42. ଯୀଶୁନ୍ ରୁଆଙନ୍ ୟର୍ରନ୍
ଯୀଶୁ ଅଙ୍ଗାଡିନ୍ନା ରନବୁମରଞ୍ଜି ସିଲଡ୍ ଡୋଲନେ, ଅବୟ୍ ଜାଗାନ୍ ବାଗୁ ଞଙନେମରଞ୍ଜି ଇୟେଞ୍ଜି। ଆତଞିନ୍ନେଗଡଞ୍ଜି, ଯୀଶୁନ୍ ଆଉପ୍ରେଙ୍ ଇନିଜି ଡିଲୋ ତି ଆବର୍ନେ କଡାଡିଗଡଃଲଞ୍ଜି । ଆନିଞ୍ଜି ଆସାଲଞ୍ଜି ଡ ଆନିନ୍ କ୍ରିଷ୍ଟ ଗାମଲେ ବନ୍ଡ ଆନିନ୍ ସନମ୍ୱବନ୍ ଞାଙେନ୍। ନମି ତି ଆଇମର୍ ଗାମେନ୍ ଡ ଆନିନ୍ ଆରି ଅମେଙେନ୍ । ଆନିଞ୍ଜି ଅଜ୍ଜନାଲଜି ଆନା ଆଡଅଙ୍ ଡର୍ନେଜି ।
ଯୀଶୁନ୍ ତି ଆମଙଞ୍ଜି ଇୟେନ୍ ଆରି ଆନିଞ୍ଜି ସରିନ୍ ତଞିୟ୍ଲନ୍, ବନ୍ଡ ଆନିନ୍ ଆଡଅଙ୍ ଆନିଞ୍ଜି ଅନ୍ନମ୍ମଡ୍ଲଜି । ଆନିଞ୍ଜି ଇନି ଆବର୍ନେଲୋଙ୍ କଡାଡ଼ିଲଞ୍ଜି ଗାମ୍ଲେ ଆନିନ୍ ଆନିଞ୍ଜି ଆଡଅଙ୍ ବରେଞ୍ଜି,ଆରି ଅସୋୟ୍ ଡିନ୍ନା ଆମ୍ମୁଙ୍ ଯୀଶୁନ୍ ସରିନ୍ ଇନିଜି ଅଡକୋନ୍ ଡେଲୋ ତି ଅଡକୋନ୍ ଆତେ ଆନିଞ୍ଜି ଆନିନ୍ ଆଡଅଙ୍ ବରେଞ୍ଜି । ଆନିଞ୍ଜି ଇୟ୍ୟମେଞ୍ଜି ଡ ଅବୟ୍ନ୍ନେ ବନୁଲ୍ଲେମର୍ ସରିନ୍ କଡାଡ଼ିତଞ୍ଜି ଆନା ଯିରୁଶାଲମଲୋଙ୍ ଆଗଟେଏନ୍ ଆବର୍ନେଜି ଏର୍ଜନନା ।
ତି ଆତିକ୍କି ଯୀଶୁନ୍ ଆନିଞ୍ଜି ଆଡଅଙ୍ ଅଡକୋନ୍ ଅବ୍ଗନ୍ଲୁଡ୍ଲେ ବର୍ନେନ୍ ବର୍ରନ୍ ଡ ଈଶ୍ୱରନ୍ କ୍ରିଷ୍ଟ ଆସନ୍ ଇନିଜି ବର୍ରନ୍ । ଆନିନ୍ ପୁର୍ବାନ୍ବରନ୍ ଅବ୍ମନ୍ନେଲେ ବର୍ରନ୍ ଡ କ୍ରିଷ୍ଟନ୍ ଡନୁକ୍କାନ୍ ବୋଗେତନ୍ ଆରି ରନବ୍ବୁନ୍ ଡେତେ ଆରି ୟାଗି ଡିନ୍ନାଲୋଙ୍ ଆରି ଡୋତନ୍ । ତି ବାଗୁ ମନ୍ଡ୍ରା ଅଙ୍ଗା ଆଗଡାଲୋଙ୍ ଡକୋନେନ୍ ଆସନ୍ ଇୟ୍ୟମେଞ୍ଜି,ଆନିଞ୍ଜି ଏଙ୍ଗାଲେ ତେତ୍ତେ ତୁଙେଞ୍ଜି, ତାଡିତ୍ ଅରୁବେନ୍ ।
ତି ବାଗୁ ମନ୍ଡ୍ରା ଆନିଞ୍ଜି ସରିନ୍ ଡକୋନେନ୍ ଆସନ୍ ଯୀଶୁନ୍ ଆଡଅଙ୍ ବରେଞ୍ଜି, ତି ଆସନ୍ ଆନିନ୍ ଆନିଞ୍ଜି ବାତ୍ତେ ଜିରେନ୍ । ଆନିଞ୍ଜି ଏଙ୍ଗାଲେ ସାଲ୍ଲୁମ୍ ଗାଗାନେନ୍ ଆସନ୍ ଅବ୍ଜାଡାଲଞ୍ଜି,ଯୀଶୁନ୍ ଅବୟ୍ ରୋଟିନ୍ ଞମ୍ଲେ ଈଶ୍ୱରନ୍ ଆଡଅଙ୍ ସେନେନ୍ ଡ ତି ଆତେ ରେବେନ୍ । ଅବ୍ତାଡନ୍ ଆନିନ୍ ଆଡଅଙ୍ ଯୀଶୁନ୍ ଗାମ୍ଲେ ଆନିଞ୍ଜି ଅମ୍ମଡେଞ୍ଜି । ବନ୍ଡ ତି ଆବନେଡା ଆନିନ୍ ଆମଙ୍ଞ୍ଜି ସିଲଡ୍ ମାୟାଏନ୍ ।
ଆନିଞ୍ଜି ବାଗୁଞ୍ଜି ତର୍ଡମ୍ କଡାଡ଼ି ଲଞ୍ଜି “ଆନିନ୍ ଯୀଶୁନ୍ ଡକୋଏନ୍ ! ତି ଆସନ୍ ଆନିନ୍ ଇନ୍ଲେନ୍ ଆଡଅଙ୍ ଈଶ୍ୱରନ୍ ଆବର୍ନେ ଆରବ୍ଗନ୍ଲ୍ଲୁଡ୍ ଲଙ୍ଲନ୍ ଆଡିତ୍ ଗରେଲେଞ୍ଜି ଡୁଡୁଏନ୍ !” ଅବ୍ତାଡନ୍ ଆନିଞ୍ଜି ଯିରୁଶାଲମ ୟର୍ରନ୍ ଜିର୍ରାଜି । ଆନିଞ୍ଜି ଏଙ୍ଗାଲେ ତୁଙ୍ଲାଜି,ଆନିଞ୍ଜି ଞଙ୍ନ୍ନେମରଞ୍ଜି ଆଡଅଙ୍ ଇୟ୍ଲାୟ୍ ବରେଜି, “ଯୀଶୁନ୍ ଆମେଙ୍ ଡକୋ ! ଇନ୍ଲେଞ୍ଜି ଆନିନ୍ ଏଗିୟ୍ଲାୟ୍ !”
ଞଙ୍ନେମରଞ୍ଜି ଏଙ୍ଗାଲେ କଡାଡ଼ିଲଞ୍ଜି,ଯୀଶୁନ୍ ଆନିଞ୍ଜି ଆଡ୍ରକୋଲଞ୍ଜି ଆସିଙ୍ଲୋଙ୍ ତି ଆମୁକ୍କାବାଞ୍ଜି ଅବ୍ଗିୟ୍ତ୍ତାଲନ୍ ଆରି ବର୍ରନ୍ “ଅମଙ୍ବାବେନ୍ ସନୟୁନ୍ ଡେଏତୋ !” ଞଙ୍ନେମରଞ୍ଜି ଆନିନ୍ ଅବୟ୍ ବୁତ ଗାମ୍ଲେ ଡିସୟେଞ୍ଜି, ବନ୍ଡ ଯୀଶୁନ୍ ଗାମେନ୍ ଡ “ଆମ୍ୱେଞ୍ଜି ଇନି ଆସନ୍ ବତଙ୍ତବେନ୍ ଆରି ଏଡାଲ୍ଗଡ୍ତେ ? ଅସିଞେନ୍ ଡ ତାଲ୍ଜଙ୍ଞେନ୍ ଗିୟ୍ବା । ଞେନ୍ ଏଙ୍ଗାଲେ ଡଅଙ୍ଞେନ୍ ଡକୋ ବୁତଞ୍ଜି ତି ଅନ୍ତମ୍ ଆଡଅଙ୍ ଅଡ୍ଡକୋଏ ।” ଡ ଆନିନ୍ ବୁତତଡ୍ ତି ଆତେ ଅନବ୍ତୁଜନ୍ ଆସନ୍ ,ଆନିନ୍ ଜନୋମନ୍ ଆସନ୍ ଅସୋୟ୍ ବେଡେଞ୍ଜି । ଆନିଞ୍ଜି ଆନିନ୍ ଆଡଅଙ୍ ଆଡିଞ୍ଡିଞନ୍ ଆୟଃ ତିୟେଞ୍ଜି, ଆରି ଆନିନ୍ ତି ଆତେ ଜୋମେନ୍ ।
ୟିଶୁନ୍ ଗାମେନ୍ “ଞେନ୍ ଆମ୍ୱେଞ୍ଜି ଆଡଅଙ୍ ବର୍ରବେନ୍ ଡ ବର୍ନେଲୋଙ୍ଞେନ୍ ଇଶ୍ୱରନ୍ ଆବାକ୍ୟଲୋଙ୍ ଆଇଡିଡନ୍ ଅଡକୋନ୍ ଆବର୍ନେଜି ଗନବ୍ଡେଲନ୍ ଆସନ୍ ଡେତେ ।” ତି ଆତକ୍କି ଆନିନ୍ ତି ଆମନ୍ନଞ୍ଜି ରୋଏନ୍ ଏଙ୍ଗାଲେ ଆନିଞ୍ଜି ଈଶ୍ୱରନ୍ ଆବର୍ନେ ଗନ୍ଲୁଡ୍ଲେ ରପ୍ତିତଜି । ଆନିନ୍ ଗାମେନ୍ “ପୂର୍ବାନ୍ମା ଆଇଡିଡ୍ ଡ କ୍ରିଷ୍ଟନ୍ ଡନୁକ୍କାନ୍ ଞାଙ୍ଲେ ରନବୁନ୍ ଡେତେ ଆରି ୟାଗି ଡିନ୍ନାଲୋଙ୍ ଞନର୍ମେଙନ୍ ଡେତେ ।”
“ଶାସ୍ତ୍ରଲୋଙନ୍ ଆରି ନିୟ୍ ଆଇଡିଡ୍ ଡକୋଏନ୍ ଡ ଡିଲେ ମନ୍ଡ୍ରାନ୍ ଆନିଞ୍ଜି ଆଇର୍ସେଲୋଙନ୍ ସିଲଡ୍ ତନମ୍ମାଡନ୍ ଆଞନାଙ୍ ଆସନ୍ ଆବ୍ବର୍ୟବୁଡ୍ଡିତଞ୍ଜି ଅଙ୍ଗାଆତେ ଞଙ୍ନେମରଞ୍ଜି ଅପ୍ପୁଙ୍ବର୍ତଞ୍ଜି । ଆନିଞ୍ଜି କେନ୍ ଆତେ ଯିରୁଶାଲମ ସିଲଡ୍ ସୁସୁଡାଲେ ଅଡକୋନ୍ ରେଙନ୍ ଡକୋନ୍ ଆମନ୍ଡ୍ରାଜି ଆମଙ୍ ଏଇୟ୍ତେ । ଆମ୍ୱେଞ୍ଜି କେନ୍ ଅଡକୋନ୍ ଆବର୍ନେଜି ଆସାକ୍କି ।
ତିକ୍କି ବାକୁଡି ଡିନ୍ନା ଜାୟ୍, ଯୀଶୁନ୍ ଜବ୍ରତର ତି ଆଞଙ୍ନ୍ନେମରଞ୍ଜି ସରିନ୍ ଅର୍ରବାଙେଞ୍ଜି । ବତର, ଆନିନ୍ ଆବମେଡ୍ରନ୍ ୫୦୦ ସିଲଡ୍ ଗୋଗୋୟ୍ ଆମନ୍ଡ୍ରାଜି ସରିନ୍ ଅର୍ରବାଙଲନ୍ ! ଆନିନ୍ ନମି ଆମେଙ୍ ଡକୋ କେନ୍ ଆବର୍ନେ ଅନିନ୍ ଜବ୍ରତର ତି ଆଞନ୍ନେମରଞ୍ଜି ଆମଙ୍ ଅବ୍ତୁଜେନ୍, ଆରି ଆନିନ୍ ଈଶ୍ୱରନ୍ ଆରାଜ୍ୟ ଆବର୍ନେଲୋଙ୍ ଞନଙନ୍ ତିୟେନ୍ ।
ଯୀଶୁନ୍ ତି ଆଞନ୍ନେମରଞ୍ଜି ଆଡଅଙ୍ ବରେଞ୍ଜି “ରୁଆଙନ୍ ଡ ପୁର୍ତ୍ତିନ୍ ଅଡକୋନ୍ ଆଡନେ ଞେନ୍ ତନିୟନ୍ ଡେଏନ୍ । ତି ଆସନ୍ ଇୟ୍ବା,ଅଡକୋ ମନ୍ଡ୍ରାଞ୍ଜି ଆମଙ୍ ଇୟ୍ଲେ ବାପ୍ପାନ୍, ଡାଙ୍ଗଡାଅନନ୍ ଆରି ମଡ଼ିର୍ ପୁରାଡ଼ନ୍ ଆଞୁମ୍ଲୋଙ୍ ଆନିଞ୍ଜି ଆଡଅଙ୍ ତବ୍ବୁବ୍ଡାଲେ ଆରି ଞେନ୍ ଆମ୍ୱେଞ୍ଜି ଇନିଜି ଆବନାଞ୍ ତିୟ୍ଲବେନ୍ ତି ଅଡକୋନ୍ ମନାନ୍ନେନ୍ ଆସନ୍ ଞନଙନ୍ ତିୟ୍ଲେ ଞଙ୍ନ୍ନେମର୍ ତୁବ୍ବାଜି । ମନ୍ନେନ୍ଡକ୍କୋବା, ଞେନ୍ ଡିତାନ୍ ଆମ୍ୱେଞ୍ଜି ସରିନ୍ ଡକୋ।”
ଯୀଶୁନ୍ ରନବୁନ୍ ସିଲଡ୍ ଡୋଲନ୍କି ବାକୁଡି ଡିନ୍ନା ଆତିକ୍କି, ଆନିନ୍ ଆଞନ୍ନେମରଞ୍ଜି ଆଡଅଙ୍ ବରେଞ୍ଜି “ମଡ଼ିର୍ପୁରାଡ଼ାନ୍ ଅମଙ୍ବାବେନ୍ ଆପ୍ରଡ୍ତନାୟ୍ ଆବେଡା ବାପ୍ପାଞେନ୍ ଆମ୍ୱେଞ୍ଜି ଆଡଅଙ୍ ଅଙ୍ଗାଜାୟ୍ ବୋର୍ସାନ୍ ଅନ୍ଡ୍ରଙ୍ ତିୟ୍ବେନ୍ ତି ଆଡିନ୍ନା ଜାୟ୍ ଯିରୁଶାଲମଲୋଙ୍ ଡକୋନାବା ।” ତି ସିଲଡ୍ ଯୀଶୁନ୍ ରୁଆଙନ୍ ଜିରେନ୍, ଆରି ଅବୟ୍ ମେଗନ୍ ଆନିଞ୍ଜି ଅଗନିୟ୍ଲୋଙନ୍ ସିଲଡ୍ ଯୀଶୁନ୍ ଆଡଅଙ୍ ଅବ୍ସସଏନ୍ । ଯୀଶୁନ୍ ଅଡକୋନ୍ ଆବର୍ନେଲୋଙ୍ ଆଡନେ ଆସନ୍ ଈଶ୍ୱରନ୍ ଆଅର୍ଜଡୋମ୍ସି ଗଡ୍ଲୋଙ୍ ତଙ୍କୁମେନ୍ ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବର୍: ମାଥିଉ ୨୮:୧୬-୨୦; ମାର୍କ ୧୬:୧୨-୨୦; ଲୂକ ୨୪:୧୩-୫୩; ଯୋହନ ୨୦:୧୯-୨୩; ପ୍ରେରିତ ୧:୧-୧୧
Free to use, adapt, and share under an open license (CC BY-SA 4.0).