18. ଡେସାନ୍ ଆନ୍ନାନା
ଗୋଗୋୟ୍ ବର୍ଷେଙ୍ ଆତିକ୍କି ଦାଉଦନ୍ ରବ୍ବୁଏନ୍, ଡ ଆଡଙ୍ଗଡା ଅନନ୍ ଶଲୋମନନ୍ ଇସ୍ରାଏଲ ଲୋଙନ୍ ରାଜାଲନେ। ଈଶ୍ୱରନ୍ ଶଲୋମନନ୍ ଡ ଆନିନ୍ ଅଙ୍ଗାଆତେ ଗୋଗୋୟ୍ ସାୟ୍ତେ ତି ଆତେ ବରେନ୍। ଏଙ୍ଗାଲେ ଶଲୋମନନ୍ ବୁଡ୍ଡିନ୍ ଆସନ୍ ବେନର୍ରନେ, ଈଶ୍ୱରନ୍ ତିଲୋଙ୍ ସଡ୍ରାଏନ୍ ଡ ଆନିନ୍ ଆଡଅଙ୍ ପୁର୍ତ୍ତିଲୋଙ୍ ଅଡକୋନ୍ ସିଲଡ୍ ଗୋଗୋୟ୍ ବୁଡ୍ଡିମର୍ ଏମ୍ମେଏନ୍। ଶଲୋମନନ୍ ଗୋଗୋୟ୍ ଞଙ୍ଲନେ ଡ ଆନିନ୍ ଗୋଗୋଯ୍ ବୁଡ୍ଡିମର୍ ରାଜା ଡେଲୋ। ଆରି ଈଶ୍ୱରନ୍ ଆନିନ୍ ଆଡଅଙ୍ ଗୋଗୋୟ୍ ଗମାଙ୍ମର୍ ଏମ୍ମେଏନ୍।
ଯିରୁଶାଲମ୍ ଲୋଙନ୍, ଶଲୋମନନ୍ ମନ୍ଦିରସିଙନ୍ ତୁବେନ୍ ଅଙ୍ଗାଆତେ ଆବାପ୍ପାନ୍ ଇୟ୍ୟମେନ୍ ଡ ତରୁବ୍ତୁବଞ୍ଜି ରୁକ୍କୁଲେ ଡକୋଏନ୍। ମନ୍ଡ୍ରାଞ୍ଜି ଇଶ୍ୱରନ୍ ଆପନୁର୍ ଡ ଅନମଙ୍ ତନିୟନ୍ ରନୁକ୍କୁଆସିଂ ଲୋଙନ୍ ଆତନୁବ୍ ଆପାଲ୍ଲତେଙ୍ ମନ୍ଦିରସିଂଲୋଙନ୍ ତୁବେଞ୍ଜି। ଈଶ୍ୱରନ୍ ଜିର୍ରାୟ୍ ଡ ମନ୍ଦିରଲୋଙନ୍ ଡକୋଲନେ, ଡ ଆନିନ୍ ଆମନ୍ଡ୍ରାଞ୍ଜି ସରିନ୍ ଡକୋଲନେ।
ବନ୍ଡ ଶଲୋମନନ୍ ଆନ୍ନା ଆଡେସା ଆଇବୟ୍ଜି ଆଡଅଙ୍ ଲଡଜେନ୍। ଆନିନ୍ ୧୦୦୦ ଆନ୍ନା ଆଡେସା ଆଇବୟ୍ଜି ବିବାଡାଲନ୍ ଈଶ୍ୱରନ୍ ଆବଞାୟ୍ ଅମ୍ମାନେଲୋ। ତି ଆଇବୟ୍ଜିଲୋଙ୍ ଲାଙଲେଡ୍ ଆନ୍ନାଆଡେସା ସିଲଡ୍ ଜିର୍ରାଜି ଡ ଆନିଞ୍ଜି ଆକୋଣ୍ତାୟ୍ସନୁମଞ୍ଜି ପାଙ୍ତୁମ୍ଲନାଜି ଡ ଡିତାନ୍ ଆନିଞ୍ଜି ଆଡଅଙ୍ ପୁର୍ରେଞ୍ଜି। ଶଲୋମନନ୍ ଏଙ୍ଗାଲେ ବୁଡ୍ଡାଞନ୍, ଆନିନ୍ ନିୟ୍ ଆନିଞ୍ଜି ବାତ୍ତେ କୋଣ୍ତାୟ୍ସନୁମଞ୍ଜି ପୁର୍ରେନ୍।
ଈଶ୍ୱରନ୍ ଶଲୋମନନ୍ ଆଡଅଙ୍ ଗୋଗୋୟ୍ ବର୍ରାବେନ୍ ଡ ଶଲୋମନନ୍ ଆର୍ନବୁ ଆତିକ୍କିଆନିନ୍ ଇସ୍ରାଏଲ ଡେସାନ୍ ବାଗୁ ରାଜ୍ୟ ଏମେଲେ ଅବ୍ନ୍ନାଏନ୍।
ଶଲୋମନନ୍ ଆର୍ନବୁ ଆତିକ୍କି, ଆଡାଙ୍ଗଡା ଅନନ୍ ରିହବିୟାମନ୍ ରାଜାଲନେ। ରିହବିୟାମନ୍ ଅବୟ୍ ପେଲ୍ଲାମର୍ ଡକୋଏନ୍। ଇସ୍ରାଏଲନ୍ ଆଡେସା ଲୋଙ ଅଡକୋ ମନ୍ଡ୍ରାଞ୍ଜି ରୁକ୍କୁଡାଲନ୍ ଆନିନ୍ ଅବୟ୍ ରାଜା ଏମ୍ମେଞ୍ଜି। ଆନିଞ୍ଜି ରିହବିୟାମନ୍ ଆଡଅଙ୍ ବାବ୍ବାବ୍ଲେ ବର୍ରେଞ୍ଜି ଡ ଶଲୋମନନ୍ ଆନିଞ୍ଜି ଆଡଅଙ୍ ଲଗିନ୍ ଲନୁମନ୍ ଡ ଗୋଗୋୟ୍ ସିସ୍ଟୁ ତନିୟନ୍ ଡେଏନ୍।
ରିହବିୟାମନ୍ ଆନିଞ୍ଜି ଆଡଅଙ୍ ରଡୋଡମ୍ ଜାଲଙେଞ୍ଜି, “ଆମ୍ୱେଞ୍ଜି ଇନି ଏଇୟ୍ୟତେ ଞେନ୍ ବାପ୍ପାଞେନ୍ ଶଲୋମନନ୍ ଆମ୍ୱେଞ୍ଜି ଆଡଅଙ୍ ପ୍ରାନ୍ଡଣ୍ତନ୍ ଆଲନୁମ୍ ଅବ୍ଲୁମଲୁମ ଲବେନ୍ ଡ ଆନିନ୍ ସିଲଡ୍ ଞେନ୍ ଆରି ଗୋଗୋୟ୍ ପ୍ରାନ୍ଡଣ୍ତନ୍ ଆଲନୁମ୍ ବାଞ୍ତବେନ୍,ଡ ଆନିନ୍ ସିଲଡ୍ ଞେନ୍ ଗୋଗୋୟ୍ ଆମ୍ୱେଞ୍ଜି ଆଡଅଙ୍ ପନରଡନ୍ ତିୟତବେନ୍।”
ଇସ୍ରାଏଲ ଡେସାନ ଦଶକେଜ୍ଜା ରିହବିୟାମନ୍ ଆସଙ୍ଗତାଲୋଙ ଡୁଙଲନାଜି। ଆବାଗୁନ୍ କେଜ୍ଜାନ୍ ଆନିନ୍ ଆଡଅଙ୍ ଡର୍ରନ ଡଲୋଲଞ୍ଜି। କେନ୍ ବାଗୁ କେଜ୍ଜାନ୍ ବାତ୍ତେ ଯିହୁଦା ରାଜ୍ୟ ଡେଲୋ।
ଇସ୍ରାୟେଲ ଡେସାନ୍ ଆନ୍ନା ଦଶଟା ଆଜାତି ରିହବିୟାମନ୍ ଆବନେରାମର୍ ଡେଞ୍ଜି। ଆରି ଯାରବିୟାମ୍ ଆଞୁମ୍ ଅବୟ୍ ମନ୍ଡ୍ରାନ୍ ଆଡଅଙ୍ ତି ଆରାଜାଞ୍ଜି ଆଡନେ ଆସନ୍ ତବ୍ନଙେଞ୍ଜି। ଆନିଞ୍ଜି ଅର୍ଜଡୋମ୍ଗଡ୍ ଆବନ୍ତାବା ରାଜ୍ୟଲଞ୍ଜି ଡ ଆନିଞ୍ଜି ଆଡଅଙ୍ ଇସ୍ରାୟେଲ ରାଜ୍ୟ ଗନାମନ୍ ଡେଲୋ।
ଯାରବିୟାମ୍ ଈଶ୍ୱରନ୍ ସଙ୍ଗତ୍ତାଲେ ମନଙ୍ତଡନ୍ ଆଲନୁମ୍ ଲୁମେନ୍ ଡ ମନ୍ଡ୍ରାଞ୍ଜି ଆଡଅଙ୍ ଇର୍ସେନ୍ ଅବ୍ଲ୍ଲୁମ୍ଲୁମେଞ୍ଜି। ଯିହୁଦା ଆରାଜ୍ୟଲୋଙ୍ ଡକୋନ୍ ମନ୍ଦିରଲୋଙନ୍ ଈଶ୍ୱରନ୍ ଆଡଅଙ୍ ଏର୍ପନୁରନ୍ ଆନିନ୍ କୋଣ୍ତାୟ୍ ପନୁରନ୍ ଆସନ୍ ତି ଆମନ୍ଡ୍ରାଞ୍ଜି ଆସନ୍ ବାଗୁ କୋଣ୍ତାୟନ୍ ତୁବେନ୍।
ଯିହୁଦା ରାଜ୍ୟ ଡ ଇସ୍ରାୟେଲ ରାଜ୍ୟ ବନେରା ଡେଏଞ୍ଜି ଆରି ଗୋଗୋୟ୍ ତର ଆନିଞ୍ଜି ଅଲସୁଏଞ୍ଜି।
ନୁଆ ଆରାଜ୍ୟ ଇସ୍ରାୟେଲୋଙନ୍ ଅଡକୋନ୍ ଆରାଜା ଇର୍ସେମର୍ ଡକୋଏଞ୍ଜି। କେନ୍ ଅଡକୋନ୍ ଆରାଜାଜି ଲୋଙ୍ ଗୋଗୋୟ୍ନେ ରାଜା ଆନ୍ନା ଇସ୍ରାୟେଲଞ୍ଜି ଆସିଲୋଙ୍ ସନମ୍ୱବନ୍ ଞାଙେଞ୍ଜି ଆନାଜି ଆନିଞ୍ଜି ଆଜଗାଲୋଙ୍ ରନାଜାନେ ସାଜେଞ୍ଜି।
ଅଡକୋନ୍ ଆରାଜାଜି ଡ ଇସ୍ରାୟେଲଞ୍ଜି ଆରାଜ୍ୟଲୋଙ୍ ଅଡକୋନ୍ ଆମନ୍ଡ୍ରା କୋଣ୍ତାୟ୍ ସନୁମନ୍ ପୁର୍ରେଞ୍ଜି। ଆନିଞ୍ଜି କୋଣ୍ତାୟ୍ସମୁନମ୍ ଆପୁର୍ରପର୍ରଲୋଙ୍ ଗୋଗୋୟ୍ ଡାରିଲଞ୍ଜି ଆରି ପସିଜନଞ୍ଜି ଅନମେଙନ୍ ତିୟେଞ୍ଜି।
ଯିହୁଦୀଞ୍ଜି ଆରାଜା ଦାଉଦନ୍ ଆକେଜ୍ଜାଜି ଡକୋଏଞ୍ଜି। କେନ୍ ଅଡକୋନ୍ ଆରାଜାଜି ଲୋଙ୍ ଲାଙ୍ଲେଡ୍ ମନଙ୍ ଡକୋଏଞ୍ଜି ଆନାଜି କି ନିଆଞନ୍ ବାତ୍ତେ ଡନେଲଞ୍ଜି ଆରି ଈଶ୍ୱରନ୍ ପୁର୍ରଞ୍ଜି। ବନ୍ଡ ଯିହୂଦାଞ୍ଜି ଲାଙ୍ଲେଡ୍ ଆରାଜାଜି ଇର୍ସେନ୍ ଆରି କୋଣ୍ତାୟ୍ସନୁମନ୍ ପୁର୍ରେଞ୍ଜି। ଲାଙ୍ଲେଡ୍ ରାଜାଞ୍ଜି ପସିଜନଞ୍ଜି ଆଡଅଙ୍ ସନୁମନ୍ ଆମଙ୍ ଅନମଙନ୍ ତିୟେଞ୍ଜି। ଯିହୁଦାଲୋଙ୍ ଲାଙ୍ଲେଡ୍ ମନ୍ଡ୍ରାଞ୍ଜି ଈଶ୍ୱରନ୍ ସଙ୍ଗତାଲେ ଇର୍ସେନ୍ ଲୁମେଞ୍ଜି ଆରି ସନୁମନ୍ ପୁର୍ରେଞ୍ଜି।
ବାଇବକ ଲୋଙନ୍ ଅବୟ୍ ଅନବ୍ଜଙବର୍: ୧ରାଜାବଳୀ ୧-୬; ୧୧-୧୨
Free to use, adapt, and share under an open license (CC BY-SA 4.0).