43. ମଣ୍ତଳୀନ୍ ଆସନୁସୁ
ଯୀଶୁନ୍ ରୁଆଙନ୍ ଜିରେନ୍ କି, ଯୀଶୁନ୍ ଏଙ୍ଗାଲେ ବାଞେଞ୍ଜି ତି ଅନ୍ତମ୍ ଞଙନେମରଞ୍ଜି ଯିରୁଶାଲମନ୍ ଡକୋଲଞ୍ଜି । ଡର୍ନେମରଞ୍ଜି ତେତ୍ତେ ବେର୍ବ୍ବନେ ଆସନ୍ ଡିତାନ୍ ରୁକ୍କୁଲଞ୍ଜି ।
ଅନ୍ନେଲାୟ୍ ପୁରନ୍ ପଚାଶ ଡିନ୍ନା ଆତିକ୍କି ଡିବର୍ଷେଙ୍ ଯିଉଦୀଞ୍ଜି ପେଣ୍ଟିକଷ୍ଟ ଗାମ୍ଲେ ଅବୟ୍ ଡିନାନ୍ ମାନ୍ନେଲେ ଞଡ୍ରମ୍ଲଞ୍ଜି । ପେଣ୍ଟିକଷ୍ଟନ୍ ଗାମେନ୍ ଡେନ୍ ତି ଆବେଡା ଆଙ୍ଗା ଆଡିଡ୍ ଯିଉଦିଞ୍ଜି ଅବ୍ଞାନେନ୍ ପୁରନ୍ ମାନ୍ନେତଜି । ପେଣ୍ଟିକଷ୍ଟନ୍ ରୁକ୍କୁଲନ୍ ମନ୍ନାନେନ୍ ଆସନ୍ ସମ୍ପ୍ରଦା ପୁର୍ତ୍ତିନ୍ ସିଲଡ୍ ଯିଉଦୀଞ୍ଜି ଯିରୁଶାଲମନ୍ ଜିର୍ରାଜି । କେନ୍ ଆବର୍ଷେଙ୍ ଯୀଶୁନ୍ ରୁଆଙ୍ନ୍ ଜିରେନ୍ କି ବପାଲ୍ଲୀ ଆତିକ୍କି ପେଣ୍ଟକଷ୍ଟନ୍ ଅଡୋଲ୍ଲାୟ୍ ।
ଡର୍ନେମରଞ୍ଜି ଏଙ୍ଗାଲେ ରୁକ୍କୁଲଞ୍ଜି, ଅଙ୍ଗା ଆସିଂ ଲୋଙ୍ ଆନିଞ୍ଜି ଡକୋଲଞ୍ଜି ତେତ୍ତେ ଗୋଗୋୟ୍ ରିଙ୍ଗେନ୍ ଆସନଡ୍ଡା ଅନ୍ତମ୍ ତେତ୍ତେ ବରିଜେନ୍ । ତି ଆତିକ୍କି ତଗୋନ୍ ଅନ୍ତମ୍ ଅଲ୍ଲାଙଞ୍ଜି ଅଡକୋନ୍ ଆଡର୍ନେମରଞ୍ଜି ଆତୋଣ୍ତୋବବ୍ବ୍ ଲୋଙ ଗିୟ୍ତାଏନ୍ । ତି ଅଡକୋନଞ୍ଜି ମଡିର୍ ପୁରାଡାନ୍ ଞାଙେଞ୍ଜି ଆରି ଆନିଞ୍ଜି ଆନ୍ନାଆନ୍ନା ଆଲଙ୍ଲଙ୍ଲୋଙ୍ ବର୍ନେ ବର୍ରଞ୍ଜି ।
ଏଙ୍ଗାଲେ ଯିରୁଶାଲମନ୍ ଆମନ୍ଡ୍ରାଞ୍ଜି ତି ଆସନଡା ଅମ୍ଡଙେଞ୍ଜି, ଇନି ଡେଲୋ ଗନିଜନ୍ ଆସନ୍ ମନ୍ଡ୍ରାଞ୍ଜି ରୁକ୍କୁଲଞ୍ଜି । ଇଶ୍ୱରନ୍ ଆସାନ୍ନିଆ ଲୁମ୍ ଡର୍ନେମରଞ୍ଜି ଆବର୍ରତଞ୍ଜି ଏଙ୍ଗାଲେ ଅମ୍ଡଙେଞ୍ଜି, ଆନିଞ୍ଜି ସାନ୍ନିଆଏଞ୍ଜି ଇନିଆସନ୍ ଗାମେଣ୍ତେନ୍ ଆନିଞ୍ଜି ତିଜି ଆତେ ଆଲଙ୍ଲଙ୍ଞ୍ଜି ସରିନ୍ ଆବର୍ରତଞ୍ଜି ଅମ୍ଡଙେଞ୍ଜି ।
ଲାଙଲେଡ୍ ମନ୍ଡ୍ରାଞ୍ଜି ଞଙେନମରଞ୍ଜି ଆବନ୍ନୁଲଜି ଗାମେଞ୍ଜି । ବନ୍ଡ ପିତରନ୍ ତନଙ୍ଲେ ଆନିଞ୍ଜି ଆଡଅଙ୍ ବରେଞ୍ଜି “ବର୍ନେ ଞେନ୍ ଅମ୍ଡଙବା! ଲେନ୍ ଅଡକୋନ୍ ଆମନ୍ଡ୍ରାଜି ଆବନ୍ନୁଲଜି ତଃ ! କେନ୍ ଆତେ ଯୋୟେଲ୍ ପୁର୍ବାଃତେବର୍ନେମରନ୍ ଆବର୍ରନ୍ ଆବର୍ନେ ଗଡେଲେନ୍, ଅଙ୍ଗାଲୋଙ୍ ଈଶ୍ୱରନ୍ ଗାମେନ୍ “ଆତନିକ୍କି ଡିନ୍ନାଙ୍ଲୋଙ୍, ଞେନ୍ ପୁରାଡାଞେନ୍ ଲାତାୟ୍ ।”
”ଏ ଇସ୍ରାଏଲିୟ ଆମନ୍ଡ୍ରାଜି, ଯୀଶୁନ୍ ଅବୟ୍ ମନଙ୍ମର୍ ଡକୋଏନ୍ ଆନା ଈଶ୍ୱରନ୍ ଆବୋର୍ସା ବାତ୍ତେ ଗୋଗୋୟ୍ ବୋର୍ସାଡମନ୍ ଆକାବ୍ବାଡାଜି ଡ ସାନ୍ନିଆଡମନ୍ ଆକାବ୍ବାଡା ଲୁମେନ୍, ଇନିଜି ଆମ୍ୱେଞ୍ଜି ଅଗିଜେନ୍ ଡ ଜନ୍ନାଜି । ବନ୍ଡ ଆମ୍ୱେଞ୍ଜି ଆନିନ୍ ଆଡଅଙ୍ ଆଅକ୍କାଡଙ୍ଲୋଙ୍ ଏତାଙେନ୍ !”
“ଯୀଶୁନ୍ ରବ୍ବୁଏନ୍ ଜାୟ୍ ଡେନ୍, ଈଶ୍ୱରନ୍ ଆନିନ୍ ରନବ୍ବୁନ୍ ସିଲଡ୍ ଅବ୍ଡୋଏନ୍ । କେନ୍ ଆତ୍ତେ କେନ୍ ଆପୁରବାଃତେବର୍ ଗଡେଲେନ୍, ଇନି ଗାମ୍ତେ ‘ଆମନ୍ ମଡିର୍ମର୍ନମ୍ ମସାନ୍ନିଲୋଙନ୍ ଅନବ୍ସଅଏ।” ଈଶ୍ୱରନ୍ ଆରି ଯୀଶୁନ୍ ଆଡଅଙ୍ ପୁରାନ୍ନା ତିୟେନ୍, ଇଲ୍ଲେନ୍ ସାକି ।’
“ନମି ଯୀଶୁନ୍ ବାପ୍ପାନ୍ ଆର୍ଜଡୋମ୍ ଗଡ୍ ଆତଙ୍କୁମ୍ । ଆରି ଯୀଶୁନ୍ ଏଙ୍ଗାଲେ ମଡିର୍ ପୁରାଡାନ୍ ଆପ୍ପାୟତାୟ୍ ଗାମେନ୍, ତି ଅନ୍ତମ୍ ମଡିର୍ପୁରାଡାନ୍ ଆପ୍ପାୟଲାୟ୍ । ନମି ଆମ୍ୱେଞ୍ଜି ଅଙ୍ଗଆତେ ଏଗିୟ୍ତେ ଡ ଅମ୍ଡଙ୍ତେ ତି ଅଡକୋନ୍ ମଡିର୍ପୁରାଡାନ୍ ଅବ୍ଡେନ୍ନେଏନ୍ ।”
”କେନ୍ ଆଯୀଶୁ ଆମ୍ୱେଞ୍ଜି ଆ ଅକ୍କାଡଙ୍ଲୋଙନ୍ ଅତାଙେନ୍ । ବନ୍ଡ ଜନ୍ନାବେନ୍ତୋ ଡ ଈଶ୍ୱରନ୍ ଯୀଶୁନ୍ ଆଡଅଙ୍ ବାଗୁନ୍ ପ୍ରବୁନ୍ ଡ କ୍ରିଷ୍ଟନ୍ ଏମେଏନ୍ !”
ମନ୍ଡ୍ରାଞ୍ଜି ପିତରନ୍ ଆବର୍ନେ ଅମ୍ଡଙେଞ୍ଜି ଆରି ଆନିନ୍ ଆବର୍ରନ୍ ଆବର୍ନେଲୋଙ୍ ଆଉଗରଞ୍ଜି ଆପପଗୋ ଡେଏଞ୍ଜି । ତି ଆସନ୍ ଆନିଞ୍ଜି ପିତରନ୍ ଡ ଆନ୍ନା ଞଙ୍ନେମରଞ୍ଜି ବରେଞ୍ଜି “ବୋଞାଙ୍ଜି, ଇଲ୍ଲେଞ୍ଜି ଇନି ଏଙ୍ଗାନୟ୍?”
ପିତରନ୍ ଆନିଞ୍ଜି ଆଡଅଙ୍ ଜାଲଙ୍ଲେ ବରେଞ୍ଜି “ଆମ୍ୱେଞ୍ଜି ରମ୍ମଙ୍ରମ୍ମଙ୍ ଯୀଶୁକ୍ରିଷ୍ଟନ୍ ଆଞୁମ୍ ଲୋଙ୍ ତବ୍ବୁବ୍ଡାନବା ଏଙ୍ଗାଲେ ଈଶ୍ୱରନ୍ ଇର୍ସେବେଞ୍ଜି ତମ୍ମାତବେନ୍ । ତି ସିଲଡ୍ ମଡିର୍ପୁରଡନ୍ ତିୟ୍ତବେନ୍ ।”
ୟାଗି ଅଜାର ମନ୍ଡ୍ରାଞ୍ଜି, ପିତରନ୍ ଆବର୍ନେ ଡର୍ରଞ୍ଜି ଡ ଯୀଶୁନ୍ ଆଞଙନେମର୍ ଡେଏଞ୍ଜି । ଆନିଞ୍ଜି ଡର୍ରନ୍ ଯିରୁଶାଲମନ୍ ଡକୋନ୍ ଅବୟ୍ ମଣ୍ତଳୀଲୋଙ୍ ମାୟ୍ଲଞ୍ଜି ।
ଞଙନେମରଞ୍ଜି ଡିତାନ୍ ଆପର୍ତମ୍ମୁନ୍ ଆଞଙନେମରନ୍ ଆଞନଙ୍ ଅମ୍ଡଙେଞ୍ଜି, ରୁକ୍କୁଲନ୍ ଡକୋମଞ୍ଜି, ରୁକ୍କୁଲନ୍ ଗାଗାଲଞ୍ଜି, ଆରି ରୁକ୍କୁଲନ୍ ବେର୍ବ୍ବରଞ୍ଜି । ଆନିଞ୍ଜି ରୁକ୍କୁଲନ୍ ଈଶ୍ୱରନ୍ ଆଡଅଙ୍ ସନ୍ନେନ୍ସେନନ୍ ଆତନିୟନ୍ ସର୍ଡାଏଞ୍ଜି ଆରି ଆନିଞ୍ଜି ଆତ୍ତେ ଇନିଜି ଡକୋଏନ୍ ତି ଆତେ ଆନିଞ୍ଜି ଲୋଙ ତର୍ଡମ୍ ବାନ୍ତେଞ୍ଜି । ରମ୍ମଙ୍ରମ୍ମଙ୍ ଅଡକୋଞ୍ଜି ଆମନନଙ୍ ସାଜେଞ୍ଜି । ଡିତାନ୍ ଗୋଗୋୟ୍ ମନ୍ଡ୍ରାଞ୍ଜି ଡର୍ନେନ୍ ଡର୍ରଞ୍ଜି ।
ବାଇବଲ ଲୋଙନ୍ ଅବୟ୍ ଅନବ୍ଜଙବର୍: ପ୍ରେରିତ ୨
Free to use, adapt, and share under an open license (CC BY-SA 4.0).