21. ଈଶ୍ୱରନ୍ କ୍ରୀଷ୍ଟନ୍ ଆବର୍ରନେ ସିବ୍ଡେୟ୍ତନେ
ଆମୁଙ୍ମା ଈଶ୍ୱରନ୍ କ୍ରୀଷ୍ଟନ୍ ଆପ୍ପାୟ୍ ଆସନ୍ ଇଯ୍ୟମେନ୍। କ୍ରୀଷ୍ଟନ୍ ଆସନିବ୍ଡେୟ୍ ବର୍ରନେ ଆପର୍ତମୁନ୍ ଆଦମନ୍ ଡ ହବାନ୍ ଞାଙେଞ୍ଜି। ଈଶ୍ୱରନ୍ ସିବ୍ଡେୟ୍ବର୍ରନ୍ ଡ ହବାନ୍ ଆକେଜ୍ଜାଲୋଙ ଅବୟ୍ନେ କନୋଡନ୍ ଡେତେ ଆନ୍ନା ଜାଆଡନ୍ ଆବ୍ବବ୍ ସମନ୍ତେ। ହବାନ୍ ଆଡଅଙ୍ ଅଙ୍ଗା ଆଜାଆଡ୍ କଣ୍ତାୟେନ୍ ଆନିନ୍ ସନୁମ୍ ଡକୋଏନ୍। ସନିବ୍ଡଜନ୍ ଆଗରାମ୍ଗାମ୍ କ୍ରୀଷ୍ଟନ୍ ମେରନ୍ ସନୁମନ୍ ଆଡଅଙ୍ ଅବ୍ବାରେତେ।
ଈଶ୍ୱରନ୍ ଅବ୍ରାମନ୍ ଆଡଅଙ୍ ସିବ୍ଡୟବର୍ରନ ଡ ଆନିନ୍ ଲୋଙ୍ ଅଡକୋନ୍ ଆପୁର୍ତ୍ତିମର୍ରଞ୍ଜି ଅନବସିତ୍ତାନ୍ ଞାଙ୍ତଜି। କେନ୍ ଆନବ୍ସିତ୍ତାନ୍ ଡନେନ୍ଡେତେ ଅଙ୍ଗାବେଡା କ୍ରୀଷ୍ଟନ୍ ବିଅଜି ଜିର୍ରତାୟ୍. ପୁର୍ତ୍ତେଲୋଙନ୍ ଡକୋନ୍ ଆମନ୍ଡ୍ରାଜି ଅନୁରନ୍ ଞନାଙନ୍ ଆସନ୍ ଆନିନ୍ କେନ୍ ଆତେ ଗବ୍ଡେଲ୍ତେ।
ଈଶ୍ୱରନ୍ ମୋଶାନ୍ ଆଡଅଙ୍ ସିବ୍ଡୟବର୍ରନ୍ ଡ ବିଅଜିମୋଶାନ୍ ଅନ୍ତମ୍ ଅବୟ୍ ପୁର୍ବାଃତେବର୍ନେମର୍ନ ଆଡଅଙ୍ ତବ୍ଙ୍ତେ। କ୍ରୀଷ୍ଟନ୍ ଆସନିବ୍ଡେୟ୍ବର୍ରଲୋଙ ଅବୟ୍ ଆନା ତିକ୍କି ଆଡିନ୍ନା ଜିର୍ରତାୟ୍।
ଈଶ୍ୱରନ୍ ଦାଉଦନ୍ ଆଡଅଙ୍ ସିବ୍ଡୟ୍ବର୍ରନ୍ ଡ ଆକେଜ୍ଜାଲୋଙନ୍ ଅବୟ୍ନେ ମନ୍ଡ୍ରାଞ୍ଜି ଆସନ୍ ଅଡକୋଡିନ୍ନା ରାଜାତନେ। ତି ଆତ୍ତେ ଆଗରାମ୍ଗାମ୍ କ୍ରୀଷ୍ଟନ୍ ରାଜା ଦାଉଦନ୍ ଆକେଜ୍ଜାମର୍ ଡେତେ।
ଯିରିମିୟ ପୂର୍ବାଃତେବର୍ନେମର୍ଞ୍ଜି ବାତ୍ତେ ଈଶ୍ୱରନ୍ ସନିବ୍ଡୟ୍ବର୍ରନ୍ ଡ ଆନିନ୍ ଅବୟ୍ ଆନୋକ୍କା ତୁବ୍ତେ, ବନ୍ଡ ଈଶ୍ୱରନ୍ ଇସ୍ରାଏଲନ୍ ସରିନ୍ ସୀନୟ୍ ଆବରୁଲୋଙ୍ ଆଙ୍ଗା ଆନୋକ୍କା ତୁବେନ୍ ତି ଅନ୍ତମ୍ତଡ୍। ଈଶ୍ୱରନ୍ ମନ୍ଡ୍ରାଞ୍ଜି ଆଗରେଲୋଙ୍ ତି ଆନୋକ୍କାନ୍ ଇଡ୍ତେ ,ମନ୍ଡ୍ରାଞ୍ଜି ରମ୍ମଙ୍ ଅନ୍ତମ୍ ଇଶ୍ୱରନ୍ ଆଡଅଙ୍ ଜନାତଜି,ଆନିଞ୍ଜି ଆମନ୍ଡ୍ରାନ୍ ଡେତଜି ଆରି ଈଶ୍ୱରନ୍ ଆଇର୍ସେଲୋଙଞ୍ଜି ସିଲଡ୍ ତମ୍ମାତଜି। କ୍ରିଷ୍ଟନ୍ ଆନୁଆ ଆନୋକ୍କାନ୍ ସୁସୁତେ।
ଈଶ୍ୱରନ୍ ଆତନାଲ୍ମଡ୍ଗିୟ୍ମର୍ ଆରି ନିୟ୍ ବର୍ରନେ ଡ କ୍ରିଷ୍ଟନ୍ ଅବୟ୍ନ୍ନେ ତନାଲ୍ମଡ୍ଗିୟ୍ମର୍,ପୁର୍ପୁର୍ମର୍ ଆରି ରାଜାନିୟ୍ ଡେତେ। ତନାଲ୍ମଡ୍ଗିୟ୍ମର୍ ତି ଆମନ୍ଡ୍ରା ଆନା ଈଶ୍ୱରନ୍ ଆବର୍ନେ ଅମ୍ଡଙ୍ଲେ ତି ଆବର୍ନେଜି ମନ୍ଡ୍ରାଞ୍ଜି ଆମଙ୍ଲୋଙ୍ ଅପୁଙ୍ବର୍ତନେ। ଈଶ୍ୱରନ୍ ଅନାପ୍ପାୟନ୍ ଆସନ୍ ଆସରିବ୍ଡୟ୍ବର୍ରନ୍ କ୍ରିଷ୍ଟନ୍ ଆଜାଡିନ୍ ତନାମଡ୍ଗୟ୍ମର୍ ଡେତେ।
ଇସ୍ରାଏଲ ଆପୁର୍ପୁର୍ମର୍ଜି ଈଶ୍ୱରନ୍ ଆମଙ୍ ମନ୍ଡ୍ରାଞ୍ଜି ଆମଙ୍ଗଡ୍ ଆଇର୍ସେଞ୍ଜି ଆପନରଡନ୍ ଆପାଲ୍ନ୍ତେଙ୍ ତନମ୍ଫିଲ୍ଲୋଙନ୍ ତନିତିୟନ୍ ତିୟେଞ୍ଜି। ପୁର୍ପୁର୍ମରଞ୍ଜିନିୟ୍ ଈଶ୍ୱରନ୍ ଆମଙ୍ ମନ୍ଡ୍ରାଞ୍ଜି ଆସନ୍ ବେବ୍ବର୍ରନ୍ ତିୟେଞ୍ଜି। ମସୀହନ୍ ଆଜାଡି ସୋଡା ପୁର୍ପୁର୍ମର୍ ଆନା ଆନିନ୍ଡମ୍ ଈଶ୍ୱରନ୍ ଆମଙ୍ ଅବୟ୍ ଆଜାଡିନ୍ ତନିୟନ୍ ଅନ୍ତମ୍ ତିୟ୍ଡମ୍ତନେ।
ଅବୟ୍ ରାଜାନ୍ ତି ଆମନ୍ଡ୍ରା ଆନା ଅବୟ୍ ରାଜ୍ୟଲୋଙନ୍ ଡନେତେ ଡ ତି ଆମନ୍ଡ୍ରାଞ୍ଜି ଆଡଅଙ୍ ପନ୍ସୁଆତ୍ତିତଜି । କ୍ରିଷ୍ଟନ୍ ଅବୟ୍ ଆଜାଡି ରାଜା ଡେତେ ଆନା ତି ଆଜୋଜୋଞ୍ଜି ଦାଉଦନ୍ ଆତରଙ୍କୁମ୍ଲୋଙ୍ ତଙ୍କୁମ୍ତେ । ଆନିନ୍ ଅଡକୋ ପୂର୍ତ୍ତିଲୋଙନ୍ ଅଡ୍କୋ ଡିନ୍ନା ଆସନ୍ ରାଜାତନେ,ଆରି ଡିତାନ୍ ଆଜାଡିଡମନ୍ ଆପନ୍ସୁଆତି ଲୁମ୍ତେ ଆରି ଆଜାଡିନ୍ ଆତେ ବର୍ତନ୍ ।
ଈଶ୍ୱରନ୍ ଆତନାଲ୍ମଡ୍ଗିୟ୍ମର୍ଜି ଗୋଗୋୟ୍ ଆନ୍ନା ଆବର୍ନେଜି କ୍ରିଷ୍ଟନ୍ ଆବର୍ନେଜି ପୁର୍ବାନ୍ ବର୍ରଞ୍ଜି । ତନାଲ୍ମଡ୍ଗିୟ୍ମର୍ ମଲାଖିନ୍ ଆମ୍ମୁଙ୍ମା ବର୍ରନେ ଡ ମସିହନ୍ ଆଜ୍ରିର୍ତାଞନ୍ ଆମ୍ମୁଙ୍ ଅବୟ୍ନ୍ନେ ସୋଡା ତନାଲ୍ମଡ୍ଗିୟ୍ମରନ୍ ଜିର୍ତାୟ୍ । ତନାଲ୍ମଡ୍ଗିୟ୍ମର୍ ଯିଶାଇୟନ୍ ପୁର୍ବାନ୍ବର୍ରନ୍ ଡ କ୍ରିଷ୍ଟନ୍ ଅବୟ୍ ଆଇସିଜନ୍ ଆକିମ୍ଫୋଙ୍ଲୋଙ୍ ସିଲଡ୍ କନୋଡନ୍ ଡେତେ । ମୀଖା ତନାଲ୍ମଡ୍ଗିୟ୍ମର୍ ବର୍ରନ୍ ଡ ଆନିନ୍ ବେଥଲିହିମ ଆଗଡାଲୋଙ୍ କନୋଡନ୍ ଡେତେ ।
ଯିଶାଇୟ ତନାଲ୍ମଡ୍ଗିୟ୍ମର୍ ବର୍ରନ୍ ଡ କ୍ରିଷ୍ଟନ୍ ଗାଲିଲିଲୋଙ୍ ଡକୋତନେ, ଆପଲାଙ୍ଗରେମରଞ୍ଜି ଆଡଅଙ୍ ସନବ୍ୟୁନ୍ ତିୟ୍ତେ ,ଆରି ଆବଣ୍ତିମରଞ୍ଜି ଆଡଅଙ୍ ଅନୁରନ୍ ଅପୁଙ୍ବର୍ତନ୍,ଆରି ଆବଣ୍ତି ମରଞ୍ଜି ଉର୍ତଜି । ଆନିନ୍ ଆରିନିୟ୍ ପୁର୍ବାନ୍ ବର୍ରନ୍ ଡ ଆନିନ୍ ଅସୁମରଞ୍ଜି ଆନାଜି ଅମଡଙ୍ଲେ,ଗିୟ୍ଲେ,ବର୍ରନ୍ ଅଡେ ତଞିୟ୍ଲନ୍ ଅର୍ରପ୍ତିଏଜି, ଆନିଞ୍ଜି ଆଡଅଙ୍ ଅବ୍ସୁକ୍କାତଜି ।
ତନାଲ୍ମଡ୍ଗିୟ୍ମର୍ ଯଶାଇୟ ନିୟ୍ ବର୍ରନ୍ ଡ କ୍ରିଷ୍ଟନ୍ ଆଡଅଙ୍ ସନଙ୍ଗତ୍ତାନ୍ ଡେତେ,କାଜ୍ଜାନିୟ୍ ଇଜ୍ଜା ଗନାମନ୍ଡେତେ । ଆନ୍ନା ଆତନାଲ୍ମଡ୍ଗିୟ୍ମର୍ଜି ପୁର୍ବାନ୍ମା ବର୍ରଞ୍ଜି ଡ ଆନାଜି କ୍ରିଷ୍ଟନ୍ ଆଡଅଙ୍ ସମ୍ୱବେଞ୍ଜି ଆନିଞ୍ଜି ତି ଆସିନ୍ଡ୍ରିନ୍ ଆସନ୍ ଅବ୍କଡିତଜି ଆରି ଆବୟ୍ ଅକୁଲମନ୍ ଆନିନ୍ ଆଡଅଙ୍ ଅବ୍ଞମ୍ଞମ୍ତେ । ଯିଖରିୟ ତନାଲ୍ମଡ୍ଗିୟ୍ମର୍ ପୁର୍ବାନ୍ମା ବର୍ରନ୍ ଆନା କ୍ରିଷ୍ଟନ୍ ଅବ୍ଞମ୍ଞମ୍ତେ ତି ଆନିନ୍ ତିରିଶିଟା ରୁପାଡାବନ୍ ତନିୟନ୍ ଡେତେ ।
ତନାଲ୍ମଡ୍ଗିୟ୍ମରଞ୍ଜି ଆରିନିୟ୍ ବର୍ରଞ୍ଜି କ୍ରିଷ୍ଟନ୍ ଆରନବୁ ଏଙ୍ଗାଲେ ଡେତେ । ଯିଶାଇୟନ୍ ପୁର୍ବାନ୍ମା ବର୍ରନେ ଡ ମନ୍ଡ୍ରାଞ୍ଜି କ୍ରିଷ୍ଟନ୍ ଆଡଅଙ୍ କାରିଜ୍ତଜି,ଆନିନ୍ ଆଡଅଙ୍ ତିକ୍କଲାୟ୍ତଜି,ଆରି ଆନିନ୍ ଆଡଅଙ୍ ତିଡ୍ତଜି । ଆନିଞ୍ଜି ଆନିନ୍ ଆଡଅଙ୍ ତାଙ୍ତଜି ଡ ଆନିନ୍ ଗୋଗୋୟ୍ ସତିଡ୍ ସମୟେନ୍ ବାତ୍ତେ ରନବୁନ୍ ଡେତେ ଏନ୍ନେଲ୍ ଡ ଆନିନ୍ ଇନ୍ନିଙ୍ ଆଇର୍ସେ ଅଲ୍ଲୁମ୍ଲୋ ।
ତନାଲ୍ମଡ୍ଗିୟ୍ମରଞ୍ଜି ଆରି ନିୟ୍ ବର୍ରଞ୍ଜି ଡ କ୍ରିଷ୍ଟନ୍ ମଡ଼ିର୍ ଡେତେ ଆନିନ୍ ଇନ୍ନିଙ୍ ଆଇର୍ସେନ୍ ଅଡ୍ଡକୋଏ । ଆନିନ୍ ଆନ୍ନା ଆମନ୍ଡ୍ରାଜି ଆଇର୍ସେଲୋଙ୍ ପନରଡନ୍ ଆଞନାଙ୍ ଆସନ୍ ରନବୁନ୍ ଡେତେ । ତି ଆପନରଡନ୍ ଈଶ୍ୱରନ୍ ଡ ମନ୍ଡ୍ରାଞ୍ଜି ଆମଙ୍ଲୋଙ୍ ସନୟୁନ୍ ପାଙ୍ତାୟ୍ କେନ୍ଆସନ୍ , କ୍ରିଷ୍ଟନ୍ ତନାଙନ୍ ଆସନ୍ ଈଶ୍ୱରନ୍ ଆଇସ୍ସୁମ୍ ଡକୋଏନ୍ ।
ତନାଲ୍ମଡ୍ଗିୟ୍ମରଞ୍ଜି ପୁର୍ବାନ୍ମା ବର୍ରଞ୍ଜି ଡ କ୍ରିଷ୍ଟନ୍ ଆରନବୁ ଡେତେ ଆରି ଈଶ୍ୱରନ୍ ଆନିନ୍ ଆଡଅଙ୍ ରନବୁନ୍ ସିଲଡ୍ ଅବ୍ଡୋତେ । କ୍ରିଷ୍ଟନ୍ ଆରନବୁ ଡ ଆୟର୍ମେଙନ୍ ବାତ୍ତେ ଇର୍ସେମରଞ୍ଜି ଆଡଅଙ୍ ଅନୁରନ୍ ଆରି ଅବୟ୍ ଆନୁଆ ଅନୋକ୍କାନ୍ ଆସନୁସୁ ଆସନ୍ ଈଶ୍ୱରନ୍ ତି ଆନିୟ୍ୟମଞ୍ଜି ଗବ୍ଡେଲ୍ତେ।
ଈଶ୍ୱରନ୍ କ୍ରିଷ୍ଟନ୍ ଆବର୍ନେଜି ତନାଲ୍ମଡ୍ଗିୟ୍ମରଞ୍ଜି ଗୋଗୋୟ୍ ବର୍ନେନ୍ ବର୍ରଞ୍ଜି,ବନ୍ଡ କ୍ରିଷ୍ଟନ୍ କେନ୍ ଅଡ୍କୋ ତନାଲ୍ମଡ୍ଗିୟ୍ମରଞ୍ଜି ଆଡିତ୍ ଅନ୍ନିଙ୍ ଆବେଡା ଅଜ୍ଜିର୍ରାୟ୍ । କେନ୍ ଅଡ୍କୋ ପୁର୍ବାନ୍ମା ଆବର୍ନେଜି ଆତରିୟଞ୍ଜି ୪୦୦ ସିଲଡ୍ ଗୋଗୋୟ୍ ବର୍ଷେଙ୍ ଆତିକ୍କି ,ଗିୟ୍ଲେ ବେଡାନ୍,ଈଶ୍ୱରନ୍ ପୁର୍ତ୍ତିଲୋଙନ୍ କ୍ରୀଷ୍ଟନ୍ ଆପ୍ପାୟ୍ଲାୟ୍ ।
ବାଇବଲଲୋଙନ୍ ଅବୟ୍ ଅନବ୍ଜଙ୍ବର୍: ଆଦି ୩:୧୫; ୧୨:୧-୩; ଦ୍ୱିତୀୟ ବିବରଣ ୧୮:୧୫; ୨ଶାମୁୟେଲ ୭; ଯିରିମିୟ ୩୧; ଯିଶାଇୟ ୫୯:୧୬; ଦାନିୟେଲ ୭; ମଲାଖି ୪:୫ ଯିଶାଇୟ ୭:୧୪; ମୀଖା ୫:୨; ଯିଶାଇୟ ୯:୧-୭; ୩୫:୩-୫; ୬୧; ୫୩; ଗୀତସଂହିତା ୨୨:୧୮; ୩୫:୧୮; ୬୯:୪; ଯିଖରିୟ ୧୧:୧୨-୧୩; ଯିଶାଇୟ ୫୦:୬; ଗୀତସଂହିତା ୧୬:୧୦-୧୧
Free to use, adapt, and share under an open license (CC BY-SA 4.0).