39. ଯୀଶୁନ୍ ଆଡଅଙ୍ ଅପ୍ପନ୍ସୁଆତିଏଞ୍ଜି
ତାଡିନ୍ନା ଅଡ୍ରାତିନ୍ ଡକୋଏନ୍ । ସୋଡା ପୁର୍ପୁର୍ମରନ୍ ଏଙ୍ଗାଲେ ଯୀଶୁନ୍ ଆଡଅଙ୍ ଅବ୍ପ୍ପୁଙ୍ବର୍ତେ ତି ଆସନ୍ ସିପାଇଞ୍ଜି ଆନିନ୍ ସୋଡା ପୁର୍ପୁର୍ମରଞ୍ଜି ଆସିଙ୍ ଓରୋଙେଞ୍ଜି । ପିତରନ୍ ସଞାୟ୍ ଡକୋଲନ୍ ଆନିଞ୍ଜି ଆଡଅଙ୍ ସଣ୍ତୋଙ୍ଲେ ପାଙେଞ୍ଜି । ଯୀଶୁନ୍ ଏଙ୍ଗାଲେ ତି ଆସିଙ୍ ଓରୋଙେଞ୍ଜି,ପିତରନ୍ ଡାଣ୍ତନ୍ ଡକୋଲନ୍ ତଗୋଲୋଙନ୍ ଞଡ୍ଞଡ୍ଲନ୍ ।
ଅମ୍ମସିଙନ୍, ଯିଉଦି ଆସୋଡାମର୍ଜି ଯୀଶୁନ୍ ଆଡଅଙ୍ ଅପ୍ପସୁଆତ୍ତିଏଞ୍ଜି । ଆନିଞ୍ଜି ଜବ୍ର କଣ୍ତାୟ୍ ସାକିମରନ୍ ଅବ୍ଜାଡାଲେ ଡକ୍କୋଏଞ୍ଜି ଆନାଜି ଆନିନ୍ ସଙ୍ଗତ୍ତାଲେ କଣ୍ତାୟ୍ଲେ ବର୍ତଞ୍ଜି ।ବନ୍ଡ ତି ଆବର୍ନେଞ୍ଜି ତର୍ଡମ୍ଲୋଙ୍ ଅମ୍ମାୟ୍ଲନ୍, ତି ଆସନ୍ ଯିଉଦି ସୋଡାମରଞ୍ଜି ଅବ୍ତୁୟ୍ବର୍ରନ୍ ଅର୍ରପ୍ତିଲଜି ଡ ଆନିନ୍ ଅସୋୟ୍ ଅନାଡଲୁମନ୍ ଲୁମେନ୍ ଗାମ୍ଲେ । ଯୀଶୁନ୍ ଇନ୍ନିଙ୍ ଅଗ୍ଗାମ୍ଲୋ ।
ଆତନିକ୍କି, ସୋଡା ପୁର୍ପୁର୍ମରନ୍ ଯୀଶୁନ୍ ଆଡଅଙ୍ ତଙ୍ତଙ୍ମଡ୍ଲେ ଗିୟ୍ଲେ ଆନିନ୍ ବରେନ୍ “ଇନ୍ଲେଞ୍ଜି ବର୍ରେନ୍, ଆମନ୍ ପଁ ଆମେଙ୍ ଈଶ୍ୱରନ୍ ଆଅନ୍ କ୍ରିଷ୍ଟନ୍ ?”
ଯୀଶୁନ୍ ଗାମେନ୍ “ଞେନ୍ ଆନିନ୍,ଆରି ଆମ୍ୱେଞ୍ଜି ଞେନ୍ ଆଡଅଙ୍ ଈଶ୍ୱରନ୍ ଆତରଙ୍କୁମ୍ଲୋଙ୍ ତନଙ୍କୁମନ୍ ଡ ରୁଆଙନ୍ ସିଲଡ୍ ଆପରତ୍ତନାଞନ୍ ଏଗିୟ୍ତେ ।” ସୋଡା ପୁର୍ପୁର୍ମରନ୍ ବରାବନ୍ ବାତ୍ତେ ଆସିନ୍ଡ୍ରିନ୍ ପେଲେ ଆନ୍ନା ଆଡର୍ମ୍ମ ସୋଡାମର୍ଜି ଆଡଅଙ୍ ଆକ୍ରନ୍ ବାବ୍ବାବ୍ଲେ ଗାମେନ୍ “ଇନ୍ଲେଞ୍ଜି ଆରି ସାକିମରନ୍ ସନାୟ୍ସାୟ୍ତଡ୍ ! ଆମ୍ୱେଞ୍ଜି ଏଅମ୍ଡଙେନ୍ ଡ ଆନିନ୍ ଈଶ୍ୱରନ୍ ଆଅନ୍ ଗାମ୍ଲେ ବର୍ତନେ । ଆମ୍ୱେଞ୍ଜି ପନସୁଆତିବେନ୍ ଇନି ?”
ଯିଉଦି ସୋଡାମରଞ୍ଜି ସୋଡା ପୁର୍ପୁର୍ମରନ୍ ଜାଲଙ୍ଲେ ଗାମେଞ୍ଜି “ଆନିନ୍ ରନବୁ ପନରଡନ୍ ଆଞନାଙ୍ ଆସନ୍ ଡକୋ” ତି ସିଲଡ୍ ଆନିଞ୍ଜି ଯୀଶୁନ୍ ଆମଡ୍ଲୋଙ୍ ସିନ୍ଡ୍ରିନ୍ ଜିବାଡେଞ୍ଜି,ଆନିନ୍ ଆଡଅଙ୍ ତିଡେଞ୍ଜି, ଆନିନ୍ ଆଡଅଙ୍ କାରିଜେଞ୍ଜି ଆରି ଆନିନ୍ ଆଡଅଙ୍ ତିକ୍କଲାୟେଞ୍ଜି ।
ପିତରନ୍ ଅସିଙନ୍ ଆଡାଣ୍ତଲୋଙ୍ ଜଗ୍ଗେଲେ ଆଡ୍ରକୋଲନ୍ ଆବେଡା, ଅବୟ୍ ଆଇମରନ୍ ଆନିନ୍ ଗିୟ୍ଲେ ବରେନ୍”ଆମନ୍ ନିୟ୍ ଯୀଶୁନ୍ ସରିନ୍ ଡକୋଲନ୍ !” ପିତରନ୍ କେନ୍ ଆବର୍ନେ ଇଜ୍ଜା ଗାମେନ୍ । ତିକ୍କି ଆଓୟୋଙ୍, ଆରି ଅବୟ୍ନେ ଆଇମରନ୍ ତି ଆବୟ୍ୟନ୍ ଆବର୍ନେ ବରେନ୍,ବନ୍ଡ ପିତରନ୍ କେନ୍ ଅତେ ନିୟ୍ ଇଜ୍ଜା ଗାମେନ୍ । ଆତନିକ୍କି ମନ୍ଡ୍ରାଞ୍ଜି ବରେଞ୍ଜି, “ଇନ୍ଲେଞ୍ଜି ଜନା ଡ ଆମନ୍ ଯୀଶୁନ୍ ସରିନ୍ ଡକୋଲନ୍ ଇନି ଆସନ୍ ଗାମେଣ୍ତେନ୍ ଆମ୍ୱେନ୍ ବାଗୁନ୍ବେନ୍ ଗାଲିଲି ସିଲଡ୍ ଏଜିର୍ରାୟ୍ ।”
ତି ସିଲଡ୍ ପିତରନ୍ ପର୍ମାଡାଲନ୍ ଗାମେନ୍ “ଈଶ୍ୱରନ୍ ଞେନ୍ ଆଡଅଙ୍ ସୟ୍ପଇଞ୍ତୋ ଆରି ଞେନ୍ କେନ୍ ଆମନ୍ଡ୍ରା ଆଡଅଙ୍ ଜନାଲାୟ୍ଡେନ୍!” ଅବ୍ତାଡନ୍ ଅବୟ୍ କନ୍ସିମନ୍ ଓଲେନ୍, ଆରି ଯୀଶୁନ୍ ଆୟର୍ଗୁଡିଲ୍ଲନ୍ ପିତରନ୍ ଆଙାଙେନ୍ ।
ପିତରନ୍ ଜିରେନ୍ ଗୋଗୋୟ୍ ଡନୁକ୍କାନ୍ ବାତ୍ତେ ୟେଏନ୍ । ତି ଆବନେଡା ଯିଉଦାନ୍ ଗିଜେନ୍ ଡ ଯିଉଦି ସୋଡାମରଞ୍ଜି ଯୀଶୁନ୍ ଆଡଅଙ୍ ରନବ୍ବୁନ୍ ଆସନ୍ ଅବ୍ଡୋସାଏଞ୍ଜି । ଯିଉଦାନ୍ ଡୁକ୍କଡାଏନ୍ ଆରି ଜିର୍ରେ ଅନିନ୍ଡମ୍ ଇୟ୍ଲେ ରବ୍ବୁନେ ।
ଆବର୍ତାନ୍ ଅଙଲ୍ ଅଙଲନ୍, ଯିଉଦି ସୋଡ ମରଞ୍ଜି ଯୀଶୁନ୍ ଆଡଅଙ୍ ପିଲାତ ଆମଙ୍ ଓରୋଙେଞ୍ଜି ଆନାଃ ରୋମ୍ ଆଡନେମର୍ ଡକୋଏନ୍ । ଆନିଞ୍ଜି ଆସାଲଞ୍ଜି ଡ ପିଲାତ ଯୀଶୁନ୍ ଆଡଅଙ୍ ଅବ୍ଡୋସାଡାଲେ ରନବୁନ୍ ଆସନ୍ ପନ୍ସୁଆତ୍ତିତେ । ପିଲାତ ଯୀଶୁନ୍ ଆଡଅଙ୍ ବରେନ୍ “ଆମନ୍ ଇନି ଯିଉଦିଞ୍ଜି ଆରାଜା ?”
ଯୀଶୁନ୍ ଜାଲଙ୍ଲେ ଗାମେନ୍ “ଆମନ୍ ବର୍ତନେ,ବନ୍ଡ ରାଜ୍ୟ ଞେନ୍ କେନ୍ ଆପୂର୍ତ୍ତି ଆସନ୍ ତଡ୍ । ଆରି ଏନ୍ନେଲେ ଡେନ୍ , କମ୍ୱାରିଞେଞ୍ଜି ଞେନ ଆସନ୍ ସୁତଞ୍ଜିବନ୍ । ଈଶ୍ୱରନ୍ ଆବର୍ନେଲୋଙ୍ ଆଜାଡିନ୍ ଆବର୍ନେ ଆସନ୍ ଞେନ୍ ପୂର୍ତ୍ତିଲୋଙନ୍ ଜିର୍ରାୟ୍ । ଆନାଜାକିଁ ଆଜାଡିନ୍ ଆଡଅଙ୍ ଲଡୟତେ ତି ଡେନ୍ ଆନିନ୍ ବର୍ନେ ଞେନ୍ ଅମ୍ଡଙ୍ତେ ।” ପିଲାତ ଗାମେନ୍ “ଆଜାଡିନ୍ ଇନି?”
ପିଲାତନ୍ ଯୀଶୁନ୍ ସରିନ୍ କଡାଡ଼ି ସାଡେଞ୍ଜି କି ଆତିକ୍କି, ଆରୁକ୍କୁମରଞ୍ଜି ଆମଙ୍ ଇୟ୍ଲେ ଇୟ୍ଲବର୍ନେ “କେନ୍ ଆମନ୍ଡ୍ରା ଆମଙ୍ ଇନ୍ଲେନ୍ ଇନ୍ନିଙ୍ ଆଡୋସା ଏଞାଙାୟ୍ ।” ବନ୍ଡ ଯିଉଦି ଆସୋଡାମର୍ଜି ଡ ଆକୁଡାୟ୍ ମରଞ୍ଜି ଆକ୍ରାନ୍ ବାବ୍ବାବ୍ଲେ ବର୍ରଞ୍ଜି “ଆନିନ୍ ଆଅକଡ୍ଡାଙ୍ଲୋଙନ୍ ତାଙ୍ବା ! ପିଲାତ ଜାଲଙ୍ଲେ ଗାମେନ୍ “ଆନିନ୍ ଡୋସାତଡ୍ । ବନ୍ଡ ଆନିଞ୍ଜି ଆରି ଆକ୍ରାନ୍ ବାବ୍ବାବେଞ୍ଜି । ତି ସିଲଡ୍ ପିଲାତନ୍ ୟାଗି ତର ଆସନ୍ ବର୍ରନ୍ “ଆନିନ୍ ଡୋସାତଡ୍!”
ପିଲାତନ୍ ବତଙେନ୍ ଡ ଅସମୟ୍ ମନ୍ଡ୍ରାଞ୍ଜି ସଙ୍ଗତ୍ତାଲେ ଅଲ୍ତିଡନ୍ ସୁସୁଡଙ୍ଞ୍ଜି,ତି ଆସନ୍ ଯୀଶୁନ୍ ଆଡଅଙ୍ ଆଅକ୍କାଡାଙ୍ଲୋଙନ୍ ଆତନାଙ୍ ଆସନ୍ ଆନିନ୍ ଆସିପାଇଞ୍ଜି ବାଞେଞ୍ଜି । ରୋମୋୟ ଆସିପାଇଜି ଯୀଶୁନ୍ ଆଡଅଙ୍ ଅନାଙ୍ଙ୍ଗତିଡ୍ ଲୁଆଡନ୍ ବାତ୍ତେ ତିଡେଞ୍ଜି ଆରି ଅବୟ୍ ରାଜାକାବନ୍ ଡ ଆବବ୍ଲୋଙନ୍ ଅବ୍ବାନ୍ ଆରନୁବ୍ବବ୍ ଅବ୍ରୁବ୍ବବେଞ୍ଜି । ତି ଆତିକ୍କି ଆନିଞ୍ଜି ଆନିନ୍ ଆଡଅଙ୍ “ଯିଉଦିଞ୍ଜି ଆରାଜା ଆଡଅଙ୍ ଗିୟ୍ବା !” ଗାମ୍ଲେ ତିକ୍କଲାୟେଞ୍ଜି ।
ବାଇବଲ ଲୋଙନ୍ ଅବୟ୍ ଅନବ୍ଜଙ୍ବରନ୍: ମାଥିଉ ୨୬:୫୭-୨୭; ମାର୍କ ୧୪:୫୩-୧୫:୧୫; ଲୂକ ୨୨:୫୪-୨୩:୨୫; ଯୋହନ ୧୮:୧୨-୧୯:୧୬
Free to use, adapt, and share under an open license (CC BY-SA 4.0).