଜି ଇସ୍ରାଏଲୀୟଞ୍ଜି ଆଡଅଙ୍ ଗିୟଲେ ଅରପ୍ତିଏଜି।

ଈଶ୍ୱରନ୍ ମୋଶାନ୍ ଆଡଅଙ୍ ଆସିନ୍ ତେକେଲେ ସମେୟଁଡ୍ରାନ୍ ବାଗୁ ପାଲପାଲ ଅନମେନ୍ ଆସନ୍ ବର୍ରେନ୍। ତି ଆତିକ୍କି ଈଶ୍ୱରନ୍ ରିଙ୍ଗେନ୍ ସରିନ୍ ସମେୟଁଡ୍ରାଲୋଙନ୍ ଆପ୍ପାୟଲେ ଅର୍ରଜଡୋମ୍ ଡ ଅର୍ରକଡାବି ରୁମ୍ପେଲେନ୍, ଏଙ୍ଗାଲେ ସମେୟଁଡ୍ରାଲୋଙନ୍ ଅବୟ୍ ତଙରନ୍ ଗଡେଲେନ୍।

ଇସ୍ରାଏଲୀୟଞ୍ଜି ସମେୟଁଡ୍ରାନ୍ ଆମଡ୍ଡି ଗଡ ତଙିଲଞ୍ଜି ଡ ଆବାଗୁଗଡଞ୍ଜି ଡାଆନ୍ କିନ୍ତାଲ୍ ଗୋ ଡକୋଲନେ।

ତି ଆତିକ୍କି ଈଶ୍ୱରନ୍ ମେଗନ୍ ତେତେ ସିଲଡ ତୋଣ୍ତୋନ୍ ପାଙେନ୍ ଏଙ୍ଗାଲେ ଇସ୍ରାଏଲୀୟଞ୍ଜି ଅମୁରର୍ରେ ଆଜିର୍‌ତଞ୍ଜି ଆତେ ମିସରୀୟଞ୍ଜି ଗିୟଲେ ଅପ୍ତିତଜି। ମିସରୀୟଞ୍ଜି ଆନିଞ୍ଜି ଆଡଅଙ୍ ଗନଙନ୍ ଆସନ୍ ଇୟ୍ୟମେଞ୍ଜି।

ତି ଆସନ୍ ଆନିଞ୍ଜି ସମେୟଁଡ୍ରାଲୋଙନ୍ ଆଡ୍ରେଏନ୍ ଆତଙର୍ ଗଡ ଇସ୍ରାଏଲୀୟଞ୍ଜି ଗଙେଞ୍ଜି, ବନ୍‌ଡ ଈଶ୍ୱରନ୍ ମିସରୀୟଞ୍ଜି ଡଣ୍ତନ୍ ତେୟେଞ୍ଜି ଡ ଆସଗଡାଞ୍ଜି ଡାଆନ୍ ଆଅମଃ ଅମ୍‌ଗନେନ୍। ଆନିଞ୍ଜି ଅବସରଙଲନ୍ ବର୍ରଞ୍ଜି, “ଜିର୍ରବା! ଇଶ୍ୱରନ୍ ଇସ୍ରାଏଲୀୟଞ୍ଜି ଆମଙଗଡ ସୁତନେ।”

ଇସ୍ରାଏଲୀୟଞ୍ଜି ସମେୟଁଡ୍ରାନ୍ ଆଅଡିଗଡ୍ ମନଙ୍ ତୁଙେଞ୍ଜି ତି ଆତିକ୍କି ଈଶ୍ୱରରନ୍ ମୋଶାନ୍ ଆଡଅଙ୍ ଆରି ଆସିନ୍ ତନେକେନ୍ ଆସନ୍ ବର୍ରେନ୍। ଏଙ୍ଗାଲେ ଆନିନ୍ ଈଶ୍ୱରନ୍ ଆବର୍ରନେ ମାନ୍ନେଏନ୍ ଡାଆନ୍ ମିସରିୟଞ୍ଜି ଆତୋନଡୋ ଅସେଡେନ୍ ଡ ସମେୟଁଡ୍ରା ଆମୁଙ୍ ଅନ୍ତମ୍ ମାୟଲନେ। ଅଡକୋନ୍ ମିସରୀୟଞ୍ଜି ଆସିଫାୟୀଜି ସମେୟଁଡ୍ରାଲୋଙନ୍ ବୁବ୍ବଡାଲେ ରବ୍ବୁଏଞ୍ଜି।

ଈଶ୍ରାୟେଲବାଜି ଏଙ୍ଗାଲେ ଗିଜେଞ୍ଜି ମିସରବାଜି ରବ୍ବୁଆଜେଞ୍ଜି, ଆନିଞ୍ଜି ଇଶ୍ୱରନ୍ ଆମଙ୍ ଆସାଲଞ୍ଜି ଆରି ମୋଶାନ୍ ଆଡଅଙ୍ ଈଶ୍ୱରନ୍ ଆପୁର୍ବାଃତେ ବର୍ନେମର୍ ଗାମ୍‌ଲେ ଡର୍ରଞ୍ଜି।

ଇଶ୍ରାୟେଲଞ୍ଜି ନିୟ୍ ଗୋଗୋୟ ସର୍ଡାନ୍ ବାତ୍ତେ ସର୍ଡାଲଞ୍ଜି ଇନିଆସନ୍ ଗାମେଣ୍ତେନ୍ ଈଶ୍ୱରନ୍ ଆନିଞ୍ଜି ଆଡଅଙ୍ ରନବୁନ୍ ଡ କମ୍ୱାରିନ୍ ସିଲଡ୍ ଅବ୍‌ମେଙେଞ୍ଜି। ନମି ଆନିଞ୍ଜି ଈଶ୍ୱରନ୍ ଆସନେବା ଆସନ୍ ଆଉର୍ନେ ଡେଏଞ୍ଜି। ଇଶ୍ରାୟେଲିୟଞ୍ଜି ଆନିଞ୍ଜି ଆନୁଆ ଉର୍ନେନ୍ ଆମନାନ୍ନେନ୍ ଡ ଈଶ୍ୱରନ୍ ଆସନେନ୍‌ସେନ୍ ଆସନ୍ ଗୋଗୋୟ୍ କନନଞ୍ଜି କନେଞ୍ଜି ଇନିଆସନ୍ ଗାମେଣ୍ତେନ୍ ମିସରବାଜି ଆସିପାଇଜି ଆମଙ୍ ସିଲଡ୍ ଆନିଞ୍ଜି ଆଡଅଙ୍ ଡୋବେଞ୍ଜି।

ଈଶ୍ୱରନ୍ ଇଶ୍ରାୟେଲଞ୍ଜି ଆଡଅଙ୍ ଏଙ୍ଗାଲେ ମିସରବାଜି ଆମଙ୍ ସିଲଡ୍ ଅବ୍‌ଜିନୟେଞ୍ଜି ଆରି ଆନିଞ୍ଜି କମ୍ୱାରିନ୍ ସିଲଡ୍ ଏଙ୍ଗାଲେ ଉରେଞ୍ଜି, ତିଆତେ ଆମନାନ୍ନେ ଆସନ୍ ଇଶ୍ରାୟେଲଞ୍ଜି ଆଡଅଙ୍ ଅନେଲାୟ୍ ପୁରନ୍ ତନୁବନ୍ ଆସନ୍ ବାଞେଞ୍ଜି। ଆନିଞ୍ଜି ଅବୟ୍ ଅର୍ରଙ୍ ପାରାଏନ୍ ଆଅନ୍‌ମେଣ୍ତାନ୍ ବାତ୍ତେ ଅନମଙନ୍ ତିୟଲେ ଡ ରୁଟିନ୍ ଜୋମଲେ ତିଆତେ ଆନିଞ୍ଜି ମାନ୍ନେଲଞ୍ଜି।