15. ସନିବ୍ଡୟ୍ ଡେସାନ୍
ଆତନିକ୍କି ସନିବ୍ଡୟ୍ ଡେସାନ୍ କିଣାନଲୋଙ୍ ଈଶ୍ରାୟେନଞ୍ଜି ଆତନୁଙ୍ ଆସନ୍ ଅବୟ୍ ବେଳାନ୍ ଅଡୋଲାୟ୍ । ରଡୋ କିନ୍ତାଲ୍ ତାଲନ୍ ବାତ୍ତେ ଆଡଙ୍ ଡଙନ୍ କିଣାନଞ୍ଜି ଆଗଡା ଯିରିହୋ ଆବର୍ନେଜି ମନେଲନ୍ ଆସନ୍ ଯିହୋଶୟ ବାଗୁ ମନେଲ୍ ମରଞ୍ଜି ଆପ୍ପାୟେନ୍ । ତିଆଗଡାଲୋଙ୍ ରାହାବ ଗାମ୍ଲେ ଅବୟ୍ ଡାରିବଜନ୍ ଡକୋଏନ୍ । ଆନା ତି ଆମନେଲ୍ମର୍ଜି ଆଡଅଙ୍ ସଏଞ୍ଜି କି ତିକ୍କି ଆନିଞ୍ଜି ଅଜନା ଜନିରନ୍ ଆସନ୍ ମାୟେଞ୍ଜି। ଆନିନ୍ ଏନ୍ନେଲେ ଲୁମେନ୍, ଇନିଆସନ୍ ଗାମେଣ୍ତେନ୍ ଆନିନ୍ ଈଶ୍ୱରନ୍ ଆମଙ୍ ଡର୍ରନେ । ଆନିଞ୍ଜି ରାହାବନ୍ ଡ ଆକୁତ୍ତମ୍ମାଞ୍ଜି ଅନୁରନ୍ ତିୟ୍ତଜି । ଇଶ୍ରାୟେଲଞ୍ଜି ଆଙ୍ଗା ଯିରୀହୋ ଆଗଡା ଅବ୍ମୋସ୍ସାତଜି ଗାମ୍ଲେ କେନ୍ ଆତେ ସିବ୍ଡୟ୍ ବର୍ରଞ୍ଜି ।
ଈଶ୍ରାୟେଲଞ୍ଜି ସନିବ୍ଡୟ୍ ଡେସାନ୍ ଆତନୁଙ୍ ଆସନ୍ ଯର୍ଦ୍ଦନଅଲନ୍ ପନଡନ୍ ପଡେଏନ୍ । ଈଶ୍ୱରନ୍ ଯହୋଶୟନ୍ ଆଡଅଙ୍ ବରେନ, “ପୁର୍ପୁର୍ ମରଞ୍ଜି ଆପର୍ତ୍ତମ୍ମୁନ୍ ଜିରେତଜି ।” ପୁର୍ପୁର୍ ମରଞ୍ଜି ଏଙ୍ଗାଲେ ଯର୍ଦ୍ଦନ୍ଅଲନ୍ ଞାଡୁବେଞ୍ଜି, ତି ଆବେଡା ତୋଣ୍ତୋନ୍ ଡକୋନ୍ ଆଡାଆ ଆଃପନେ ରଏଏନ୍, ଏଙ୍ଗାଲେ ଈଶ୍ରାୟେଲଞ୍ଜି ଆସର୍ଲବଗଡନ୍ ତଞିୟ୍ ଲନ୍ ଯର୍ଦ୍ଦନ ଅଲନ୍ ପଡ୍ଲେ ରପ୍ତିତଜି ।
ମନଡ୍ରାଞ୍ଜି ଯର୍ଦ୍ଦନଅଲନ୍ ଆପରଡେଞ୍ଜି ଆତିକ୍କି, ବୋର୍ସାଡମନ୍ ଆଗଡା ଯିରିହୋ ଏଙ୍ଗାଲେ ସନୁନ୍ ଡେତେ ତି ଆତେ ଈଶ୍ୱରନ୍ ଯିହୋଶୟନ୍ ଆଡଅଙ୍ ବରେନ୍ । ମନଡ୍ରାଞ୍ଜି ଈଶ୍ୱରନ୍ ଆମନାନ୍ନେମର୍ ଡେଞ୍ଜି । ଈଶ୍ୱରନ୍ ଏଙ୍ଗାଲେ ବର୍ରନ, ତି ଅନ୍ତମ୍ ସିପାଇଞ୍ଜି ଡ ପୁର୍ପୁର୍ ମରଞ୍ଜି ବମିୟତ୍ତାନ୍ ବତର କେନ୍ ଅନ୍ତମ୍ ତୁଡ୍ରୁ ଡିନ୍ନା ଯରିହୋ ଆଗଡା ଏର୍ରେ ବୁଲ୍ଲେଏଞ୍ଜି ।
ତି ଆତିକ୍କି ବପାଲ୍ଲିଲୋଙ୍ ଈଶ୍ରାୟେଲିୟଞ୍ଜି ସାତ୍ବେଡା ବୁଲ୍ଲେଏଞ୍ଜି । ଆନିଞ୍ଜି ଗଡାନ୍ ଉଞ୍ଜିମନେଙନ୍ ଆତନିକ୍କି ଆସନ୍ ବୁଲେଏଞ୍ଜି,ତିଆଡିତ୍ ସିପାଇଞ୍ଜି ବାବ୍ବାବେଞ୍ଜି ଆରି ପୁର୍ପୁର୍ ମରଞ୍ଜି ଆପନେଡଞ୍ଜି ପେଡେଞ୍ଜି ।
ତି ଆଡିତ୍ ଯିରୀହୋ ଆକିନ୍ତତାଲ୍ ଜି ଗୋଙ୍ଲେ ଜିରେନ୍ ! ଈଶ୍ୱରନ୍ ଆବନାଞ୍ ଅନ୍ତମ୍ ଈଶ୍ରାୟେଲବାଜି ଗଡାଲୋଙନ୍ ଡକୋନ୍ ଅଡକୋନ୍ ଆଜନବ୍ ଅମ୍ମୋସ୍ସାଏଞ୍ଜି । ଆନିଞ୍ଜି ରାହାବନ୍ ଡ ତି ଆକୁତ୍ତମ୍ମାଜିତୁମ୍ ଇନ୍ନିଙ୍ ଅନ୍ନେଙ୍ଗାଲଜି । ଆନାଜି ଈଶ୍ରାୟେଲଗଡ୍ ଡେଏଞ୍ଜି । କିଣାନଲୋଙ୍ ଆଡରକୋତଞ୍ଜି ଲାଙ୍ଲେଡ୍ ଆନ୍ନା ଆମନଡ୍ରାଜି ଏଙ୍ଗାଲେ ଅମ୍ଡଙେଞ୍ଜି ଡ ଈଶ୍ରାୟେଲବାଜି ଯିରିହୋଗଡାନ୍ ଅବ୍ମୋସ୍ସାଏଞ୍ଜି,ଆନିଞ୍ଜି ବତଙେଞ୍ଜି ଡ ଇଶ୍ରାୟେଲବାଜି ଆନିଞ୍ଜି ନିୟ୍ ସୁତଜି ।
କିଣାନଲୋଙ୍ ଅନ୍ନିଙ୍ ଆମନଡ୍ରାଜି ସରିନ୍ ସୟୁସନିବଡଜନ୍ ଏତୁବ୍ଡଙ୍ ଗାମ୍ଲେ ଈଶ୍ୱରନ୍ ଈଶ୍ରାୟେଲିୟଞ୍ଜି ଆଡଅଙ୍ ବନାଞନ୍ ତିୟେଞ୍ଜି । ବନ୍ଡ ଗିଦିୟୋନ୍ ଗାମ୍ଲେ ଅବୟ୍ କିଣାନିୟ ଆମନଡ୍ରାଜି ଯିହୋଶୟନ୍ ଆଡଅଙ୍ କଣ୍ତାୟ୍ଲେ ବରେନ୍ ଡ ଆନିଞ୍ଜି ଗୋଗୋୟ୍ ସଙାୟ୍ ଲୋଙ୍ ଡକୋନ୍ ଅବୟ୍ ଡରକୋନେଲୋଙନ୍ ସିଲଡ୍ ଜିର୍ରାଜି । ଆନିଞ୍ଜି ଯିହୋଶୟନ୍ ଆଡଅଙ୍ ଆନିଞ୍ଜି ସରିନ୍ ଅବୟ୍ ସୟୁସନିବଡୟ୍ ତନୁବନ୍ ଆସନ୍ ବରେନ୍ ।
ଗିବିୟୋନବାଜି ଅଙ୍ଗାଲୋଙ୍ ସିଲଡ୍ ଜିର୍ରାଜି ତି ଆତେ ଯିହୋଶୟନ୍ ଡ ଈଶ୍ରାୟେଲ ଆମନଡ୍ରାଜି ଈଶ୍ୱରନ୍ ଆଡଅଙ୍ ଅନବ୍ପୁଂ ଲଜି । ତି ଆସନ୍ ଯିହୋଶୟନ୍ ତି ଆନିଞ୍ଜି ସରିନ୍ ଅବୟ୍ ସୟୁସନିବଡଜନ୍ ତୁବେନ୍ । ଗିବିୟୋନିୟବାଜି ଆନିଞ୍ଜି ଆଡଅଙ୍ କଣ୍ତାୟ୍ଲଲେଞ୍ଜି ଗାମ୍ଲେ ଇଶ୍ରାୟେଲିୟଞ୍ଜି ଏଙ୍ଗାଲେ ଜନାଏଞ୍ଜି ଆନିଞ୍ଜି ବରାବେଞ୍ଜି,ବନ୍ଡ ଆନିଞ୍ଜି ଆନଞ୍ଜି ସରିନ୍ ଆତରୁବେଞ୍ଜି ସୟୁସନିବଡଜନ୍ ଡକ୍କୋଏଞ୍ଜି ଇନି ଆସନ୍ ଗାମେଣ୍ତେନ୍ କେନ୍ ଆତେ ଈଶ୍ୱରନ୍ ଆସନିବଡୟ୍ ଡକୋଏନ୍ । ଅସୋୟ୍ ଡିନ୍ନା ଆତିକ୍କି, କିଣାନଲୋଙ୍ ଡକୋନ୍ ଅମୋରିୟ ଆଞୁମ୍ ଅବୟ୍ ରାଜାଞ୍ଜି ଅମ୍ଡଙେଞ୍ଜି ଡ ଆନିଞ୍ଜି ଇଶ୍ରାୟେଲିୟଞ୍ଜି ସରିନ୍ ଅବୟ୍ ସୟୁସନିବଡଜନ୍ ତୁବେଞ୍ଜି, ତି ଆସନ୍ ଆନିଞ୍ଜି ତି ଆସିପାଇଞ୍ଜି ରୁକ୍କୁଏଡାଲେ ଗୋଗୋୟ୍ ସିପାଇନ୍ ଏମ୍ମେଲେ ଗିବିୟୋନବାଜି ଆଡଅଙ୍ ସୁଏଞ୍ଜି । ଗିବିୟୋନିୟବାଜି ଯିହୋଶୟନ୍ ଆମଙ୍ ମାୟ୍ନେନ୍ ଆସନ୍ ଅବୟ୍ କବରନ୍ ଆପ୍ପାୟେଞ୍ଜି ।
ତି ଆସନ ଯିହୋଶୟନ୍ ଈଶ୍ରାୟେଲ ଆସିପାଇଜି ଆଡଅଙ୍ ରୁକ୍କୁଏନ୍ ଗିବିୟୋନିୟବାଜି ଆମଙ୍ ତନୁଙନ୍ ଆସନ୍ ତମ୍ଫଗଲ୍ ତଞିୟ୍ ଲଞ୍ଜି । ଡୋତାଡାଲେ ଆନିଞ୍ଜି ଅମୋରିୟ ଆସିପାଇଜି ଆଡଅଙ୍ ଅକ୍କାବ୍ବାଲେ ଆନିଞ୍ଜି ସୁଏଞ୍ଜି ।
ଇଶ୍ୱରନ୍ ତି ଆଡିନ୍ନା ଈଶ୍ରାୟେଲିୟବାଜି ଡନେଲେ ସୁଏନ୍ । ଆନିନ୍ ଅମୋରିୟ ଆସିପାଇଜି ଆଡଅଙ୍ ଅକ୍କାବ୍ବାଏଞ୍ଜି ଡ ଆଳେରନ୍ ଆପ୍ପାୟ୍ଲାୟ୍ ଅଙ୍ଗା ଆତେ ଗୋଗୋୟ୍ ଅମୋରିୟଞ୍ଜି ଆପ୍ରାନ୍ନା ପାଙେନ୍ ।
ଈଶ୍ୱରନ୍ ରୁଆଙ୍ଲୋଙନ୍ ଓୟୋଙନ୍ ଅବୟ୍ଗଡ୍ ଡକ୍କୋଏନ୍ ଏଙ୍ଗାଲେ ଇଶ୍ରାୟେଲନ୍ ଗୋଗୋୟ୍ ବେଡାଜାୟ୍ ଅମୋରିୟଞ୍ଜି ମେଡ୍ରନ୍ ଅବ୍ନାରେତଜି । ତି ଆଡିନ୍ନା ଈଶ୍ୱରନ୍ ଈଶ୍ରାୟେଲଞ୍ଜି ଆସନ୍ ଅବୟ୍ ସୋଡା ଜନିନୟ୍ ଞାଙେଞ୍ଜି।
ଈଶ୍ୱରନ୍ କେନ୍ ଅଡକୋନ୍ ସିପାଇଞ୍ଜି ଅବ୍ନାରେଏନ,ଆରି ଗୋଗୋୟ୍ କିଣାନିୟମରଞ୍ଜି ଈଶ୍ରାୟେଲଞ୍ଜି ଆଡଅଙ୍ ଆସନୁ ଆସନ୍ ରୁକ୍କୁଲଞ୍ଜି । ଯିହୋଶୟନ୍ ଡ ଇଶ୍ରାୟେଲିୟଞ୍ଜି ଆନିଞ୍ଜି ଆଡଅଙ୍ ସୁଏଞ୍ଜି ଡ ଅମ୍ମୋସ୍ସାଏଞ୍ଜି ।
କେନ୍ ଆସନୁ ଆତିକ୍କି,ଈଶ୍ୱରନ୍ ଈଶ୍ରାୟେଲଞ୍ଜି ଅଡକୋନ୍ ଆକେଜ୍ଜା ସନିବ୍ଡୟ୍ ଡେସାନ୍ ରମ୍ମଙ୍ ବନ୍ତା ଏମ୍ମେଲେ ତିୟେଞ୍ଜି । କେନ୍ ଆତିକ୍କି ଈଶ୍ୱରନ୍ ଈଶ୍ରାୟେଲନ୍ ଆସଣ୍ତିଲୋଙ୍ ଡକୋନ୍ ଅଡକୋନ୍ ଆଡେସା ସରିନ୍ ସନୟୁନ୍ ତିୟେଞ୍ଜି ।
ଯିହୋଶୟନ୍ ବୁଡାଏନ୍,ଆନିନ୍ ଈଶ୍ରାୟେଲନ୍ ଅଡକୋ ମନ୍ଡ୍ରାଞ୍ଜି ଆଡଅଙ୍ ରୁକ୍କୁଏନ୍ । ତି ସିଲଡ୍ ଈଶ୍ୱରନ୍ ଈଶ୍ରାୟେଲିୟଞ୍ଜି ସରିନ୍ ସିନୟ ଆବରୁଲୋଙ୍ ଅଙ୍ଗା ଆନୋକ୍କା ତୁବେନ୍ ତି ଆନୋକ୍କାଲୋଙ୍ ମନ୍ଡ୍ରାଞ୍ଜି ଆଡଅଙ୍ ଅବ୍ନିୟ୍ୟମେଞ୍ଜି । ମନ୍ଡ୍ରାଞ୍ଜି ଈଶ୍ୱରନ୍ ସରିନ୍ ଡର୍ରନ୍ ଡକୋନେନ୍ ଡ ତି ଆନୋକ୍କାଜି ମନାନ୍ନେନ୍ ଆସନ୍ ସିବ୍ଡୟ୍ବର୍ରଞ୍ଜି ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍: ଯିହୋଶୟ ୧-୨୪
Free to use, adapt, and share under an open license (CC BY-SA 4.0).