20. ଅନମ୍ଡୁଙନ୍ ଡ ୟର୍ରନେନ୍
ବାଗୁନ୍ ଇସ୍ରାଏଲ ରାଜ୍ୟନ୍ ଡ ଯିହୁଦା ରାଜ୍ୟନ୍ ଇଶ୍ୱରନ୍ ସଙ୍ଗତାଲେ ଇର୍ସେନ୍ ଲୁମେଞ୍ଜି। ଈଶ୍ୱରନ୍ ସୀନୟ ବରୁଲୋଙନ୍ ଆନିଞ୍ଜି ସରିନ୍ ଅଙ୍ଗା ଆନୋକ୍କା ଡକୋଏଞ୍ଜି ଆନିଞ୍ଜି ତି ଆନୋକ୍କା ଅମ୍ମାନେଲୋଜି। ମଡ୍ରାନ୍ଞ୍ଜି ଏଙ୍ଗାଲେ ମୁର୍ସେତଞ୍ଜି ଡ ଆରି ଆନିନ୍ ଆଡଅଙ୍ ପୁର୍ତଜି ତିଆସନ୍ ଈଶ୍ୱରନ୍ ଆପୁର୍ବାଃତେବର୍ନେମର୍ଞ୍ଜି ଆପ୍ପାୟଲେ ଅବ୍ତରକ୍କେଏଞ୍ଜି, ବନ୍ଡ ଆନିଞ୍ଜି ତି ଆତ୍ତେ ମନ୍ନାନେନ୍ ଆସନ୍ ଅସାଏଞ୍ଜି।
ତି ଆସନ୍ ଇଶ୍ୱରନ୍ ବାଗୁନ୍ ଆରାଜ୍ୟଞ୍ଜି ଆବେନାରାମର୍ଜି ଆସିଲୋଙ୍ ମୋସ୍ସାନେନ୍ ଆସନ୍ ବାଞେଞ୍ଜି। ଅବୟ୍ ବୋର୍ସା ଡ କାନକାରମନ୍ ଅଗ୍ଗାମେନ୍ ଆଡେସା ଆସିରୀୟ ଡେସା ଇସ୍ରାଏଲ ରାଜ୍ୟନ୍ ଆଡଅଙ୍ ଅବ୍ମୋସାଏନ୍। ଇସ୍ରାଏଲ ଲୋଙନ୍ ଡକୋନ୍ ଅଡକୋନ୍ ଆମଡ୍ରାଜି ଆଡଅଙ୍ ଆସିରୀୟଞ୍ଜି ସମ୍ବବେଞ୍ଜି, ଡାବୋଡମନ୍ ଆଜନବ୍ଜି ପାଙେଞ୍ଜି ଆରି ଡେସାନ୍ ଲାଙଲେଡ୍ ରେଙ୍ ସୟେଞ୍ଜି।
ଆସିରୀୟଞ୍ଜି ଗମାଙ୍ମର୍ନ, ଡନେମର୍ରଞ୍ଜି ରୁକ୍କୁଏଞ୍ଜି ଡ ଆନିଞ୍ଜି ଞମ୍ଲେ ଆସିରୀୟନ୍ ଜିର୍ରେଞ୍ଜି। ଡ ସନାୟ୍ସାୟ୍ ଇସ୍ରାଏଲମର୍ରଞ୍ଜି ତୁମ୍ ଆନ୍ନାଜି ଅସମ୍ବଲଜି ଆନିଞ୍ଜି ଇସ୍ରାଏଲ ରାଜ୍ୟଲୋଙନ୍ ଡକୋଲଜି।
ତି ଆତିକ୍କି ଆସିରୀୟଞ୍ଜି ଆନ୍ନା ଡେସାମର୍ରଞ୍ଜି ଆଡେସାଲୋଙଞ୍ଜି ଡକୋନେନ୍ ଆସନ୍ ଓରୋଙଲାଜି ଅଙ୍ଗାଲୋଙ୍ ଇସ୍ରାଏଲ ରାଜ୍ୟ ଡକୋଏନ୍। ତି ଆନ୍ନା ଆଡେସାମର୍ରଜି ଗଡାଞ୍ଜି ଆରି ତୁବେଞ୍ଜି ଅଙ୍ଗାଜି ଆତେ ମୋସାଜେନ୍ ଡ ଇସ୍ରାଏଲୀୟଞ୍ଜି ସରିନ୍ ବିବାଲଞ୍ଜି ଅଙ୍ଗାଲୋଙ୍ ଆନିଞ୍ଜି ଡକୋଲଞ୍ଜି। ଅଙ୍ଗା ଆଇସ୍ରାଏଲୀୟ ଆକେଜ୍ଜା ଆନ୍ନା ଆଡେସାମର୍ରଞ୍ଜି ସରିନ୍ ବିବାଲଞ୍ଜି ଆନିଞ୍ଜି ଆଡଅଙ୍ ଶମିରୋଣୀୟ ଗାମେଞ୍ଜି।
ଯିହୁଦୀରାଜ୍ୟନ୍ ଆମନ୍ଡ୍ରାଜି ଗିଜେନ୍ଜି ଡ ଇସ୍ରାଏଲ ଡେସାନ୍ ଆମନ୍ଡ୍ରାଜି ଈଶ୍ୱରନ୍ ଆଡଅଙ୍ ଅଡର୍ରଞ୍ଜି ଡ ଆବନାଞନ୍ ଅମ୍ମାନେଲଞ୍ଜି ଈଶ୍ୱରନ୍ ଆନିଞ୍ଜି ଆଡଅଙ୍ ପନରଡନ୍ ତିୟେଞ୍ଜି। ବନ୍ଡ ଆନିଞ୍ଜି କିଣାନୀୟଞ୍ଜି ଆସନୁମ୍ଞ୍ଜି ଡ କଣ୍ତାୟ୍ସୁମଞ୍ଜି ପୁର୍ରେଞ୍ଜି। ଆନିଞ୍ଜି ଆତରକ୍କାୟ୍ ଆସନ୍ ଈଶ୍ୱରନ୍ ପୁର୍ବାଃତେବର୍ନେମର୍ଞ୍ଜି ଆପ୍ପାୟଲାୟ୍, ବନ୍ଡ ଆନିଞ୍ଜି ଅନମ୍ଡଙନ୍ ଆସନ୍ ଆଲ୍ଲେଏଞ୍ଜି।
ଆସିରୀୟଞ୍ଜି ଇସ୍ରାଏଲ ରାଜ୍ୟନ୍ ଅବ୍ମୋସାଲେ ୧୦୦ ବର୍ଷେଙ୍ ଆତିକ୍କି, ଇଶ୍ୱରନ୍ ବାବିଲନ୍ ଆରାଜା ନବ୍ଖୁଦ୍ନିତ୍ସରନ୍ ଆଡଅଙ୍ ଯିହୁଦାନ୍ ଆସୁନେ ଆସନ୍ ଆପ୍ପାୟେନ୍। ବାବିଲୋନନ୍ ଅବୟ୍ ବୋର୍ସା ଡେସାନ୍ ଡକୋଏନ୍। ଯିହୁଦାନ୍ ଆରାଜା ନବ୍ଖୁଦ୍ନିତ୍ସରନ୍ ଆକମ୍ୱାରୀନେନ୍ ଆସନ୍ ମାନ୍ନେଏଞ୍ଜି ଡ ଡିଲବର୍ଷେଙ୍ ଆନିନ୍ ଗୋଗୋୟ୍ ଡାବୋନ୍ ତିୟେଞ୍ଜି।
ବନ୍ଡ ଅସୋୟ୍ ବର୍ଷେଙ୍ ଆତିକ୍କି, ଯିହୁଦାନ୍ ଆରାଜା ବାବିଲୋନନ୍ ଆଡଅଙ୍ ସଙ୍ଗତାଏଞ୍ଜି। ତିଆସନ୍, ବାବିଆଲୋନୀୟଞ୍ଜି ୟର୍ରନ୍ ଯିହୁଦା ରାଜ୍ୟନ୍ ସୁଏଞ୍ଜି। ଆନିଞ୍ଜି ଯିରୁଶାଲମ ଗଡାନ୍ ଆନିଞ୍ଜି ଏମ୍ମେଲଞ୍ଜି, ମନ୍ଦିରସିଙନ୍ ଅମ୍ମୋସାଏଞ୍ଜି ଡ ଗଡାନ୍ ଡ ମନ୍ଦିରନ୍ ଆତଙ୍କା ପାଙଲେ ଜିର୍ରେଞ୍ଜି।
ସନଙ୍ଗତାଲୋଙନ୍ ଯିହୁଦା ରାଜ୍ୟ ପନରଡନ୍ ତନିୟନ୍ ଆସନ୍ ନବୁଖୁଦନିତ୍ସରଞ୍ଜି ଆସିପାଇଜି ରାଜାନ୍ ଆତେମଡନ୍ ଆଡାଙ୍ଗଡା ଅନନଞ୍ଜି ସମ୍ୱବେଞ୍ଜି ଡ ଆନିନ୍ ଅବ୍କାଡୁଏଞ୍ଜି।ତି ଆତିକ୍କି, ଆନିନ୍ ଏଙ୍ଗାଲେ ବାବିଲୋନନ୍ ଆବଣ୍ତିସିଂଲୋଙନ୍ ରବ୍ବୁତେ ତି ଆସନ୍ ଆନିଞ୍ଜି ଆନିନ୍ ଆଡଅଙ୍ ବାବିଲୋନନ୍ ଓରୋଙେଞ୍ଜି।
ନବ୍ଖୁଦ୍ନିତ୍ସରନ୍ ଡ ଆସିପାଇଜି ଯିହୁଦାନ୍ ଅଡକୋନ୍ ପରାଞ୍ ଆମନ୍ଡ୍ରା ବାବିଲୋନନ୍ ଓରଙେଞ୍ଜି ଡ ବଷେଙ୍ କବ୍ବାଡାନ୍ ଆସନ୍ ସନାୟ୍ସାୟ ମର୍ରଞ୍ଜି ଯିହୁଦାଲୋଙନ୍ ଉମ୍ରେଙଲେ ଜିର୍ରେଞ୍ଜି। ଈଶ୍ୱରନ୍ ମନ୍ଡ୍ରାଞ୍ଜି ଆଡଅଙ୍ ସିବ୍ଡେୟ୍ ଡେସାନ୍ ସିଲଡ୍ ବଡଗାଁୟ୍ ଅନୋରୋଙନ୍ ଆବେଳା ଅନମ୍ଡୁଙନ୍ ଗନାମନ୍ ଡେଏନ୍।
ଇର୍ସେଲୋଙନ୍ ଈଶ୍ୱରନ୍ ଆନିଞ୍ଜି ଆଡଅଙ୍ ଅମଡୁଙ୍ଲେ ଆନ୍ନା ଆଡେସା ଆପ୍ପାୟେନ୍ ଜନଙ୍ଡେନ୍ ଆନିନ୍ ଆନିଞ୍ଜି ଆଡଅଙ୍ ଡ ଆସନିବ୍ଡେୟ୍ ବର୍ରଞ୍ଜି ଅକରୋଡାଲୋ। ଈଶ୍ୱରନ୍ ଆମନ୍ଡ୍ରାଞ୍ଜି ଆଉପ୍ରେଙ୍ ଗିୟଲ୍ଲେ ଡକୋଲନେ ଡ ଆପୁର୍ବାଃବର୍ନେମର୍ରଞ୍ଜି ଲୋଙ୍ ଆନିଞ୍ଜି ବନରନ୍ ବର୍ରେଞ୍ଜି। ଆନିନ୍ ସିବ୍ଡେୟ୍ଲନ୍ ଡ, ସତୁରି ବର୍ଷେଙ୍ ଆତିକ୍କି ଆନିଞ୍ଜି ଆରି ସନିବ୍ଡେୟ୍ ଡେସାନ୍ ୟର୍ରତନାଜି।
ସତୁରି ବର୍ଷେଙ୍ ଆତିକ୍କି, ପାର୍ସୀଞ୍ଜି ଆରାଜା ସାଇରସନ୍ ବାବିଲୋନନ୍ ଅବ୍ବାରେଏନ୍, ତି ଆସନ୍ ବାବିଲୋନିୟନ୍ ଆରାଜ୍ୟ ପାରସ୍ୟନ୍ ଆରାଜ୍ୟ ଡେଲୋ। ନମି ଇସ୍ରାଏଲିୟଞ୍ଜି ଆଡଅଙ୍ ଯିହୁଦି ଗନାମନ୍ ଡେଲୋ ଡ ଆନିଞ୍ଜି ଆଡଅଙ୍ ଡିଲ୍ଲେଡିନ୍ନା ବାବୋଲୋନନ୍ ଡକୋଲଞ୍ଜି। ଅସୋୟ୍ ବୁ୍ଡାମର୍ରଞ୍ଜି ତୁମ୍ ଯିହୁଦା ରାଜ୍ୟନ୍ ଇୟ୍ୟମେଞ୍ଜି।
ପାରସ୍ୟ ଆରାଜ୍ୟ ରଡ୍ଡୋ ଡକୋଏନ୍ ବନ୍ଡ ଆନିଞ୍ଜି ଅଙ୍ଗା ଆଡେସା ଜିନୟେଞ୍ଜି ଆଉପ୍ରେଙନ୍ କାନ୍କାରମେଞ୍ଜି। ସାଇରସ୍ ପାରସ୍ୟନ୍ ଆରାଜା ଡେଏନ୍ କି ଅସୋୟ୍ ଡିନ୍ନାଲୋଙ୍, ଆନିନ୍ ଅବୟ୍ ବନାୟନ୍ ବାଞେଞ୍ଜି ଡ ଆନ୍ନା ଜାୟ୍ ପାରସ୍ୟ ଡେସାନ୍ ଉମ୍ରେଙଲେ ୟରର୍ନେ ସାୟ୍ତେ ଆନିନ୍ ୟରର୍ନ ଏରପ୍ତିତେ। ଆନିନ୍ ଏନେଲେ ଡ ମନ୍ଦିରସିଙନ୍ ଆବାର୍ତନୁବନ୍ ଆସନ୍ ତଙ୍କାନ୍ ତିୟେଞ୍ଜି। ଅନମ୍ଡୁଙନ୍ ସତୁରି ବର୍ଷେଞ୍ ଆତକ୍କି, ଯିହୁଦୀଞ୍ଜି ଅସୋୟ୍ନେ ଯିହୁଦାଲୋଙ ଡକୋନ୍ ଯିରୁଶାଲମ ଗଡାନ୍ ୟର୍ରନାଜି।
ମଡ୍ରାଞ୍ଜି ଏଙ୍ଗାଲେ ଜିରୁଶାଲମନ୍ ତୁଙେଞ୍ଜି, ଆନିଞ୍ଜି ମନ୍ଦିରନ୍ ଡ ଗଡାନ୍ ଆଏର୍ରେ ଡକୋନ୍ ଆକିନ୍ତାଲ୍ତତର୍ତରନ୍ ବାର୍ତୁବେଞ୍ଜି। ନମି ଆନ୍ତାନ୍ ଆନିଞ୍ଜି ଆନ୍ନା ଆଡେସା ଆମର୍ରାଜିଲୋଙ୍ ଶାସନ ଞାଙେଞ୍ଜି ଜାୟ୍ ଡେନ୍ ଆନିଞ୍ଜି ସନିବ୍ଡେୟ୍ ଡେସାନ୍ ଡକୋଲଞ୍ଜି ଡ ମନ୍ଦିରଲୋଙନ୍ ପୁର୍ପୁର୍ରଞ୍ଜି।
ବାଇବଲନନ୍ ଅବୟ୍ ଅନବ୍ଜଙବର୍ର: ୨ ରାଜାବଳୀ ୧୭:୨୪-୨୫; ୨ ବଂଶାବଳୀ ୩୬; ଏଜ୍ରା ୧-୧୦; ନିହିମିୟା ୧-୧୦
Free to use, adapt, and share under an open license (CC BY-SA 4.0).