45. ସ୍ତିପାନନ୍ ଡ ଫିଲିପ୍ପିନ୍
ଆପର୍ତ୍ତମ୍ମୁ ମଣ୍ତଳୀଲୋଙନ୍ ସୋଡାମରଞ୍ଜି ଲୋଙ୍ ସ୍ତିପାନ ଗାମ୍ଲେ ଅବୟ୍ ମନ୍ଡ୍ରାନ୍ ଡକୋଏନ୍ । ଆନିନ୍ ଆଡଅଙ୍ ଅବୟ୍ ଆଜନାମର୍ ଡକୋଏନ୍ ଆରି ଆନିନ୍ ମେଡ୍ରନ୍ ମଡ଼ିର୍ପୁରାଡ଼ାନ୍ ଡ ବନୁଡ୍ଡିଲୋଙନ୍ ଆବ୍ରିୟ୍ ଡକୋଏନ୍ । ସ୍ତିପାନ ଜବ୍ର କାବ୍ବାଲୁମନ୍ ଲୁମେନ୍ ଆରି ଡନ୍ନେମରନ୍ ଅନ୍ତମ୍ ବର୍ରନ୍ ଏଙ୍ଗାଲେ ମନ୍ଡ୍ରାଞ୍ଜି ଯୀଶୁନ୍ ଆମଙ୍ ଡର୍ତଞ୍ଜି ।
ବମିୟ୍ତା, ଅଙ୍ଗାବେଡା ସ୍ତିପାନ ଯୀଶୁନ୍ ଆବର୍ନେ ଞନଙନ୍ ତିୟେନ୍, ତିଆବେଡା ଯୀଶୁନ୍ ଆମଙ୍ ଅଡ୍ଡରଞ୍ଜି ଲାଙ୍ଲେତ୍ ଯିଉଦିଞ୍ଜି ସ୍ତିପାନ ସରିନ୍ ଗୋଡେଲଞ୍ଜି । ଆନିଞ୍ଜି ଜବ୍ର ବରାବେଞ୍ଜି ଆରି ସ୍ତିପାନ ଆବର୍ନେଜି ଡରମ୍ମସୋଡା ମରଞ୍ଜି ଆମଙ୍ କଣ୍ତାୟ୍ବର୍ରଞ୍ଜି । ଆନିଞ୍ଜି ଗାମେଞ୍ଜି “ଇନଲେଞ୍ଜି ଆନିନ୍ ମୋଶାନ୍ ଡ ଈଶ୍ୱରନ୍ ସଙ୍ଗତ୍ତାଲେ ବର୍ନେନ୍ ଆବରର୍ରନ୍ ଏଅମ୍ଡଙ୍ଲାୟ୍ !” ତିଆସନ୍ ଡରମ୍ମସୋଡା ମରଞ୍ଜି ସ୍ତିପାନ ଆଡଅଙ୍ ଜିଏଞ୍ଜି ଆରି ସୋଡା ପୁର୍ପୁର୍ମରନ୍ ଡ ଯିଉଦିଞ୍ଜି ଆସୋଡାମର୍ଜି ଆମଙ୍ ଆନିନ୍ ଆଡଅଙ୍ ଓରୋଙ୍ଲାଜି ଅଙ୍ଗାଲୋଙ୍ ସ୍ତିପାନ ସଙ୍ଗତ୍ତାଲେ ଗୋଗୋୟ୍ ପାତ୍ତିଆବରନ୍ ବର୍ତଞ୍ଜି ।
ସୋଡା ପୁର୍ପୁର୍ମରନ୍ ସ୍ତିପାନ ଆଡଅଙ୍ ଅପ୍ପୁଙେନ୍ “କେନ୍ ଅଡକୋନ୍ ଆବର୍ନେ ଅଜାଡିନ୍ ପଁ ?” ଅବ୍ରହାମନ୍ ସିଲଡ୍ ସୁସୁଡାଲେ ଯୀଶୁନ୍ ଆବନେଡା ଜାୟ୍ ଈଶ୍ୱରନ୍ ଅଙ୍ଗା ଅଡକୋନ୍ ଆସୋଡା ସୋଡା ଆଲନୁମ୍ଜି ଲୁମେନ୍, ତେତ୍ତେଲୋଙ୍ ଲାଙ୍ଲେଡ୍ ଅମ୍ମନେଲେ ଆନିଞ୍ଜି ଆଡଅଙ୍ ଜାଲଙ୍ଲେ ବର୍ରନ୍ ଡ ଈଶ୍ୱରନ୍ ଆମନ୍ଡ୍ରାଜି ଏଙ୍ଗାଲେ ଡିତାନ୍ ତି ଆବନାଞନ୍ ମାନ୍ନେଏଞ୍ଜି । ତି ସିଲଡ୍ ଆନିନ୍ ଗାମେନ୍ “ଏ ରଡୋ ଉଗ୍ଗର୍ ଡ ପେଲ୍ଲା ମର୍ଜି ଆମ୍ୱେଞ୍ଜି ଡିତାନ୍ ମଡ଼ିର୍ପୁରାଡ଼ାନ୍ ଏସଙ୍ଗତ୍ତାତେ, ଏଙ୍ଗାଲେ ଆମ୍ୱେନ୍ ପୁର୍ବା ଜୋଜୋବେଞ୍ଜି ଡିତାନ୍ ଈଶ୍ୱରନ୍ ସଙ୍ଗତ୍ତାଲେ ତି ପୁର୍ବାତେଃଆବର୍ନେମର୍ଜି ଆଡଅଙ୍ ରବ୍ବୁଏଞ୍ଜି । ବନ୍ଡ ଆନିଞ୍ଜି ସିଲଡ୍ ଗୋଗୋୟ୍ ଇର୍ସେନ୍ ଏଲୁମେନ୍ ! ଆମ୍ୱେଞ୍ଜି କ୍ରିଷ୍ଟନ୍ ଆଡଅଙ୍ ଏରବ୍ବୁଏନ୍ !”
ଏଙ୍ଗାଲେ ଡରମ୍ମ ସୋଡା ମରଞ୍ଜି କେନ୍ ଆତେ ଅମ୍ଡଙେଞ୍ଜି ଏତ୍ତେଲେ ବରାବେଞ୍ଜି ଡ ଆନିଞ୍ଜି ତି ଆଲୁଡଞ୍ଜି ଡୁବ୍ଡୁବ୍ଲେ ଞମ୍ଲେ ଆକ୍କରାନ୍ ବାବ୍ବାବେଞ୍ଜି । ଆନିଞ୍ଜି ସ୍ତିପାନ ଆଡଅଙ୍ ଗଡାନ୍ ସିଲଡ୍ ଅମ୍ଡୁଙ୍ଲେ ଡିଙ୍ଲେ ପାଙେଞ୍ଜି ଆରି ଆନିନ୍ ଆଡଅଙ୍ ରନ୍ବ୍ବୁନ୍ ଆସନ୍ ଅରେଙନ୍ ବାତ୍ତେ ତିଡେଞ୍ଜି ।
ସ୍ତିପାନ ଆର୍ରବୁଏନ୍ ଆଡିତ୍ ଆକ୍ରାନ୍ ବାବ୍ବାବେନ୍ ଆରି ଗାମେନ୍ “ଏ ଯୀଶୁ ପୁରାଡା ଞେନ୍ ପାଙା ।” ତି ସିଲଡ୍ ଆନିନ୍ ତୁଡୁମ୍ଲେ ଆରି ଅବ୍ସର୍ରଙ୍ଲନ୍ ବର୍ରନ୍ “ଏ ପ୍ରବୁ,କେନ୍ ଆଇର୍ସେ ଆନିଞ୍ଜି ସଙ୍ଗତ୍ତାଲେ ଡିଡଙେ ।” ତି ସିଲଡ୍ ଆନିନ୍ ରବୁଏନ୍ ।
ସାଉଲ ଆଞୁମ୍ ଅବୟ୍ ମନ୍ଡ୍ରାନ୍ ସ୍ତିପାନ ଆଡଅଙ୍ ଆରର୍ବ୍ବୁଏଞ୍ଜି ଆମନ୍ଡ୍ରାଜି ସରିନ୍ ଆବମତନ୍ ଡକୋଏନ୍ । ସନମ୍ୱବ୍ମରଞ୍ଜି ଆସରମ୍ୱବେଞ୍ଜି ଆଡିତ୍ ତି ଆସିନ୍ଡ୍ରିଞ୍ଜି ଜଗ୍ଗେଏନ୍ । ତି ଆଡିତ୍ ,ଯିରୁଶାଲମଲୋଙ୍ ଡକୋନ୍ ଅମନ୍ଡ୍ରାଜି ଯୀଶୁନ୍ ଆସନଣ୍ତୋଙ୍ମର୍ଜି ଆଡଅଙ୍ ଡଣ୍ତାୟେଞ୍ଜି,ତି ଆସନ୍ ଡର୍ନେମରଞ୍ଜି ଅଡେତ୍ତେ ଅଡେନ୍ନେ ଜିରେଞ୍ଜି । ବନ୍ଡ କେନ୍ ଅଡକୋନ୍ ଡେଏନ୍ଜାୟ୍ ଡେନ୍, ଆନିଞ୍ଜି ଅଡେଙ୍ଗାରେଙ୍ ଜିରେଞ୍ଜି ତେତ୍ତେ ଯୀଶୁନ୍ ଆବର୍ନେ ଅପ୍ପୁଙ୍ବର୍ରଞ୍ଜି ।
ଅବୟ୍ ଯୀଶୁନ୍ ଆଞଙ୍ନ୍ନେମର୍ ଆଞୁମ୍ ଫିଲିପ୍ପ ଯିରୁଶାଲମଲୋଙନ୍ ଡନଣ୍ତାୟନ୍ ଆଞରାଙେଞ୍ଜି ଆସନ୍ ଆଜରିରେଞ୍ଜି ଡର୍ନେମରଞ୍ଜି ଲୋଙ୍ ଅବୟ୍ନ୍ନେ ଡକୋଏନ୍ । ଆନିନ୍ ଶମରିୟନ୍ ଜିର୍ରେ ତେତ୍ତେ ୟିଶୁନ୍ ଆବର୍ନେ ଅପ୍ପୁଙ୍ବର୍ରନେ ଡ ଗୋଗୋୟ୍ ମନ୍ଡ୍ରାନ୍ ତେତ୍ତେ ଅନୁରନ୍ ଞାଙେଞ୍ଜି । ତି ସିଲଡ୍ ବଡିନ୍ନା, ଈଶ୍ୱରନ୍ ଆକବର ପାଙ୍ମର୍ ଫିଲିପ୍ପନ୍ ଆମଙ୍ ଇୟ୍ଲେ ଆରିଙ୍ରିଙ୍ଗଡ୍ ଡକୋନ୍ ଆତଙର୍ଗଡ୍ ଜନିରନ୍ ଆସନ୍ ବରେନ୍ । ଆନିନ୍ଏଙ୍ଗାଲେ ତି ଆତଙର୍ଗଡ୍ ଜିରେନ୍, ଫିଲିପ୍ପ ଗିଜେନ ଡ ଇଥିଓପିଆ ରାଜାସିଙଲୋଙନ୍ ଅବୟ୍ ସୋଡା ଆଗୁମୁସ୍ତା ତି ଆରତ୍ତାଲୋଙନ୍ ଜିର୍ତାୟ୍ । ତି ଆମନ୍ଡ୍ରା ଆମଙ୍ ଆମଙ୍ ଇୟ୍ଲେ ଆନିନ୍ ସରିନ୍ କଡାଡିନେନ୍ ଆସନ୍ ମଡ଼ିର୍ ପୁରାଡାନ୍ ଫିଲିପ୍ପ ଆଡଅଙ୍ ବରେନ୍ ।
ଫିଲିପ୍ପ ଏଙ୍ଗାଲେ ରତ୍ତାନ୍ ଆତୟ୍ତୟ୍ ତୁଙେନ୍, ତି ଇଥିଓପିଆ ଆମନ୍ଡ୍ରା ଯିଶାୟ ପୁରବାତେଃବର୍ନେମର୍ ଆବଇଲୋଙ୍ ସିଲଡ୍ ଆପରଡେଲନ୍ ଅମ୍ଡଙେନ୍ । ତି ଆମନ୍ଡ୍ରା ପଡେଲନ୍ ଡ “ଆନିଞ୍ଜି ମେଣ୍ତାନ୍ ଅନ୍ତମ୍ ଆନିନ୍ ରନବ୍ବୁନ୍ ଆସନ୍ ପାଙେଞ୍ଜି, ଆରି କଡିଙ୍ଲେ ଆସ୍ରେତ୍ତେନ୍ ଆମେଣ୍ତା ଅନ୍ତମ୍ ଆନିନ୍ ଅବ୍କଡିଙ୍ଲନ୍ ସେଡେନ୍ । ଆନିଞ୍ଜି ଆନିନ୍ ଆଡଅଙ୍ ଗବ୍ରଜେଞ୍ଜି ଆରି ଅଡ୍ଡନେଲଜି । ଆନିଞ୍ଜି ଆନିନ୍ ଆମଙନ୍ ସିଲଡ୍ ଆପ୍ରାନ୍ନା ପାଙେଞ୍ଜି ।”
ଫିଲିପ ତି ଇଥିଓପିଆ ଆମନ୍ଡ୍ରା ଆଡଅଙ୍ ବରେନ୍ “ଆମନ୍ ଅଙ୍ଗା ଆତେ ପଡେଲନ୍ ତି ଆତେ ଇନି ଗନ୍ଲୁଡ୍ଲମ୍ ପଁ ?” ତି ଇଥିଓପିଆ ଆମନ୍ଡ୍ରା ଜାଲଙ୍ଲେ ଗାମେନ୍,ଇଜ୍ଜା,ଆନ୍ନିଙ୍ ଅଃଞଙ୍ଲିଞ୍ଜିଡେନ୍ ଏଙ୍ଗାଲେ ଗଃନ୍ଲୁଡିଂ । କାନକାରମ୍ ଗାମ୍ଲେ ଅମଙ୍ଞେନ୍ ଆୟ୍ତଙ୍କୁମା । ଯିଶାୟ ଇନି ଆବର୍ନେନ୍ ବର୍ରନ୍ ଅଡେ ଆନ୍ନାମର୍ ଅବର୍ନେ ବର୍ରନ୍ ?” ଫିଲିପ୍ପ ଆନିନ୍ ଆଡଅଙ୍ ଅବ୍ଗନ୍ଲୁଡ୍ଲେ ବରେନ୍ ଡ ଯିଶାୟ ଯୀଶୁନ୍ ଆବର୍ନେ କେନ୍ ଆତେ ଇଡେନ୍ ।
ଯିଶୁନ୍ ଆବର୍ନେଲୋଙ୍ ଡକୋନ୍ ଆମନଙ୍ବର୍ ବର୍ନେନ୍ ଆସନ୍ ଫିଲିପ୍ପ ଆନ୍ନା ଆବର୍ନେନିୟ୍ ଅବ୍ଗନ୍ଲୁଡେନ୍ । ଏଙ୍ଗାଲେ ଫିଲିପ୍ପ ଡ ଇଥିଓପିଆ ଆମନ୍ଡ୍ରା ଜିରେଞ୍ଜି,ଆନିଞ୍ଜି ଅବୟ୍ ଡାଆଲୋଙନ୍ ତୁଙ୍ଲାଜି ।
ଇଥିଓପିଆ ଆମନ୍ଡ୍ରା ଗାମେନ୍ “ଗିଜା ! ତେନ୍ନେ ଅସୋୟ୍ ଡାଆନ୍ ଡକୋ ! ଞେନ୍ ତବ୍ବୁବ୍ଡାଲନ୍ ରପ୍ତିତାୟ୍ ପଁ ?ଆନିନ୍ ରତ୍ତାନ୍ ଆସରଲ୍ଲାୟ୍ତେନ୍ ଆମନ୍ଡ୍ରା ରତ୍ତାନ୍ ତବ୍ନଙା ଗାମ୍ଲେ ବରେନ୍ । ତି ଆସନ୍ ଆନିଞ୍ଜି ଡାଆଲୋଙନ୍ ପଡ୍ଲନ୍ଞ୍ଜି, ଆରି ଫିଲିପ୍ପ ତି ଇଥିଓପିଆନ୍ ଆଡଅଙ୍ ତବ୍ବୁବ୍ଡାନ୍ ତିୟେନ୍ ।
ଆନିଞ୍ଜି ଡାଆଲୋଙନ୍ ସିଲଡ୍ ଡୋଲନ୍ ଜିର୍ରାଜି ଆତିକ୍କି, ମଡ଼ିର୍ପୁରାଡ଼ନ୍ ଫିଲିପ୍ପ ଆଡଅଙ୍ ଆନ୍ନାରେଙ୍ ଓରୋଙେନ୍ ଅଙ୍ଗାଲୋଙ୍ ଆନିନ୍ ଯୀଶୁନ୍ ଆବର୍ନେଜି ମନ୍ଡ୍ରାଞ୍ଜି ଆମଙ୍ ଡିତାନ୍ ବର୍ରନେ, ଇଥିଓପିଆବାୟ୍ ଅସିଙନ୍ ଆଜନିର୍ ଆସନ୍ ଅବ୍ଜାଡାଲନ୍, ଆନିନ୍ ସର୍ଡାଡମ୍ ଡକୋଏନ୍ ଇନି ଆସନ୍ ଆନିନ୍ ଯୀଶୁନ୍ ଆଡଅଙ୍ ଜନାଏନ୍ ।
ବାଇବଲ ଲୋଙନ୍ ଅବୟ୍ ଅନବ୍ଜଙବର୍
ପ୍ରେରିତ- ୬:୮-୮:୫; ୮:୨୬-୪୦-୪୬
Free to use, adapt, and share under an open license (CC BY-SA 4.0).