44. ପିତରନ୍ ଡ ଯୋହନନ୍ ଅବୟ୍ ବେଡ୍ବେଡ୍ନ୍ନେମରନ୍ ଅବ୍ସୁକ୍କାତଜି
ବମିୟ୍ତା, ପିତରନ୍ ଡ ଯୋହନନ୍ ମନ୍ଦିରସିଙନ୍ ଇୟେଞ୍ଜି । ଆନିଞ୍ଜି ଏଙ୍ଗାଲେ ମନ୍ଦିରନ୍ ଆଡୁଆରା ତୁଙେଞ୍ଜି, ଆନିଞ୍ଜି ଅବୟ୍ ଅସୋତ୍ତାମରନ୍ ଅବରେଡ଼୍ବେଡ୍ତନ୍ ଗିଜେଞ୍ଜି ।
ପିତରନ୍ ତି ଆସୋତ୍ତା ମରନ୍ ଆଡଅଙ୍ ଆଙାଙ୍ଲେ ବରେନ୍, “ତନିୟନ୍ ଆସନ୍ ଅମଙ୍ଲେନ୍ ଡାବ୍ବୋତଡ୍ । ବନ୍ଡ ଅମଙ୍ଞେନ୍ ଇନିଜି ଡକୋ ତି ଆତେ ଞେନ୍ ଆମନ୍ ତିୟ୍ତମ୍ । ନାଜରିତ ଯୀଶୁନ୍ ଆଞୁମ୍ଲୋଙ୍ ଡୋଲନ୍ ତଞିୟ୍ନା !”
ଅବ୍ତାଡନ୍, ଈଶ୍ୱରନ୍ ତି ଆସୋତ୍ତାମରନ୍ ଆଡଅଙ୍ ଅବ୍ସୁକ୍କାଏନ୍, ଆରି ଆନିନ୍ ଏର୍ରେ ଏଙ୍ଲେ ତଙିୟ୍ଲନ୍ । ମନ୍ଦିରନ୍ ଆତୟ୍ତୟ୍ ଡକୋନ୍ ଆମନ୍ଡ୍ରାଜି କାବ୍ବା ଡେଆଜେଞ୍ଜି ।
ଅଙ୍ଗା ଆମନ୍ଡ୍ରା ସୁକ୍କାଏନ୍ ତି ଆନିନ୍ ଗନିଜନ୍ ଆସନ୍ ମନ୍ଡ୍ରାଞ୍ଜି ରୁକ୍କୁଲଞ୍ଜି । ପିତରନ୍ ତି ଆନିଞ୍ଜି ଆଡଅଙ୍ ବରେଞ୍ଜି “କେନ୍ ଆମନ୍ଡ୍ରା ଆସରୁକ୍କାଏନ୍ ଆମ୍ୱେଞ୍ଜି ଇନି ଆସନ୍ ଡିୟ୍ତେ କାବ୍ବା ଡେତବେନ୍ ? ବୋର୍ସାଲେନ୍ ଅଡେ ମନଙ୍ ଞନ୍ଡ୍ରମ୍ଲେନ୍ ଆସନ୍ କେନ୍ ଆମନ୍ଡ୍ରା ଆଡଅଙ୍ ଏନ୍ନବ୍ ସୁକ୍କାଲାୟ୍ । ଆର୍ପାୟ୍ କେନ୍ ଆତେ ଯୀଶୁନ୍ ଆବୋର୍ସା ଡ ଯୀଶୁନ୍ ଆତନିୟ୍ ଡର୍ନେ ତି ଆମନ୍ଡ୍ରା ଅବ୍ସୁକ୍କାଏନ୍ ।”
“ଆମ୍ୱେଞ୍ଜି ମା ଯୀଶୁନ୍ ଆଡଅଙ୍ ରନବ୍ବୁନ୍ ଆସନ୍ ରୋମୀୟ ଆଡନେମର୍ ଆଡଅଙ୍ ଏ ବରେନ୍ । ଆମ୍ୱେଞ୍ଜି ଅନମେଙ୍ ଡନେମରନ୍ ଏରବ୍ବୁଏନ୍, ବନ୍ଡ ଈଶ୍ୱରନ୍ ଆନିନ୍ ରନବୁନ୍ ସିଲଡ୍ ଅବ୍ଡୋଏନ୍ । ଆମ୍ୱେଞ୍ଜି ଇନଜି ଅଡକୋନ୍ ଏଲୁମ୍ତେ ତି ଆତେ ଗନ୍ଲୁଡ୍ଲେ ଏର୍ରପ୍ତିଲୋ ଡେଲୋଜନଙ୍ କ୍ରିଷ୍ଟନ୍ ଡନୁକ୍କାନ୍ ଞାଙଲେ ରବୁତେ କେନ୍ ଆପୁର୍ବାତଃବର୍ନେନ୍ ଗନବ୍ଡେଲନ୍ ଆସନ୍ ଈଶ୍ୱରନ୍ ଲନୁମ୍ବେଞ୍ଜି ଞନ୍ଡ୍ରମେନ୍ । ତି ଆସନ୍ ନମି, ଆବ୍ବୟ୍ବୁଡ୍ଡିନାବା ଆରି ଈଶ୍ୱରନ୍ ଆମଙ୍ ୟର୍ନାୟ୍ବା ଏଙ୍ଗାଲେ ଆମ୍ୱେଞ୍ଜି ଇର୍ସେବେନ୍ ମଡ଼ିର୍ ଅନବ୍ମେନ୍ ଡେତେ ।”
ପିତରନ୍ ଡ ଯୋହନନ୍ ଇନିଜି ବର୍ରଞ୍ଜି ତି ଆତେ ଅମ୍ଡଙ୍ଲେ ମନ୍ଦିରନ୍ ଆସୋଡା ମର୍ଜି ବତଙେଞ୍ଜି । ତି ଆସନ୍ ଆନିଞ୍ଜି ଆନିଞ୍ଜି ଆଡଅଙ୍ ଜିଲେ ପାଙ୍ଲେ ବଣ୍ତିସିଙନ୍ ଡକ୍କୋଏଞ୍ଜି । ବନ୍ଡ ଜବ୍ର ମନ୍ଡ୍ରା ପିତରନ୍ ଆମନଙ୍ବର୍ ଲୋଙ୍ ଡର୍ରଞ୍ଜି, ଆରି ଯୀଶୁନ୍ ଆଡଅଙ୍ ଆଡରର୍ରଞ୍ଜି ଆମନ୍ଡ୍ରାଜି ଆଡନି ୫୦୦୦ ଲୋଙ୍ ତୁଙେନ୍ ।
ଆବାର୍ତାନ୍ ଯିଉଦି ଆସୋଡାମର୍ଜି ପିତରନ୍ ଡ ଯୋହନନ୍ ଆଡଅଙ୍ ସୋଡା ପୁର୍ପୁର୍ମରନ୍ ଡ ଆନ୍ନା ଡରମ୍ମଗୁରୁନ୍ ଆମଙ୍ ଓରୋଙ୍ଲାଜି । ଆନିଞ୍ଜି ପିତରନ୍ ଡ ଯୋହନନ୍ ଆଡଅଙ୍ ବରେଞ୍ଜି “ଆଙ୍ଗା ଆବୋର୍ସା ବାତ୍ତେ ଆମ୍ୱେଞ୍ଜି କେନ୍ ଆସୋତ୍ତାମର୍ ଏବ୍ସୁକ୍କାଏନ୍ ?”
ପିତରନ୍ ଆନିଞ୍ଜି ଆଡଅଙ୍ ଜାଲଙ୍ଲେ ଗାମେନ୍ “କେନ୍ ଆମନ୍ଡ୍ରା ଯୀଶୁ କ୍ରିଷ୍ଟନ୍ ଆବୋର୍ସା ବାତ୍ତେ ସୁକ୍କାଡାଲେ ତନଙ୍ଲେ ରପ୍ତିତେ । ଆମ୍ୱେଞ୍ଜି ଯୀଶୁନ୍ ଆଡଅଙ୍ ଆଅକାଡ୍ଡାଙ୍ଲୋଙନ୍ ଏତାଙେନ୍,ବନ୍ଡ ଈଶ୍ୱରନ୍ ଆନିନ୍ ଆଡଅଙ୍ ଆରି ଅମ୍ମେଙ୍ଲେ ଅବ୍ଡୋଏନ୍ ! ଆମ୍ୱେଞ୍ଜି ଆନିନ୍ ଆଡଅଙ୍ ଏଜ୍ଜାଲୋ, ବନ୍ଡ ଅନୁରନ୍ ଆଞନାଙ୍ ଆସନ୍ ଯୀଶୁନ୍ ଆବୋର୍ସା ଅମ୍ରେଙ୍ଲେ ଆରି ଇନ୍ନିଙ୍ ତଡ୍ ।
ପିତରନ୍ ଡ ଯୋହନନ୍ ଡିୟ୍ନେ ଆବୋର୍ସା ବାତ୍ତେ ବର୍ନେନ୍ ଆବର୍ତଞ୍ଜି ଗିୟ୍ଲେ ସୋଡା ମରଞ୍ଜି କାବ୍ବା ଡେଏଞ୍ଜି ଇନି ଆସନ୍ ଗାମେଣ୍ତେନ୍ ଆନିଞ୍ଜି ଗିଜେଞ୍ଜି ଡ କେନ୍ ଆନିଞ୍ଜି କାଜ୍ଜାନ୍ ଆମନ୍ଡ୍ରାଜି ଆନାଜି ଏର୍ପଡେନେ ଡକୋଏଞ୍ଜି ।ବନ୍ଡ ତିକ୍କି ଆନିଞ୍ଜି ମନ୍ନେଏଞ୍ଜି ଡ ଆନିଞ୍ଜି ଯୀଶୁନ୍ ସରିନ୍ ଡକୋଏଞ୍ଜି । ଆନିଞ୍ଜି ପିତରନ୍ ଡ ଯୋହନନ୍ ବବ୍ବ୍ତଙେଞ୍ଜି କି ଅମ୍ରେଙେଞ୍ଜି ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍: ପିତର ୩:୧-୪:୨୨
Free to use, adapt, and share under an open license (CC BY-SA 4.0).