41. ଈଶ୍ୱରନ୍ ଯୀଶୁନ୍ ଆଡଅଙ୍ ରନବୁନ୍ ସିଲଡ୍ ଅବ୍‌ଡୋତେ

ସିପାଇଞ୍ଜି ଯୀଶୁନ୍ ଆଅକ୍କାଡଙ୍‌ଲୋଙନ୍ ୟୋଡେଞ୍ଜି କି, ଅସୋୟ୍ ଡର୍ନେ ଯିହୂଦୀଞ୍ଜି ପିଲାତନ୍ ବରେଞ୍ଜି “କଣ୍ତାୟ୍ ପୁର୍ବାଃତେମର୍‌ନ ଯୀଶୁନ୍ ଗାମେନ୍ ଡ ଆନିନ୍ ୟାଗିଡିନ୍ନାଲୋଙ୍ ଡୋତନେ । ଆଡଙ୍‌ଆନା ଜନଗେନ୍ ଡେତେ ଆରି ଅନବ୍‌ଜାଡେନ୍ ଡେତେ ଡ ଆଞଙନେମରଞ୍ଜି ଆମରନ୍ ରାଉଡାଲନ୍ ବର୍‌ଡଙନେ ତଡ୍‌ଜି ଡ ଆନିନ୍ ରନବୁନ୍ ସିଲଡ୍ ଡୋଲନ୍ ଗାନମେ ।”

ପିଲାତନ୍ ଗାମେନ୍ “ଅସୋୟ୍ ସିପାଇଞ୍ଜି ଓରୋଙଲେ ରନପ୍ତି ଜାୟ୍ ମଶାନ୍ନିନ୍ ଜଗେବା ।” ତି ଆସନ୍ ଆନିଞ୍ଜି ମଶାନ୍ନିନ୍ ଆଗ୍ରନେ ଆତଙର୍ ଗଡ୍ ରାଜାନ୍ ଆଟନିପଅଲନ୍ ଡାଲେଞ୍ଜି ଆରି ତେତ୍ତେ ସିପାଇଞ୍ଜି ଡକୋଏଞ୍ଜି ଏଙ୍ଗାଲେ ଆନିଙ୍ଗ୍ ମରାନ୍ ରାଉଲନ୍ ପାଙଲେ ଅରପ୍ତିଏଜି ।

ଯୀଶୁନ୍ ତନୁଲନ୍ ଡେନ୍ କି ଆବାର୍ତାନ୍ ଲୋଲୋନେ ଡିନ୍ନା ଡକୋଏନ୍, ଆରି ତି ଆଡିନ୍ନା ମଶାନ୍ନିନ୍ ଆନିୟ୍ ଆସନ୍ ଯିହୂଦୀଞ୍ଜି ଆମନ୍ନାନେନ୍ ଲୋଙ୍ ଅଡକୋଲୋ । ତି ଆସନ୍ ଲୋଲୋନେ ଡିନ୍ନାନ୍ ଆବର୍ତାନ୍ ଆଅଙଲ୍‌ଅଙଲନ୍ ଆଇମରଞ୍ଜି ଯୀଶୁନ୍ ଆମରାଲୋଙ୍ ଗୋଗୋୟ୍ ଲଙିଡ୍ ଜନବନ୍‌ଜି ଜନଡନ୍ ଆସନ୍ ମଶାନ୍ନିନ୍ ଅନିୟନ୍ ଆସନ୍ ଅବ୍‌ଜାଡାଲଞ୍ଜି ।

ଏରବ୍ବୋମଙ୍ ଅବୟ୍ ସୋଡା ଗନୁମ୍‌ତିରନ୍ ଗୁମ୍‌ତିରେନ୍ । ଗଡ୍‌ଗଡାନ୍ ଆସାଆର୍ ଆଗ୍ରିୟ୍‌ତାତେନ୍ ଅନ୍ତମ୍ ଅବୟ୍ କବରପାଙମରନ୍ ରୁଆଙନ୍ ସିଲଡ୍ ଗିୟ୍‌ତାଏନ୍ । ମଶାନ୍ନିନ୍ ଆଗରନ୍ନେ ଗଡ୍ ଡକୋନ୍ ଆରେଙ୍ ଆଗଡାୟ୍ ଡ ଆନିନ୍ ତେତ୍ତେ ଆତଙ୍କୁମ୍ ଡକୋଏନ୍ । ଅଙ୍ଗା ଆସିପାଇଜି ମଶନ୍ନିନ୍ ଜଗେଏଞ୍ଜି ଆନିଞ୍ଜି ବତଙ୍‌ଲେ ଆରବ୍ବୁମରନ୍ ଅନ୍ତମ୍ ଗୋଙେଞ୍ଜି ।

ଏଙ୍ଗାଲେ ଆଇମରଞ୍ଜି ମଶାନ୍ନିନ୍ ତୁଙେଞ୍ଜି, କବରପାଙ୍‌ମରନ୍ ଆନିଞ୍ଜି ଆଡଅଙ୍ ବରେଞ୍ଜି “ବତଙ୍‌ଡଙ୍‌ବେନ୍ । ଯୀଶୁନ୍ ତେନ୍ନେ ମଡ୍ରତଡ୍ । ଆନିନ୍ ଏଙ୍ଗାଲେ ବରନେ, ଏତ୍ତେଲେ ରନବୁମରଞ୍ଜି ସିଲଡନ୍ ଡୋଲନେ! ୟବା ଆରି ମଶାନ୍ନିନ୍ ଆୟ୍‌ଗିୟବା ।” ଅଙ୍ଗାଲୋଙ୍ ଯୀଶୁନ୍ ଆମରା ଆଡକୋ ଡକୋଏନ୍, ଆଇମରଞ୍ଜି ମଶାନ୍ନି ଆଅମ ଇୟ୍‌ଲେ ଗିଜେଞ୍ଜି । ଆମରାନ୍ ତେତ୍ତେ ଅବୟ୍‌ତଡ୍ ।

ତି ଆତିକ୍କି ରୁଆଙ୍ କବରପାଙ୍‌ମରନ୍ ତି ଆଇମର୍ଞ୍ଜି ଆଡଅଙ୍ ବରେଞ୍ଜି “ଞଙ୍‌ନେମରଞ୍ଜି ଇୟ୍‌ଲେ ଇୟ୍‌ବର୍‌ବାଜି, ‘ଯୀଶୁନ୍ ଡୋଲନେ ଡ ଆମୁଙ୍ ବେନ୍ ଗାଲିଲିନ୍ ଜିର୍‌ତେ ।”

ତି ଆଇମର୍ଞ୍ଜି ବତଙେଞ୍ଜି ଡ ଗୋଗୋୟ୍ ସଡ୍ରାଏଞ୍ଜି । ଞଙ୍‌ନେମରଞ୍ଜି ତି ଆମନଙ୍ କବରନ୍ ଆବନର୍ ଆସନ୍ ଇର୍ରେଜିରେଞ୍ଜି ।

ଏଙ୍ଗାଲେ ତି ଆମନଙ୍‌ବର୍ ଞଞ୍‌ନେମରଞ୍ଜି ଆବନର୍ ଆସନ୍ ତଙରନ୍ ଡକୋଏଞ୍ଜି, ଯୀଶୁନ୍ ଆନିଞ୍ଜି ଆଡଅଙ୍ ଅବ୍‌ତୁୟ୍‌ଲନେ ଆରି ଆନିଞ୍ଜି ଆନିନ୍ ଆଡଅଙ୍ ଲୋମେଞ୍ଜି । ଯୀଶୁନ୍ ଗାମେନ୍ “ବତଙ୍‌ଡଙବେନ୍ ।” ଜିର୍ବା ଆରି ଗାଲିଲିନ୍ ଆଜନୁର୍ ଆସନ୍ ଞଙ୍ନେମରଞେଞ୍ଜି ଇବର୍‌ବାଜି ।ତେତ୍ତେ ଆନିଞ୍ଜି ଞେନ୍ ଗିୟ୍‌ଲେ ରପ୍ତିତିଞ୍ଜି ।”