46. ସ୍ତିପାନ୍ ଆରବ୍ବୁଏଞ୍ଜି ଆମନ୍ଡ୍ରାଜି ଆସିଡ୍ରିନ୍ ଆର୍ଜଗେଏନ୍ ଆବେନଡ୍ଡିଆମର୍ ସାଉଲ ଡକୋଏନ୍ ।
ଆନିନ୍ ଯୀଶୁନ୍ ଆଡଅଙ୍ ଅଡର୍ରନେ, ତି ଆସନ୍ ଆନିନ୍ ଡର୍ନେମରଞ୍ଜି ଆଡଅଙ୍ ଡଣ୍ତାୟେନ୍ । ବାଗୁନ୍ ଓବ୍ବାମରନ୍ ଡ ଆଇମରନ୍ ଏଙ୍ଗାଲେ ଜିଲ୍ଲେ ପନାଙନ୍ ଆସନ୍ ଆନିନ୍ ଯିରୁଶାଲମନ୍ ଡକୋନ୍ ରମଙ୍ ଡର୍ନେମରଞ୍ଜି ଆସିଂ ଗନ୍ନେଞ୍ଜି ଆରି ବଣ୍ତିସିଂଲୋଙନ୍ ବଣ୍ତିଲେ ଡକୋଏଞ୍ଜି । ଦମ୍ମେସକଲୋଙନ୍ ଡକୋନ୍ ଆଡର୍ନେମରଞ୍ଜି ଏଙ୍ଗାଲେ ସାଉଲନ୍ ଞମ୍ଲେ ଯିରୁଶାଲମନ୍ ପାଙ୍ଲେ ରପ୍ତିତାୟ୍ ତି ଆସନ୍ ସୋଡାପୁର୍ପୁର୍ମରନ୍ ଆନିନ୍ ଆଡଅଙ୍ ବାଞେଞ୍ଜି । ସାଉଲନ୍ ଏଙ୍ଗାଲେ ପମ୍ମେସକନ୍ ଆତଙର୍ ଗଡ୍ ଜିରେନ୍, ରୁଆଙନ୍ ସିଲଡ୍ ଅବୟ୍ଗୋଗୋୟ୍ ସାଆର୍ ଆସାଆର୍ ଏର୍ରେ ଗିୟ୍ତାଏନ୍ ଆରି ଆନିନ୍ ଗୋଙ୍ଲେ ଜିରେନ୍ ।
ଅବୟ୍ନେ କେନ୍ଆତେ ଆବର୍ରନ୍ ସାଉଲନ୍ ଅମ୍ଡଙେନ୍, “ସାଉଲ! ସାଉଲ! ଆମନ୍ ଇନିଆସନ୍ ଞେନ୍ ଆଡଅଙ୍ ଡଣ୍ତାୟ୍ତିଞ୍ ?” ସାଉଲନ୍ ବରେନ୍ “ପ୍ରବୁ, ଆମନ୍ ଆନା ?” ଯୀଶୁନ୍ ଜାଲଙ୍ଲେ ବରେନ୍ “ଞେନ୍ ଯୀଶୁନ୍ । ଆମନ୍ ଞେନ୍ ଆଡଅଙ୍ ଡଣ୍ତାୟ୍ତିଞ୍!” ସାଉଲନ୍ ଏଙ୍ଗାଲେ ଡୋଲନ୍ନେ, ଆନିନ୍ ଗିୟ୍ଲେ ଅରପ୍ତିଲୋ ।
ଆଗଡିନ୍ ଆନିନ୍ ଆଡଅଙ୍ ଦମ୍ମେସକନ୍ ଆତଙର୍ ଅବ୍ତୁୟ୍ଗଡେଞ୍ଜି । ସାଉଲନ୍ ୟାଗି ଡିନ୍ନା ଜାୟ୍ ଇନ୍ନୁଙ୍ ଅଜୋମ୍ଲୋ ଡ ଅଃଗାଲୋ । ହନନିୟ୍ ଆଞୁମ୍ ଅବୟ୍ ଞଙନେମରନ୍ ଦମ୍ମେସକଲୋଙନ୍ ଡକୋଲନେ ।
ଈଶ୍ୱରନ୍ ଆନିନ୍ ଆଡଅଙ୍ ବରେନ୍ “ସାଉଲନ୍ ଆଡ୍ରକୋତନ୍ ଆସିଙ୍ ଇୟା । ଆତୋଣ୍ତୋନ୍ ଅସିନ୍ ଡକୋଆ ଏଙ୍ଗାଲେ ଆନିନ୍ ଗିୟ୍ଲେରପ୍ତିତେ ।” ବନ୍ଡ ହନନିୟନ୍ ଗାମେନ୍ “ପ୍ରବୁ, କେନ୍ ଆମନ୍ଡ୍ରା ଏଙ୍ଗାଲେ ଡର୍ନେମରଞ୍ଜି ଆଡଅଙ୍ ଡଣ୍ତାୟ୍ତେ ତିଆତେ ଞେନ୍ ଅମ୍ଡଙଲାୟ୍, ”ଈଶ୍ୱରନ୍ ଆନିନ୍ ଜାଲଙଲେ ବରେନ୍ “ଇୟା! ଯିହୁଦୀନ୍ ଡ ଆନ୍ନାମରଞ୍ଜି ଆମଙ୍ ଅଞୁମ୍ଞେନ୍ ଆପ୍ପୁଃବର୍ନେ ଆସନ୍ ଞେନ୍ ଆନିନ୍ ବାସ୍ସେଲାୟ୍ । ଆନିନ ଅଞୁମ୍ଲୋଙଞେନ୍ ଗୋଗୋୟ୍ ଡନଣ୍ତାୟନ୍ ଞାଙତେ ।” ତି ଆସନ୍ ହନନିୟନ୍ ସାଉଲନ୍ ଆଡ୍ରକୋନେସିଂ ଇୟେନ୍, ଆତୋଣ୍ତୋନ୍ ଆସିନ୍ ଡକୋଏନ୍ ଆରି ଗାମେନ୍ “ଆମନ୍ ତେନ୍ନେ ଆଜିର୍ତାଞନ୍ ଆବେଡା ଅଙ୍ଗା ଆଯୀଶୁ ଆମନ୍ ତନ୍ନାଲ୍ମଡନ୍ ତିୟ୍ଲମ୍, ଅନିନ୍ ଞେନ୍ ଅମଙ୍ନମ୍ ଆପ୍ପାୟଲିଞ୍ ଏଙ୍ଗାଲେ ଆମନ୍ ଆରି ଗିୟ୍ଲେରପ୍ତିତେ ଆରି ମଡିର୍ପୁରାଡାନ୍ ଞାଙ୍ତେ ।
ସାଉଲନ୍ ଅବ୍ତାଡନ୍ ଗନିଜନ୍ ଆସନ୍ ବୋର୍ସାନ୍ ଞାଙେନ୍, ଆରି ହନନିୟନ୍ ଆନିନ୍ ଆଡଅଙ୍ ତବ୍ବୁଡାଏନ୍ । ତି ଆତିକ୍କି ସାଉଲନ୍ ଗାଗାଲନେ ଆରି ବୋର୍ସାଞାଙେନ୍ । ଅବ୍ତାଡନ୍ ସାଉଲନ୍ ଦମ୍ମେସକନ୍ ଡକୋନ୍ ଆଯିହୁଦୀଜି ଆମଙ୍ କେନ୍ ଆତେ ଆପ୍ପୁଙ୍ବର୍ରନେ “ଯୀଶୁନ୍ ଆଜାଡିନ୍ ଈଶ୍ୱରନ୍ ଆଡାଙ୍ଗଡାଅନନ !”
ଅଙ୍ଗା ଆମନ୍ଡ୍ରା ଡର୍ନେମରଞ୍ଜି ଅନବ୍ମୋସାନ୍ ଆସନ୍ ଇସ୍ସୁମେନ୍ ଆରି ଆନିନ୍ ନମି ଯୀଶୁନ୍ ଆମଙ୍ ଡର୍ରନେ ତିଲୋଙ୍ ଯିହୁଦୀଞ୍ଜି ସାନ୍ନିଆ ଡେଏଞ୍ଜି । ସାଉଲନ୍ ଯିହୁଦିଞ୍ଜି ସରିନ୍ ଜୁକ୍ତିଲନ୍ ଆଜାଡିନ୍ ଗାମଲେ ଅବ୍ତୁଜେନ୍ ଯୀଶୁନ୍ ଆଜାଡି କ୍ରୀଷ୍ଟନ୍ । ଗୋଗୋୟ୍ ଡିନ୍ନା ଆତିକ୍କି, ସାଉଲନ୍ ଆସନମ୍ୱବ୍ ଆସନ୍ ଯିହୁଦୀଞ୍ଜି ଏରେଞ୍ଜି ଗୋଜଞ୍ଜି ।
ଆନିଞ୍ଜି ଆନିନ୍ ଆଡଅଙ୍ ସମ୍ୱନବନ୍ ଆସନ୍ ଗଡାନ୍ ଆଗ୍ରନେଗଡ୍ ଜନଗେନ୍ ଆସନ୍ ମନ୍ଡ୍ରାନ୍ ଆପ୍ପାୟେଞ୍ଜି । ବନ୍ଡ ସାଉଲନ୍ ତି ଆବର୍ନେ ଅମ୍ଡଙେନ୍, ଆରି ତିଲୋଙ୍ ଅବୁର୍ରେ ଜନୁରନ୍ ଆସନ୍ ଆଗଡିଞ୍ଜି ମାୟେଞ୍ଜି । ବତଗଲ୍ ଆନିଞ୍ଜି ଅବୟ୍ ମରଞ୍ଲୋଙନ୍ ଆନିନ୍ କିନ୍ତାଲ୍ତର୍ ଗଡ୍ ଆନିନ୍ ଅପ୍ପଲାଜି । ସାଉଲନ୍ ଦମ୍ମେସକନ୍ ସିଲଡ୍ ଅବ୍ବୁର୍ରେ ଜିରେନ୍ ତି ଆତିକ୍କି, ଆନିନ୍ ଯୀଶୁନ୍ ଆବର୍ନେ ଅପ୍ପୁବର୍ରନ୍ ଡକୋଲନେ । ସାଉଲନ୍ ଞଙନେମରଞ୍ଜି ସରିନ୍ ରନବାଙନ୍ ଆସନ୍ ଯିରୁଶାଲମନ୍ ଇୟେନ୍, ବନ୍ଡ ଆନିଞ୍ଜି ଆନିନ୍ ଆଡଅଙ୍ ବତଙେଞ୍ଜି ।
ତି ସିଲଡ୍ ବର୍ଣ୍ଣବା ଆଞୁମ୍ମର୍ ଅବୟ୍ ଡର୍ନେମରନ୍ ଞଙ୍ନେମରଞ୍ଜି ଆମଙ୍ ସାଉଲନ୍ ଓରୋଙେନ୍ ଆରି ଆନିଞ୍ଜି ଆଡଅଙ୍ ବରଞ୍ଜି ଡ ଆନିନ୍ ଦମ୍ମେସକଲୋଙନ୍ ଏଙ୍ଗାଲେ ଅବୋର୍ସାଲନ୍ ଅପ୍ପୁଙ୍ବର୍ରନେ । ତି ସିଲଡ୍ ଞଙ୍ନେମରଞ୍ଜି ଆନିନ୍ ଆଡଅଙ୍ ମାୟେଞ୍ଜି । ଅଙ୍ଗା ଆଡର୍ନେମରଞ୍ଜି ଡନଣ୍ତାୟନ୍ ଆସନ୍ ଯିରୁଶାଲମନ୍ ଅମ୍ରେଙ୍ଲେ ଜିରେଞ୍ଜି, ଆନିଞ୍ଜି ଆନ୍ତିୟକିଆ ଜାୟ୍ ଯୀଶୁନ୍ ଆବର୍ନେ ଅପ୍ପୁଙ୍ବର୍ରଞ୍ଜି ।
ଆନ୍ତିୟକିଆଲୋଙନ୍ ଡକୋନ୍ ଲାଙ୍ଲେଡ୍ ମନ୍ଡ୍ରାଞ୍ଜି ଯିଉଦିଜି ଅଡକୋଲଜି, ବନ୍ଡ ଆପର୍ତମୁନ୍ ଆସନ୍ ଆନିଞ୍ଜି ଲୋଙ୍ ଗୋଗୋୟ୍ନେ ଡର୍ନେମର୍ ଡେଲୋଜି । ବର୍ଣ୍ଣବ୍ବା ଡ ସାଉଲନ୍ ତେତ୍ତେ ଡକୋ ଆନୁଆ ଡର୍ନେମରଞ୍ଜି ଆଡଅଙ୍ ଯୀଶୁନ୍ ଆବର୍ନେ ଲୋଙ୍ ଗୋଗଗୟ୍ ଞନଙନ୍ ଆତନିୟ୍ ଆସନ୍ ଡ ମଣ୍ତଳୀନ୍ ରଡୋ ଆନବ୍ମେ ଆସନ୍ ଇୟେଞ୍ଜି । ଆନ୍ତିୟକିଆ ଆମଣ୍ତଲୀଲୋଙ୍ ଡକୋନ୍ ଆଡର୍ନେମଞ୍ଜି ଆଡଅଙ୍ ଆପର୍ତମୁନ୍ “ଖ୍ରୀଷ୍ଟିଆନ୍” ଗାମଲେ ବର୍ନେନ୍ ଡେଏନ୍ । ବମିୟ୍ତା, ଆନ୍ତିୟକିଆ ଆମଣ୍ତଳୀଲୋଙ୍ ଡକୋନ୍ ଆଖ୍ରୀଷ୍ଟିଆନଜି ଅନମ୍ ବେର୍ବ୍ବରନ୍ ଆର୍ଲୁମେଞ୍ଜି ଆଡିଡ୍ ମଡିରପୁରାଡାନ୍ ଆନିଞ୍ଜି ଆଡଅଙ୍ ବରେଞ୍ଜି “ବର୍ଣ୍ଣବାନ୍ ଡ ସାଉଲନ୍ ଅଙ୍ଗା ଆଲନୁମ୍ ଆସନ୍ ଞେନ୍ ଓଡ୍ଡେଲବେନ୍ ତି ଆସନ୍ ଆନିଞ୍ଜି ଆଡଅଙ୍ ଞେନ୍ ଆସନ୍ ଅବ୍ବାନ୍ନାବା ।
ତି ଆସନ୍ ଆନ୍ତିୟକିଆ ଆମଣ୍ତଳୀ ବର୍ଣ୍ଣବାନ୍ ଡ ସାଉଲନ୍ ଆସନ୍ ବେର୍ବ୍ବର୍ ଡାଲନ୍ ଆନିଞ୍ଜି ଆଡଅଙ୍ ଅବ୍ସିତ୍ତାଏଞ୍ଜି । ତି ଆତିକ୍କି ଆନିଞ୍ଜି ଗୋଗୋୟ୍ ରେଙନ୍ ଯୀଶୁନ୍ ଆମନଙ୍ବର୍ଜି ଅପ୍ପୁଙ୍ବର୍ନେ ଆସନ୍ ଆନିଞ୍ଜି ଆଡଅଙ୍ ଆପ୍ପାୟେଞ୍ଜି । ବର୍ଣ୍ଣବାନ୍ ଡ ସାଉଲନ୍ ଆନ୍ନଆନ୍ନା ଆଜାତି ଆମନ୍ଡ୍ରାଜି ଆମଙ୍ ଞନଙନ୍ ତିୟ୍ଲେ ପାଙେଞ୍ଜି ଆରି ଗୋଗୋୟ୍ ମନ୍ଡ୍ରାଜି ଯୀଶୁନ୍ ଆମଙ୍ ଡର୍ରଞ୍ଜି ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍: ପ୍ରେରିତ ୮:୩; ୯:୧-୩୧; ୧୧:୧୯-୨୬; ୧୩:୧-୩:୪୭
Free to use, adapt, and share under an open license (CC BY-SA 4.0).