40. ଯୀଶୁନ୍ ଆଅକ୍କାଡଙ୍‌ଲୋଙନ୍ ୟୋଡେଞ୍ଜି

ସିପାଇଞ୍ଜି ଯୀଶୁନ୍ ଆଡଅଙ୍ ତିକ୍କଲାୟେଞ୍ଜି କି, ଆନିଞ୍ଜି ଆଅକ୍କାଡଙ୍‌ଲୋଙନ୍ ୟନୋଡନ୍ ଆସନ୍ ଆନିନ୍ ଓରୋଙେଞ୍ଜି । ଆନିନ୍ ଅଙ୍ଗା ଆଅକ୍କାଡଙ୍‌ଲୋଙନ୍ ରବ୍ବୁତେ ତି ଆଅକ୍କାଡଙ୍ ଆନିନ୍ ଅବୋୟେଞ୍ଜି ।

ସିପାଇଞ୍ଜି “କପାଳସ୍ଥଳ” ଆଞୁମ୍ ଅବୟ୍ ଜାଗାଲୋଙନ୍‌ ଓରୋଙେଞ୍ଜି ଆରି ଆଅକ୍କାଡଙ୍‌ଲୋଙନ୍ ଆଜଙନ୍ ଡ ଆସିନ୍ ଅବ୍ବାନ୍ ବାତ୍ତେ ତାଙେଞ୍ଜି । ବନ୍‌ଡ ଯୀଶୁନ୍ ଗାମେନ୍ “ବାପ୍ପା, କେନ୍ ଆନିଞ୍ଜି ତମ୍ମାଡାୟ୍ ଇନି ଆସନ୍ ଆନିଞ୍ଜି ଇନି ଲୁମ୍‌ତଜି ତି ଆତେ ଜନାଜିତଡ୍ ।” “ଯିହୂଦୀଞ୍ଜି ଆରାଜା” ଇଡ୍‌ଲେ ତି ଆତେ ଯୀଶୁନ୍ ଆବବ୍‌ଲୋଙ୍ ଡନାଲନ୍ ଆସନ୍ ପିଲାତନ୍ ଆନିଞ୍ଜି ଆଡଅଙ୍ ବରେଞ୍ଜି ।

ସିପାଇଞ୍ଜି ଯୀଶୁନ୍ ଆସିଣ୍ତ୍ରି ଅବ୍‌କଡିଏଞ୍ଜି । ଆନିଞ୍ଜି ଏଙ୍ଗାଲେ କେନ୍ ଆତେ ତିବେଞ୍ଜି, ଆବର୍ନେ ଆପୁର୍ବାଃତେବର୍ ଗଡେଲେନ୍ “ଆନିଞ୍ଜି ସିଣ୍ତ୍ରିଞେନ୍ ବାନ୍ତେଏଞ୍ଜି ଡ ସିଣ୍ତ୍ରିନ୍ ଆସନ୍ ଅବ୍‌କଡିଏଞ୍ଜି ।”

ଯୀଶୁନ୍ ବାଗୁ ରାଉମର୍‌ନଜି ଆମଡ୍ଡି ଆଅକ୍କାଡଙ୍‌ଲୋଙନ୍ ୟୋଡେଞ୍ଜି । ଆନିଞ୍ଜିଲୋଙ୍ ଅବୟ୍‌ନେ ଯୀଶୁନ୍ ଆଡଅଙ୍ ତିକ୍କଲାୟେନ୍, ବନ୍‌ଡ ଅବୟ୍‌ନେ ଗାମେନ୍ “ଆମନ୍ ଇନି ଈଶ୍ୱରନ୍ ଅବତଙମ୍ ? ଇନ୍‌ଲେଞ୍ଜି ଡୋସାମର୍, ବନ୍‌ଡ କେନ୍ ଆମନ୍‌ଡ୍ରା ଡୋସାତଡ୍ ।” ତି ଆତିକ୍କି ଆନିନ୍ ଯୀଶୁନ୍ ଆଡଅଙ୍ ଗାମେନ୍ “କାନକାରମ୍‌ଡାଲେ ଞେନ୍ ଆଡଅଙ୍ ରାଜ୍ୟଲୋଙନମ୍ ଆୟ୍‌ମନେଇଁ ।” ଯୀଶୁନ୍ ଆନିନ୍ ଆଡଅଙ୍ ଗାମେନ୍ “ ଲଙେ ଆମନ୍ ଞେନ୍ ସରିନ୍ ରୁଆଙନ୍ ତୁଙତାୟ୍ ।”

ଯିହୁଦୀନ୍ ଆସୋଡାମର୍ଜି ଡ ଲାଙଲେଡ୍ ମନ୍‌ଡ୍ରାଞ୍ଜି ଯୀଶୁନ୍ ଆଡଅଙ୍ ତିକ୍କଲାୟେଞ୍ଜି । ଆନିଞ୍ଜି ଆନିନ୍ ଆଡଆଙ୍ ବରେଞ୍ଜି “ଆମନ୍ ଈଶ୍ୱରନ୍ ଆଅନ୍ ଡେନ୍, ଆଅକ୍କାଡଙ୍‌ଲୋଙନ୍ ସିଲଡ୍ ପଡ୍‌ନାୟ୍ ଆରି ଆମନ୍‌ଡମ୍ ଡୋବ୍‌ନା! ତିଡେନ୍ ଇନ୍‌ଲେନ୍ ଅମଙ୍‌ନମ୍ ଏଡର୍ତନାୟ୍ ।”

ତି ଆତିକ୍କି ଅଡକୋ ରେଙନ୍ ଲୋଙଡେନ୍, ତି ଆତେ ତମ୍ୱା ଡକୋଏନ୍ ଜନଙ ଡେନ୍ । ତମ୍ୱାନ୍ ଆବନେଡା ଲୋଙଡେନ୍ ଆରି ୟାଗି ଗଣ୍ଟା ଜାୟ୍ ରଏଏନ୍ ।

ତି ସିଲଡ୍ ଯୀଶୁନ୍ ଅବ୍‌ସରଙ୍‌ଲନ୍ ଓଡେଲେ ବର୍ରନ୍ “ଅଗଡେନ୍! ବାପ୍ପା, ଅସିଲୋଙନମ୍ ପୁରାଡାଞେନ୍ ତିୟତାୟ୍ ।” ତି ଆତିକ୍କି ଆନିନ୍ ବରୁମେନ୍ ଆରି ଆପ୍ରାନାନ୍ ଉମ୍‌ରେଙେନ୍ । ଏଙ୍ଗାଲେ ଆନିନ୍ ରବ୍ବୁଏନ୍, ଏତ୍ତେଲେ ୟୁର୍ରଲଏନ ଆରି ମନ୍ଦିର ସିଙଲୋଙନ୍ ଅଙ୍ଗା ଆସୋଡା ଡରଙ୍‌ନେକାବନ୍ ଈଶ୍ୱରନ୍ ଆତେମଡ୍ ସିଲଡ୍ ମନ୍‌ଡ୍ରାଞ୍ଜି ଆଡଅଙ୍ ଆନ୍ନାଲେ ଡକୋଏନ୍ ତି ଆତେ ତୋଣ୍ତୋନ୍ ସିଲଡ୍ ଜାତାନ୍ ଜାୟ୍ ପତେଲେ ବାଗ୍‌ପାଲ୍‌ପାଲ୍ ଡେଲୋ ।

ଯୀଶୁନ୍ ଆରନବୁନ୍ ବାତ୍ତେ ମନ୍‌ଡ୍ରାଞ୍ଜି ଈଶ୍ୱରନ୍ ଆମଙ୍ ଜନିରନ୍ ଆସନ୍ ତଙରନ୍ ରୋଏନ୍ । ଯୀଶୁନ୍ ଆଜ୍ରଗେଇଞ୍ଜି ଆସିପାଇ କେନ୍ ଅଡକୋନ୍ ଗିୟଲେ ଆନିନ ଗାମେନ୍ “ଆଜାଡିନ୍,ଆନିନ୍ ଡୋସାମର୍ ତଡ୍ ଡକୋଏନ୍ । ଆନିନ୍ ଈଶ୍ୱରନ୍ ଆଅନ୍ ଡକୋଏନ୍ ।”

ତି ଆତିକ୍କି ଯୋଷେଫନ୍ ଡ ନିକଦିମନ୍, ଯୀଶୁନ୍ ଆଡଅଙ୍ ଆଡର୍ରଞ୍ଜି କେନ୍ ବାଗୁ ଯିହୂଦୀ ନେତାଞ୍ଜି ଯୀଶୁନ୍ ଆମରା ଆପନାଙ୍ ଆସନ୍ ପିଲାତନ୍ ଆଡଅଙ୍ ବରେଞ୍ଜି । ଆନିଞ୍ଜି ଅବୟ ସିଣ୍ତ୍ରିଲୋଙନ୍ ବଲଡ୍‌ଲେ ଅରେଙନ୍ ବାତ୍ତେ ଆତୁବ୍‌ତୁବ୍ ଅବୟ୍ ମଶାନ୍ନିଲୋଙନ୍ ଡକୋଏଞ୍ଜି । ତି ଆତିକ୍କି ଆନିଞ୍ଜି ମଶାନ୍ନିନ୍ ଆଗ୍ରନେଲୋଙ ଅବୟ୍ ସୋଡା ଅରେଙ୍ ଅମଲୁଡ୍‌ଲେ ତୁଡ୍‌ବେଞ୍ଜି ।