16. ଅନବ୍ମେଙମରଞ୍ଜି
ଯିହୋଶୟନ୍ ରବ୍ବୁଏନ୍ କି, ଇସ୍ରାଏଲମରଞ୍ଜି ଈଶ୍ୱରନ୍ ଆବନାୟ୍ ଅମ୍ମାନେଲୋଜି ଆରି ଆନିଞ୍ଜି ଲାଙଲେଡ୍ କିଣାନୀୟଞ୍ଜି ଅନମ୍ଡୁଙଲଜି ଆରି ଈଶ୍ୱରନ୍ ଆନୋକ୍କା ଅମ୍ମାନେଲଜି । ଇସ୍ରାଏଲିୟଞ୍ଜି ଆଜାଡି ଈଶ୍ୱରନ୍ ଯିହୋବାନ୍ ଆଡଅଙ୍ ଏର୍ରପନୁରନ୍ କିଣାନିୟଞ୍ଜି ଆକୋଣ୍ତାୟ୍ସୁମଞ୍ଜି ପୁରେଞ୍ଜି । ଇସ୍ରାଏଲିୟଞ୍ଜି ଆମଙ୍ ରାଜାନ୍ ଅବୟତଡ୍ ଡକୋଏନ୍, ତିଆସନ୍ ଅଡକୋଞ୍ଜି ଆଗନିୟ୍ଗିୟ୍ଲୋଙନ୍ ଇନି ମନଙ୍ ଗିୟତାଏନ୍ ଆନିଞ୍ଜି ତିଆତେ ଲୁମେଞ୍ଜି ।
ଇନି ଆସନ୍ ଇସ୍ରାଏଲିୟଞ୍ଜି ଈଶ୍ୱରନ୍ ଆବନାୟ୍ ଅମ୍ମାନେଲଜି, ତି ଆସନ୍ ଈଶ୍ୱରନ୍ ଆବନେରାମରଞ୍ଜି ଆସିଲୋଙ୍ ଅବ୍ବାରେଲେ ପନରଡନ୍ ତିୟେଞ୍ଜି । କେନ୍ ଆବନେରାମର୍ଜି ଇସ୍ରାଏଲୀୟଞ୍ଜି ଗୋଗୋୟ୍ ଆବିତ୍ତିନଞ୍ଜି ରାଉଲଞ୍ଜି, ଆବିତ୍ତିଞ୍ଜି ଅବ୍ମୋସାଏଞ୍ଜି ଆରି ଆନିଞ୍ଜି ଲୋଙ୍ ଗୋଗୋୟ୍ନେ ସମ୍ୱବେଞ୍ଜି । ଗୋଗୋୟ୍ ବର୍ଷେଙ୍ ଈଶ୍ୱରନ୍ ଏରମନ୍ନାନେନ୍ ଡ ଆବନେରାମରଞ୍ଜି ଲୋଙ ତକର୍ରେ ଇସ୍ରାଏଲୀୟଞ୍ଜି ଆବ୍ଡିଡ୍ ବୁଡ୍ଡିଲଞ୍ଜି ଡ ଆନିଞ୍ଜି ଆନମ୍ମେଙ୍ ଆସନ୍ ଈଶ୍ୱରନ୍ ଆମଙ୍ ବେର୍ବ୍ବରନେଜି ।
ତି ଆତିକ୍କି ଈଶ୍ୱରନ୍ ଆନଞ୍ଜି ଆସନ୍ ଅବୟ୍ ଅନମ୍ମେଙ୍ମରନ୍ ତିୟେଞ୍ଜି ଆନା ଆନିଞ୍ଜି ଆଡଅଙ୍ ଆବନେରାମର୍ଞ୍ଜି ଆମଙ୍ ସିଲଡ୍ ଅବ୍ମେଙଞ୍ଜି ଆରି ଡେସାନ୍ ସନୟୁନ୍ ପାଙଲାୟ୍ । ବନ୍ଡ ତି ଆତିକ୍କି ମନ୍ଡ୍ରାଞ୍ଜି ଇଶ୍ୱରନ୍ ଆଡଅଙ୍ କରୋଡାଏଞ୍ଜି ଆରି କୋଣ୍ତାୟ୍ସନୁମନ୍ ପୁରନ୍ ଉଲ୍ଞ୍ଜି । ତି ଆସନ୍ ଈଶ୍ୱରନ୍ ଆତୁୟାଃ ଅବୟ୍ ବନେରା ମିଦିୟୋନୀୟଞ୍ଜି ଆସିଲୋଙ୍ ଆନିଞ୍ଜି ଅବ୍ବାରେଏଞ୍ଜି ।
ମିଦିୟୋନୀୟଞ୍ଜି ସାତବର୍ଷେଙ୍ ଜାୟ୍ ଇସ୍ରାଏଲୀୟଞ୍ଜି ଆଜନଡ୍ରୋମ୍ ପାଙେଞ୍ଜି । ଇସ୍ରାଏଲୀୟଞ୍ଜି ଗୋଗୋୟ୍ ବତଙେଞ୍ଜି; ମିଦିୟୋନୀୟଞ୍ଜି ଏଙ୍ଗାଲେ ଆନିଞ୍ଜି ସାୟ୍ଲେ ଅରପ୍ତିଏଜି, ତି ଆସନ୍ ଆନିଞ୍ଜି କିଣ୍ତ୍ରେଙ୍ ପୁତ୍ତସିଂ ରେଙନ୍ ସଲଞ୍ଜି । ଆତନିକି, ଆନିଞ୍ଜି ଆନମେଙ୍ ଆସନ୍ ଆନିଞ୍ଜି ଈଶ୍ୱରନ୍ ଆମଙ୍ ଓଡେବର୍ରଞ୍ଜି ।
ବଡିନ୍ନା, ଗିଦିୟୋନ୍ ଆଞୁମ୍ନର୍ ଅବୟ୍ ଇସ୍ରାଏଲୀୟ ସଲନ୍ ଅବ୍ଞାଲନେ ଏଙ୍ଗାଲେ ମିଦିୟୋନୀୟଞ୍ଜି ତି ଆତେ ପାଙ୍ଲେ ଅରପ୍ତିଏଜି । ଅଡକୋଡିନ୍ନାନ୍ ଆପ୍ରବୁ ଆକବରପାଙମରନ୍ ଗିଦିୟୋନନ୍ ଆମଙ୍ ଇୟ୍ଲ୍ଲେ ଇୟ୍ଲାୟବର୍ରେ “ବୋର୍ସାସୁନେମର୍, ଈଶ୍ୱରନ୍ ଆମନ୍ ବାତ୍ତେ ଡକୋ । ଜିରା ଆରି ଇସ୍ରାଏଲୀୟଞ୍ଜି ଆଡଅଙ୍ ମିଦିୟୋନୀୟଞ୍ଜି ଆସିଲୋଙ୍ ସିଲଡ୍ ଅବ୍ନୁରାଃ ।”
ଅବୟ୍ କୋଣ୍ତାୟସନୁମନ୍ ଅନମଙନ୍ ଆତନିୟ୍ ଆତନପ୍ପେଲ୍ ଗିଦିୟୋନନ୍ ଆବାପ୍ପା ଆମଙ୍ ଡକୋଏନ୍ । ତି ଆତନପ୍ପେଲ୍ ପଃନାଲନ୍ ଆସନ୍ ଈଶ୍ୱରନ୍ ଗିଦିୟୋନନ୍ ଆଡଅଙ୍ ବରେନ୍। ବନ୍ଡ ଗିଦିୟୋନନ୍ ମନ୍ଡ୍ରାଞ୍ଜି ଆଡଅଙ୍ ବତଙେନ୍, ତି ଆସନ୍ ଅରଙ୍ ତଗଲେନ୍ ଜାୟ୍ ଆନିନ୍ ଜଗେଏନ୍ । ତି ଆସନ୍ ଆନିନ୍ ତି ଆତନୁପ୍ପେଲ୍ ପାଲେନ୍ ଆରି ଅବ୍ଗୁଣ୍ତନ୍ । କୋଣ୍ତାୟ୍ସନୁମନ୍ ଆତଃନଡ୍ ଅଙ୍ଗା ଆତନୁପ୍ପେଲ୍ ଡକୋଏନ୍ ତେତ୍ତେ ଆନିନ୍ ଅବୟ୍ ଆନୁଆ ତନପ୍ପେଲନ୍ ତୁବେନ୍ ଆରି ଇଶ୍ୱରନ୍ ଆସନ୍ ଅନମେଙନ୍ ତିୟେନ୍ ।
ଆବାରତାନ୍ ଡୋତାନ୍ ମନ୍ଡ୍ରାଞ୍ଜି ଗିଜେଞ୍ଜି ଡ ଆନାଃତି ଅବୟ୍ନେ ତି ଆତନିପ୍ପେଲ୍ ପେଲ୍ଲେ ଡ ଲବ୍ଗଡ୍ଲେ ଅମ୍ମୋସାଏନ୍, ଆରି ଆନିଞ୍ଜି ଗୋଗୋୟ୍ ବର୍ରାବେଞ୍ଜି । ଆନିଞ୍ଜି ଗିଦିୟୋନନ୍ ଆସିଂ ଆନିନ୍ ଆସମ୍ୱବ୍ ଆସନ୍ ଇୟେଞ୍ଜି, ବନ୍ଡ ଗିଦିୟୋନନ୍ ଆବାପ୍ପା ଗାମେନ୍ “ଆମ୍ୱେଞ୍ଜି ଇନି ଆସନ୍ ସନୁମ୍ବେନ୍ ଆସନାୟୁମ୍ ଏସାୟ୍ତେ? ଆନିନ୍ ଈଶ୍ୱର ଡେନ୍, ଆନିନ୍ ଆନିନ୍ ଡମ୍ ଅମ୍ମେଙନେତୋ!” ଆନିନ୍ ତି ଆବର୍ନେ ଆବରନ୍ ମନ୍ଡ୍ରାଞ୍ଜି ଗିଦିୟୋନନ୍ ଅସମ୍ୱବ୍ଲଜି ।
ତି ଆତକ୍କି ମିଦିୟୋନୀୟଞ୍ଜି ଇସ୍ରାଏଲୀୟଞ୍ଜି ଆମଙ୍ ସିଲଡ୍ ରାଉନେନ୍ ଆସନ୍ ଆରି ଇୟ୍ଲାଜି । ଆନିଞ୍ଜି ସରିନ୍ ସନୁସୁନେନ୍ ଆସନ୍ ଗିଦିୟୋନନ୍ ଇସ୍ରାଏଲୀୟଞ୍ଜି ରୁକ୍କୁଏନ୍ । ଈଶ୍ୱରନ୍ ଇସ୍ରାଏଲୀୟଞ୍ଜି ଅନୁରନ୍ ତନିୟନ୍ ଆସନ୍ ଆନିନ୍ ଆଡଅଙ୍ ବାଞ୍ତେ, ତି ଆତେ ଅନବ୍ଜାଡିନେନ୍ ଆସନ୍ ଗିଦିୟୋନନ୍ ଈଶ୍ୱରନ୍ ଆମଙ୍ ସିଲଡ୍ ବାଗୁ ଅନମ୍ମଡନ୍ ବେଡେନ୍ ।
ଆପରତମୁନ୍ ଆଅମ୍ମଡନ୍ଲୋଙ, ଗିଦିୟୋନନ୍ ଲବନ୍ ଅବୟ୍ ମେଣ୍ତାନ୍ ଆଉସାଲ ବେଲେନ୍ ଆରି ଈଶ୍ୱରନ୍ ଆଡଅଙ୍ ଡୋତାନ୍ ଆଶିଶିରାଡାନ୍ ଲବଲୋଙନ୍ ଏରନବ୍ସେଡନ୍ ଆଉସାଲନ୍ ଆତୋଣ୍ତୋ ଅନବ୍ସେଡନ୍ ଆସନ୍ ବରେନ୍ । ଈଶ୍ୱରନ୍ ତି ଆତେ ଲୁମେନ୍ । ଆବର୍ତାନ୍ ଆତଗଲ୍, ଆନିନ୍ ଇଶ୍ୱରନ୍ ଆଡଅଙ୍ ଗାମେନ୍ ଲବଲୋଙନ୍ ତୁମ୍ ଆଡାଡା ଡକୋନେତେ । ବନ୍ଡ ଆଉସାଲନ୍ ଆସର୍ ଡକୋନେତୋ । ଈଶ୍ୱରନ୍ ତି ନିୟ୍ ଆତେ ଲୁମେନ୍ ।କେନ୍ ବାଗୁ ଅରମ୍ମଡ୍ଲୋଙନ୍ ଗିଦୟୋନନ୍ ଜନାଏନ୍ ଡ ଇସ୍ରାଏଲୀୟଞ୍ଜି ମିଦିୟୋନୀୟଞ୍ଜି ଆମଙ୍ ସିଲଡ୍ ଅନୁର୍ ତିୟନ୍ ଆସନ୍ ଈଶ୍ୱରନ୍ ଆନିନ୍ ବାଞ୍ତେ ।
୩୨,୦୦୦ ଇସ୍ରାଏଲୀୟ ସିପାଇଞ୍ଜି ଗିଦିୟୋନନ୍ ଆମଙ୍ ଜିର୍ରାଜି, ବନ୍ଡ ଈଶ୍ୱରନ୍ ଗାମେନ୍ କେନ୍ ଆତେ ଗୋଗୋୟ୍ ଡମ୍ ଡକୋ । ଆନାଜି ସୁନେନ୍ ଆସନ୍ ବତଙ୍ତଜି ତି ଅନ୍ତମ୍ ୨୨,୦୦୦ ମନ୍ଡ୍ରାଞ୍ଜି ଆସିଙନ୍ ଆପ୍ପାୟେଞ୍ଜି । ଈଶ୍ୱରନ୍ ଗିଦିୟୋନନ୍ ବରେନ୍ ଡ କେନ୍ ଆଡନିଡି ନିୟ୍ ଆତେ ଗୋଗୋୟ୍ଡମ୍ । ତି ଆସନ୍ ଗିଦିୟୋନନ୍ ୩୦୦ ମନ୍ଡ୍ରାଞ୍ଜି ଅମ୍ରେଙଲେ ଅଡକୋଞ୍ଜି ଆପ୍ପାୟେଞ୍ଜି ।
ତି ଆତଗଲ୍ ଈଶ୍ୱରନ୍ ଗିଦିୟନନ୍ ଆଡଅଙ୍ ବରେନ୍ “ମିଦିୟୋନଞ୍ଜି ଆଡ୍ରକୋନେ ଲୋଙ୍ ଇୟବା ଆରି ଏଙ୍ଗାଲେ ଆନିଞ୍ଜି ଆତର୍ଡମ୍ କଡାଡିନ୍ ଅମ୍ଡଙତେ, ଆମ୍ୱେନ୍ ଆରି ବତଙ୍ଡଙବେନ୍ ।” ତି ଆସନ୍ ତି ଆତଗଲ୍, ଗିଦିୟୋନନ୍ ତି ଆଡ୍ରକୋନେ ରେଙନ୍ ଇୟେନ୍ ଆରି ଅବୟ୍ ମିଦିୟୋନୀୟ ସିପାଇନ୍ ଆଗ୍ରିଜେନ୍ ଆଗନୁମ୍ତେ ବର୍ ଆଗଡିନ୍ ଆଡଅଙ୍ ଆବରତେନ୍ ଅମ୍ଡଙେନ୍ । ତି ଆମନ୍ଡ୍ରା ଆଗଡିନ୍ ବରେନ୍ “କେନ୍ ଆଗନୁନ୍ତେ ଆଗରାମ୍ଗାମ ଗିଦିୟୋନନ୍ ଆସିପାଇଜି ମିଦିୟୋନୀୟଞ୍ଜି ଆସିପାଇଜି ଆଡଅଙ୍ ଅବ୍ବାରେତଜି !” ଗିଦିୟୋନନ୍ ତି ଆତେ ଅମ୍ଡଙେନ୍, ଆନିନ୍ ଈଶ୍ୱରନ୍ ଆଡଅଙ୍ ସନେନନ୍ ତିୟେନ୍ ।
ଗିଦିୟୋନନ୍ ଆସିପାଇଞ୍ଜି ଆମଙ୍ ୟର୍ରନ୍ ଆସିପାଇଞ୍ଜି ରମଙ୍ ରମଙ୍ ଆଡଅଙ୍ ପନେଡନ୍, ଅବୟ୍ ଲବସିମନ୍ ଡ ଞରମ୍ତୋଡନ୍ ତିୟେଞ୍ଜି। ମିଦିୟୋନୀୟଞ୍ଜି ଆସିପାଇଜି ଅଙ୍ଗାରେଙ୍ ଆଲୁଲ୍ଲୁଡ୍ ଡକୋଏଞ୍ଜି ଆନିଞ୍ଜି ତି ଆଡ୍ରକୋନେଲୋଙ୍ ଏର୍ରେ ଏରେଞ୍ଜି । ଗିଦିୟୋନନ୍ ୩୦୦ ସିପାଇନ୍ ଆଲବସିମଞ୍ଜିଲୋଙ୍ ଆଞରମ୍ତୋଡନ୍ଜି ଡକୋଏଞ୍ଜି ଏଙ୍ଗାଲେ ମିଦିୟୋନଞ୍ଜି ଆସିପାଇଜି ଞରମ୍ତୋଡନ୍ ଆସାଆର୍ ବାତ୍ତେ ଗିୟ୍ଲେ ଅରପ୍ତିଏଜି।
ତି ସିଲଡ୍, ଗିଦିୟୋନନ୍ ଆସିପାଇଜି ଆବସାଣ୍ତନ୍ ଆଲବସିମଞ୍ଜି ପାଲେଞ୍ଜି, ତିଲୋଙ୍ ସିମ୍ମାଲୋଙନ୍ ଅଡକୋନ୍ ଆଞରମ୍ତୋଡ୍ ଆତଃଗୋ ଏରବ୍ବୋମଙ୍ ଗିୟ୍ତାଏନ୍ ।ଆନିଞ୍ଜି ଆଞମଞମଞ୍ଜି ଆପନେଡ୍ ପେଲ୍ଲେ ଅବ୍ସରଙଲନ୍ ବର୍ରଞ୍ଜି “ଅଡକୋଡିନ୍ନା ଆପ୍ରବୁ ଆରି ଗିଦିୟୋନନ୍ ଆସନ୍ ଅବୟ୍ କଡିବନ୍!”
ଇଶ୍ୱରନ୍ ମିଦିୟୋନଞ୍ଜି ଡଣ୍ତାୟେଞ୍ଜି, ତିଲୋଙ୍ ଆନିଞ୍ଜି ତର୍ଡମ୍ ଅଲସୁଲେ ଅଲସମ୍ୱବେଞ୍ଜି । ଅବ୍ତାଡନ୍, ଲାଙଲେଡ୍ ଇସ୍ରାଏଲୀୟଞ୍ଜି ଆସିଙନଞ୍ଜି ସିଲଡ୍ ଓଡେଲେ ମିଦିୟୋନଞ୍ଜି ଗନଙନ୍ ଆମନାୟ୍ ଆସନ୍ ବରେଞ୍ଜି। ଆନିଞ୍ଜି ଆନିଞ୍ଜି ଲୋଙ୍ ଗୋଗୋୟ୍ନେ ସମ୍ୱବେଞ୍ଜି ଆରି ଲାଙଲେଡ୍ ଇସ୍ରାଏଲନ ଆସଣ୍ତି ସିଲଡ୍ ଅମ୍ଡୁଙଲେ ଗଙେଞ୍ଜି । ତି ଆଡିନ୍ନା ୧,୨୦,୦୦୦ ମିଦିୟୋନଞ୍ଜି ରବ୍ବୁଏଞ୍ଜି । ଈଶ୍ୱରନ୍ ଇସ୍ରାଏଲଞ୍ଜି ଆଡଅଙ୍ ଅନୁରନ୍ ତିୟେଞ୍ଜି ।
ମନ୍ଡ୍ରାଞ୍ଜି ଗିଦିୟୋନନ୍ ଆଡଅଙ୍ ଅନବ୍ରାଜାନ୍ ଇସୁମେଞ୍ଜି । ମନ୍ଡ୍ରାଞ୍ଜି ଆଏତେନେ ଆଡନେ ଆସନ୍ ଗିଦିୟୋନନ୍ ଅତିୟ୍ଲଜି, ବନ୍ଡ ମିଦିୟୋନଞ୍ଜି ଆମଙ୍ ସିଲଡ୍ ଅଙ୍ଗାଜି ଆସୁନାଡାବ୍ଜି ଆନିଞ୍ଜି ପାଙେଞ୍ଜି ତିଜି ଆତେ ବେଡେଞ୍ଜି । ମନ୍ଡ୍ରାଞ୍ଜି ଗିଦିୟୋନନ୍ ଆଡଅଙ୍ ଗୋଗୋୟ୍ ସୁନାନ୍ ତିୟେଞ୍ଜି ।
ତି ଆତିକ୍କି ସୋଡାପୁର୍ପୁର୍ମରନ୍ ଆର୍ରତନେନ୍ ଅନ୍ତମ୍ ଅବୟ୍ ଅଙ୍ଗିନ୍ ତି ଆସୁନାଡାବ୍ ବାତ୍ତେ ତୁବେନ୍ । ବନ୍ଡ କେନ୍ ଆତେ କୋଂଣ୍ତାୟ୍ସୁମ୍ ଗୋ ମନ୍ଡ୍ରାଞ୍ଜି ପୁରେଞ୍ଜି । ତି ଆସନ୍ ଈଶ୍ୱରନ୍ ଆରି ଆନିଞ୍ଜି ଡଣ୍ତନ୍ ତିୟେଞ୍ଜି ଇନି ଆସନ୍ ଗାମେନଡେନ୍ ଇସ୍ରାଏଲନ୍ କୋଣ୍ତାୟ୍ ପୁର୍ରନେ । ଆନିଞ୍ଜି ଅନବ୍ବାରେନ୍ ଆସନ୍ ଆନିଞ୍ଜି ଆଡଅଙ୍ ବାଞେଞ୍ଜି । ଆନିଞ୍ଜି ଆତନିକ୍କି ଆରି ଇଶ୍ୱରନ୍ ଆମଙ୍ ବେର୍ବ୍ବର୍ଞ୍ଜି, ଆରି ଈଶ୍ୱରନ୍ ଆନିଞ୍ଜି ଆସନ୍ ଆରି ଞବୟ୍ ଅନମ୍ମେଙ୍ମରନ୍ ଆପ୍ପାୟଲାୟ୍ ।
କେନ୍ଆତେ ଗୋଗୋୟ୍ତର ଆବ୍ଡିଡ୍ଲଃଲନ୍: ଇସ୍ରାଏଲଞ୍ଜି ଇର୍ସେନ୍ ଲୁମେଞ୍ଜି, ଈଶ୍ୱରନ୍ ଆନିଞ୍ଜି ଡଣ୍ତନ୍ ତିୟେଞ୍ଜି, ତି ସିଲଡ୍ ଆନିଞ୍ଜି ଆବ୍ଡିଡ୍ବୁଡ୍ଡିଲଞ୍ଜି ଆରି ଇଶ୍ୱରନ୍ ଆନିଞ୍ଜି ଆନମ୍ମେଙ୍ ଆସନ୍ ଅନମ୍ମେଙ୍ମରଞ୍ଜି ଆପ୍ପାୟ୍ଲାୟ୍ । ଗୋଗୋୟ୍ ବର୍ଷେଙ୍ ଈଶ୍ୱରନ୍ ଗୋଗୋୟ୍ ଅନମ୍ମେଙ୍ମରଞ୍ଜି ଆପ୍ପାୟ୍ଲାୟ୍, ଆନାଜି ଇସ୍ରାଏଲୀୟଞ୍ଜି ଆବନେରାମରଞ୍ଜି ସିଲଡ୍ ଆନିଞ୍ଜି ଆଡଅଙ୍ ଅମ୍ମେଙେଞ୍ଜି ।
ଆତିକ୍କି, ସମ୍ପ୍ରରା ଡେସାନ୍ ଏଙ୍ଗାଲେ ଅବୟ୍ ରାଜାନ୍ ଡକୋ ଏତେଲେ ଅବୟ୍ ରାଜାନ୍ ଆସନ୍ ମନ୍ଡ୍ରାଞ୍ଜି ଈ୍ୱରନ୍ ଆମଙ୍ ବେର୍ବ୍ବରଞ୍ଜି । ଆନିଞ୍ଜି ଏନେଲେ ଅବୟ୍ ରାଜା ସାଜେଞ୍ଜି ଆନା ଡେଙ୍ଗା, ବୋର୍ସା ଡ ଆନା ଆନିଞ୍ଜି ଆଡଅଙ୍ ସନୁନ୍ ଆସନ୍ ତଙରନ୍ ଅବତୁୟ୍ତଜି । ଈଶ୍ୱରନ୍ କେନ୍ ଆବର୍ରନେ ଅଲଡୟ୍ଲୋ, ବନ୍ଡ ଆନିଞ୍ଜି ଏଙ୍ଗାଲେ ଇସୁମେଞ୍ଜି ଏତେଲେ ଅବୟ୍ ରାଜାନ୍ ତିୟେଞ୍ଜି ।
ବାଇବଲନ୍ ଲୋଙନ୍ ଅବୟ୍ ଅନବ୍ଜଙ ବର୍: ବିଚାରକର୍ତ୍ତା ୧-୩; ୬-୮
Free to use, adapt, and share under an open license (CC BY-SA 4.0).