19. ପୁର୍ବାଃତେବର୍ନେମର୍ଞ୍ଜି
ଇସ୍ରାଏଲୀୟଞ୍ଜି ଆମୁଙ୍ଆବର୍ନେ ଲୋଙ୍, ଈଶ୍ୱରନ୍ ଆନିଞ୍ଜି ଆମଙ୍ ଆପୁର୍ବାଃତେବର୍ନେମର୍ଞ୍ଜି ଆପ୍ପାୟେନ୍। ପୁର୍ବାଃତେବର୍ନେମର୍ଞ୍ଜି ଈଶ୍ୱରନ୍ ଆମଙସିଲଡ୍ ବର୍ନେନ୍ ଅମ୍ଡଙ୍ଡାଲେ ଡ ଆତିକ୍କି ଇଶ୍ୱରନ୍ ଆବର୍ନେଜି ମନ୍ଡ୍ରାଞ୍ଜି ଆଡଅଙ୍ ବରେଞ୍ଜି।
ଆହାବନ୍ ଅଙ୍ଗାବେଡା ଇସ୍ରାଏଲନ୍ ରାଜାଲନେ ତାଡିନ୍ନା ଏଲିୟନ୍ ଅବୟ୍ ପୁର୍ବାଃତେବର୍ନେମରନ୍ ଡକୋଏନ୍। ଆହାବନ୍ ଅବୟ୍ ପେଲ୍ଲାମର୍ ଡକୋଏନ୍ ଆନ୍ନା ବାଲ୍ ଆଞୁମ୍ ଅବୟ୍ କୋଣ୍ତାୟ୍ସନୁମନ୍ ପନୁରନ ଆସନ୍ ମଡ୍ରାଞ୍ଜି ଆଡଅଙ୍ ଅବ୍ସଡ୍ରାଏଞ୍ଜି। ଏଲୀୟ୍ ଆହାବନ୍ ଆଡଅଙ୍ ବରେନ୍, ଞେନ୍ ଅରଙ୍ବରମନ୍ ଜାୟ୍ ଇସ୍ରାଏଲନ୍ ଆଡେସାଲୋଙ ଏଙ଼୍ଗାଲ ଜାୟ୍ଡେନ୍ ତରୁବନ୍ ଅଡେ ଶିଶିରାଡାନ୍ ଅନ୍ନସେଡାୟ୍।” ତି ଲୋଙ ଆହାବନ୍ ଗୋଗୋୟ୍ ବର୍ରାବେନ୍।
ଏଲିୟନ୍ ଆଡଅଙ୍ ରନବ୍ବୁନ୍ ଆସନ୍ ଆରିସୁମେନ୍ ଆହାବନ୍ ଆମଙ୍ ସିଲଡ୍ ଆନିନ୍ ଆଡଅଙ୍ ଆରିଙ୍ରିଙ୍ ରେଙନ୍ ଡକୋନ୍ ଅବୟ୍ ଅଲଡାଲୋଙ୍ ସନ୍ନେନ୍ ଆସନ୍ ଇଶ୍ୱରନ୍ ଏଲୀୟନ୍ ଆଡଅଙ୍ ବର୍ରେନ୍। ଡ଼ିତାନ୍ ଡୋତ୍ତାନ୍ ଡ ସାଲୁମନ୍ ଅନ୍ତିଡଞ୍ଜି ରୋଟିନ୍ ଡ ଜେଲ୍ଲୁନ୍ ପାଙତିୟଲାଜି। ଆହାବନ୍ ଡ ଆସିପାଇଜି ଏଲୀୟନ୍ ସାଜଞ୍ଜି, ବନ୍ଡ ଆନିଞ୍ଜି ଆନିନ୍ ଆଡଅଙ୍ ଅଞାଙ୍ଲଜି। କାନ୍ତାରାନ୍ ଡିୟ୍ତେ ଆଗୋଗୋୟ୍ ଡକୋଏନ୍ ଡ ଅଲନ୍ ଆଡାଆ ନିୟ୍ ଅସର୍ରେପାଙେନ୍।
ତି ଆସନ୍ ଏଲୀୟ୍ ଅବୟ୍ ଆତୟ୍ତୟ୍ ଡେସାନ୍ ଜିର୍ରେନ୍। କାନ୍ତାରାନ୍ ଆଡ୍ରେଏନ୍ ଆସନ୍ ତି ଆଡେସା ଲୋଙ୍ ଅବୟ୍ ଜୁଆରବଜନ୍ ଡ ଆଡାଙ୍ଗଡଅନନ ଆଜରୋମ୍ଜୋମ୍ ଅଞିଡେନ୍। ଇନି ଆସନ୍ ଗାମେଣ୍ତେନ୍ ତରୁବନ୍ ଅନ୍ନଡୋଲାଞନ୍ ଆସନ୍ କାନ୍ତାରାଏନ୍ ବନ୍ଡ ଆନିଞ୍ଜି ଏଲୀୟନ୍ ଆଡଅଙ୍ ସେବାଏଞ୍ଜି, ଡ ଈଶ୍ୱରନ୍ ଆନିଞ୍ଜି ଆଡଅଙ୍ ଜନୋମନ୍ ତିୟେଞ୍ଜି ଏଙ୍ଗାଲେ ଆମ୍ଇ଼ଦାନ୍ ଡ ଆମିଞଲସିମନ୍ ଆଙ୍ଗିୟ୍ ଆରିକ୍କା ଅଡକୋଲନ୍। ତି ଆକାନ୍ତାରାବେଡା ଆମଙଞ୍ଜି ଡିତାନ୍ ଜନୋମନ୍ ଡକୋଏନ୍। ଏଲୀୟନ୍ ତେତ୍ତେ ଜବ୍ରବର୍ଷେଙ୍ ଜାୟ୍ ଡକୋଲନେ।
ୟାଗି ବର୍ଷେଙ୍ ଆତିକ୍କି, ଈଶ୍ୱରନ୍ ଏଲୀୟନ୍ ଆଡଅଙ୍ ଇସ୍ରାଏଲ ଆଡେସା ୟର୍ନେ ଆସନ୍ ବର୍ରେନ୍, ଡ ଆହାବନ୍ ଆଡଅଙ୍ ବନରନ୍ ଡ ଆନିନ୍ ଆରି ତରୁବନ୍ ଅବ୍ନଡୋତାୟ୍। ଏଙ୍ଗାଲେ ଆହାବନ୍ ଏଲୀୟନ୍ ଆଡଅଙ୍ ଗିଜେନ୍, ଆନିନ ଗାମେନ୍ “କେନ୍ ପଙ୍ ଆମନ୍ କନ୍ନାୟ୍କାୟ୍ବର୍ରମର୍!” ଏଲୀୟନ୍ ଆନିନ୍ ଆଡଅଙ୍ ଜାଲଙେନ୍ “ଆମ୍ୱେନ୍ କନ୍ନାୟ୍କାୟମର୍! ଆମ୍ୱେନ୍ ଆଜାଡି ଇଶ୍ୱରନ୍ ଅଡକୋଡିନ୍ନାନ ଆପ୍ରବୁ ଏଉମ୍ରେଙନ୍ ଡ ବାଲ୍ କୋଣ୍ତାୟ୍ସନୁମନ୍ ଆଡଅଙ୍ ଏପୁର୍ରେନ୍। ଇସ୍ରାଏଲ ଆରାଜ୍ୟ ଅଡକୋ ମଡ୍ରାଞ୍ଜି କର୍ମିଲ ଆବର୍ରୁ ଓରୋଞାଜି।”
୪୫୦ ବାଲ୍ ପୁର୍ରବାଃତେବର୍ନେମର୍ଞ୍ଜି ସରିନ୍ ଇସ୍ରାଏଲ ଆରାଜ୍ୟ ଅଡକୋନ୍ ଆମଡ୍ରାଜି କର୍ମିଲ ବରୁନ୍ ଜିର୍ରାଜି। ଏଲିୟନ୍ ମଡ୍ରାଞ୍ଜି ଆଡଅଙ୍ ବର୍ରେଞ୍ଜି, “ଆମ୍ୱେଞ୍ଜି ଡିଅଙ୍ ଡିନ୍ନା ଏନବ୍ ଆବ୍ୟର୍ରବୁଡ୍ଡିଲନ୍ ଏଡକୋତନେ? ଅଡକୋଡିନ୍ନା ଆପ୍ରବୁ ଈଶ୍ୱର ଡେନ୍ ଆମ୍ୱଞ୍ଜି ଆନିନ୍ ସେବାବା! ଡ ବାଲ୍ କଣ୍ତାୟ୍ସନୁମନ୍ ଈଶ୍ୱର ଡେନ୍ ଆନିନ୍ ସେବାବା!”
ତି ଆତିକ୍କି ଏଲୀୟନ୍ ବାଲ୍ ପୁର୍ବାଃବର୍ନେମର୍ରଞ୍ଜି ଆଡଅଙ୍ ବର୍ରେନ୍ “ଅବୟ୍ କିମ୍ମେଡନ୍ ରବ୍ବୁବା ଆରି ତି ଆନିନ୍ ଅମନଙନ୍ ତନିୟନ୍ ଆସନ୍ ଅବ୍ଜାଡାବା, ବନ୍ଡ ତେତ୍ତେ ତଗୋନ୍ ଏସୟ୍ଡଙେ । ଞେନ୍ନିୟ୍ ଏତ୍ତେଲେ ତୁବ୍ତାୟ୍। ଅଙ୍ଗା ଆଈଶ୍ୱର ତଗୋନ୍ ବାତ୍ତେ କଡ଼ାଡିତନ୍ ଆନିନ୍ ଆଜାଡି ଈଶ୍ୱରନ୍।” ତି ଆସନ୍ ବାଲ୍ ପୂର୍ବଃତେ ବର୍ନେମରଞ୍ଜି ଅବୟ୍ ତନମ୍ଫିଲନ୍ ତୁବେଞ୍ଜି ଡ ତେତ୍ତେ ତଗୋନ୍ ଅସ୍ସୟ୍ଲଜି।
ତିଆତିକ୍କି ବାଲ୍ ପୂର୍ବାଃତେବର୍ନେ ମରଞ୍ଜି ବାଲ୍ ସନୁମନ୍ ଆମଙ୍ ବେବ୍ବର୍ରଞ୍ଜି “ବାଲ୍, ବେବ୍ବର୍ନେଲେନ୍ ଅମ୍ଡଙା !” ତମ୍ଫରୁବ୍ ଆନିଞ୍ଜି ବେବ୍ବର୍ରଞ୍ଜି ଡ ଅବ୍ସର୍ରଙ୍ଲନ୍ ବାବ୍ବାବେଞ୍ଜି ଆରି ଆନିଞ୍ଜିଡମ୍ କୁଣ୍ତିନ୍ ବାତ୍ତେ ଗଡ୍ଲଞ୍ଜି ବନ୍ଡ ଇନ୍ନିଙ୍ ଆଜନାଲଙ୍ ଅଞାଙ୍ଲଜି।
ଆସାଲ୍ଲୁମନ୍,ଏଲିୟନ୍ ଈଶ୍ୱରନ୍ ଆମଙ୍ ଅବୟ୍ ଅନମଙନ୍ ଅବ୍ଜାଡାଏନ୍। ତି ସିଲଡ୍ ଆନିନ୍ ମନ୍ଡ୍ରାଞ୍ଜି ଆଡଅଙ୍ ବରେଞ୍ଜି ତନମ୍ଫିଲ୍ଲୋଙନ୍ ଜେଲୁନ୍, ଅଙଲନ୍ ଏନ୍ନେଲେ ଡ ତନମ୍ଫିଲନ୍ ଏର୍ରେ ଆଲବରେଙ୍ ଡାଆନ୍ ବାତ୍ତେ ମେଡ୍ରନ୍ ଅନ୍ଡ୍ରଙ୍ ଡାଡାଏନ୍ ଜାୟ୍ ବାରଟା ଆସୋଡା ସୁତ୍ତିଲୋଙ୍ ଡାଆନ୍ ଲନାନ୍ ଆସନ୍ ବରେଞ୍ଜି।
ତି ଆତିକ୍କି ଏଲିୟନ୍ ବେବ୍ବର୍ରନେ “ଏ ଅବ୍ରାମନ୍ ,ଇସାକନ୍ ଡ ଯାକୁବନ୍ ଆଈଶ୍ୱର ଡିତାନ୍ ଆପ୍ରବୁ, ଲଙେ ଇନ୍ଲେଞ୍ଜି ଆଡଅଙ୍ ଅବ୍ତୁୟ୍ଲେନ୍ ଡ ଆମନ୍ ଇସ୍ରାଏଲନ୍ ଆଈଶ୍ୱର ଆରି ଞେନ୍ ସନେବାମର୍ନମ୍। ଞେନ୍ ଜାଲଙିୟ୍ ଏଙ୍ଗାଲେ କେନ୍ ଅଡକୋ ମନ୍ଡ୍ରାନ୍ ଜନାତଜି ଡ ଆମନ୍ ଆଜାଡି ଈଶ୍ୱରନ୍।”
ତେରଙ୍, ରୁଆଙନ୍ ସିଲଡ୍ ତଗୋନ୍ ଅସେଡ୍ଲେ ତନମ୍ଫିଲ୍ଲୋଙନ୍ ଡକୋନ୍ ଜେଲୁନ୍, ଅଙଲନ୍ ଅରେଙନ୍ ,ଆଉମରିଲନ୍ ଏନ୍ନେଲେ ଡ ତନମ୍ଫିଲ୍ଲୋଙନ୍ ଏର୍ରେ ଡକୋନ୍ ଆଡାଆନିୟ୍ ଞାରେନ୍। ମନ୍ଡ୍ରାଞ୍ଜି ଏଙ୍ଗାଲେ କେନ୍ ଆତ୍ତେ ଗିଜେଞ୍ଜି, ଆନିଞ୍ଜି ଲବନ୍ ଲାବ୍ବତୟ୍ଲନ୍ ବର୍ରଞ୍ଜି, “ଅଡ୍କୋଡିନ୍ନା ଆପ୍ରବୁମା ଈଶ୍ୱରନ୍ ! ଅଡ୍କୋଡିନ୍ନା ଆପ୍ରବୁମା ଈଶ୍ୱରନ୍ !”
ତି ସିଲଡ୍ ଏଲିୟନ୍ ଗାମେନ୍ “ବାଲ ପୂର୍ବାଃତେବର୍ନେମର୍ଜି ଅଡ଼ୁର୍ରେଜନିରନ୍ ଏତିୟ୍ଡଙ୍ଜି !” ତିଆସନ୍ ମନ୍ଡ୍ରାଞ୍ଜି ବାଲ ପୂର୍ବାଃତେବର୍ନେମର୍ଜି ଞମ୍ଲେ ସମ୍ବ୍ବବେଞ୍ଜି।
ତି ଆତିକ୍କି ଏଲିୟନ୍ ଆହବନ୍ ଆଡଅଙ୍ ବରେନ୍, “ଗଡାନ୍ ଲୟର୍ନା, ଇନିଆସନ୍ ଗାମେଣ୍ତେନ୍ ତରୁବନ୍ ଅଡୋତାୟ୍।” ଅବ୍ତାଡନ୍ ରୁଆଙନ୍ ୟଗାଏନ୍ ଡ ଗୋଗୋୟ୍ ତରୁବନ୍ ଅଡୋଲାୟ୍। ଯିହୋବାନ୍ କାନ୍ତାରାନ୍ ଅବ୍ଗଡେନ୍ ଆରି ଆନିନ୍ ଅବୟ୍ ଆଜାଡି ଈଶ୍ୱର ଗାମ୍ଲେ ଅବ୍ତୁଜେନ୍।
ଏଲିୟନ୍ ଆଡିନ୍ନା, ଈଶ୍ୱରନ୍ ଇଲିଶାୟ୍ ଗାମ୍ଲେ ଅବୟ୍ ମନ୍ଡ୍ରାନ୍ ଆପୁର୍ବାଃତେ ବର୍ନରମର୍ ଆସନ୍ ବାସ୍ସେଏନ୍। ଈଶ୍ୱରନ୍ ଇଲିଶାୟନ୍ ଆସିଲୋଙ୍ ଜବ୍ର ସାନ୍ନିଆଲୁମନ୍ ଲୁମେନ୍। ନାମାନନ୍ ଆସନ୍ ଅବୟ୍ ସାନ୍ନିଆଲୁମନ୍ ଡେଏନ୍,ଆନା ଅବୟ୍ ବନେରା ସିପାଇଞ୍ଜି ଆସୋଡା ଡକୋଏନ୍, ଆନା ବରନ୍ତଙନ୍ ଆଉସାଲ୍ ରୋଗନ୍ ଞାଙେନ୍। ଆନିନ୍ ଇଲିଶାୟନ୍ ଆବର୍ନେ ଅମ୍ଡଙେନ୍ ତି ଆସନ୍ ଆନିନ୍ ଇୟ୍ଲେ ମନବ୍ନଙନ୍ ଆସନ୍ ଇଲିଶାୟନ୍ ଆଡଅଙ୍ ବରେନ୍। ଇଲିଶାୟନ୍ ନାମାନନ୍ ଆଡଅଙ୍ ଯର୍ଦ୍ଦନ ଅଳୋଙନ୍ ସାତ ତର ତବ୍ବୁବ୍ନେନ୍ ଆସନ୍ ବରେନ୍।
ଆପରର୍ତ୍ତମ୍ମୁନ୍ ନାମାନନ୍ ବରାବେନ୍ ଡ ତି ଆତେ ଅଲ୍ଲୁମ୍ଲୋ ଇନିଆସନ୍ ଗାମେଣ୍ତେନ୍ ଆନିନ୍ କେନ୍ ଆତେ କନଣ୍ତାୟ୍ଗୋ ଅବ୍ଡୋସାଏନ୍। ବନ୍ଡ ତିକ୍କି ଆଓୟୋଙ୍ ଆନିନ୍ ଆବ୍ଡିଡ୍ ବୁଡ୍ଡିଲନ୍ ଯର୍ଦ୍ଦନଲୋଙନ୍ ସାତତର ତବ୍ବୁବ୍ଡାଲନେ। ଆନିନ୍ ଏଙ୍ଗାଲେ ଆତନିକ୍କି ତର ଆସନ୍ ଡାଆଲୋଙନ୍ ସିଲଡ୍ ତବ୍ବୁବ୍ଲନ୍ ଡୁଙଲନାୟ୍ ତି ଆଡିତ୍ ଆଉସାଲନ୍ ମେଡ୍ରନ୍ ମନଙେନ୍। ଈଶ୍ୱରନ୍ ଆନିନ୍ ଆଡଅଙ୍ ଅବ୍ସୁକ୍କାଏନ୍।
ଈଶ୍ୱରନ୍ ଆରି ଆନ୍ନା ପୁରବାଃତେ ବର୍ନେମରଞ୍ଜି ଆପ୍ପାୟ୍ଲାୟ୍। ଆନିଞ୍ଜି ଆଡ୍କୋଞ୍ଜି ମନ୍ଡ୍ରାଞ୍ଜି ଆଡଅଙ୍ କୋଙ୍ଡାୟ୍ସୁମ୍ ପୁରନ୍ ଅନମ୍ରେଙନ୍ ଆସନ୍ ବରେଞ୍ଜି ଡ ଆନ୍ନାମରଞ୍ଜି ଆଡଅଙ୍ ନିଆୟନ୍ ଡ କାନକାରମ୍ଗିୟ୍ ଆସନ୍ ବରେଞ୍ଜି। ପୁର୍ବାଃତେ ବର୍ନେମରଞ୍ଜି ମନ୍ଡ୍ରାଞ୍ଜି ଆଡଅଙ୍ ଅବ୍ତରକ୍କଲେ ବରେଞ୍ଜି ଡ ଆନିଞ୍ଜି ଇର୍ସେଲୁମନ୍ ଅନ୍ନମ୍ରେଙ୍ ଲଜିଡେନ୍ ଡ ଈଶ୍ୱରନ୍ ଆବନାଞ୍ ଅମ୍ମାନ୍ନେଲଜିଡେନ୍, ଈଶ୍ୱରନ୍ ଆନିଞ୍ଜି ଆଡଅଙ୍ ଅବ୍ଡୋସାଲେ ପନ୍ସୁଆତିତଜି ଡ ଆନିଞ୍ଜି ଆଡଅଙ୍ ପନରଡନ୍ ତିୟତଜି।
ଲାଙ୍ଲେଡ୍ ଆଡିନ୍ନା ମନ୍ଡ୍ରାଞ୍ଜି ଈଶ୍ୱରନ୍ ଆବନାଞ୍ ଅମ୍ମାନ୍ନେଲଜି। ଆନିଞ୍ଜି ତି ଆବେଡା ପୁର୍ବାଃତେବର୍ନେମରଞ୍ଜି ସରିନ୍ ମନଙ୍ ଅଞନ୍ଡ୍ରମ୍ଲଞ୍ଜି ଆରି ଏନ୍ନେଲ୍ ଡ ଆନିଞ୍ଜି ଆଡଅଙ୍ ସମ୍ବବେଞ୍ଜି। ବତର, ଯିରିମିୟ ପୂର୍ବାଃତେବର୍ନେମରନ୍ ଆଡଅଙ୍ ଅବୟ୍ ଆସର୍ କୁଆଲୋଙନ୍ ପିଡେଞ୍ଜି ଡ ଆନିନ ଆଡଅଙ୍ ରନବ୍ବୁ ଆସନ୍ ଆତିନ୍ସନ୍ ଅନମ୍ରେଙନ୍ ଡେଏନ୍। ଆନିନ୍ କୁଆନ୍ ଆକାଡ୍ଡୋଲୋଙ୍ ତଗିଲେନ୍ ଡ ରାଜାନ୍ ଆନିନ୍ଲୋଙ୍ କାନକାରମ୍ ଡାଏନ୍ ଡ ଯିରିମିୟନ୍ ଅନ୍ଡ୍ରଙ୍ ରବୁଏନ୍ କୁଆନ୍ ସିଲଡ୍ ତବ୍ଲେ ଅନୋରୋଙନ୍ ଆସନ୍ ଆକମ୍ୱାରିଞ୍ଜି ବାଞେନ୍।
ପୁର୍ବାଃତେବର୍ନେମରଞ୍ଜି ଆଡଅଙ୍ ମନ୍ଡ୍ରାଞ୍ଜି ସଙ୍ଗତ୍ତାଏଞ୍ଜି ଜନଙ୍ଡେନ୍ ଆନିଞ୍ଜି ଈଶ୍ୱରନ୍ ଆସନ୍ ବର୍ନେନ୍ ବର୍ରଞ୍ଜି। ଆନିଞ୍ଜି ମନ୍ଡ୍ରାଞ୍ଜି ଆଡଅଙ୍ ଅବ୍ତରକ୍କଲେ ବରେଞ୍ଜି ଡ ଆନିଞ୍ଜି ଅମ୍ମୁର୍ସେଲଞ୍ଜି ଡେନ୍ ଈଶ୍ୱରନ୍ ଆନିଞ୍ଜି ଆଡଅଙ୍ ଅମ୍ମୋସ୍ସାତଜି। ଈଶ୍ୱରନ୍ ଆନାପ୍ପାୟ୍ମର୍ କ୍ରିଷ୍ଟନ୍ ଇୟ୍ତାୟ୍ ଗାମ୍ଲେ ତି ଆସନିବ୍ଡୟ୍ବର୍ ନିୟ୍ ମନ୍ଡ୍ରାଞ୍ଜି ଆଡଅଙ୍ ଅବ୍ନିୟ୍ୟମେଞ୍ଜି।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍: ୧ରାଜାବଳୀ ୧୬-୧୮; ୨ରାଜାବଳୀ ୫; ଯିରିମିୟ ୩୮
Free to use, adapt, and share under an open license (CC BY-SA 4.0).