17. ଈଶ୍ୱରନ୍ ଦାଉଦନ୍ ସରିନ୍ ଆଓକ୍କାନେ
ଶାଉଲନ୍ ଇସ୍ରାୟେଲଲୋଙ୍ ଆପର୍ତ୍ତମ୍ମୁ ଆରାଜା ଡକୋଏନ୍ । ଆନିନ୍ ଡେଙ୍ଗା ଡ ମନଙ୍ ଡକୋଏନ୍, ଏଙ୍ଗାଲେ ମନ୍ଡ୍ରାଞ୍ଜି ରାଜାନ୍ ସାଜେଞ୍ଜି । ଆପର୍ତମୁନ୍ ଅସୋୟ୍ ବର୍ଷେଙ୍ ଆସନ୍ ଶାଉଲନ୍ ଅବୟ୍ ମନଙ୍ ରାଜାଲନ୍ ଡଲୋଏନ୍ ଅଙ୍ଗାବେଳା ଆନିନ୍ ଇସ୍ରାଏଲନ୍ ଡନେଏନ୍ । ବନ୍ଡ ତି ଆତିକ୍କି ଆନିନ୍ ଅବୟ୍ ପେଲ୍ଲାମର୍ ଡେଲୋ ଆନ୍ନା ଈଶ୍ୱରନ୍ ଆବ୍ବଞାୟ୍ ଅମ୍ମାନେଲୋ, ତି ଆସନ୍ ଈଶ୍ୱରନ୍ ଅବୟ୍ ଆନ୍ନାମର୍ ବାସେଏନ୍ ଆନ୍ନା ଆପାଲ୍ଲତେଙନ୍ ରାଜାତନେ।
ଶାଉଲନ୍ ଆତକ୍କି ଈଶ୍ୱରନ୍ ଅବୟ୍ ବେଣ୍ତିଆନ୍ ଇସ୍ରାଏଲନ୍ ଆରାଜା ଆସନ୍ ବାସେଏନ୍ । ବେଥଲିହିମନ୍ ଗଡାନ୍ ସିଲଡ୍ ଆଜିର୍ରାଞନ୍ ଆଦାଉଦ ଅବୟ୍ ତୁର୍ମେନ୍ମର୍ ଡକୋଏନ୍ । ଆନ୍ନା ଆନ୍ନା ଆଡିଡ୍ ଆନିନ୍ ଆବାପ୍ପାନ୍ ଆମେଣ୍ତାଜି ତୁରେନ୍, ତାଡିନ୍ନା ଦାଉଦନ୍ ମେଣ୍ତାଞ୍ଜି ଲାୟ୍ସୁଏଞ୍ଜି ଆକିନ୍ନା ଡ ଆଭାଲ୍ଲୁଜି ସମ୍ୱବେନ୍ । ଦାଉଦନ୍ ଅବୟ୍ ଲବଡ୍ଡି ଡ ଡାର୍ମିକମର୍ ଡକୋଏନ୍ ଆନ୍ନା ଈଶ୍ୱରନ୍ ଆମଙ୍ ଡର୍ନ୍ ଆବଞାୟନ୍ ମାନ୍ନେଏନ୍ ।
ଦାଉଦନ୍ ଅବୟ୍ ସିପାଇ ଡ ସୋଡାମର୍ ଡକୋଏନ୍ । ଅଙ୍ଗାବେଡା ଦାଉଦନ୍ ଆବେଣ୍ତିଆ ଡକୋଏନ୍,ଆନିନ୍ ଗଲିୟାଦ ଗାମ୍ଲେ ଅବୟ୍ ସୋଡାଡମ୍ ଆମନ୍ଡ୍ରା ବାତ୍ତେ ଅଲ୍ସୁଏଞ୍ଜି । ଗଲିୟାଦନ୍ ଅବୟ୍ ଆଞନ୍ନେମର୍, ଗୋଗୋୟ୍ ବୋର୍ସା ସିପାଇ, ଆନା ୟାଗି ମିଟର୍ ଆଡନେଙ୍ଗା ଡକୋଏନ୍ । ବନ୍ଡ ଈଶ୍ୱରନ୍ ଗଲିୟାଦନ୍ ରବ୍ବୁଡାଲେ ଇସ୍ରାୟେଲନ୍ ଆନୁର୍ ତିୟନ୍ ଆସନ୍ ଦାଉଦନ୍ ମାୟେନ୍ । ତି ସିଲଡ୍, ଦାଉଦନ୍ ଇସ୍ରାୟେଲନ୍ ଅବନେରାମରଞ୍ଜିଲୋଙ୍ ଗୋଗୋୟ୍ ତର ଜିନୟେନ୍, ତି ଆସନ୍ ମନ୍ଡ୍ରାଞ୍ଜି ତି ଆଡଅଙନ୍ ସେନେଞ୍ଜି ।
ଦାଉଦନ୍ ଆଉପ୍ରେଙ୍ ମନ୍ଡ୍ରାଞ୍ଜି ଆଲନଡୟ୍ ଶାଉଲନ୍ ସଏଲେ ଅର୍ରପ୍ତିଲୋ । ଶାଉଲନ୍ ଦାଉଦନ୍ ଆରନବ୍ବୁ ଆସନ୍ ଗୋଗୋୟ୍ତର ଏରେନ୍ ଗୋଜେନ୍, ତି ଆସନ୍ ଦାଉଦନ୍ ଶାଉଲନ୍ ଆମଙ୍ ସିଲଡ୍ ସଲନେ । ବଡିନ୍ନା ଦାଉଦନ୍ ଆରନବ୍ବୁ ଆସନ୍ ଶାଉଲନ୍ ଆନିନ୍ ଆଡଅଙ୍ ସାଜେନ୍ । ଶାଉଲନ୍ ତି ଆଡଲ୍ଲି ଇୟେନ୍ ଅଙ୍ଗାଲୋଙ୍ ଦାଉଦନ୍ ଶାଉଲନ୍ ଆମଙ୍ ସିଲଡ୍ ସଲନ୍ ଡକୋଲନ୍,ବନ୍ଡ ଶାଉଲନ୍ ଆନିନ୍ ଆଡଅଙ୍ ଗିୟ୍ଲେ ଅର୍ରପ୍ତିଲୋ । ଦାଉଦନ୍ ଶାଉଲନ୍ ଆତନ୍ନଡ୍ ଡକୋଏନ୍ ଡ ଆନିନ୍ ଆନିନ୍ ଆଡଅଙ୍ ସମ୍ବବ୍ବ୍ଲେ ରପ୍ତିତବନ୍, ଆନିନ୍ ଅଲ୍ଲୁମ୍ଲୋ । ଆରପାୟ୍ଁ ଦାଉଦନ୍ ଶାଉଲନ୍ ଆଡଅଙ୍ ଅନବ୍ତୁଜନ୍ ଆସନ୍ ଶାଉଲନ୍ ଆସିନ୍ଡ୍ରି ଜିଃଜିଡ୍ ଗଡେନ୍ ଏଙ୍ଗାଲେ ଆନିନ୍ ରନାଜାନେନ୍ ଆସନ୍ ଆନିନ୍ ଆଡଅଙ୍ ଅର୍ରବ୍ବୁଲୋ ।
ତି ଆତିକ୍କି, ଶାଉଲନ୍ ସନୁଲୋଙନ୍ ରବୁଏନ୍, ଡ ଦାଉଦନ୍ ଇସ୍ରାୟେଲୋଙନ୍ ରାଜାଲନେ । ଆନିନ୍ ଅବୟ୍ ମନଙ୍ ରାଜା ଡକୋଏନ୍, ଡ ମନ୍ଡ୍ରାଞ୍ଜି ଆନିନ୍ ଆଡଅଙ୍ ଲଡଜେଞ୍ଜି । ଈଶ୍ୱରନ୍ ଦାଉଦନ୍ ଆଡଅଙ୍ ଅବ୍ସିତ୍ତାଏନ୍ ଡ ଅବ୍ଞାଙ୍ଞାଙେନ୍ । ଦାଉଦନ୍ ଗୋଗୋୟ୍ ସନୁନ୍ ସୁଏନ୍ ଡ ଇଶ୍ୱରନ୍ ଇସ୍ରାୟେଲନ୍ ଆବନେରାମର୍ଜି ଆନବ୍ନାରେ ଆସନ୍ ଆନିନ୍ ଆଡଅଙ୍ ମାୟେନ୍ । ଦାଉଦନ୍ ଯିରୁଶାଲମନ୍ ଜିନୟେନ୍ ଡ କେନ୍ ଆତେ ଆସୋଡ ଗଡାନ୍ ତୁବେନ୍ । ଦାଉଦନ୍ ଆରାଜାନେ ବେଡା ଇସ୍ରାୟେଲନ୍ ବୋର୍ସା ଡ ଗମାଙେଞ୍ଜି ।
ଦାଉଦନ୍ ଅବୟ୍ ମନ୍ଦିରସିଂ ଆତନୁବ୍ ଆସନ୍ ସାଜେନ୍ ଆଙ୍ଗାଲୋଙ୍ ଅଡକୋ ଇସ୍ରାୟେଲ ଈଶ୍ୱରନ୍ ଆଡଅଙ୍ ପୁର୍ରେ ରପ୍ତିତଜି ଡ ଆମଙନ୍ ଅନମଙନ୍ ତିୟ୍ଲେ ରପ୍ତିତଜି । ଉଞ୍ଜି ବର୍ଷେଙ୍ଜାୟ୍ ମନ୍ଡ୍ରାଞ୍ଜି ଈଶ୍ୱରନ୍ ଆଡଅଙ୍ ପୁରେଞ୍ଜି ଡ ମୋଶାନ୍ ଆତରୁବେନ୍ ଆରୁକ୍କୁନେସିଂଲୋଙ୍ ଅନମଙନ୍ ତିୟେଞ୍ଜି ।
ବନ୍ଡ ଈଶ୍ୱରନ୍ ନାଥନ୍ ଗାମ୍ଲେ ପୂର୍ବାତେଃ ବର୍ନେ ମରନ୍ ଦାଉଦନ୍ ଆମଙ୍ ବର୍ନେନ୍ ବର୍ରେ ଆପ୍ପାୟେନ୍, “ଇନି ଗାମେଣ୍ତେନ୍ ଆମନ୍ ଅବୟ୍ ସୁସୁନେମର୍,ତି ଆସନ୍ ଆମନ୍ ଞେନ୍ ଆସନ୍ କେନ୍ ଆମନ୍ଦିରସିଂ ତୁବ୍ଡଙେ ।” ଡାଙ୍ଗଡାଅନ୍ନମ୍ ତିଆତେ ତୁବ୍ତେ । ବନ୍ଡ ଞେନ୍ ଆମନ୍ ଆଡଅଙ୍ ଗୋଗୋୟ୍ ଅବ୍ସିତ୍ତାତମ୍ । କେଜ୍ଜାଲୋଙ୍ନମ୍ ସିଲଡ୍ ଅବୟ୍ନ୍ନେ ମନ୍ଡ୍ରାଞେଞ୍ଜି ଆତୋଣ୍ତୋ ରାଜାଲନ୍ ଅଡ୍କୋଡିନ୍ନା ଆସନ୍ ରାଜାତନେ !” ଅଡ୍କୋଡିନ୍ନା ଆର୍ରାଜାତନ୍ ଦାଉଦନ୍ ଆକେଜ୍ଜାଲୋଙ୍ ଆବୟ୍ନେନ୍ ଆନିନ୍ କ୍ରିଷ୍ଟନ୍ । କ୍ରିଷ୍ଟନ୍ ଈଶ୍ୱରନ୍ ଆବନାସ୍ସେମର୍ ଆନା ପୂର୍ତିନ୍ ଆମନ୍ଡ୍ରାଜି ଆଇର୍ସେଞ୍ଜି ସିଲଡ୍ ଅମ୍ମେଙ୍ତଜି ।
ଏଙ୍ଗାଲେ ଦାଉଦନ୍ କେନ୍ ଅଡକୋନ୍ ଆବର୍ନେ ଅମ୍ଡଙେନ୍, ଆନିନ୍ ଅବ୍ତାଡନ୍ ଈଶ୍ୱରନ୍ ଆଡଅଙ୍ ସନେନନ୍ ତିୟେନ୍ ଡ ଆନିନ୍ ଆଡଅଙ୍ ସେନେନ୍ ଇନିଆସନ୍ ଗାମେଣ୍ତେନ୍ ଆନିନ୍ ଦାଉଦନ୍ ଆଡଅଙ୍ ଆନବ୍ସୋଡା ଡ ଗୋଗୋୟ୍ ଅନବ୍ସିତ୍ତା ତନିୟନ୍ ଆସନ୍ ସିବ୍ଡୟ୍ବରେନ୍ । ଇଶ୍ୱରନ୍ ଅଙ୍ଗାବେଡା କେନ୍ ଅଡକୋନ୍ ତୁବ୍ତେ ଦାଉଦନ୍ ଜନାଲେ ଅର୍ରପ୍ତିଲୋ । ବନ୍ଡ ଏନ୍ନେଲେ ଡେଲୋ, ଇସ୍ରାୟେଲିୟଞ୍ଜି କ୍ରିଷ୍ଟନ୍ ଆଜରିର୍ତାଞନ୍ ଆସନ୍ ୧୦୦୦ ବର୍ଷେଙ୍ ଜଗ୍ଗେଏଞ୍ଜି ।
ଗୋଗୋୟ୍ ବର୍ଷେଙ୍ ଦାଉଦନ୍ ନିଆୟନ୍ ଡ ଡର୍ନେନ୍ ବାତ୍ତେ ରାଜାଲନେ ଡ ଈଶ୍ୱରନ୍ ଆନିନ୍ ଆଡଅଙ୍ ଅବ୍ସିତ୍ତାଏନ୍ । ଡେଲୋଜାକିଁଡେନ୍,ଆନମେଙନ୍ ଆତନକୋଡ୍ ଡିନ୍ନା ଆଡିତ୍ ଆନିନ୍ ଈଶ୍ୱରନ୍ ଆଡଅଙ୍ ସଙ୍ଗତ୍ତାଲେ ଇର୍ସେଲୁମନ୍ ଲମେନ୍ ।
ବଡିନ୍ନା, ଅଙ୍ଗାବେଡା ଦାଉଦନ୍ ଆସିପାଇଜି ସନୁନ୍ ଆସନ୍ ଅସିଙନ୍ ସିଲଡ୍ ସଙାଜ୍ ଡକୋଲଞ୍ଜି ,ଆନିନ୍ ରାଜାସିଙନ୍ ଆତୋଣ୍ତୋ ସିଲଡ୍ ଗିଜେନ୍ ଡ ଅବୟ୍ ମନଙ୍ଡମ୍ ଆଇମର୍ ଉମ୍ମାତନ୍ । ତି ଆଇମର୍ ଆଞୁମ୍ ବେଥସେବା ଡକୋଏନ୍ ।
ଆନ୍ନାଗଡ୍ ଏର୍ନାଙାଙନ୍ ଦାଉଦନ୍ ଆନିନ୍ ଆନୋରୋଙ୍ ଆସନ୍ ଅବୟ୍ ମନ୍ଡ୍ରାନ୍ ଆପ୍ପାୟେନ୍ । ଆନିନ୍ ଆନିନ୍ ବାତ୍ତେ ଲୁଡେନ୍ ଡ ଆନିନ୍ ଆଡଅଙ୍ ଆସିଙନ୍ ଆପ୍ପାୟେନ୍ । ଅସୋୟ୍ଡିନ୍ନ ଆତିକ୍କି ବେଥସେବା ଦାଉଦନ୍ ଆମଙ୍ ଅବୟ୍ ବନରନ୍ ବର୍ରେ ଆପ୍ପାୟ୍ଲାୟ୍ ଡ ଆନିନ୍ ଆତିଲ୍କୋଡ୍ ଡକୋ ।
ଉରିୟ ଗାମ୍ଲେ ଅବୟ୍ ମନ୍ଡ୍ରାନ୍ ଦାଉଦନ୍ ଆସିପାଇଲୋଙ୍ ଅବୟ୍ ମନଙ୍ ସିପାଇ, ବେତସେବା ଆଅୟ୍ତବ୍ ଡକୋଏନ୍ । ଦାଉଦନ୍ ଉରିୟନ୍ ଆଡଅଙ୍ ସନୁନ୍ ସିଲଡ୍ ଓଡ୍ଡେଲେ ଆଡୁକ୍ରିନ୍ ଆମଙ୍ ଜନିରନ୍ ଆସନ୍ ବରେନ୍ । ବନ୍ଡ ଲାଙ୍ଲେଡ୍ ସିପାଇଞ୍ଜି ସନୁଲୋଙନ୍ ଡକୋନ୍ ଆଡିଡ୍ ଉରିୟନ୍ ଅସିଙନ୍ ଆଜନିର୍ ଆସନ୍ ଅସାଏନ୍ । ତିଆସନ୍ ଦାଉଦନ୍ ଉରିୟନ୍ ଆଡଅଙ୍ ଆରି ସନୁନ୍ ଆସନ୍ ଆପ୍ପାୟେନ୍ ଆରି ସିପାଇଞ୍ଜି ଆସୋଡା ଆମଙ୍ ବର୍ରେ ଆପ୍ପାୟେନ୍ ଡ ଆନିନ୍ ଉରିୟନ୍ ଆଡଅଙ୍ ଏତ୍ତେଗୋଲୋଙ୍ ଡକ୍କୋଏତୋ ଅଙ୍ଗାଲୋଙ୍ ବନେରାମରଞ୍ଜି ଗୋଗୋୟ୍ ଡକୋଜି ଏଙ୍ଗାଲେ ଉରିୟନ୍ ବନେରାମରଞ୍ଜି ଆସିଲୋଙ୍ ରବୁତେ ।
ଉରିୟନ୍ ରନବ୍ବୁନ୍ ଡେଏନ୍କି ଆତିକ୍କି, ଦାଉଦନ୍ ବେଥସେବାନ୍ ଆଡଅଙ୍ ବିବାଲନେ । ତି ଆତକ୍କି, ଆନିନ୍ ଦାଉଦନ୍ ଆଡଙ୍ଗଅନ୍ କୋଡେନ୍ । ଦାଉଦନ୍ ଇନି ଲୁମେନ୍ ତିଆସନ୍ ଈଶ୍ୱରନ୍ ଗୋଗୋୟ୍ ବରବେନ୍ ତିଆସନ୍ ଆନିନ୍ ଆମଙନ୍ ନାଥନ୍ ପୂର୍ବାଃତେ ବର୍ନେମରନ୍ ଆପ୍ପାୟଲେ ଆଇର୍ସେନ୍ ଏଙ୍ଗାଲେ ମନଙ୍ତଡ୍ ଡକୋଏନ୍ ତି ଆତେ ଇୟ୍ଲାୟ୍ବର୍ରେ । ଦାଉଦନ୍ ଆଇର୍ସେନ୍ ଆସନ୍ ଆବ୍ୟର୍ ବୁଡ୍ଡିଲନ୍ ଆରି ଈଶ୍ୱରନ୍ ଆନିନ୍ ତନମ୍ମାଡନ୍ ତିୟେନ୍ । ଦାଉଦନ୍ ତିକ୍କି ଆନମେଙ୍ ଡିନ୍ନାଲୋଙ୍, ଏନ୍ନେଲେ ଡ ଆକନଲ୍କଲ୍ ଡିନ୍ନାଇଙନ୍ନିୟ୍ ଈଶ୍ୱରନ୍ ଆଡଅଙ୍ ସଣ୍ତୋଙ୍ଡାଲେ ଆବର୍ନେନ୍ ଆନମ୍ଡଙ୍ମର୍ ଡକୋଏନ୍ ।
ବନ୍ଡ ଦାଉଦନ୍ ଆଇର୍ସେ ଆପନରଡ୍ ଆସନ୍ ତି ଆଡାଙ୍ଗଡଅନନ୍ ରବୁଏନ୍ । ଦାଉଦନ୍ ଆନମେଙ୍ଡିନ୍ନାଜାୟ୍ ଆକୁତ୍ତମ୍ମାଲୋଙନ୍ ଗୋଡେନ୍ ଡକୋଏନ୍,ଆରି ଦାଉଦନ୍ ଆବୋର୍ସା ଅସୋୟ୍ଲେ ପାଙେନ୍ । ଆଜାଡିଡମ୍ ଦାଉଦନ୍ ଈଶ୍ୱରନ୍ ଆମଙ୍ ଏର୍ଡର୍ନେ ଡକୋଏନ୍, ଡେଲୋଜାକିଁଡେନ୍ ଈଶ୍ୱରନ୍ ତି ଆସନିବ୍ଡୟ୍ ବରନ୍ ଡନକ୍କୋନ୍ ଆସନ୍ ଡର୍ନେମର୍ ଡକୋଏନ୍ । ତିକ୍କି ଆଓୟୋଙ୍ ଦାଉଦନ୍ ବେଥସେବାନ୍ ଆମଙ୍ ସିଲଡ୍ ଅବୟ୍ ଓବ୍ବାଅନନ୍ କୋଡେଞ୍ଜି ଆରି ତି ଆଞୁମନ୍ ଆନିଞ୍ଜି ସଲୋମନ୍ ତିୟେଞ୍ଜି ।
ବାଇବଲଲୋଙନ୍ ଅବୟ୍ ଅନବ୍ଜଙ୍ବର୍: ୧ ଶାମୁୟେଲ ୧୦; ୧୫-୧୯;୨୪;୩୧; ୨ ଶାମୁୟେଲ ୫;୭,୧୧-୧୨
Free to use, adapt, and share under an open license (CC BY-SA 4.0).