50. ଯୀଶୁନ୍ ଆରି ୟର୍ତନାୟ୍
୨୦୦୦ ବର୍ଷେଙ୍ ସିଲଡ୍ ଗୋଗୋୟ୍ ଓୟୋଙ୍ ଅମ୍ଫରା ପୁର୍ତ୍ତିଲୋଙନ୍ ସିଲଡ୍ ଗୋଗୋୟ୍ ମନ୍ଡ୍ରାଞ୍ଜି କ୍ରୀଷ୍ଟ ଯୀଶୁନ୍ ଆବର୍ନେ ଅମ୍ଡଙ୍ଲେ ସାଡେଞ୍ଜି । ମଣ୍ତଳୀନ୍ ଗୋଗୋୟ୍ଲେ ପାଙ୍ତେ । ଯୀଶୁନ୍ ସିବ୍ଡୟ୍ ବର୍ରନ୍ ଡ ଆନିନ୍ ଆତନକୋଡ୍ ଡିନ୍ନା ପୁର୍ତ୍ତିନ୍ ୟର୍ତନାୟ୍ । ଡ ଆନିନ୍ ନମି ଆନ୍ତାନ୍ ଅଣ୍ତ୍ରଙ୍ ଜିରାୟ୍,ଆନିନ୍ ଆସନିବ୍ଡୟ୍ ବରନ୍ ଡକ୍କୋତେ ।
ଇନଲେନ୍ ଯୀଶୁନ୍ ଆଜରିର୍ତାଞନ୍ ଜଗ୍ଗେ ଜଗ୍ଗେଲେ,ଈଶ୍ୱରନ୍ ସାୟ୍ତେ ଏଙ୍ଗାଲେ ଇନ୍ଲେନ୍ ଅବୟ୍ ମଡିର୍ ଆରି ଆନିନ୍ ଆଡଅଙ୍ ଗନୁଗୁ ପନେମେଙ୍ ଆତନିୟ୍ ଅବୟ୍ ଅନମେଙ୍ ଅନ୍ତମ୍ ଞଡ୍ରମ୍ତମ୍ୱୋ । ଆନିନ୍ ସାୟ୍ତେ ଇନ୍ଲେନ୍ ତି ଆରାଜ୍ୟ ଆବର୍ନେଜି ଆନ୍ନା ମରଞ୍ଜି ଆଡ୍ଅଙ୍ ବର୍ତବୋ । ଯୀଶୁନ୍ ପୁର୍ତ୍ତିଲୋଙନ୍ ଆଡ୍ରକୋଲନ୍ ଆବନେଡା ବର୍ରନେ “ଞଙ୍ନ୍ନେମର୍ଞେଞ୍ଜି ଈଶ୍ୱରନ୍ ଆରାଜ୍ୟ ଆମନଙ୍ବର୍ ପୁର୍ତ୍ତିଲୋଙନ୍ ଡକୋନ୍ ଅଡକୋ ମନ୍ଡ୍ରାଞ୍ଜି ଆମଙ୍ ଅପ୍ପଙ୍ବର୍ତଞ୍ଜି,ତି ସିଲଡ୍ ଯୁଗନ୍ ଅଗଡ୍ତ୍ତେ ।
ଗୋଗୋୟ୍ ଆଜାତି ମର୍ଜି ନମି ଆନ୍ତାନ୍ ଯୀଶୁନ୍ ଆବର୍ନେ ଅଣ୍ତ୍ରଙ୍ ଅମ୍ଡଙେଜି । ଆନିନ୍ ରୁଆଙନ୍ ଆଜରିରେନ୍ ଆମ୍ମୁଙ୍, ଆନାଜି ଆଙ୍ଗିୟ୍ ମନଙ୍ବରନ୍ ଅଣ୍ତ୍ରଙ୍ ଅମ୍ଡଙେଜି ତି ଆନିଞ୍ଜି ଆମଙ୍ ମନଙ୍ବରନ୍ ଆନପ୍ପୁଙ୍ବର୍ ଆସନ୍ ଯୀଶୁନ୍ ଖ୍ରୀଷ୍ଟାନୁ ମରଞ୍ଜି ଆଡଅଙ୍ ବରେଞ୍ଜି । ଆନିନ୍ ବର୍ରନ୍”ଆମ୍ୱେଞ୍ଜି ଇୟ୍ଲେ ଅଡକୋ ଜାତିନ୍ ଆମନ୍ଡ୍ରାଜି ଆଡଅଙ୍ ଞଙ୍ନ୍ନେମରନ୍ ତୁବ୍ବା !” ଆରି ଗନଡନ୍ ଆସନ୍ ଜନ୍ଡ୍ରୋମନ୍ ଅଗୁରାଜେନ୍ ।
ଯୀଶୁନ୍ ଆରି ଗାମେନ୍ “କମ୍ୱାରିମରନ୍ ଆସାଉକାରନ୍ ସିଲଡ୍ ସୋଡାତଡ୍ । କେନ୍ ଆପୁର୍ତ୍ତିଲୋଙ୍ ଡନେନ୍ ଆଞନାଙ୍ ଆମନ୍ଡ୍ରାଜି ଏଙ୍ଗାଲେ ଞେନ୍ ଆଡଅଙ୍ ସଙ୍ଗତ୍ତାତିଞ୍ଜି,ଏତ୍ତେଲେ ମା ଆନିଞ୍ଜି ଞେନ୍ ଆସନ୍ ଆମ୍ୱେଞ୍ଜି ଆଡଅଙ୍ ଡଣ୍ତାୟ୍ ଡାଲେ ରବ୍ବୁତବେଞ୍ଜି । ଆରି କେନ୍ ଆପୁର୍ତ୍ତିଲୋଙ୍ ଆମ୍ୱେଞ୍ଜି ଡନଣ୍ତାୟନ୍ ଏଞାଙ୍ତେ,ସର୍ଡାନାବା ଇନିଆସନ୍ ଗାମେଣ୍ତେନ୍ ପୁର୍ତ୍ତିଲୋଙନ୍ ଆଡ୍ରନେତେନ୍ ଆସନୁମ୍ ଆଡଅଙ୍ ଞେନ୍ ଜିନୟ୍ଲାୟ୍ । ଆରି ଆମ୍ୱେଞ୍ଜି ଆତନକୋଡ୍ ଜାୟ୍ ଞେନ୍ ସରିନ୍ ଡର୍ରନ୍ ଏଡକୋଲନ୍ ଡେନ୍, ତି ଡେନ୍ ଈଶ୍ୱରନ୍ ଆମ୍ୱେଞ୍ଜି ଆଡଅଙ୍ ଡୋବ୍ତବେନ୍ ।
ଡ ପୁର୍ତ୍ତିନ୍ ଆରଞିଡ୍ତେନ୍ ଆଡିତ୍ ମନ୍ଡ୍ରାଞ୍ଜି ଆସନ୍ ଇନିଜି ଡେତେ ତି ଆତେ ଅନବ୍ଗନ୍ଲୁଡନ୍ ଆସନ୍ ଯୀଶୁନ୍ ଆଞନ୍ନେମରଞ୍ଜି ଆଡଅଙ୍ ଅବୟ୍ ଅନବ୍ଜଙ୍ବରନ୍ ବର୍ରନେ । ଆନିନ୍ ଗାମେନ୍ “ଅବୟ୍ ମନ୍ଡ୍ରାନ୍ ଆକୋତ୍ତାଲୋଙନ୍ ମନଙ୍ ଜବ୍ମ୍ମଲନ୍ ବୁଡେନ୍ । ଆନିନ୍ ଆଲୁଲ୍ଲୁଡନ୍ ଆବେଡା ତି ଅବନେରା ମରନ୍ ଇୟ୍ଲେ ଗଅମନ୍ ଡ ତୋଲୋଣି ବାୟନ୍ ବିଡେନ୍ ଆରି ଆନିନ୍ ଜିରେନ୍ ।”
“ଏଙ୍ଗାଲେ ଆବାୟନ୍ ପଡାବ୍ଲାୟ୍, ତି ଆମନ୍ଡ୍ରା ଆକମ୍ୱାରି ମରଞ୍ଜି ଇୟ୍ଲାୟ୍ ବର୍ନେଜି’ଗୁରୁ, ଆମନ୍ ତି ଅକୋତ୍ତାଲୋଙ୍ ମନଙ୍ ଆଜବ୍ମଲ୍ ବନ୍ ବିଡେନ୍ । ଏତ୍ତେଲ୍ ଡେନ୍ ତେତ୍ତେ ଇନି ଗାମ୍ଲେ ତୋଲ୍ଲୋନଣିନ୍ ଗିୟ୍ତ୍ତାତେ ?” ଗୁରୁନ୍ ଜାଲଙ୍ଲେ ବର୍ରନ୍,’ ଅବୟ୍ ବନେରାମର୍ ତି ଆତେ ଲୁମେନ୍ ।”
“କମ୍ୱାରିମରଞ୍ଜି ତି ଆସାଉକାରନ୍ ଆଡଅଙ୍ ବରେଞ୍ଜି,“ଇନ୍ଲେନ୍ ଇନି ତୋଲ୍ଲୋଣିଞ୍ଜି ପୁୟ୍ଲେ ସେଡ୍ବୋ ?” ସାଉକାରନ୍ ଗାମେନ୍, ଇଜ୍ଜା, ଆରି ଅମ୍ୱେନ୍ ତି ଆତେ ଏଲୁମେଣ୍ତେନ୍,ତି ଆତେ ସରିନ୍ ଗଅମନ୍ ନିୟ୍ ଏପୁୟ୍ତୁମ୍ତେ । ଜନ୍ଡ୍ରୋମନ୍ ଅଣ୍ତ୍ରଙ୍ ଅଗୁରେନ୍ ଜାୟ୍ ଜଗ୍ଗେବା, ତୋଲ୍ଲୋଣିଞ୍ଜି ରୁକ୍କୁଲେ ସୟ୍ବା, ବନ୍ଡ ଗଅମନ୍ ଜନ୍ଡ୍ରୋମନ୍ ଅସଙ୍ଞେନ୍ ପାଙାୟ୍ବା ।
ଞଙ୍ନ୍ନେମରଞ୍ଜି ତି ଆନବ୍ଜଙ୍ବର୍ ଗନ୍ଲୁଡ୍ଲେ ଅର୍ରପ୍ତିଲଜି, ତି ଆସନ୍ ଆନିଞ୍ଜି ଆଡଅଙ୍ ଅନବ୍ଗନ୍ଲ୍ଲୁଡନ୍ ଆସନ୍ ଯୀଶୁନ୍ ଆଡଅଙ୍ ବରେଞ୍ଜି । ଯୀଶୁନ୍ ଗାମେନ୍ “ଅଙ୍ଗା ଆମନ୍ଡ୍ରା ମନଙ୍ ଆଜବ୍ମଲ୍ ଗୁଏନ୍ ଆନିନ୍ କ୍ରିଷ୍ଟନ୍ ଆରବ୍ମଡ୍ ଅନ୍ତମ୍ ଡକୋ । କୋତ୍ତାନ୍ ଆଗରାମ୍ଗାମ୍ ପୁର୍ତ୍ତିନ୍ । ମନଙ୍ ଜବ୍ମଲନ୍ ଈଶ୍ୱରନ୍ ଆରାଜ୍ୟଲୋଙ୍ ଡକୋନ୍ ଆମନ୍ଡ୍ରାଜି ।
“ତୋଲ୍ଲୋଣିଞ୍ଜି ତି ଆମନ୍ଡ୍ରାଜି ଆଡଅଙ୍ ଅବ୍ତୁୟ୍ତେ ଡ ଆନାଜି ମନଙ୍ତଡନ୍ ଆଲନୁମ୍ ଲୁମ୍ତଜି । ଅଙ୍ଗା ଆବନେରାମର୍ ତୋଲ୍ଲୋଣିଞ୍ଜି ବିଡ୍ଲ୍ଲୋଙ୍ ବିଡ୍ଲେ ଜିରେନ୍ ଆନିନ୍ ଆଡଅଙ୍ ସନୁମନ୍ । ଜନ୍ଡ୍ରୋମନ୍ ଆଗନଡ୍ ଆଗରାମ୍ ଗାମ୍ ପୁର୍ତ୍ତିନ୍ ଆତନକୋଡ୍ ଡିନ୍ନା ଆରି ଗଗ୍ଗନ୍ନେମରଞ୍ଜି ଆଗରାମ୍ଗାମ୍ ଈଶ୍ୱରନ୍ ଆକବର ପାଙ୍ମର୍ଜି ।
ଅଙ୍ଗାବେଡା ପୁର୍ତ୍ତିନ୍ ଅଗଡ୍ତେ, ତି ଆବେଡା କବରପାଙ୍ମରଞ୍ଜି ଇର୍ସେ ଅନଞ୍ଜି ରୁକ୍କୁଡାଲେ ଆଡୁଡୁ ତୋଡ୍ ଲୋଙନ୍ ପିଡ୍ତଜି, ଅଙ୍ଗାଲୋଙ୍ ୟନେନ୍ ଡ ରମ୍ରମ୍ଜିନେନ୍ ଡେତେ । ତି ଆବନେଡା ଡାର୍ମିକଞ୍ଜି ତି ଆବାପ୍ପାଞ୍ଜି ଈଶ୍ୱରନ୍ ଆରାଜ୍ୟଲୋଙ୍ ଓୟୋଙନ୍ ଅନ୍ତମ୍ ତରାଡ୍ତଜି ।”
ଯୀଶୁନ୍ ଆରି ନିୟ୍ ବର୍ରନ୍ ଡ ପୁର୍ତ୍ତିନ୍ ଅଣ୍ତ୍ରଙ୍ ଅଗଡେନ୍ ଆମ୍ମୁଙ୍ ଆନିନ୍ ପୁର୍ତ୍ତିଲୋଙନ୍ ଆରି ୟର୍ତନାୟ୍ । ଆନିନ୍ ଏଙ୍ଗାଲେ ପୁର୍ତ୍ତିନ୍ ସିଲଡ୍ ରୁଆଙନ୍ ଜିରେନ୍,ଆନିନ୍ ତି ଅନ୍ତମ୍ ମା ପୁର୍ତ୍ତିନ୍ ୟର୍ତନାୟ୍ । ଆନିନ୍ ଆବ ଡଅଙନ୍ ଡକୋତେ ଡ ଆନିନ୍ ରୁଆଙ୍ଲୋଙନ୍ ମେଗନ୍ ସରିନ୍ ୟର୍ତନାୟ୍ । ଯୀଶୁନ୍ ଆଙ୍ଗା ୟର୍ତନାୟ୍,ଡିଅଙ୍ଗା କ୍ରିଷ୍ଟାନୁ ମରଞ୍ଜି ଆମ୍ମୁଙ୍ ରବୁଏଞ୍ଜି,ଆନିଞ୍ଜି ରନବୁନ୍ ସିଲଡ୍ ଡୋତଞ୍ଜି ଆରି ଆନିନ୍ ରୁଆଙନ୍ ଇୟ୍ତେ ରବାଙେଜି ।
ତି ସିଲଡ୍ ଅଙ୍ଗା ଆକ୍ରିଷ୍ଟାନୁଜି ଆମେଙ୍ ଡକୋଜି ଆନିଞ୍ଜି ରନବୁନ୍ ସିଲଡ୍ ଆଡୋନେ କ୍ରିଷ୍ଟାନୁଞ୍ଜି ସରିନ୍ ମାୟ୍ଲନ୍ ରୁଆଙନ୍ ଅନୋରୋଙନ୍ ଡେତଜି । ଆନିଞ୍ଜି ଅଡକୋଞ୍ଜି ତେତ୍ତେ ଯୀଶୁନ୍ ସରିନ୍ ଡକୋତଞ୍ଜି । ତି ଆତିକ୍କି ଯୀଶୁନ୍ ତି ଅମନ୍ଡ୍ରାଞ୍ଜି ସରିନ୍ ମେଡ୍ରନ୍ ସୟୁନ୍ ଡ ରୁକ୍କୁଲନ୍ ଡିତାନ୍ ଆସନ୍ ଡକୋତଞ୍ଜି ।
ଆନାଜି ଯୀଶୁନ୍ ଆମଙ୍ ଡର୍ନେନ୍ ଡର୍ତଞ୍ଜି ଆନିଞ୍ଜି ଆଡଅଙ୍ ଅବୟ୍ ରନୁବ୍ବବନ୍ ଆତନିୟ୍ ଆସନ୍ ଯୀଶୁନ୍ ସିବ୍ଡୟ୍ ବର୍ରନ୍ । ଆନଞ୍ଜି ଈଶ୍ୱରନ୍ ସରିନ୍ ମେଡ୍ରନ୍ ସନୟୁନ୍ ବାତ୍ତେ ଡକୋଲନ୍ ରାଜାତଞ୍ଜି ।
ବନ୍ଡ ଆନାଜି ଯୀଶୁନ୍ ଆମଙ୍ ଅଡ୍ଡର୍ନେଜି ଈଶ୍ୱରନ୍ ତି ଆନିଞ୍ଜି ଆଡଅଙ୍ ପନ୍ସ୍ସୁଆତ୍ତିତଜି । ଆନିନ୍ ଆନିଞ୍ଜି ଆଡଅଙ୍ ନର୍କଲୋଙନ୍ ପିଡ୍ତଜି,ଅଙ୍ଗାଲୋଙ୍ ୟନେନ୍ ଡ ରମ୍ରମ୍ଜିନେ ଡେତେ । କେନ୍ ଅନ୍ତମ୍ ଅବୟ୍ ତଗୋନ୍ ଅଙ୍ଗା ଆତେ ଆଙ୍ଗିୟ୍ ଅପ୍ପଞିଡେ ଆରି ଡିତାନ୍ ଡୁଡୁତେ, ଆରି ବୋବ୍ବୋଡଞ୍ଜି ଆନିଞ୍ଜି ଆଡଅଙ୍ ଜନୋମନ୍ ଅଲ୍ଲୋଲୋନଜି ।
ଯୀଶୁନ୍ ଅଙ୍ଗା ଆଡିନ୍ନା ୟର୍ତନାୟ୍, ଆନିନ୍ ମେଡ୍ରନ୍ ସନୁମନ୍ ଡ ତି ଆରାଜ୍ୟନ୍ ଆଡଅଙ୍ ଅମ୍ମୋସ୍ସାତେ । ଆନିନ୍ ସନୁମନ୍ ଆଡଅଙ୍ ଡ ଈଶ୍ୱରନ୍ ଆଡଅଙ୍ ଆବନାୟ୍ ମନ୍ନାନେନ୍ ସିଲନ୍ ଆନିନ୍ ଆସନ୍ଡୋଙ୍ ଆସନ୍ ଆର୍ବାସେଏଞ୍ଜି ଅଡକୋଞ୍ଜି ଆଡଅଙ୍ ନର୍କଲୋଙନ୍ ଆପ୍ପାୟ୍ତେ ଆଙ୍ଗାଲୋଙ୍ ଡିତାନ୍ ତଗୋନ୍ ଡୁଡୁତେ ।
ଇନି ଆସନ୍ ଗାମେଣ୍ତେନ୍ ଆଦମନ୍ ଡ ଅବାନ୍ ଈଶ୍ୱରନ୍ ଆବନାୟ୍ ଅମ୍ମାନେଲଜି ଆରି କେନ୍ ଆପୁର୍ତ୍ତିଲୋଙ୍ ଇର୍ସେନ୍ ଗନ୍ଲାୟ୍, ତି ଆସନ୍ ଈଶ୍ୱରନ୍ ତି ଆନିନ୍ ସୟ୍ପେଏନ୍ ଆରି ଆନିନ୍ ଆବ୍ମୋସ୍ସ ଆସନ୍ ଗବ୍ରିୟ୍ୟମ୍ଲନେ । ବନ୍ଡ ଅଡିନ୍ନା ଈଶ୍ୱରନ୍ ଅବୟ୍ ଆନୁଆ ରୁଆଙନ୍ ଡ ଆନୁଆ ପୁର୍ତ୍ତିନ୍ ଗବ୍ଡେଲତେ ଅଙ୍ଗା ଆତେ ଆନିନ୍ ମନଙ୍ ଡ ଅବ୍ନଗଡ୍ତୁପ୍ତେ ।
ଯୀଶୁନ୍ ଡ ଆମନ୍ଡ୍ରାଞ୍ଜି ଆନୁଆ ପୁର୍ତ୍ତିଲୋଙନ୍ ଡକୋତଞ୍ଜି, ଆରି ଇନିଜି ଡକୋତନେ ତି ଅଡକୋନ୍ ଅତୋଣ୍ତୋ ଆନିନ୍ ଅଡକୋଡିନ୍ନା ଆସନ୍ ଡନେତନେ । ଆନିନ୍ ଅଡକୋଞ୍ଜି ଆମଡ୍ଡାଆ ଗଡ୍ତେ ଆରି ଡଣ୍ତଞାଙନ୍, ଡୁକ୍କାନ୍, ୟନେନ୍, ଇର୍ସେନ୍, ଡଣ୍ତନ୍ ଅଡେ ରନବ୍ବୁନ୍ ଅଡେଏ । ଯୀଶୁନ୍ ସନୟୁନ୍ ଡ ନିଆଞନ୍ ଆରାଜ୍ୟନ୍ ଆତୋଣ୍ତୋ ଡନେତନେ ଆରି ଆନିନ୍ ଆମନ୍ଡ୍ରାଞ୍ଜି ସରିନ୍ ଡିତାନ୍ ଡକୋତନେ ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍: ମାଥିଉ ୨୪:୨୪; ୨୮:୧୮; ଯୋହନ ୧୫:୨୦, ୧୬:୩୩; ପ୍ରକାଶିତ ୨:୧୦; ମାଥିଉ ୧୩:୨୪-୩୦, ୩୬-୪୨; ୧ଥେସଲନିକୀୟ ୪:୧୩-୫:୧୧; ଯାକୁବ ୧:୧୨; ମାଥିଉ ୨୨:୧୩; ପ୍ରକାଶିତ ୨୦:୧୦ ;୨୧:୧-୨୨:୨୧
Free to use, adapt, and share under an open license (CC BY-SA 4.0).