48. ଈଶ୍ୱରନ୍ ଅଙ୍ଗାବେଡା ପୁର୍ତ୍ତିନ୍ ଗବ୍ଡେଲେନ୍, ତି ଆବେଡା ଅଡକୋ ମଡ଼ିର୍ ଡକୋଏନ୍ ।
ତି ଆବେଡା ଇର୍ସେନ୍ ଅଡ୍ଡକୋଲୋ । ଆଦମନ୍ ଡ ଅବାନ୍ ତର୍ଡମ୍ ଅଲ୍ଲଡଜେଞ୍ଜି ଆରି ଆନିଞ୍ଜି ଈଶ୍ୱରନ୍ ଆଡଅଙ୍ ଲୋବଏଞ୍ଜି । ତି ଆବେଡା ଇନ୍ନିଙ୍ ଅସୁନ୍ ଅଡେ ରନବୁନ୍ ଅଡ୍ଡକୋଲୋ । ପୁର୍ତିନ୍ କେନ୍ ଏନ୍ନେଲେ ଡେଏତୋ ଗାମ୍ଲେ ଈଶ୍ୱରନ୍ ଇସୁମେନ୍ । ଅବାନ୍ ଆଡଅଙ୍ କନନ୍ଣ୍ତାୟନ୍ ଆସନ୍ ସନୁମନ୍ ଅବୟ୍ ଜାଆଡନ୍ ବାତ୍ତେ ବର୍ନେନ୍ ବର୍ରନ୍ ।
ତି ସିଲଡ୍ ଆନିନ୍ ଡ ଆଦମନ୍ ଈଶ୍ୱରନ୍ ସଙ୍ଗତ୍ତାଲେ ଇର୍ସେନ୍ ଲୁମେଞ୍ଜି । ଇନି ଆସନ୍ ଗାମେଣ୍ତେନ୍ ଆନିଞ୍ଜି ଇର୍ସେନ୍ ଲୁମେଞ୍ଜି, ତି ଆସନ୍ ପୁର୍ତ୍ତିଲୋଙନ୍ ଡକୋନ୍ ଅଡକୋନ୍ ଆମନ୍ଡ୍ରାନ୍ ଅସୁତଜି ଡ ଅଡ୍କୋମନ୍ଡ୍ରାନ୍ ରବୁତଜି । ଇନିଆସନ୍ ଗାମେଣ୍ତେନ୍ ଆଦମନ୍ ଡ ଅବାନ୍ ଇର୍ସେନ୍ ଲୁମେଞ୍ଜି, କେନ୍ ଆତେ ସିଲଡ୍ ଆରି ବରନ୍ତଙନ୍ ଆବର୍ନେ ଗଟେଏନ୍ ।
ଆନିଞ୍ଜି ଈଶ୍ୱରନ୍ ଅବନେରା ଡେଲଜି । କେନ୍ଲୋଙ୍, ତି ଆଡିନ୍ନା ସିଲଡ୍କନୋଡନ୍ ଅଡ୍ରେତେନ୍ ଡିଲେ ମନ୍ଡ୍ରାନ୍ ଇର୍ସେନ୍ ବାତ୍ତେ କୋଡ୍କୋଡ୍ଲଙ୍ନ୍ତଞ୍ଜି ଆରି ଈଶ୍ୱରନ୍ ଆବନେରା ଡେତଜି । ଈଶ୍ୱରନ୍ ଡ ମନ୍ଡ୍ରାନ୍ ସରିନ୍ ଡକୋନ୍ ଆକନୁଲମ୍ ଇର୍ସେନ୍ ବାତ୍ତେ ରମ୍ମଙ୍ ଡେଲୋ । ବନ୍ଡ ତି ଆକନୁଲମ୍ ଆରିମନାୟନ୍ ଆସନ୍ ଈଶ୍ୱରନ୍ ଅବୟ୍ ତଙରନ୍ ଆତନୁବ୍ ଆସନ୍ ଏରେନ୍ ଗୋଜେନ୍ । ଈଶ୍ୱରନ୍ ପର୍ମାଡାଲନ୍ ବର୍ରନେ ଡ ଅବାନ୍ ଆକେଜ୍ଜା ଲୋଙ୍ ସିଲଡ୍ କନୋଡନ୍ ଆଡରେତେନ୍ ଅବୟ୍ନ୍ନେ ସନୁମନ୍ ଆବବ୍ ଲବ୍ଗର୍ତେ, ଆରି ସନୁମନ୍ ତି ଆଜଙନ୍ ପାବ୍ରାତେ ।
କେନ୍ ଆଗରାମ୍ ଗାମନ୍ କେନ୍ଆତେ ଡ ସନୁମନ୍ କ୍ରିଷ୍ଟନ୍ ଆଡଅଙ୍ ରବ୍ବୁତେ, ବନ୍ଡ ଈଶ୍ୱରନ୍ ଆନିନ୍ ଆଡଅଙ୍ ଆରବୁମରଞ୍ଜି ଆମଙ୍ ସିଲଡ୍ ଅବ୍ଡୋତେ, ଆରି କ୍ରିଷ୍ଟନ୍ ଡିତାନ୍ ଆସନ୍ ସନୁମନ୍ ଆବୋର୍ସା ଲବ୍ଗର୍ତେ । ଜବ୍ର ବର୍ଷେଙ୍ ଆତିକ୍କି,ଈଶ୍ୱରନ୍ ଗାମେନ୍ ଡ ଯୀଶୁନ୍ ମା କ୍ରିଷ୍ଟନ୍ । ଈଶ୍ୱରନ୍ ଏଙ୍ଗାଲେ ପୁର୍ତ୍ତିନ୍ ବନୁବ୍ବ୍ଡାନ୍ ବାତ୍ତେ ଅଡକୋ ପୂର୍ତ୍ତିନ୍ ଅମ୍ମୋସାଏନ୍, ତି ଆଡିନ୍ନା ଆନାଜି ଆମଙନ୍ ଡର୍ରଞ୍ଜି ତି ଆନିଞ୍ଜି ଡନୋବନ୍ ଆସନ୍ ଜାଆଜନ୍ ତିୟେଞ୍ଜି ।
ଆଜାଡିନ୍ ତି ଅନ୍ତମ୍ ମାଃ, ଡିଲେ ମନ୍ଡ୍ରାନ୍ ଆନିଞ୍ଜି ତର୍ଡମ୍ ଆନିଞ୍ଜି ଆଇର୍ସେଞ୍ଜି ଆସନ୍ ମନୋସ୍ସାନ୍ ଆସନ୍ ଡକୋଏନ୍, ବନ୍ଡ ଆନାଜି ଆମଙନ୍ ଡର୍ରତଞ୍ଜି ଆନିଞ୍ଜି ଡନୋବନ୍ ଆସନ୍ ଈଶ୍ୱରନ୍ ଯୀଶୁନ୍ ଆଡଅଙ୍ ତିୟେଞ୍ଜି । ବଶଅ ବଶଅ ବର୍ଷେଙ୍ ଲୋଙ୍ ମନ୍ଡ୍ରାଞ୍ଜି ଆଇର୍ସେଲୋଙଞ୍ଜି ଅଙ୍ଗା ଆଡଣ୍ତ ଞନାଙନ୍ ଡକୋଏନ୍ ତି ଆତ୍ତେ ଅନବ୍ତୁଜନ୍ ଆସନ୍ ପୁର୍ରପୁର୍ରମରଞ୍ଜି ଡିତାନ୍ ଈଶ୍ୱରନ୍ ଆମଙ୍ ଅନମେଙନ୍ ତିୟେଞ୍ଜି ।
ବନ୍ଡ ତି ଅଡକୋନ୍ ଆନମେଙ୍ ଆଇର୍ସେଞ୍ଜି ଅବ୍ସଙାଲ୍ଲେ ଅର୍ରପ୍ତିଲୋ । ଯୀଶୁନ୍ ତି ଆସୋଡା ପୁର୍ରପୁର୍ରମରନ୍ । ଆନ୍ନା ପୁର୍ରପୁର୍ରମରଞ୍ଜି ଅନ୍ତମ୍ ତଡ୍, ଅଙ୍ଗା ଆତେ ଯୀଶୁନ୍ ଲୁମଲ୍ଲେ ଅବ୍ତୁଜେନ୍ – ଅବୟ୍ଡମନ୍ ଅନମଙନ୍ ଅନ୍ତମ୍ ଆନିନ୍ ଆନିନଡମ୍ ତିୟଡମ୍ଲନ୍ ଅଙ୍ଗା ଆତେ ପୁର୍ତ୍ତିଲୋଙନ୍ ଡକୋନ୍ ଅଡକୋନ୍ ଆଇର୍ସେ ସବ୍ଙାୟତେ । ଯୀଶୁନ୍ ଅବୟ୍ ମନଙ୍ ପୁର୍ରପୁର୍ରମର୍, ଇନି ଆସନ୍ ପୁର୍ତ୍ତିନ୍ ଡକୋନ୍ ଏଙ୍ଗାଲେଜାୟ୍ ଆମନ୍ଡ୍ରା ଆଙ୍ଗାଜାକିଁ ଆର୍ଲୁମେନ୍ ଆଇର୍ସେ ଆନିନ୍ ଆଉପ୍ରେଙନ୍ ପାଙେନ୍ । ଈଶ୍ୱରନ୍ ଅବ୍ରାହାମନ୍ ବରେନ୍ “ପୁର୍ତ୍ତିଲୋଙନ୍ ଅଡକୋମନ୍ଡ୍ରାଞ୍ଜି ଆମନ୍ଲୋଙ୍ ଅନବ୍ସିତ୍ତାନ୍ ଞାଙ୍ତଜି ।”
ଯୀଶୁନ୍ ଅବ୍ରାହାମନ୍ ଆକେଜ୍ଜାମର୍ ଡକୋଏନ୍ । ଅଡକୋ ମନ୍ଡ୍ରାନ୍ ଆନିନ୍ ଲୋଙ ଅନବ୍ସିତ୍ତାନ୍ ଞାଙେଞ୍ଜି, ଇନି ଆସନ୍ ଯୀଶୁନ୍ ଆଞୁମ୍ଲୋଙ୍ ଆଡର୍ନେମରଞ୍ଜି ଇର୍ସେନ୍ ସିଲଡ୍ ଅନୁରନ୍ ଞାଙେଞ୍ଜି, ଆରି ଅବ୍ରାହାମନ୍ ମନଙ୍ କେଜ୍ଜାମର୍ଞ୍ଜି ଡେଲୋଜି ।
ଅବ୍ରାହାମନ୍ ଆଡାଙ୍ଗଡା ଅନନ ଇସାହାକନ୍ ଆଡଅଙ୍ ଅନମଙନ୍ ତନିୟନ୍ ଆସନ୍ ଏଙ୍ଗାଲେ ଈଶ୍ୱରନ୍ ବରେନ୍, ତାଡିନ୍ନା ଆଡାଙ୍ଗଡଅନନ ଇସାହାକନ୍ ଆପାଲତେଙ୍ ଅନମେଙନ୍ ତିୟନ୍ ଆସନ୍ ଅବୟ୍ ମେଣ୍ତାନ୍ ତିୟେନ୍ । ଇନ୍ଲେନ୍ ଅଡକୋଲେନ୍ ଇର୍ସେଲେନ୍ ଆସନ୍ ରନବ୍ବୁନ୍ ଡେତେ! ବନ୍ଡ ଈଶ୍ୱରନ୍ ଆଆନନ ଯୀଶୁନ୍ ଇନ୍ଲେନ୍ଲୋଙ୍ ଆନିନ୍ ଅବୟ୍ ଅନମେଙନ୍ ଅନ୍ତମ୍ ରନବ୍ବୁନ୍ ତିୟେନ୍ । ଈଶ୍ୱରନ୍ ଏଙ୍ଗାଲେ ମିସରଲୋଙନ୍ ଆତନିକ୍କି ରୋଗାନ୍ ଆପ୍ପାୟେନ୍, ଆନିନ୍ ଅଡକୋ ଇସ୍ରାଏଲୀୟ କୁତ୍ତମ୍ମାଜି ଅବୟ୍ ମନଙ୍ ମେଣ୍ତାନ୍ ରବ୍ବୁଡାଲେ ଆଡୁଆରାନ୍ଜି ଆସନଙ୍ଲୋଙ୍ ତି ଆମେଣ୍ତା ଆମିଞାମନ୍ ଜନଡନ୍ ଆସନ୍ ବରେନ୍ ।
ଈଶ୍ୱରନ୍ ଏଙ୍ଗାଲେ ମିଞାମନ୍ ଗିଜେନ୍, ଆନିନ୍ ଆନିଞ୍ଜି ଆସିଂ ଅମ୍ରେଙେନ୍ ଆରି ଆନିଞ୍ଜି ଆପର୍ତୁମୁ ଅନନଞ୍ଜି ଅର୍ରବ୍ବୁଲୋ । କେନ୍ ଆବର୍ନେ ଆଡଅଙ୍ ଅନେଲାୟ୍ପୁର୍ ଗନାମନ୍ ଡେତେ । ଯୀଶୁନ୍ ଅନେଲାୟପୁରନ୍ ଆମେଣ୍ତା ।
ଆନିନ୍ ମନଙ୍ ଡ ମଡିର୍ ଡକୋଏନ୍ ଆରି ଅନେଲାୟ୍ପୁରନ୍ ଆମନ୍ନାନେ ବେଳାମା ଆନିନ୍ ରନବ୍ବୁନ୍ ଡେଏନ୍ । ଏଙ୍ଗାଲେ ଅବୟ୍ନେ ଯୀଶୁନ୍ ଆମଙ୍ ଡର୍ରତନେ, ତାଡିଡ୍ ଯୀଶୁନ୍ ଆମିଞାମ୍ ଆଇର୍ସେଞ୍ଜି ଲୋଙ ତିୟଡମ୍ତନେ, ଆରି ଈଶ୍ୱରନ୍ ଆଡଣ୍ତ ତି ଆମନ୍ଡ୍ରା ସିଲଡ୍ ସଙାୟ୍ତେ । ଈଶ୍ୱରନ୍ ଇସ୍ରାଏଲିୟଞ୍ଜି ସରିନ୍ ଅବୟ୍ ଅନୋକ୍କାନ୍ ଡକୋଏନ୍, ଆନାଜି ଆବାସ୍ସେମର୍ ଡକୋଏଞ୍ଜି ।
ବନ୍ଡ ଈଶ୍ୱରନ୍ ନମି ଅବୟ୍ ନୁଆ ଅନୋକ୍କା ଡକୋଏନ୍ ଅଙ୍ଗା ଆତେ ଅଡକୋନଞ୍ଜି ଆସନ୍ ଡେତେ । କେନ୍ ଆନୁଆ ଅନୋକ୍କାନ୍ ବାତ୍ତେ, ଏଙ୍ଗାଗୋଜାୟ୍ ଆଜାତିଲୋଙ୍ ଏଙ୍ଗାଗୋ ଜାୟ୍ ଆମନ୍ଡ୍ରା ଯୀଶୁନ୍ ଆମଙ୍ ଆଡର୍ନେଲୋଙନ୍ ଈଶ୍ୱରନ୍ ଆମନ୍ଡ୍ରାଜି ଲୋଙ୍ ଅବୟ୍ନେ ଡେତେ । ମୋଶାନ୍ ଅବୟ୍ ସୋଡା ପୁର୍ବାଃତେବର୍ନେମର୍ ଡକୋଏନ୍ ଆନା ଈଶ୍ୱରନ୍ ଆବର୍ନେ ଅପ୍ପୁବର୍ରନେ ।
ବନ୍ଡ ଯୀଶୁନ୍ ଅଡକୋନ୍ ଆପୁର୍ବାଃତେବର୍ନେମରଞ୍ଜି ସିଲଡ୍ ସୋଡା ଡକୋଏନ୍ । ଆନିନ୍ ଈଶ୍ୱର, ତି ଆସନ୍ ଆନିନ୍ ଇନିଜି ଲୁମେନ୍ ଡ ତି ଆତେ ଈଶ୍ୱରନ୍ ଆଲନୁମ୍ ଡ ଈଶ୍ୱରନ୍ ଆବର୍ନେ ଡକୋଏନ୍ । ତିଲୋଙ୍ ଯୀଶୁନ୍ ଆଡଅଙ୍ ଈଶ୍ୱରନ୍ ଆବର୍ନେ ଗନାମନ୍ ଡେତେ । ଈଶ୍ୱରନ୍ ରାଜା ଦାଉଦନ୍ ଆଡଅଙ୍ ସିବ୍ଡେୟ୍ବର୍ରନ ଡ ଆକେଜ୍ଜା ଲୋଙନ୍ ଅବୟ୍ନେ ଈଶ୍ୱରନ୍ ଆମନ୍ଡ୍ରାଞ୍ଜି ଲୋଙ୍ ଅଡକୋଡିନ୍ନା ଡନେତନେ ।
ଇନି ଆସନ୍ ଗାମେଣ୍ତେନ୍ ଯୀଶୁନ୍ ଈଶ୍ୱରନ୍ ଆଡାଙ୍ଗଡା ଅନନ ଡ କ୍ରୀଷ୍ଟନ୍, ଆନିନ୍ ଦାଉଦନ୍ ଆକେଜ୍ଜା ଡକୋଏନ୍ ଆନା ଅଡକୋଡିନ୍ନା ଡନେତନେ ।ଦାଉଦନ୍ ଇସ୍ରାଏଲନ୍ ଆରାଜା ଡକୋଏନ୍, ବନ୍ଡ ଯୀଶୁନ୍ ସମ୍ପ୍ରଦା ପୁର୍ତ୍ତିନ୍ ଆରାଜା ।
ଆନିନ୍ ଆରି ଜିର୍ତାୟ୍ ଆରି ନିଆୟନ୍ ଡ ସନୟୁନ୍ ବାତ୍ତେ ଡିତାନ୍ ରାଜାତନେ । ବାଇବଲ୍ ଲୋଙନ୍ ଅବୟ୍ ଅନବ୍ଜଙବର୍: ଆଦି ୧-୩, ୬, ୧୪, ୨୨; ଯାତ୍ରା ୧୨, ୨୦; ୨ଶାମୁୟେଲ ୭; ଏବ୍ରୀ ୩:୧-୬, ୪:୧୪-୫:୧୦; ୭:୧-୮:୧୩; ୯:୧୧-୧୦:୧୮; ପ୍ରକାଶିତ ୨୧:୪୯_
Free to use, adapt, and share under an open license (CC BY-SA 4.0).