49. ମରିୟମ୍ ଗାମଲେ ଅବୟ୍ ଡାଙ୍ଗଡିନ୍ ଆଡଅଙ୍ ଅବୟ୍ ମଡିର୍ କବରପାଙ୍ମରନ୍ ବରେନ୍ ଡ ଆନିନ୍ ଈଶ୍ୱରନ୍ ଆଡାଙ୍ଗଡଅନନ କୋତ୍ତେ ।
ତି ଆସନ୍ ଅଙ୍ଗାବେଳା ଆନିନ୍ ଡାଙ୍ଗଡି ଡକୋଏନ୍, ମଡିର୍ପୁରାଡାନ୍ ଆନିନ୍ ସୁଙେଏନ୍ ଡ ଆନିନ୍ ତିଲ୍କୋଡେନ୍, ତି ଆସନ୍ ଆନିନ୍ ଅବୟ୍ ଓବ୍ବା ଅନନ କୋଡେନ୍ ଆରି ଆଞୁମନ୍ ଯୀଶୁ ତିୟେନ୍ । ତିଲୋଙ୍, ଯୀଶୁନ୍ ବାଗୁନ୍ ଈଶ୍ୱର ଡ ମନ୍ଡ୍ରା ।
ଯୀଶୁନ୍ ଗୋଗୋୟ୍ ସାନ୍ନିଆଲୁମନ୍ ଲୁମେନ୍ ଅଙ୍ଗାଆତେ ଆନିନ୍ ଈଶ୍ୱରନ୍ ଆଅନନ ଗାମଲେ ଅବ୍ତୁୟତେ । ଆନିନ୍ ଡାଆନ୍ ଆତୋଣ୍ତୋ ତଞିୟ୍ଲନ୍, ରିଙ୍ଗେନ୍ ଅଲବ୍ବଡ୍ଡିଏନ୍, ଗୋଗୋୟ୍ ଅସୁମରଞ୍ଜି ଆଡଅଙ୍ ଅବ୍ସୁକ୍କାଏନ୍, ବୁତଞ୍ଜି ଗଙେନ୍, ଆରବ୍ବୁମର୍ରଞ୍ଜି ଅବ୍ମେଙେନ୍ ଆରି ୫୦୦୦ ସିଲଡ୍ ଗୋଗୋୟ୍ ମନ୍ଡ୍ରାନ୍ ମଲ୍ଲୟ୍ ରୁଟିନ୍ ଡ ବାଗୁ ଅୟନ୍ ବାତ୍ତେ ଅବ୍ଜୋମେନ୍ ।
ଯୀଶୁନ୍ ଅବୟ୍ ସୋଡା ଞନଙ୍ମର୍ ଡକୋଏନ୍, ଆରି ଆନିନ୍ ଡନେନ୍ ବାତ୍ତେ ବର୍ନେ ବରନେ ଇନି ଆସନ୍ ଆନିନ୍ ଈଶ୍ୱରନ୍ ଆଡାଙ୍ଗଡା ଅନନ ଡକୋଏନ୍ । ଆନିନ୍ ଞନଙନ୍ ତିୟେନ୍ ଡ ଏଙ୍ଗାଲେ ଆମ୍ୱେନ୍ ଆମ୍ୱେନ୍ଡମ୍ ଏଲଡୟ୍ତେ ଏତ୍ତେଲେ ଆନ୍ନାମରଞ୍ଜି ଲନଡଜନ୍ ପଡେତେ ।
ଆନିନ୍ ଆରି ଞନଙନ୍ ତିୟେନ୍ ଡ ଆମ୍ୱନଞ୍ଜି ଇନ୍ନୁଙ୍ ଆଜନବ୍ ଡ ଆବିତ୍ତିଜି ଏର୍ଲଡୟ୍ତେନ୍ ସିଲନ୍ ଈଶ୍ୱରନ୍ ଗୋଗୋୟ୍ ଲଡୟ୍ବା ।
ଯୀଶୁନ୍ ଗାମେନ୍ ଡ ପୁର୍ତ୍ତିଲୋଙନ୍ ଡକୋନ୍ ଇନିଙ୍ ମଡଃଗାନ୍ ଆଜନବ୍ ସିଲନ୍ ଈଶ୍ୱରନ୍ ଆରାଜ୍ୟ ଗୋଗୋୟ୍ ମଡଃଗା ଡକୋ । ଅଙ୍ଗାଜାୟ୍ ଆମନ୍ଡ୍ରା ଆସନ୍ ଗୋଗୋୟ୍ ଆସନାୟ୍ସାୟ୍ ଆଜନବ୍ଗାମେଣ୍ତେନ୍ ଈଶ୍ୱରନ୍ ଆଡେସାଲୋଙ୍ ମନ୍ନାୟ୍ନେନ୍ । ଈଶ୍ୱରନ୍ ଆରାଜ୍ୟଲୋଙ୍ ଗନନ୍ନେ ଆସନ୍, ଆମ୍ୱନ୍ଞ୍ଜି ଇର୍ସେବେଞ୍ଜି ସିଲଡ୍ ଅନୁରନ୍ ଞନାଙନ୍ ଡେତେ ।
ଯୀଶୁନ୍ ଗାମେନ୍, ଲାଙଲେଡ୍ ମନ୍ଡ୍ରାଞ୍ଜି ଆନିନ୍ ବାତ୍ତେ ମାୟଲନ୍ ଅନୁରନ୍ ଞାଙ୍ତଜି, ବନ୍ଡ ଆନ୍ନାମରଞ୍ଜି ଅବ୍ମାୟଲଞ୍ଜି । ଆନିନ୍ ଗାମେନ୍ ଲାଙଲେଡ୍ମନ୍ଡ୍ରା ମନଙ୍ ଲଃନ୍ ଅନ୍ତମ୍ ।ଆନିଞ୍ଜି ଯୀଶୁନ୍ ଆମନଙ୍ ବର୍ନେ ଅମ୍ଡଙ୍ ଡାଲେ ଅନୁରନ୍ ଞାଙ୍ତଜି । ଲାଙଲେଡ୍ ତଙର୍ ରେଙନ୍ ଡକୋନ୍ ଆରେଙ୍ଲଃନ୍ ଅନ୍ତମ୍, ଅଙ୍ଗାଲୋଙ୍ ଈଶ୍ୱରନ୍ ଆବର୍ନେ ଆଜମଲ୍ଲ ଗନ୍ଲେ ଅରପ୍ତିଏ ଆରି ଅବ୍ଞାନ୍ ଆସନ୍ ଜନ୍ରୋମନ୍ ଅନ୍ଜଏ । ଅଙ୍ଗା ଆମନ୍ଡ୍ରାଜି ଯୀଶୁନ୍ ଆବର୍ନେ ଅନମ୍ଡଙେଜି ଆନିଞ୍ଜି ଈଶ୍ୱରନ୍ ଆଡେସା ଗନ୍ଲେ ଅରପ୍ତିଏଜି ।
ଯୀଶୁନ୍ ଞନଙନ୍ ତିୟେନ୍ ଡ ଈଶ୍ୱରନ୍ ଇର୍ସେମରଞ୍ଜି ଗୋଗୋୟ୍ ଲଡୟ୍ତଜି । ଆନିନ୍ ଆନିଞ୍ଜି ତନମ୍ମାଡନ୍ ତିୟ୍ଲେ ଆଅନନ ଏମ୍ମେତଜି ।
ଯୀଶୁନ୍ ଇନ୍ଲେଞ୍ଜି ଆରି ବରେଞ୍ଜି, ଡ ଈଶ୍ୱରନ୍ ଇର୍ସେନ୍ ସଙ୍ଗତାତେ । ଅଙ୍ଗା ଆଡିନ୍ନା ଆଦମନ୍ ଡ ଅବାନ୍ ଇର୍ସେନ୍ ଲୁମେଞ୍ଜି, ତି ଆତେ ଆକେଜ୍ଜାଞ୍ଜି ଅଡକୋଞ୍ଜି ଗତରେଞ୍ଜି । ତି ଲୋଙ, ପୁର୍ତ୍ତିଲୋଙନ୍ ଅଡକୋ ମନ୍ଡ୍ରାନ୍ ଇର୍ସେନ୍ ଲୁମ୍ତଜି ଡ ଈଶ୍ୱରନ୍ ସିଲଡ୍ ଅବ୍ନାନାତଞ୍ଜି । ଡ, ଅଡକୋଞ୍ଜି ଇଶ୍ୱରନ୍ ଅଡଅଙ୍ ବନେରାଲଞ୍ଜି ।
ବନ୍ଡ ଈଶ୍ୱରନ୍ ପୁର୍ତ୍ତିନ୍ ଡକୋନ୍ ଅଡକୋଞ୍ଜି ଆଡଅଙ୍ ଲୋବଏନ୍ ଡ ଆନିନ୍ ଅବୟ୍ ଆଅନଡମନ୍ ତିୟଲାୟ୍ ଏଙ୍ଗାଲେ ଆନାଜାୟ୍ ଆନିନ୍ ଆମଙ୍ ଡର୍ରତନେ, ଆନିନ୍ ଆଇର୍ସେଲୋଙନ୍ ଡଣ୍ତନ୍ ଏର୍ନଞାଙନ୍ ଇଶ୍ୱରନ୍ ସରିନ୍ ଅଡକୋଡିନ୍ନା ଡକୋଲନ୍ ।
ଇର୍ସେଲୋଙବେନ୍, ଆମ୍ୱେନ୍ ଡୋସା ଡ ରନବ୍ବୁନ୍ ଡକୋଏନ୍ । ଈଶ୍ୱରନ୍ ଉପ୍ରେଙ୍ବେନ୍ ବନରାବ୍ ଡକୋଏନ୍, ବନ୍ଡ ଆନିନ୍ ଉପ୍ରେଙ୍ବେନ୍ ଏରବନରାବନ୍ ଯୀଶୁନ୍ ଆଉପ୍ରେଙ୍ ଆବନ୍ରାବନ୍ ଲାଏନ୍ । ଯୀଶୁନ୍ ଏଙ୍ଗାଲେ ଆଅକ୍କାଡାଙ୍ଲୋଙନ୍ ରବ୍ବୁଏନ୍, ତାଡିନ୍ନା ଆନିନ୍ ଡଣ୍ତବେନ୍ ଞାଙେନ୍ ।
ଯୀଶୁନ୍ ଆଙ୍ଗିୟ୍ ଇର୍ସେନ୍ ଅଲ୍ଲୁମ୍ଲୋ, ବନ୍ଡ ଆମ୍ୱେଞ୍ଜି ଆସନ୍ ଅଡେ ପୁର୍ତ୍ତିନ୍ ଡକୋନ୍ ଅଡକୋନ୍ ଆଇର୍ସେ ଆବୁଡାର୍ ବୋୟ୍ଲେ ଆପନାଙ୍ ଆସନ୍ ଅବୟ୍ ମଡ଼ିର୍ ତନିୟ୍ତିୟନ୍ ଅନ୍ତମ୍ ପନରଡନ୍ ଆଞନାଙ୍ ଆଡନେ ଆସନ୍ ମନଙ୍ ଗାମେନ୍ । ଇନି ଅସନ୍ ଗାମେଣ୍ତେନ୍ ଯୀଶୁନ୍ ଆନିନ୍ ଡମ୍ ତିୟ୍ଡମ୍ ଲନେ । ତି ଆସନ୍ ଈଶ୍ୱରନ୍ ଇନି ଜନଙ୍ ଆଇର୍ସେ , ଏନ୍ନଲେ ଡ ବରନ୍ତଙନ୍ ଆଇର୍ସେ ନିୟ୍ ତନମ୍ମାଡନ୍ ତିୟ୍ଲେ ରପ୍ତିତେ ।
ମନଙ୍ ଲନୁମନ୍ ଆମ୍ୱେନ୍ ଆଡଅଙ୍ ଉର୍ରେ ଅର୍ରପ୍ତି ବେନ୍ । ଈଶ୍ୱରନ୍ ସରିନ୍ ମାୟଲନ୍ ଆଡକୋନେ ଆସନ୍ କେନ୍ ଅନ୍ତମ୍ ଇନ୍ନିଙ୍ ଆବର୍ନେ ଅବୟ୍ତଡ୍ । ଯୀଶୁନ୍ ତୁମ୍ ଇର୍ସେବେନ୍ ଗିୟ୍ଡାଲେ ରପ୍ତିତେ । ଯୀଶୁନ୍ ଈଶ୍ୱରନ୍ ଆଅନ୍ ଡ ଆନିନ୍ ପାଲ୍ତେଙ୍ବେନ୍ ଯୀଶୁନ୍ ଆଅକ୍କାଡ୍ଡାଙ୍ଲୋଙନ୍ ରବୁ ଏନ୍ ଆରି ଈଶ୍ୱର଼ନ୍ ଅନିନ୍ ଆଡଅଙ୍ ରନବୁନ୍ ସିଲଡ୍ ଅବ୍ଡୋଏନ୍ କେନ୍ ଆବର୍ନେ ଆମ୍ୱେନ୍ ଏଙ୍ଗାଲେ ଜନଙ୍ଡେନ୍ ଡର୍ନେନ୍ ଡେତେ ।
ଆନା ଜନଙ୍ଡେନ୍ ଯୀଶୁନ୍ ଆମଙ୍ ଡର୍ତନେ ଡ ଆନିନ୍ ଆପ୍ରବୁନ୍ ଅନ୍ତମ୍ ଜାତେ, ଈଶ୍ୱରନ୍ ତି ତର୍ଡମ୍ ଆମନ୍ଡ୍ରାଜି ଆଡଅଙ୍ ଉର୍ତଜି । ବନ୍ଡ ଆନିନ୍ ଆମଙନ୍ ଆନା ଅଡ୍ଡର୍ନେ ଆନିନ୍ ତି ଆଡଅଙନ୍ ଅନ୍ନୁରେ । ଆମନ୍ ଗମାଙ୍ମର୍ ଅଡେ ଡୋଲୟ୍ମର୍, ଓବ୍ବାମର୍ ଅଡେ ଆଇମର୍, ଆବୁଡାମର୍ ଅଡେ ଆବେଣ୍ତିଆମର୍ ଆରି ଅଳେଙ୍ଗା ଡକୋଲନ୍ ଜନଙ୍ଡେନ୍ ତେତ୍ତେ ଇନ୍ନିଙ୍ ଅଡ୍ଡେଏ । ଈଶ୍ୱରନ୍ ଆମନ୍ ଆଡଅଙ୍ ଲୋବତମ୍ ଆରି ଆମନ୍ ଏଙ୍ଗାଲେ ଯୀଶୁନ୍ ଆମଙ୍ ଡର୍ତନେ ତି ଆତେ ଆନିନ୍ ସାୟ୍ତେ ଏଙ୍ଗାଲେ ଆନିନ୍ ସରିନ୍ ଆମ୍ୱେଞ୍ଜି ମେଡ୍ରନ୍ ଅବ୍ଡମ୍ଲନ୍ ଏଡକୋତନ୍ ।
ଯୀଶୁନ୍ ଆମନ୍ ଆଡଅଙ୍ ଆନିନ୍ ଆମଙନ୍ ଡର୍ନେନ୍ ଆସନ୍ ଡ ତବ୍ବୁବ୍ଡାନେନ୍ ଆସନ୍ ଓଡ୍ଡେତବେନ୍ । ଯୀଶୁନ୍ ଆଡଅଙ୍ କ୍ରିଷ୍ଟନ୍ ଡ ଈଶ୍ୱରନ୍ ଆବୟ୍ୟନ୍ ଆଅନ୍ ଗାମ୍ଲେ ଇନି ଆମନ୍ ଡର୍ତନେ ପଁ? ଆମନ୍ ଡର୍ତନ୍ ପଁ ଡ ଆମନ୍ ଅବୟ୍ ଇର୍ସେମର୍ ଡ ଈଶ୍ୱରନ୍ ଆମଙ୍ ସିଲଡ୍ ପନରଡନ୍ ଆଞନାଙ ଡକୋ ? ଆମନ୍ ଇନି ଡର୍ତନ୍ ଡ ଇର୍ସେନମ୍ଞ୍ଜି ବୋୟ୍ଲେ ଆପନାଙ୍ ଆସନ୍ ଯୀଶୁନ୍ ଆଅକ୍କଡ୍ଡାଙ୍ ଲୋଙନ୍ ରନବୁନ୍ ଡେଏନ୍ ?
ଯୀଶୁନ୍ ଆମନ୍ ଆସନ୍ ଇନଜି ଲୁମେନ୍ ତେତ୍ତେ ଆମନ୍ ଡର୍ରନ୍ ଡେନ୍, ଆମନ୍ ଅବୟ୍ ଖ୍ରୀଷ୍ଟିୟାନ୍ ମର୍ ! ଈଶ୍ୱରନ୍ ଆମନ୍ ଆଡଅଙ୍ ସନୁମନ୍ ଆଲୋଙଡ୍ ରାଜ୍ୟଲୋଙ୍ ସିଲଡ୍ ଅମ୍ଡୁଙ୍ଲେ ପାଙ୍ଲମ୍ ଆରି ଈଶ୍ୱରନ୍ ଆରାଜ୍ୟ ଆସନାଆର୍ ଲୋଙ୍ ତବ୍ମ୍ମିୟ୍ଲମ୍ । ଈଶ୍ୱରନ୍ ଆପାପୁର୍ ଇର୍ସେନମ୍ ଆଲନୁମ୍ଜି ଆତଙର୍ ଅଡକୋନ୍ ପାଙାଞ୍ଲେ ଜିରେନ୍ ଆରି ଆନିନ୍ ଆମନ୍ ଆଡଅଙ୍ ଆନୁଆ ଡ ଡାର୍ମିକନ୍ ଆଲନୁମ୍ ଆତଙର୍ ତିୟ୍ଲମ୍ ।
ଆରି ଆମନ୍ ଅବୟ୍ ଖ୍ରୀଷ୍ଟାନୁମର୍ ଡେନ୍, ଯୀଶୁନ୍ ଇନିଜି ଅଡକୋନ୍ ଲୁମେନ୍ ତି ଆସନ୍ ଈଶ୍ୱରନ୍ ଇର୍ସେନମ୍ଜି ଅଡକୋନ୍ ତମ୍ମାଡନ୍ ତିୟାଜେନ୍ । ନମି, ଆମନ୍ ଈଶ୍ୱରନ୍ ଆବନେରାମର୍ ଏର୍ଡନେନ୍ ଆର୍ପାୟ୍ ଆନିନ୍ ସରିନ୍ ଆଜାଡି ଆଗଡି ଆଡନେ ଆସନ୍ ଈଶ୍ୱରନ୍ ଇୟ୍ୟମ୍ତେ ।
ଆରି ଆମନ୍ ଅବୟ୍ ଈଶ୍ୱରନ୍ ଆଗଡି ଡ ପ୍ରବୁଯୀଶୁନ୍ ଅସ୍ରେବା ମର୍, ତି ଡେନ୍ ଯୀଶୁନ୍ ଇନିଜି ଞନଙନ୍ ତିୟତିୟ୍ ଲଙତନେ ତି ଆତେଜି ଞନ୍ଡ୍ରମ୍ନେନ୍ ଆସନ୍ ଆମନ୍ ସାୟ୍ତେ । ଆରି ଆମନ୍ କଖ୍ରୀଷ୍ଟାନୁମର୍ ଡେଲ୍ ଜନଙ୍ଡେନ୍, ଆମନ୍ଇର୍ସେନ୍ ଆଲନୁମ୍ ଆସନ୍ ତନୋରଲୋଙନ୍ ଅସେଡ୍ତମ୍ । ବନ୍ଡ ଈଶ୍ୱରନ୍ ଡ୍ରନେମର୍ ଡକୋ ,ଆରି ଆନିନ ବର୍ତନ୍ ଆମନ୍ ଇର୍ସେନମ୍ଞ୍ଜି ଅଡ୍କୋନ୍ ବରାୟ୍ଲନ୍ଡେନ୍, ଆନିନ୍ ଆମନ୍ ଆଡଅଙ୍ ତମ୍ମାଡନ୍ ତିୟ୍ତମ୍ । ଇର୍ସେନ୍ ସଙ୍ଗତ୍ତାଲେ ସନୁନେନ୍ ଆସନ୍ ଆନିନ୍ ଆମନ୍ ଆଡଅଙ୍ ବୋର୍ସାନ୍ ତିୟ୍ତମ୍ ।
ଆମନ୍ ଏଙ୍ଗାଲେ ବେବ୍ବର୍ତନ୍,ତି ଆବାକ୍ୟ ପଡେତନେ, ଆନ୍ନା ଆଖ୍ରୀଷ୍ଟାନୁଜି ସରିନ୍ ମାୟ୍ଲନ୍ ତି ଆସନେବାନ୍ ଲୁମ୍ତେ ଆରି ଆନିନ୍ ଆମନ୍ ଆସନ୍ ଇନିଜି ଇନିଜି ଲୁମେନ୍ ତି ଆତେ ଆନ୍ନା ଆମନ୍ଡ୍ରାଜି ଏବର୍ତେ,କେନ୍ ଆତେ ଈଶ୍ୱରନ୍ ଆମ୍ୱେନ୍ ଆଡଅଙ୍ ବର୍ତବେନ୍ । କେନ୍ ଅଡକୋନ୍ ଆମନ୍ ଆନିନ୍ ସରିନ୍ ମନଙ୍ ଆମାୟ୍ନେନ୍ ଆସନ୍ ମନାୟନ୍ ଡେତେ ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବରନ୍: ରୋମୀୟ ୩:୨୧-୨୬; ୫:୧-୧୧; ଯୋହନ ୩:୧୬; ମାର୍କ ୧୬:୧୬; କଲସୀୟ ୧:୧୩-୧୪; ୨ କରିନ୍ଥୀୟ ୫:୧୭-୨୧; ୧ଯୋହନ୧:୫-୧୦
Free to use, adapt, and share under an open license (CC BY-SA 4.0).