47. ସାଉଲନ୍ ଅମ୍ପରା ରୋମୀୟନ୍ ରାଜ୍ୟନ୍ ଆବ୍ରୁଲେନ୍ ଆଡିଡ୍ ଆନିନ୍ ରୋମୀୟ୍ ଞୁମନ୍ “ପାଉଲ” ଗାମ୍ଲେ ଞଣ୍ତ୍ରମ୍ଲନେ ।
ବଡିନ୍ନା ପାଉଲନ୍ ଡ ଆଗଡିନ୍ ଶୀଲା ଫିଲିପ୍ପି ଗଡାନ୍ ଯୀଶୁନ୍ ଆବର୍ନେ ଅପ୍ପୁଙ୍ବରନେ ଆସନ୍ ଇୟେଞ୍ଜି । ଆନିଞ୍ଜି ଗଡାନ୍ ଆତୟ୍ତୟ୍ ଅବୟ୍ ଆନ୍ନେଙ୍ ଅଲନ୍ ଡକୋନ୍ ଅବୟ୍ ଜାଗାନ୍ ଇୟେଞ୍ଜି ଅଙ୍ଗାଲୋଙ୍ ମନ୍ଡ୍ରାଞ୍ଜି ବେର୍ବ୍ବନେ ଆଲନୁମ୍ ଆସନ୍ ରୁକ୍କୁଲନ୍ ଡକୋଲଞ୍ଜି । ତେତ୍ତେ ଆନିଞ୍ଜି ଲୂଦିଆ ଆଞୁମ୍ ଅବୟ୍ ବେବାରବଜନ୍ ଗିଜେଞ୍ଜି । ଆନିନ୍ ଈଶ୍ୱରନ୍ ଆଡଅଙ୍ ଲୋବଏନ୍ ଆରି ବେର୍ବ୍ବରନ୍ ଡକୋଲନ୍ । ଯୀଶୁନ୍ ଆବର୍ନେଜି ଏଙ୍ଗାଲେ ଲୂଦିଆ ଡର୍ରତନେ ତି ଆସନ୍ ଈଶ୍ୱରନ୍ ଆମଡନ୍ ରୋଏନ୍, ଆରି ଆନିନ୍ ଡ ଆକୁତ୍ତମ୍ମାଞ୍ଜି ତବ୍ବୁଡାଲଞ୍ଜି ।
ଆନିନ୍ ପାଉଲନ୍ ଡ ଶୀଲା ଆଡଅଙ୍ ଆସିଙନ୍ଲୋଙନ୍ ଡକୋନେନ୍ ଆସନ୍ ଓଡେଏଞ୍ଜି, ତି ଆସନ୍ ଆନିଞ୍ଜି ଆନିନ୍ ସରିନ୍ ଡ ଆକୁତ୍ତମ୍ମାଞ୍ଜି ସରିନ୍ ଡକୋଲଞ୍ଜି । ପାଉଲନ୍ ଡ ଶୀଲା ବେର୍ବ୍ବନେ ଡରକୋନେ ଲୋଙନ୍ ଗୋଗୋୟ୍ ମନ୍ଡ୍ରାଞ୍ଜି ଇୟ୍ଲେ ଇୟ୍ଲାୟ୍ ମାନ୍ନେଜି ।
ଡିତାନ୍ ଅନ୍ତମ୍ ଆନିଞ୍ଜି ଏଙ୍ଗାଲେ ତି ଆବେର୍ବ୍ବନେ ଡରକୋନେଲୋଙ୍ ଜିର୍ରେଞ୍ଜି, ତି ଆବେଳା ଅବୟ୍ ଆମବ୍ବୁଡ୍ ଆଇସିୟ୍ ତି ଆକିଣ୍ତୋଙ୍ ବାଜି ସନ୍ଲ୍ଲେ ପାଙେଞ୍ଜି । କେନ୍ ଆବୁତ ବାତ୍ତେ ଆନିନ୍ ତିକ୍କି ଆଓୟୋଙ୍ ଆବର୍ନେ ମନ୍ଡ୍ରାଞ୍ଜି ବର୍ରେ ରପ୍ତିଏଞ୍ଜି, ତି ଆସନ୍ ଆନିନ୍ ତି ଆସାଉକାରନ୍ ଆସନ୍ ଅବୟ୍ ତନାଲମଡ୍ଗିୟ୍ ବର୍ନେ ବାତ୍ତେ ଗୋଗୋୟ୍ ଡାବୋନ୍ ଅର୍ଜେଲେ ତିୟେନ୍ । ଆନିଞ୍ଜି ତଙିଲେ ଆଜିର୍ରେଞ୍ଜି ଆବେଳା ତି ଆମବୁଡ୍ ଆଇସିଜନ୍ ନମିନ୍ନମିନ୍ ବାବ୍ବାବ୍ଡାଲେ ବର୍ରନେ “କେନ୍ ଆମନ୍ଡ୍ରାଜି ରୁଆଙ୍ ଈଶ୍ୱରନ୍ ଆସ୍ରେବାମର୍ଞ୍ଜି ।
ଆନିଞ୍ଜି ଅନୁରନ୍ ଆଞନାଙ୍ ଆସନ୍ ବର୍ତଞ୍ଜି! “ଆନିନ୍ ଗୋଗୋୟ୍ ବେଳା ଜାୟ୍ କେନ୍ ଅନ୍ତମ୍ ବର୍ରନ୍ ଡ ପାଉଲନ୍ କେନ୍ ଆତେ ଅମଡଙ୍ ଅମଡଙ୍ଲେ ବିଜାର ଡେଏନ୍ । ଆତନିକ୍କି ଏଙ୍ଗାଲେ ତି ଆଇସିୟ୍ ବାବ୍ବ୍ବାବ୍ବ୍ଲେ ବର୍ରନେ ପାଉଲନ୍ ଆୟର୍ଗୁଡିଲନ୍ ତି ଆଇସିୟ୍ଲୋଙ୍ ଡକୋନ୍ ଆପୁରାଡା ଆଡଅଙ୍ ବରେନ୍ “ଯୀଶୁନ୍ ଆଞୁମ୍ ଲୋଙ୍ କେନ୍ ଆମଙନ୍ ସିଲଡ୍ ଡୁଙ୍ଲନ୍ ଜିର୍ରା ।”
ଅବ୍ତାଡନ୍ ତି ଆବୁତ ଆନିନ୍ ଆଡଅଙ୍ ଅମ୍ରେଙ୍ଲେ ଜିର୍ରେନ୍ । ଅଙ୍ଗା ଆମନ୍ଡ୍ରା ତି ଆଇସିୟ୍ କମ୍ୱାରୀନ୍ ଡକୋଲେ ଡନେନ୍, ଆନିନ୍ ଗୋଗୋୟ୍ ବରାବେନ୍ ।
ଆନିଞ୍ଜି ଅମ୍ଲଞ୍ଜି ଡ ବୁତ ଅମ୍ରେଙଲେ ତି କମ୍ୱାରୀ ଆଇସିୟ୍ ମନ୍ଡ୍ରାଞ୍ଜି ଆତିକ୍କି ଆଓୟୋଙ୍ ଆବର୍ନେ ବର୍ରନ୍ ଅରପ୍ତିଏ । କେନ୍ ଆଗରାମ୍ଗାମନ୍ ମନ୍ଡ୍ରାଞ୍ଜି ତିକ୍କି ଆଓୟୋଙ୍ ଆବର୍ନେ ଆସନ୍ ଆନିଞ୍ଜି ତି ଆକମ୍ୱାରୀ ଆଇସିୟ୍ ଆସାଉକାର ଆଡଅଙ୍ ଆରି ଡାବୋନ୍ ଅତ୍ତିୟେଜି । ତି ଆସନ୍ ତି କମ୍ୱାରୀ ଆଇସିଜନ୍ ଆସାଉକାରଜି ପାଉଲନ୍ ଡ ଶୀଲାନ୍ ଆଡଅଙ୍ ରୋମୀୟ ଆଡନେମର୍ଜୀ ଆମଙ୍ ଓରୋଙେଞ୍ଜି, ଆନିଞ୍ଜି ପାଉଲନ୍ ଡ ଶୀଲାନ୍ ଆଡଅଙ୍ ତିଡେନ୍ଜି କି ବଣ୍ତିସିଂଲୋଙନ୍ ଡକୋଏଞ୍ଜି ।
ଆନିଞ୍ଜି ପାଉଲନ୍ ଡ ଶୀଲାନ୍ ଆଡଅଙ୍ ବଣ୍ତିସିଂଲୋଙନ୍ ମନଙ୍ ଜନଗେନ୍ ରେଙନ୍ ଡକୋଲେ ଆଜଙନ୍ଜି ଜିଲ୍ଲେ ଡକୋଏଞ୍ଜି ।
ଡେଲ୍ ଜାୟ୍ଡେନ୍ ଅଡ୍ରାତିନ୍ ଆନିଞ୍ଜି ଈଶ୍ୱରନ୍ ଆମଙ୍ ସେନ୍ସେନ୍ କନନଞ୍ଜି କନ୍ନେଞ୍ଜି । ଏରବ୍ବୋମଙ୍, ଗୋଗୋୟ୍ ବରନ୍ତଙନ୍ ୟୁର୍ରଲନ୍ ଡେଏନ୍!
ବଣ୍ତିସିଂଲୋଙନ୍ ଡକୋନ୍ ଅଡକୋନ୍ ଆଡୁଆରା ରୋଆୟ୍ଲନ୍, ଆରି ଅଡକୋନ୍ ଆବଣ୍ତିମରଞ୍ଜି ଆସିଲୋଙ୍ ସିଲଡ୍ ଶିଙ୍କୁଳିଞ୍ଜି ଜଲଜାଜେନ୍ । ବଣ୍ତିସିଂ ଆଜନଗେମର୍ ମଡେଏନ୍ ଆରି ଏଙ୍ଗାଲେ ଗିଜେନ୍ ଡ ବଣ୍ତିସିଂଲୋଙନ୍ ଆଡୁଆରା ଆରୋରୋଆୟ୍, ଆନିନ୍ ବତଙେନ୍ ।
ଆନିନ୍ ଇୟ୍ୟମେନ୍ ଡ ଅଡକୋନ୍ ଆବଣ୍ତିମରନ୍ ଡୁଙ୍ଲନ୍ ଜିରାଜେଞ୍ଜି, ତି ଆସନ୍ ଆନିନ୍ ଆନିନ୍ଡମ୍ ରବ୍ବୁଡମ୍ନେ ଆସନ୍ ଇୟ୍ୟମେନ୍ । ( ଆନିନ୍ ଜନାଏନ୍ ଡ ରୋମୀୟ୍ ଆସୋଡାମର୍ଆନିନ୍ ଆଡଅଙ୍ ରବ୍ବୁତେ ଡ ବଣ୍ତିମରଞ୍ଜି ଆଡଅଙ୍ ଜନୁରନ୍ ଆସନ୍ ବନାୟନ୍ ତିୟେଞ୍ଜି ଡେନ୍ ।) ବନ୍ଡ ପାଉଲନ୍ ଆନିନ୍ ଗିୟଲେ ବାବ୍ବ୍ବାବ୍ବ୍ଲେ ବରେନ୍ “ଡକୋନା! ଆମନ୍ଡମ୍ ରବ୍ବୁଡଙନେ । ଇନ୍ଲେନ୍ ଅଡକୋଲେ ତେନ୍ନେ ଡକୋଜି । ବଣ୍ତିସିଂ ଆଜନଗେମର୍ ଏଙ୍ଗାଲେ ପାଉଲନ୍ ଡ ଶୀଲାନ୍ ଆମଙ୍ ଜିର୍ରାୟ୍, ଆନିନ୍ ବନ୍ତଙନ୍ ବାତ୍ତେ ତକରେନ୍ ଆରି ଗାମେନ୍, ଅନୁରନ୍ ଆଞନାଙ୍ ଆସନ୍ ଞେନ୍ ଇନି ଏଙ୍ଗାନାୟ୍?
ପାଉଲନ୍ ଜାଲଙଲେ ଗାମେନ୍ “ଯୀଶୁନ୍ ଆମଙ୍, ଆନା ଗୁରୁ, ଡର୍ନା, ତିଡେନ୍ ଆମନ୍ ଡ କୁତ୍ତମ୍ମାନଞ୍ଜି ଅନୁରନ୍ ଏଞାଙତେ । ତି ସିଲଡ୍ ତି ଆବଣ୍ତିସିଂ ଆଜନଗେମର୍ ଆସିଙନ୍ ପାଉଲନ୍ ଡ ଶୀଲାନ୍ ଆଡଅଙ୍ ଓରୋଙଲେ ତି ଆପ୍ପାରାଞ୍ଜି ଗିୟ୍ଡାଏନ୍ । ତି ଆସିଙଞ୍ଜି ଡକୋନ୍ ଅଡକୋଞ୍ଜି ପାଉଲନ୍ ଯୀଶୁନ୍ ଆବର୍ନେ ଅପ୍ପୁଙବରେଞ୍ଜି । ବଣ୍ତିସିଂ ଆଜନଗେମର୍ ଡ ଆକୁତ୍ତମ୍ମାଞ୍ଜି ଅଡକୋଞ୍ଜି ଡର୍ରନ୍ ତବ୍ବୁବ୍ଡା ପାଙେଞ୍ଜି ।
ବଣ୍ତିସିଂଲୋଙନ୍ ଆଜନଗେମର୍ ପାଉଲନ୍ ଡ ଶୀଲାନ୍ ଆଡଅଙ୍ ଗାଗାନେନ୍ ତିୟେଞ୍ଜି ଆରି ଆନିଞ୍ଜି ଅଡକୋଞ୍ଜି ରୁକ୍କୁଲନ୍ ସର୍ଡାଲଞ୍ଜି । ଆବାର୍ତାନ୍ ଡୋତାନ୍ ଗଡାନ୍ ଆସୋଡାମର୍ଜି ପାଉଲନ୍ ଡ ଶୀଲନ୍ ଆଡଅଙ୍ ବଣ୍ତିସିଂ ସିଲଡ୍ ଅମ୍ରେଙେଞ୍ଜି ଆରି ଆନିଞ୍ଜି ଆଡଅଙ୍ ଫଲିପ୍ପୀ ଆଗଡା ସିଲଡ୍ ଜନିରନ୍ ଆସନ୍ ବରେଞ୍ଜି ।
ପାଉଲନ୍ ଡ ଶୀଲାନ୍ ଲୁଦିଆ ଡ ଲାଙଲେଡ୍ ଆନ୍ନା ଆଗଡିଜି ଆଡଅଙ୍ ରବାଙେଞ୍ଜି କି ଆନିଞ୍ଜି ତି ଆଗଡା ଅମ୍ରେଙେଞ୍ଜି । ଯୀଶୁନ୍ ଆବର୍ନେ ଅଡେତ୍ତେ ଅଡେନ୍ନେ ଲାର୍ରନ୍ ଗୋଗୋୟ୍ଲେ ପାଙେନ୍, ଆରି ମଣ୍ତଳୀ ନିୟ୍ ଗୋଗୋୟ୍ଲେ ପାଙେନ୍ । ପାଉଲନ୍ ଡ ଲାଙ୍ଲେଡ୍ ଖ୍ରୀଷ୍ଟାନୁ ସୋଡାମରଞ୍ଜି ଗୋଗୋୟ୍ ଗଡାନ୍ ବୁଲ୍ଲେଏଞ୍ଜି ଆରି ଯୀଶୁନ୍ ଆମନଙ୍ ବର୍ ଅପ୍ପୁଙ୍ବର୍ନ ଞନ୍ଙନ୍ ତିୟ୍ଲେ ପାଙେଞ୍ଜି ।
ଆନିଞ୍ଜି ମଣ୍ତଳୀରେଙନ୍ ଡକୋନ୍ ଆଡର୍ନେମର୍ଜି ଆଡଅଙ୍ ଅବ୍ସର୍ଡାଲେ ଡ ଞନ୍ଙନ୍ ଆତନିୟ୍ ଆସନ୍ ଗୋଗୋୟ୍ ସିଟିଞ୍ଜି ଇଡେଞ୍ଜି । କେନ୍ ଆସିଟିଜିଲୋଙ୍ ଅସୋୟ୍ ବାଇବଲ ବଇଲୋଙନ୍ ଡକୋ ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ ବର୍: ପ୍ରେରିତ ୧୬:୧୧-୪୦-୪୮
Free to use, adapt, and share under an open license (CC BY-SA 4.0).