13. ଈଶ୍ୱରନ୍ ଇସ୍ରାଏଲନ୍ ସରିନ୍ ଆଓକ୍କାନେ
ଈଶ୍ୱରନ୍ ଇସ୍ରାଏୟଞ୍ଜି ଆଡଅଙ୍ ଲୋହିତ ସମେୟଁଡ୍ରା ଗଡ୍ ଓରୋଙଲାଜି ଆତିକ୍କି, ଆନିନ୍ ଅବୟ୍ ଆରିଙ୍ଗ୍ରିଙ୍ଗ୍ ଗଡ୍ ସୀୟନନ୍ ଆବରୁନ୍ ଓରୋଲାଞ୍ଜି। କେନ୍ ଆତେ ତି ଆବରୁ ଅଙ୍ଗାଲୋଙ୍ ମୋଶାନ୍ ଆଜୋମ୍ତୋଡନ୍ ଆରାନୁବ୍ ଗିଜେନ୍, ବରୁନ୍ ଆଜାୟତା ମନ୍ଡ୍ରାଞ୍ଜି ପୁତ୍ତସିଙନ୍ ତୁବେଞ୍ଜି।
ଈଶ୍ୱରନ୍ ମୋଶାନ୍ ଡ ଇସ୍ରାଏଲଞ୍ଜି ବରେଞ୍ଜି, “ଆମ୍ୱେଞ୍ଜି ବନାୟ୍ ଞେନ୍ ଏମ୍ମାନେଏନ୍ ଡେନ୍ ଡ ଅନୋକାଞେନ୍ ଡୋବ୍ଲେ ଏଡକୋଏନ୍ ଡେନ୍ ଆମ୍ୱେଞ୍ଜି ଡନକ୍କୋ ତଙ୍କାଞେନ୍, ଡ ପୁର୍ରପୁର୍ରମର୍ରଞ୍ଜି ଆକ୍କେଜାଲୋଙ ଅବୟ୍ ରାଜାକେଜ୍ଜା ଡ ମଡିର୍ ଡେସା ଡେତେବେନ୍।”
ୟାଗି ଡିନ୍ନା ଆତିକ୍କି, ମନ୍ଡ୍ରାଞ୍ଜି ଆନିଞ୍ଜିଡମ୍ ମଡିର୍ ଗାମଲେ ଅବ୍ଜାଡାଲଞ୍ଜି, ଈଶ୍ୱରନ୍ ମେଗନ୍ ଆସଡ୍ଡା, ମଲ୍ଲିୟ୍ତିରନ୍, ଓମୋଡନ୍, ଡ ପନ୍ନେଡନ୍ ଆଗୋଗୋୟ୍ ସଡ୍ଡାନ୍ ବାତ୍ତେ ସୀୟନ୍ ଆବର୍ରୁନ୍ ଆତୋଣ୍ତୋ ପଲ୍ଲନାୟ୍। ମୋଶାନ୍ ତୁମ୍ ବରୁନ୍ ଆତୋଣ୍ତୋ ଜନୁରନ୍ ଆସନ୍ ବନାଞନ୍ ଞାଙେ।
ତି ଆସନ୍ ଈଶ୍ୱରନ୍ ଆନିଞ୍ଜି ଆଡଅଙ୍ ଅନୋକ୍କାନ୍ ତିୟେନ୍ ଡ ବରେନ୍, “ଞେନ୍ ଆମ୍ୱେଞ୍ଜି ଆଈଶ୍ୱର ଅଡକୋଡିନ୍ନା ଆଈଶ୍ୱର, ଆନା ଆମ୍ୱେଞ୍ଜି ଆଡଅଙ୍ ମିସରନ୍ ଆକମ୍ୱାରୀ ସିଲଡ୍ ଅବ୍ମେଙଲେ ଓରୋଙ୍ଲବେନ୍। ଆନ୍ନା ଆସନୁମ୍ ଏପୁର୍ରଡଙେ।”
“ଅନିଙ୍ ଆକୋଂଣ୍ତାୟ୍ ସନୁମ୍ ଏତୁବଡଙେ ଡ ଆନିନ୍ ଆଡଅଙ୍ ଏପୁର୍ରଡଙେ, ଇନି ଆସନ୍ ଗାମେଣ୍ତେନ୍, ଞେନ୍ ଡିତାନ୍ ବନନଡ୍ରାବନ୍ ଆପ୍ରବୁ। ଅଞୁମ୍ଞେନ୍ ଏର୍ମନାନ୍ନେନ୍ ଏଞନଡ଼୍ରମ୍ ଡଙେ। ଲୋଲୋନେ ଡିନ୍ନା ମଡିର୍ ଗାମଲେ ଞଣ୍ତ୍ରମ୍ନାବା। ଆନ୍ନା ଆଗରାମ୍ଗାମ୍ ତୁଡ୍ରୁଡିନ୍ନା କାବାଡାବେନ୍ ଲୁମ୍ୱା, ବନ୍ଡ ସାତଡିନ୍ନା ଆତ୍ତେ ଆମ୍ୱେଞ୍ଜି ଆସନ୍ ଲୋଲୋନେ ଡିନ୍ନା ଡେତେ ଡ ଆମ୍ୱେନ୍ ଞେନ୍ ଏମନ୍ନେତିଞ୍।”
“ବାପ୍ପାବେନ୍ ଡ ନନବେନ୍ ଆଡଅଙ୍ ମାନ୍ନେବା। ଏରବ୍ବୁମର୍ର ଡଙ୍ନେ। ଏ ଡାରିଡଙନେ। ଏରାଉ ଡଙନେ। ଏପାତ୍ତିଆବର୍ର ଡଙନେ। ତୟଲିୟ୍ସିଙନ୍ ବେନ୍ ଆମର୍ରା ଆଡୁକ୍ରି, ଆସିଙନ୍ ଅଡେ ତୟଲିୟ୍ସିଙନ୍ ମର୍ରବେନ୍ ଆତେ ଆରି ଇନିଙ୍ ଆଜନବ୍ ଇନି ଆନିନ୍ ଆତେ, ଏଲୋବଡଙେ।”
ତି ଆତିକ୍କି ଈଶ୍ୱରନ୍ ବାଗୁ ଅରେଙ୍ ଲୋଙନ୍ କେନ୍ ଦଶଟା ବନାୟ୍ଞ୍ଜି ଇଡେନ୍ ଡ ମୋଶାନ୍ ଆଡଅଙ୍ ତିୟେନ୍। ଈଶ୍ୱରନ୍ ଆରି ଗୋଗୋୟ୍ ଅନୋକ୍କାଞ୍ଜି ମନାନ୍ନେନ୍ ଆସନ୍ ତିୟେନ୍। ଈଶ୍ୱରନ୍ ସିବଡେୟବର୍ରନ୍ ଗାମେନ୍, “ଆରି ମନ୍ଡ୍ରାଞ୍ଜି କେନ୍ ଅଡକୋନ୍ ମାନେଏଞ୍ଜି ଡେନ୍, ଞେନ୍ ଆନିଞ୍ଜି ଆଡଅଙ୍ ଅବସିତ୍ତାତାଜି ଡ ଡୋବ୍ତାଜି। ଆରି ଆନିଞ୍ଜି ତି ଆତେଜି ଅମ୍ମାନେଲଜି ଡେନ୍, ଈଶ୍ୱରନ୍ ତି ଆନିଞ୍ଜି ଆଡଅଙ୍ ପନରଡନ୍ ତିୟତଜି।
ଈଶ୍ୱରନ୍ ଆରି ଇସ୍ରାଏଲୀୟଞ୍ଜି ଅବୟ୍ ପୁତ୍ତସିଙନ୍ ଏଙ୍ଗାଲେ ତନୁବନ୍ ଡେତେ ଅଡକୋନ୍ ଅବ୍ଜନ୍ନାଏଞ୍ଜି ଡ ତନୁବନ୍ ଆସନ୍ ବର୍ରେଞ୍ଜି। କେନ୍ ଆତେ ରନୁକ୍କୁନେସିଂ ଗନାମନ୍ ଡେଲୋ, ଡ ତେତ୍ତେ ବାଗୁ ଆଲୋଙସିଙନ୍ ଡକୋଏନ୍ ଅଙ୍ଗା ଆତେ ଅବୟ୍ ସୋଡା ଡରଙନ୍ନେକାବନ୍ ଅବନାନ୍ନାଏନ। ଆରି ସୋଡା ପୁର୍ପୁର୍ମର୍ରଞ୍ଜି ତୁମ୍ ଡରଙନେକାବନ୍ ଆକିଣ୍ତୋଙ୍ ଗଡ୍ ଡକୋନ୍ ଆଲୋଙସିଙନ୍ ଅନିୟନ୍ ଆସନ୍ ବନାୟନ୍ ଞାଙେଞ୍ଜି, ଇନି ଆସନ୍ ଗାମେଣ୍ତେନ୍ ଈଶ୍ୱରନ୍ ତେତ୍ତେ ଡକୋଲନେ।
ଅନିଙ୍ ଆମନ୍ଡ୍ରା ଈଶ୍ୱରନ୍ ଆନୋକ୍କା ଅମ୍ମାନେଲଡେନ୍ ଆନିନ୍ ଈଶ୍ୱରନ୍ ଆତନିୟ୍ ଆସନ୍ ଆବୟ୍ ଜନ୍ତୁନ୍ ରନୁକ୍କୁସିଙଲୋଙନ୍ ଡକୋନ୍ ଆତନମ୍ଫିଲ୍ ଲୋଙ ପାଙଲାୟଜି। ଅବୟ୍ ପୁର୍ପୁର୍ମର୍ରନ୍ ଜନ୍ତୁନ୍ ସମ୍ୱବ୍ଲେ ଆନିନ୍ ତନମ୍ପିଲ ଲୋଙନ୍ ସୟେଞ୍ଜି। ଅନମେଙ୍ ଆତିୟତିୟନ୍ ଆଜନ୍ତୁ ଆମିଞାମ୍ ତି ଆମନ୍ଡ୍ରା ଆ ଇର୍ସେନ୍ ତନମ୍ମାଡନ୍ ଡେଏନ୍ ଡ ତି ଆମନ୍ଡ୍ରା ଈଶ୍ୱରନ୍ ଆଗନିୟଗିୟ୍ ଲୋଙ୍ ମଡିର୍ ଡେତେ। ଈଶ୍ୱରନ୍ ମୋଶାନ୍ ଆବୋଞାଙ୍ ହାରୋଣନ୍ ଡ ହାରୋଣନ୍ ଆକେଜ୍ଜା ଆଡଅଙ୍ ଆ ପୁର୍ପୁର୍ମର୍ରଞ୍ଜି ଆଡନ୍ନେ ଆସନ୍ ବାସେଏଞ୍ଜି।
ଅଡକୋ ମନ୍ଡ୍ରାନଞ୍ଜି ଈଶ୍ୱରନ୍ ଆତରିୟ୍ଲାୟଞ୍ଜି ଆଓକ୍କାଜି ମନ୍ନାନେନ୍ ଆସନ୍, ଈଶ୍ୱରନ୍ ତୁମ୍ ପନୁରନ୍ ଆସନ୍ ଆରି ତି ଆମନ୍ଡ୍ରାନ୍ ଆଡନେ ଆସନ୍ ଅଡେଏଞ୍ଜି। ବନ୍ଡ ଆନିଞ୍ଜି ଈଶ୍ୱରନ୍ ଆମନାନ୍ନେମର୍ ଆଡନେ ଆସନ୍ ପର୍ମାଡାଲନ୍ ଅସୋୟ୍ ଡିନ୍ନା ଆତିକ୍କି ଆନିଞ୍ଜି ବରନ୍ତଙନ୍ ଆଇର୍ସେ ଲୁମେଞ୍ଜି।
ଗୋଗୋୟ୍ ଡିନ୍ନା ଆତିକ୍କି ମୋଶାନ୍ ଈଶ୍ୱରନ୍ ସରିନ୍ ସିନୟ ଆବରୁ ଆତୋଣ୍ତୋ କଡାଡିଲଞ୍ଜି। ମୋଶାନ୍ ଆୟର୍ନେ ଜଗେଜଗ୍ଗେଲେ ମନ୍ଡ୍ରାଞ୍ଜି ମଙ୍ଗାଏଞ୍ଜି ଡ ଅବୟ୍ରଡୋତଡ୍ ଡେଏଞ୍ଜି। ତି ଆସନ୍ ଆନିଞ୍ଜି ହାରୋଣନ୍ ଆମଙ୍ ସୁନ୍ନାନ୍ ପାଙ୍ଲେ ଆନିନ୍ ଆଡଅଙ୍ ଆନିଞ୍ଜି ଆସନ୍ ଅବୟ୍ କୋଂଣ୍ତାୟ୍ସନୁମନ୍ ତନୁବନ୍ ଆସନ୍ ବରେଞ୍ଜି।
ହାରୋଣନ୍ ତି ଆସୁନ୍ନା ବାତ୍ତେ ଅବୟ୍ ଆଃଅନ୍ତାଙନ୍ କୋଣ୍ତାୟ୍ସୁମନ୍ ତୁବେନ୍। ମନ୍ଡ୍ରାଞ୍ଜି ଗୋଗୋୟ୍ ପରାସାତ୍ତିନ୍ ବାତ୍ତେ ତି ଆକୋଂଣ୍ତାୟ୍ ସନୁମନ୍ ଆଡଅଙ୍ ପୁରେଞ୍ଜି। ଆରି ଅନମେଙନ୍ ତିୟେଞ୍ଜି! ତି ଆଇର୍ସେଞ୍ଜି ଆସନ୍ ଆମଙଞ୍ଜି ଈଶ୍ୱରନ୍ ଗୋଗୋୟ୍ ବରାବେନ୍ ଡ ଆନିଞ୍ଜି ଆଡଅଙ୍ ଅନବ୍ମୋସ୍ସାନ୍ ଆସନ୍ ସାଜେନ୍।
ବନ୍ଡ ମୋଶାନ୍ ଆନିଞ୍ଜି ଆସନ୍ ବେବ୍ବର୍ରନେ, ଡ ଈଶ୍ୱରନ୍ ତି ଆବେବ୍ବର୍ନେନ୍ ଅମ୍ଡଙେନ୍ ଆରି ଆନିଞ୍ଜି ଅନବ୍ମୋସ୍ସାଲଜି। ମୋଶାନ୍ ଅଙ୍ଗାବେଡା ବରୁନ୍ ସିଲଡ୍ ପଲ୍ଲନାୟ୍ ତି ଆକୋଣ୍ତାୟ୍ ଇୟଲାୟ୍ ଗିଜେ, ଆନିନ୍ ଡିୟ୍ତେ ଇୟ୍ଲାୟ୍ ବରାବେ ଡ ଈଶ୍ୱରନ୍ ଅଙ୍ଗା ଆରେଙ୍ ପଟାଲୋଙ୍ ଦଶବନାଞଞ୍ଜି ଇଡେନ୍ ଆନିନ୍ ତିଆତେ ସେଲ୍ଲେ ଅବ୍ଗୁଣ୍ତ୍ଏନ୍।
ତି ସିଲଡ ମୋଶାନ୍ ତି ଆକୋଂଣ୍ତାୟ୍ ସନୁମନ୍ ସମ୍ଲେ ଅବ୍ଗୁଣ୍ତଏନ୍, ଆରି ତି ଆଗୁଣ୍ତ ଅସୋୟ୍ ଡାଆଲୋଙନ୍ ସେଡେନ୍ ଡ ମନ୍ଡ୍ରାଞ୍ଜି ତି ଆଡାଆ ଆଗନାନ୍ ଆସନ୍ ତିୟେଞ୍ଜି। ଈଶ୍ୱରନ୍ ମନ୍ଡ୍ରାଞ୍ଜି ଆମଙ୍ ରୋଗାନ୍ ଆପ୍ପାୟ୍ଲାୟ୍ ଆରି ତି ଆରୋଗାଲୋଙ୍ ଗୋଗୋୟ୍ ମନ୍ଡ୍ରାନ୍ ରବୁଏଞ୍ଜି। ମୋଶାନ୍ ଅଙ୍ଗା ଆପର୍ତ୍ତମ୍ମୁନ୍ ଆପଟା ର୍ପାଲେନ୍ ତି ଆପାଲତ୍ତେଙନ୍ ଆରି ଅବୟ୍ ନୁଆ ଅରେଙ୍ ପଟାଲୋଙନ୍ ଦଶ ବନାଞନ୍ ଇଡେନ୍।
ତି ଆତିକ୍କି ଆନିନ୍ ଆରି ତି ଆବରୁ ଡାଜେନ୍ ଆରି ଈଶ୍ୱରନ୍ ଆମଙ୍, ମନ୍ଡ୍ରାଞ୍ଜି ଆଡଅଙ୍ ତନଡମ୍ମାଡନ୍ ଆତନିୟ୍ ଆସନ୍ ବେବ୍ବର୍ରନେ। ଈଶ୍ୱରନ୍ ମୋଶାନ୍ ଆବେବ୍ବର୍ନେ ଅମଡଙ୍ଲେ ତି ଆନିଞ୍ଜି ତନମ୍ମାଡନ୍ ତିୟେଞ୍ଜି। ମୋଶାନ୍ ବରୁନ୍ ସିଲଡ୍ ଆନୁଆ ଅରେଙ୍ ପଟାଲୋଙନ୍ ଦଶ ବନାଞନ୍ ବାତ୍ତେ ପଡଃଲନ୍ ୟର୍ରନାୟ୍। ତି ସିଲଡ୍ ଈଶ୍ୱରନ୍ ସିନୟ ଆବରୁ ସିଲଡ୍ ସନିବ୍ଡୟ୍ ଡେସାବାନ୍ ଇସ୍ରାଏଲବାଜି ଓରିଙେଞ୍ଜି।
ବାଇବଲଳୋଙନ୍ ଅବୟ୍ ଅନବ୍ଜଙ୍ବର୍: ଯାତ୍ରା ୧୯-୩୪
Free to use, adapt, and share under an open license (CC BY-SA 4.0).