22. ତବ୍ବୁଡାମର୍ର ଯୋହନନ୍ ଆକୋକୋନେ
ପୁର୍ବାନ୍, ଈଶ୍ୱରନ୍ ଆମନ୍ଡ୍ରାଞ୍ଜି ଆଡଅଙ୍ ଆକବରପାଙମର୍ରଞ୍ଜି ଡ ଆପୁର୍ବାଃତେବର୍ନେମର୍ରଞ୍ଜି ସରିନ୍ ବର୍ନେନ୍ ବର୍ରନେ। ବନ୍ଡ ୪୦୦ ବର୍ଷେଙ୍ ଡେଲୋ ସିନା ନମିଆନ୍ତାନ୍ ଆନିନ୍ ଆନିଞ୍ଜି ଆଡଅଙ୍ ଆରି ବର୍ନେନ୍ ଅବ୍ବର୍ରନ୍। ତେରଙ୍ ଅବୟ୍ ଈଶ୍ୱରନ୍ ଆକବରପାଙ୍ମର୍ର କବରନ୍ ପାଙ୍ଲେ ଯିଖରିୟ ଗାମ୍ଲେ ଅବୟ୍ ପୁର୍ରପୁର୍ରମର୍ରନ୍ ଆମଙ୍ ଇୟ୍ଲାୟ୍. ଯିଖରିୟନ୍ ଡ ଆଡୁକ୍ରୀନ୍ ଇଲିଶାବେଥ ଇଶ୍ୱରନ୍ ଆମନାନ୍ନେମର୍ର ଡକୋଏଞ୍ଜି, ବନ୍ଡ ଆନିଞ୍ଜି ଆରି ପସିଜନ୍ ଆକନୋନ୍ ଆସନ୍ ଆନିନ୍ ବୋର୍ସାତଡ୍ ଡକୋଏନ୍।
କବରପାଙ୍ମର୍ରନ୍ ଯିଖରିୟନ୍ ଆଡଅଙ୍ ବର୍ରେନ୍, “ ଡୁକ୍ରୀନମ୍ ଅବୟ୍ ଓବ୍ବାଅନନ କୋତ୍ତେ। ଆମ୍ୱେନ୍ ଆଞୁମନ୍ ଯୋହନ ଗାମ୍ଲେ ଏଡକୋତେ। ଆନିନ୍ ମଡିର୍ପୁରାଡାନ୍ ଞାଙତେ ଡ ଆନିନ୍ କ୍ରୀଷ୍ଟନ୍ ଆସନ୍ ମନ୍ଡ୍ରାଞ୍ଜି ଅବ୍ଜାଡାତଜି। ଯିଖରିୟନ୍ ଜାଲଙେନ୍ “ ଞେନ୍ ଡ ଡୁକ୍ରୀଞେନ୍ ପସିଜନ୍ ଆକ୍କନୋ ଆସନ୍ ଗୋଗୋୟ୍ ବୁଡ୍ଡାଡମ୍ଲେ! କେନ୍ ଆତେ ଡେତେ ଗାମ୍ଲେ ଞେନ୍ ଏଙ୍ଗାଲେ ଜନାଇଁ?”
କବରପାଙ୍ମର୍ରନ୍ ଗାମେନ୍ “କେନ୍ ସର୍ଡାବର୍ର ଆମ୍ୱେନ୍ ଆତନିୟ୍ ଆସନ୍ ଇଶ୍ୱରନ୍ ଞେନ୍ ଆପ୍ପାୟଲିୟ୍। ଡ ଆମନ୍ ଞେନ୍ ଆଡଅଙ୍ ଅଡର୍ରରନେ ତି ଆସନ୍ ଅରଙ୍ପସିବେନ୍ ଜାୟ୍ ଆମନ୍ ଆରି କଡାଡିଲନ୍ ଅରପ୍ତିଏ। ଅବ୍ତାଙନ୍ ଯିଖରିୟନ୍ ବର୍ରନ୍ ଅରପ୍ତିଲୋ। ସିଲଡ୍ ତି ଆକବରପାଙମର୍ର ଜିର୍ରେନ୍। ତି ଆତିକ୍କି, ଯିଖରିୟନ୍ ଅସିଙନ୍ ୟର୍ରନେ ଡ ଆଡୁକ୍ରୀନ୍ ତିଲ୍କୋଡେନ୍।
ଇଲିଶାବେଥନ୍ ଏଙ୍ଗାଲେ ତୁଡ୍ରୁ ଆଙ୍ଗାୟ୍ ଆତେ ତିଲ୍କୋଡେନ୍, ତି ଆକବରପାଙମର୍ର ଇଲୀଶାବେଥନ୍ ଆକୁଲମ୍ ଆଡଅଙ୍ ଅବ୍ତୁୟ୍ଲନେ ଆନା ଆଞୁମ୍ ମରିୟମ ଡକୋଏନ୍। ଆନିନ୍ ଅବୟ୍ ଆଡାଙ୍ଗଡି ଡକୋଏନ୍ ଡ ଯୋଷେଫନ୍ ବାତ୍ତେ ବିବାନେନ୍ ଆସନ୍ ଆବେବେଏ ଡକୋଏନ୍. କବରପାଙମର୍ରନ୍ ଗାମେନ୍ “ ଆମନ୍ ତିଲ୍କୋତମ୍ ଡ ଅବୟ୍ ଓବ୍ବାଅନନ କୋତ୍ତେ। ଆଞୁମନ୍ ଯୀଶୁ ଏତିୟତେ। ଆନିନ୍ ତୋଣ୍ତୋନ୍ ଆଇଶ୍ୱର ଆଡାଙ୍ଗଡା ଅନନ ଡେତେ ଡ ଆନିନ୍ ଅଡକୋଡିନ୍ନା ରାଜାତନେ।
ମରିୟମନ୍ ଜାଲଙଲେ ବର୍ରେନ୍ “ କେନ୍ ଆତେ ଏଙ୍ଗାଲେ ଡେଏ, ଇନି ଆସନ୍ ଗାମେଣ୍ତେନ୍ ଇଞେନ୍ ଅବୟ୍ ଡାଙ୍ଗିଡି?” କବରପାଙମର୍ରନ୍ ଅବ୍ଗଲ୍ଲୁଲେ ବର୍ରେନ୍ “ମଡିର୍ପୁରାଡାନ୍ ଉପ୍ରେଙ୍ନମ୍ ପତ୍ତନାୟ୍, ଡ ଇଶ୍ୱରନ୍ ଆବୋର୍ସା ଆମନ୍ ଆଡଅଙ୍ ଞମ୍ତମ୍। ତି ଆସନ୍ ତି ଆପସିୟ୍ ମଡିର୍ ଡ ଇଶ୍ୱରନ୍ ଆଅନନ ଡେତେ।” କବରପାଙମର୍ରନ୍ ଆନିନ୍ ଆଡଅଙ୍ ଇନିଜି ଗାମେନ୍ ମରିୟମନ୍ ତି ଆତେ ଡର୍ରନ୍ ଅଡେଏନ୍।
କବରପାଙମର୍ରନ୍ ମରିୟମନ୍ ବର୍ରେସାଡେନ୍ ଆତିକ୍କି, ଆନିନ୍ ଇଲିଶାବେଥନ୍ ଆମଙ୍ ଇୟେନ୍। ଇଲିଶାବେଥନ୍ ମରିୟମନ୍ ଆଲ୍ନୋମନ୍ ଅମ୍ଡଙାନ୍ ଅମ୍ଡଙାନ୍ ଇଲିଶାବେଥନ୍ ଆକୁମ୍ପୋଙଲୋଙ ଆପସିୟ୍ ତଙେନ୍। ଆନିଞ୍ଜି ଆସନ୍ ଇଶ୍ୱରନ୍ ଇନିଜି ଲୁମିନ୍ ତି ଆବର୍ନେ ଇୟ୍ୟମ୍ଲେ ଆଇମରଞ୍ଜି ରୁକ୍କୁଲନ୍ ସର୍ଡାଲଞ୍ଜି। ମରିୟମନ୍ ଇଲିଶାବେଥନ୍ ଆଡଅଙ୍ ଅର୍ରବାଙଲେ ୟାଗି ଆଙ୍ଗାୟ୍ ଆତିକ୍କି ମରିୟମନ୍ ଆସିଙନ୍ ୟର୍ରନେ।
ଇଲିଶାବେଥନ୍ ଆଅନନ୍ କୋଡେନ୍ କି ଆତିକ୍କି, ଯିଖରିୟନ୍ ଡ ଇଲିଶାବେଥନ୍, କବରପାଙମର୍ରନ୍ ଆବନାୟ୍ ଅନ୍ତମ୍ ତି ଆପସିୟ୍ ଯୋହନ ଅବ୍ଞୁମେଞ୍ଜି। ତି ଆତିକ୍କି ଇଶ୍ୱରନ୍ ଯଖରିୟନ୍ ଆଡଅଙ୍ ବର୍ନେନ୍ ରନପ୍ତିନ୍ ତିୟେନ୍। ଯିଖରିୟନ୍ ବର୍ରନ୍ “ଇଶ୍ୱରନ୍ ଆଡଅଙ୍ ସନେନ୍ସେନନ ଡେତୋ, ଇନି ଆସନ୍ ଗାମେଣ୍ତେନ୍ ଆନିନ୍ ଆମନ୍ଡ୍ରାଞ୍ଜି ଇୟ୍ୟମେନ୍!” ଏ ଅନଞେନ୍, ଆମନ୍ ଜିନ୍ଜିନ୍ଡମ୍ ଆଇଶ୍ୱରନ୍ ଆପୁର୍ବାଃତେବର୍ନେମର୍ର ଅନୋଡେନ୍ ଡେତେ ଆନ୍ନା ଏଙ୍ଗାଲେ ମନ୍ଡ୍ରାଞ୍ଜି ଆଇର୍ସେନଞ୍ଜି ସିଲଡ୍ ଆନିଞ୍ଜି ତନମାଡନ୍ ଞାଙତଜି ତି ଆବର୍ନେ ଆନିନ୍ ମନ୍ଡ୍ରାଞ୍ଜି ଆଡଅଙ୍ ବର୍ତଜି।
ବାଇବଲରୁ ଏକ କାହାଣୀ:ଲୂକ ୧
Free to use, adapt, and share under an open license (CC BY-SA 4.0).