14. ଆରିଙରିଙ୍ ଆସର୍ଲରେଙନ୍ ଆବୁଲ୍ଲେ
ଈଶ୍ୱରନ୍ ଇସ୍ରାଏୟଞ୍ଜି ଆଡଅଙ୍ ଅନୋକ୍କାନ୍ ତିୟେଞ୍ଜି, ଆନିନ୍ ଆନିଞ୍ଜି ବାତ୍ତେ ସିବଡୟ୍ ବର୍ରନ୍ ଡ ଆନିଞ୍ଜି ତେତ୍ତେଲୋଙ୍ ବଃପାଲପାଲ୍ ମନ୍ନାନେନ୍ ଆସନ୍ ଇସୁମେଞ୍ଜି, ବର୍ରନ୍ ସାଡେନ୍ କି ଆନିଞ୍ଜି ସୀନୟ ବର୍ରୁନ୍ ସିଲଡ୍ ଡୁଙଲନାଜି । ଈଶ୍ୱରନ୍ ଆନିଞ୍ଜି ସନିବଡେୟ୍ ଡେସାଗଡ୍ ଓରୋଙଲେ ପାଙେଞ୍ଜି, ଅଙ୍ଗା ଆଡେସା କିଣାନ୍ ଗାମେଞ୍ଜି । ମେଗନ୍ ଆକିନ୍ତାଲ୍ ଆମଙଗଡଃଞ୍ଜି କିଣାନ୍ ଗଡ୍ ଜିର୍ରେନ୍ ଡ ଆନିଞ୍ଜି ସନଡୋଙଲେ ପାଙେଞ୍ଜି ।
ଈଶ୍ୱରନ୍ ଅବ୍ରାହାମନ୍, ଇସାହାକନ୍ ଡ ଯାକୁବନ୍ ଆଡଅଙ୍ ସିବଡୟ୍ବର୍ରନ, ଡ ଆନିନ୍ ସନିବଡୟ୍ ଡେସାନ୍ ଆକେଜ୍ଜାମରଞ୍ଜି ତିୟତେ, ବନ୍ଡ ନମି ତି ଆଡେସାଲୋଙ ଗୋଗୋୟ ରୁକ୍କୁ ମନ୍ଡ୍ରାଞ୍ଜି ଡକୋଲଞ୍ଜି । ଆନିଞ୍ଜି କିଣାନିୟ୍ ଗାମେଞ୍ଜି । କିଣାନିୟଞ୍ଜି ଈଶ୍ୱରନ୍ ଅପ୍ପୁର୍ରଜି ଡ ଆବନାଞନ୍ ଅମ୍ମାନେଲୋଜି । ଆନିଞ୍ଜି ସନୁମଞ୍ଜି ଆଡଅଙ୍ ପୁରେଞ୍ଜି ଡ ଗୋଗୋୟ୍ ଇର୍ସେଲୁମନ୍ ଲୁମେଞ୍ଜି ।
ଈଶ୍ୱରନ୍ ଇସ୍ରାଏଲୀୟଞ୍ଜି ଆଡଅଙ୍ ବରେଞ୍ଜି, “ସନିବଡେୟ୍ ଡେସାଲୋଙନ୍ ଆମ୍ୱେଏଞ୍ଜି ଅଡକୋନ୍ବେନ୍ କିଣାନୀୟଞ୍ଜି ଆମଙ୍ ସିଲଡ୍ ଅନମେଙନ୍ ଡନେନ୍ ଡେତ୍ତେ । ଆନିଞ୍ଜି ବାତ୍ତେ ମାୟନେନ୍ ଏଡ୍ଡେଏ ଡ ଆନିଞ୍ଜି ବାତ୍ତେ ଏଞାଙବୟ ଡଙ୍ନେ । ଆମ୍ୱେଞ୍ଜି ଆସନୁମଞ୍ଜି ମେର୍ରନ୍ ଅମ୍ମୋସାବା । ଆରି ଆମ୍ୱେଞ୍ଜି ବନାୟ୍ଞେନ୍ ଏମ୍ମାନେଲେ ଡେନ୍, ପାଲତେଙଞେନ୍ ଆସନୁମଞ୍ଜି ଏପୁର୍ଡଙେ ।”
ଇସ୍ରାୟେଲିୟଞ୍ଜି ଏଙ୍ଗାଲେ କିଣାନୀୟନ୍ ଆସଣ୍ତି ତୁଙେଞ୍ଜି, ତାଡିଃତ୍ ମୋଶାନ୍ ଅଡକୋ କେଜ୍ଜାଲୋଙ ଅବୟନ୍ନେ ଅବୟନ୍ନେ ଏମ୍ମେଲେ ବାରଟା ଓବ୍ବାମର୍ରନ୍ ବାସେଏନ୍ । ଆନିନ୍ ତି ଆମନ୍ଡ୍ରାଜି ତି ଆଡେସା ଏଙ୍ଗାଗୋ ତିଆଗନିୟ୍ ଆସନ୍ ସଲନ୍ ଗିୟଲେ ଜନୁରନ୍ ଆସନ୍ ବର୍ରେଞ୍ଜି । କିଣାନୀୟଞ୍ଜି ବୋର୍ସାଜି ଅଡେ ଇଜ୍ଜାଡମଜି ତି ଆତ୍ତେ ଗନିଜନ୍ ଆସନ୍ ଆନିଞ୍ଜି ଆଡଅଙ୍ ବନରନ୍ ଡେଲୋ ।
ତି ଆବାରଜନ ମଡ୍ରାଞ୍ଜି ସମ୍ପରାନ୍ କିଣାନ୍ ଡେସାନ୍ ବାଗୁ ଡିନ୍ନା ବୁଲ୍ଲେଲେ ୟର୍ରନାଜି । ଆନିଞ୍ଜି ମନ୍ଡ୍ରାଞ୍ଜି ଲାବରେଜି, “ତି ଆଡେସା ଆଲବ୍ ଗୋଗୋୟ୍ ଜେଲଜେଲ୍ ଡ ତେତ୍ତେ ଗୋଗୋୟ୍ ଅଜନ ଅଜତେ !” ବନ୍ଡ ତି ଆଗନିୟଗିୟ୍ ମର୍ଜିଲୋଙ୍ ଦଶଜନ ବର୍ରଞ୍ଜି, “ତେତ୍ତେ ଆଗଡାଜି ଗୋଗୋୟ୍ ରଡୋଡମ୍ ଡ ତେତ୍ତେ ଆମନ୍ଡ୍ରାଜି ଗୋଗୋୟ୍ ସୋରାଡାଡମଜି । ଇନଲେନ୍ ଆନିଞ୍ଜି ଆଡଅଙ୍ ଇୟ୍ଲେ ସୁବୋଜି ଡେନ୍, ଆନିଞ୍ଜି ଇନଲେନ୍ ଅବ୍ବାରେଲେ ରବ୍ବୁଲଙତଙଞ୍ଜି !”
ଅବତାଡନ୍ ଆନ୍ନା ବାଗୁଜନ ଗନିୟ ମର୍ରଞ୍ଜି କାଲେବନ୍ ଡ ଯହୋଶୂୟନ୍ ଗାମେଞ୍ଜି, “କେନ ଆତେ ଆଜାଡିନ୍, ଡ କିଣାନନ୍ ଆମଡ୍ରାଜି ଡେଙ୍ଗାରା ଡ ବୋର୍ସା ଡକୋଜି, ବନ୍ଡ ଇନଲେନ୍ ଆନିଞ୍ଜି ଅବ୍ବାରେଲେ ରପ୍ତିତବୋଜି ! ଈଶ୍ୱରନ୍ ଅମଙ୍ ଗଡଲେନ୍ ସୁତନ୍ନେ ।”
ବନ୍ଡ ମନ୍ଡ୍ରାଞ୍ଜି କାଲେବନ୍ ଡ ଯିହୋଶୂୟନ୍ ଆବରର୍ନେ ଅନମ୍ଡଙ୍ଲଜି । ଆନିଞ୍ଜି ମୋଶାନ୍ ଡ ହାରୋଣନ୍ ଆଡଅଙ୍ ବର୍ରାବଲେ ବର୍ରେଞ୍ଜି, “ଆମ୍ୱେନ ଇନି ଆସନ୍ ଇନ୍ଲେଞ୍ଜି ଏନେଗୋ ଆବରନ୍ତଙ୍ ଆଜାଗା ଓରୋଙ୍ଲଲେନ୍? ଇନ୍ଲେନ୍ ସନୁ ଜାଗାଲୋଙନ୍ ଆରନବ୍ବୁ ସିଲଡ୍ ମିସରଲୋଙନ୍ ଡନକୋନେ ଡକୋଏନ୍ ଡ ଡୁକ୍ରୀଲେଞ୍ଜି ଡ ପସିଲେଞ୍ଜି କମ୍ୱାରୀ ବନ୍ ଡକୋତଞ୍ଜି ।” ମନ୍ଡ୍ରାଞ୍ଜି ଆନିଞ୍ଜି ଆସନ୍ ଅବୟ୍ ଆନ୍ନା ଆସୋଡା ମରନ୍ ବନାସ୍ସେନ୍ ଆସନ୍ ଇସୁମେଞ୍ଜି ଆନା ଆନିଞ୍ଜି ଆଡଅଙ୍ ଆରି ମିସରନ୍ ଓରୋଙତଜି ।
ଈଶ୍ୱରନ୍ ଗୋଗୋୟ୍ ବର୍ରାବେନ୍ ଡ ରୁକ୍କୁନେସିଙନ୍ ଜିର୍ରାୟ୍ । ଈଶ୍ୱରନ୍ ଗାମେନ୍, “ଆମ୍ୱେଞ୍ଜି ସଙ୍ଗତାଲୋଙେନ୍ ଏଡଙ୍ବର୍ରନ୍, ତି ଆସନ୍ ଅଡକୋ ମଡ୍ରାଞ୍ଜି ଆରିଙ୍ରିଙ୍ ଲୋଙନ୍ ଆଡମର୍ ଅନ୍ତମ୍ ଏବୁଲ୍ଲେତେ । ଯିହୋଶୂୟନ୍ ଡ କାଲେବନ୍ ଅମ୍ରେଙ୍ଲେ ବକୁଡ୍ଡି ସିଲଡ୍ ଗୋଗୋୟ୍ ବର୍ଷେଙ ଅଡକୋବେନ୍ ରବ୍ବୁତବେନ୍ ଡ ଆନିଞ୍ଜି ସନିବଡେୟ୍ ଡେସାନ୍ ଜିର୍ରେ ଏରପ୍ତିଏ ।”
ମନ୍ଡ୍ରାଞ୍ଜି ଏଙ୍ଗାଲେ କେନ୍ ଆତେ ଅମ୍ଡଙେଞ୍ଜି, ତାଡିନ୍ ଆନିଞ୍ଜି ଇର୍ସେନ୍ ଲୁମେଞ୍ଜି ତି ଆସନ୍ ଡୁକ୍କଲଞ୍ଜି, ଆନିଞ୍ଜି ଆକଡ଼ିବଞ୍ଜି ପାଙଲେ କିଣାନଲୋଙନ୍ ଡକୋନ୍ ଆମଡ୍ରାଜି ସନୁନ୍ ଡୁଙଲଞ୍ଜି । ମୋଶାନ୍ ଆନିଞ୍ଜି ଆଡଅଙ୍ ଅନିୟନ୍ ଆସନ୍ ଆଲ୍ଲେଏନ୍ ଇନି ଆସନ୍ ଗାମେଣ୍ତେନ୍ ଈଶ୍ୱରନ୍ ଆନିଞ୍ଜି ବାତ୍ତେ ଅଡକୋଲନେ, ବନ୍ଡ ଆନିଞ୍ଜି ଆବର୍ରନେନ୍ ଅନମ୍ଡଙ୍ଲଜି ।
ଈଶ୍ୱରନ୍ ସୁସୁନେ ଜାଗାନ୍ ଆନିଞ୍ଜି ବାତ୍ତେ ଅନ୍ନିୟ୍ଲୋ, ତି ଆସନ୍ ଆନିଞ୍ଜି ଆରେଏଞ୍ଜି ଡ ଆନିଞ୍ଜିଲୋଙ ଗୋଗୋୟନେ ରବ୍ବୁଏଞ୍ଜି । ତି ସିଲଡ୍ ଇସ୍ରାୟେଲୀୟଞ୍ଜି କିଣାନନ୍ ସିଲଡ୍ ସବଡିଲନ୍ ଅରୁଙ୍ରୁଙ୍ରେଙନ୍ ବାକ୍କୁଡି ବର୍ଷେଙ ବୁଲେଲେ ଡକୋଲଞ୍ଜି ।
ଇସ୍ରାୟେଲୀୟଞ୍ଜି ଆରିଙ୍ରିଙ୍ ରେଙନ୍ ବୁଲ୍ଲେ ଡାଲେ ବାକ୍କିଡି ବର୍ଷେଙ୍ ଆବେଳା ଈଶ୍ୱରନ୍ ଆନିଞ୍ଜି ଅଡକୋନ୍ ଆସନାୟସାଜଞ୍ଜି ତିୟେଞ୍ଜି। ଆନିନ୍ “ମାନ୍ନାନ୍” ଆଞୁମ୍ଲୋଙ ଜନାନ୍ ଅବୟ୍ ରୁଆଙ୍ ଜନୋମନ୍ ତିୟେଞ୍ଜି । ଆରି ଆନିନ୍ ଆନିଞ୍ଜି ଆଡ଼୍ରକୋନେ ରେଙଞ୍ଜି ଅନ୍ତିଡନ୍ ଆପ୍ପାୟେନ୍ ( ଅଙ୍ଗା ଆତେ ତରବ ଜଙ୍ନେନ୍ ଆଅନ୍ତିଜି ଡକୋଏନ୍) ଏଙ୍ଗାଲେ ଆନିଞ୍ଜି ଜନୋମନ୍ ଆସନ୍ ଜେଲୁନ୍ ଞାଙଲେରପ୍ତିତଜି । ତି ଆଡିନ୍ନାରେଙ, ଈଶ୍ୱରନ୍ ଆଜନିଜିସିଡ୍ରିଞ୍ଜି ଡ ସିପଲିଞ୍ଜି ଅନମ୍ମୋସାଲଜି ।
ଈଶ୍ୱରନ୍ ଏନେଲେ ଅବ୍ସାନ୍ନିୟାଲେ ଆନିଞ୍ଜି ଡାଆନ୍ ତିୟେଞ୍ଜି । ବନ୍ଡ କେନ୍ ଅଡକୋନ୍ ଆଲନୁମ୍ ବାତ୍ତେ ନିୟ୍, ଇସ୍ରାୟେଲୀୟଞ୍ଜି ଈଶ୍ୱରନ୍ ଡ ମୋଶାନ୍ ଆସଙ୍ଗତାଲୋଙ ଡଙବର୍ରଞ୍ଜି ଆଇୟ୍ୟମ୍ ବୁଡ୍ଡିଞ୍ଜି ବର୍ରଞ୍ଜି । ଏନେଲେ ଡେଲୋ ଜାୟଡେନ୍, ଈଶ୍ୱରନ୍ ଅବ୍ରାହାମ୍, ଇସାକନ୍ ଡ ଯାକୁବନ୍ ବାତ୍ତେ ଆଡରକ୍କୋଏନ୍ ଆସିବଡେୟ୍ ବର୍ରଲୋଙ ଡର୍ରନ ଡକୋଲନେ ।
ଆନ୍ନା ଆଡିନ୍ନା, ମନ୍ଡ୍ରାଞ୍ଜି ଏଙ୍ଗାଲେ ଡାଆନ୍ ଅଞାଙ୍ଲଜି, ଈଶ୍ୱରନ୍ ମୋଶାନ୍ ବରେନ୍, “ତି ଆରେଙ୍ ବର୍ନେନ୍ ବରା ଡ ତେତ୍ତେ ସିଲଡ୍ ଡାଆନ୍ ଡୁଙତନାୟ ।” ବନ୍ଡ ମୋଶାନ୍ ଅରେଙନ୍ ବନରନ୍ ଆପାଲତେଙ୍ ବାଗୁତର ଡାଙ୍ଗୋନ୍ ବାତ୍ତେ ଆସ୍ରମେନ୍ ଆନିନ୍ ଅଡକୋ ମନ୍ଡ୍ରାଞ୍ଜି ଲୋଙ ଈଶ୍ୱରନ୍ ଆବନାୟ୍ ଅମ୍ମାନେଲୋ । ଅଡକୋଞ୍ଜି ଏଙ୍ଗାଲେ ଡାଆନ୍ ଗାଲେ ରପ୍ତିତଜି ତି ଆସନ୍ ଡାଆନ୍ ଡୁଙଲନାୟ୍, ବନ୍ଡ ଈଶ୍ୱରନ୍ ମୋଶାନ୍ ଆଉପ୍ରେଙ ବରାବେନ୍ ଡ ଆନିନ୍ ଗାମେନ୍, “ଆମନ୍ ସନିବଡେୟ୍ ଡେସାନ୍ ଗନଲ୍ଲେଅର୍ରପ୍ତିଏ।”
ଇସ୍ରାୟେଲୀୟଞ୍ଜି ବାକ୍କୁଡି ବର୍ଷେଙ୍ ଆରିଙ୍ରିଙ୍ ରେଙନ୍ ବୁଲେଏଞ୍ଜି କି, ଈଶ୍ୱରନ୍ ସଙ୍ଗତାଲେ ଡିଅଙମଡ୍ରା ଡଙବର୍ରଞ୍ଜି, ଅଡକୋଞ୍ଜି ରବ୍ବୁଏଞ୍ଜି । ତି ଆତିକ୍କି ଈଶ୍ୱରନ୍ ଆରି ସନିବଡେୟ୍ ଡେସାନ୍ ଆରିଙ୍ରିଙ୍ରେଙ ଆନିଞ୍ଜି ଓରୋଙେଞ୍ଜି । ମୋଶାନ୍ ନମି ଗୋଗୋୟ୍ ବୁଡ୍ଡାଏନ୍, ତି ଆସନ୍ ମନ୍ଡ୍ରାଞ୍ଜି ଆନୋରୋଙ୍ ଆସନ୍ ଆନିନ୍ ମନାୟନ୍ ଆସନ୍ ଯିହୋଶୂୟନ୍ ବାସେଏନ୍ । ଈଶ୍ୱରନ୍ ମୋଶାନ୍ ଆଡଅଙ୍ ଆରି ଅବୟ୍ ସିବଡୟଲନେ, ଆନିନ୍ ମୋଶାନ୍ ଅନ୍ତମ ଆରି ଅବୟ୍ ପୁର୍ବାତେଃବର୍ନେମରନ୍ ଆପ୍ପାୟତାୟ୍ ।
ତି ଆତିକ୍କି ଈଶ୍ୱରନ୍ ମୋଶାନ୍ ଅବୟ୍ ବରୁଲୋଙନ୍ ଡନାଜନ୍ ଆସନ୍ ବର୍ରେନ୍ ଏଙ୍ଗାଲେ ଆନିନ୍ ତେତ୍ତେ ସିଲଡ୍ ସନିବଡେୟ୍ ଡେସାନ୍ ଗିୟଲେ ରପ୍ତିତେ । ମୋଶାନ୍ ସନିବଡେୟ ଡେସାନ୍ ଗିୟଲେ ରପ୍ତିଏନ୍ ଡ ତେତ୍ତେ ଆଗନନ୍ନେ ଆସନ୍ ଈଶ୍ୱରନ୍ ଆନିନ୍ ଆବାଞଲୋ । ତି ଆତିକ୍କି ମୋଶାନ୍ ରବ୍ବୁଏନ୍, ଡ ଇସ୍ରାୟେଲୀୟଞ୍ଜି ତିରିଶଡିନ୍ନା ଆନିନ୍ ଆସନ୍ ୟେଲେ ଡକୋଲଞ୍ଜି। ଯିହୋଶୂୟନ୍ ଆନିଞ୍ଜି ଅବୟ୍ ନୁଆ ଡନେମର୍ ଡେଲୋ । ଯହୋଶୂୟନ୍ ଅବୟ୍ ମନଙ୍ ଡନେମର୍ ଡକୋଏନ୍ ଇନି ଆସନ୍ ଗାମେଣ୍ତେନ୍ ଆନିନ୍ ଈଶ୍ୱରନ୍ ଆମଙ୍ ଡର୍ରନ ଡକୋଲନେ ଡ ଆବନାଞନ୍ ମାନ୍ନେଲେ ଡକୋଲନେ ।
ବାଇବଲନ୍ ଅବୟ୍ ଅନବ୍ଜଙବର୍: ଯାତ୍ରା ୧୬-୧୭; ଗଣନା ୧୦-୧୪; ୨୦;୨୭, ଦ୍ୱିତୀୟ ବିବରଣ ୩୪
Free to use, adapt, and share under an open license (CC BY-SA 4.0).