9. ଈଶ୍ୱରନ୍ ମୋଶାନ୍ ଆଡଅଙ୍ ଓଡେଏନ୍।
ଯୋଷେପନ୍ ରବ୍ବୁଏନ୍ କି, ଆକୁତ୍ତମ୍ମାଞ୍ଜି ମିସରନ୍ ଡକୋଲଞ୍ଜି। ଆନିଞ୍ଜି ଡ ଆକୁତ୍ତମ୍ମାଞ୍ଜି ତେତେ ଗୋଗୋୟ୍ ବର୍ଷେଙ୍ ଡକୋଲଞ୍ଜି ଡ ଆନିଞ୍ଜି ଗୋଗୋୟ୍ ପସିଜନ୍ କୋଡେଞ୍ଜି। ଆନିଞ୍ଜି ଆଡଅଙ୍ ଇସ୍ରାଏଲୀୟ୍ ଗାନାମନ୍ ଡେଲୋ।
ବଶହ ବଶହ ବର୍ଷେଙ୍ ଆତେକ୍କି, ଇସ୍ରାଏଲୀୟଞ୍ଜି ଗୋଗୋଜେଞ୍ଜି। ମିସର ଆମନ୍ଡ୍ରାଜି ଯୋଷେପନ୍ ଡ ଆସନାୟୁମ୍ ଆକାବ୍ବାଡାନ୍ ଆରି ଅନିୟ୍ୟଲଜି। ଆନିଞ୍ଜି ଇସ୍ରାଏଲଞ୍ଜି ଆଡଅଙ୍ ବତଙେଞ୍ଜି, ଇନି ଆସନ୍ ଗାମେନଣ୍ତେନ୍ ଆନିଞ୍ଜି ଗୋଗୋୟ୍ ଡକୋଏଞ୍ଜି। ତି ଆସନ୍ ତାଡିନ୍ନା ଅଙ୍ଗା ଆଫାରୋ ମିସରନ୍ ଡନେଲନେ ଆନିନ୍ ଇସ୍ରାଏଲଞ୍ଜି ଆଡଅଙ୍ ମିସରୀୟଞ୍ଜି ଆକମ୍ୱାରୀ ଏମେଲେ ଡକୋଏଞ୍ଜି।
ମିସରୀୟଞ୍ଜି ଇସ୍ରାଏଲିୟଞ୍ଜି ଆଡଅଙ୍ ସୋଡ଼ା ଅସିଙଞ୍ଜି ଡ ଗଡାନ୍ ଆତନୁବ୍ ଆସନ୍ ବାଞେଞ୍ଜି। କାବ୍ବାଡାନ୍ ଆନିଞ୍ଜି ଗୋଗୋୟ୍ ଡଣ୍ତଏଞ୍ଜି, ଈଶ୍ୱରନ୍ ଆନିଞ୍ଜି ଆଡଅଙ୍ ଅବସିତ୍ତାଏନ୍ ଡ ଆନିଞ୍ଜି ଗୋଗୋୟ୍ ପସିଜେଞ୍ଜି।
ଫରୋନ୍ ଗିଜେନ୍ ଡ ଇସ୍ରାଏଲୀୟଞ୍ଜି ଗୋଗୋୟ୍ ଡକୋଜି, ତି ଆସନ୍ ଆନିନ୍ ଆମନ୍ଡ୍ରାଞ୍ଜି, ଅଡକୋ ଇସ୍ରାଏଲୀୟଞ୍ଜି ଆଓବ୍ବାଅନଞ୍ଜି ନିଳଅଲନ୍ ସେଲ୍ଲେ ରନବ୍ବୁ ଆସନ୍ ବାଞେଞ୍ଜି।
ଅବୟ୍ ଇସ୍ରାଏଲୀୟ ଆଇବୟ୍ ଓବ୍ବାଅନନ୍ କୋଡେନ୍। ଆନିନ୍ ଡ଼ ଆଅୟତବନ୍ ପସିଜନ୍ ରନପ୍ତିଜାୟ୍ ସଲ୍ଲେଃ ଡକୋଏଞ୍ଜି।
ଏଙ୍ଗାଲେ ପସିଜନ୍ ଆବାପ୍ପା ଡ ଆନ୍ନନନ୍ ଆରି ସଲ୍ଲେ ଅର୍ରପ୍ତିଲଜି, ଆନିଞ୍ଜି ଆନିନ୍ ଆଡଅଙ୍ ରନବୁନ୍ ସିଲଡ୍ ଅନମେଙନ୍ ଆସନ୍ ନୀଳଅଲନ୍ ଅବୟ୍ ମରଙମଙ୍ ପେଡିଲୋଙନ୍ ଆନିନ୍ ଡକୋଏଞ୍ଜି। ଆସୋଡା ତନ୍ନାନନ୍ ଆନିନ୍ ଆଡଅଙ୍ ଇନି ଡେତେ, ଗନିଜନ୍ ଆସନ୍ ସଙାୟ୍ ସିଲଡ୍ ଗିୟଲେ ଡକୋଲନେ।
ଫରୋନ୍ ଆଡାଙ୍ଗଡି ଅନନ୍ ପେଡିନ୍ ଡ ଆଅମନ୍ ଗିଜେନ୍ ଆରି ଏଙ୍ଗାଲେ ଆନିନ୍ ଅବୟ୍ ପସିଜନ୍ ଗିଜେନ୍, ଆନିନ୍ ଅନ୍ଲନ୍ ଡକୋଏନ୍। ଆନିନ୍ ଇସ୍ରାଏଲ କେଜ୍ଜାଲୋଙନ୍ ଅବୟ୍ ଆଇବୟ୍ ଆଡଅଙ୍ ପସିଜନ୍ ଆନନ ଗାମଲେ ଏର୍ରଜନ୍ନାନ୍ ଆନବ୍ମେମେନ୍ ଆସନ୍ ଡକୋଏନ୍। ଏଙ୍ଗାଲେ ପସିଜନ୍ ସୋଡାଏନ୍ ଆନିନ୍ ଆନନନ୍ ଆଡୁବ୍ ଅଡ୍ସାୟଲୋ, ଆନିନ୍ ଫରୋନ୍ ଆଡଙ୍ଗଡିଅନନ ଆସିଲୋଙ୍ ଆବଡିଡେନ୍, ଆନା ଆଞୁମ୍ ମୋଶା ତିୟେନ୍।
ବଡିନ୍ନା, ମୋଶାନ୍ ସୋଡାଏନ୍ କି, ଆନିନ୍ ଗିଜେନ୍, ଅବୟ୍ ମିସରୀୟ ମର୍ରନ୍ ଇସ୍ରାଏଲ କମ୍ୱାରୀନ୍ ଆଡଅଙ୍ ସମ୍ନ୍ତେ। ମୋଶାନ୍ ଇସ୍ରାଏଲୀୟନ୍ ଆନମେଙ୍ ଆସନ୍ ସାଜେନ୍।
ଏଙ୍ଗାଲେ ମୋଶାନ୍ ଜନାଏନ୍, ଆନିଙ୍ ଅଗିଜେଜି ଗାମଲେ, ଆନିନ୍ ମିସରୀୟନ୍ ଆଡଅଙ୍ ରବ୍ବୁଏନ୍ ଡ ଆମରାନ୍ ତିଲେନ୍। ବନ୍ଡ ଅବୟନେ ମୋଶାନ୍ ଇନି ଲୁମେନ୍, ଗିଜେନ୍।
ଏଙ୍ଗାଲେ ଫରୋନ୍ ମୋଶାନ୍ ଇନି ଲୁମେନ୍ ଜନାଏନ୍, ଆନିନ୍ ଆଡଅଙ୍ ସନବ୍ବବନ୍ ଆସନ୍ ସାଜେନ୍। ମୋଶାନ୍ ଫାରୋନ୍ ଆସିଫାୟୀଜି ଆମଙ୍ ସିଲଡ୍ ଅନମେଙନ୍ ଆସନ୍ ମିସରନ୍ ସିଲଡ୍ ଅଙ୍ଗାଲୋଙ ଆନିନ୍ ଅମେଙତେ, ସଙାୟ୍ ଜୁର୍ରେନ୍।
ମିସରନ୍ ସିଲଡ୍ ସଙାୟ୍ ଅରୁଙ୍ଗ୍ରୁଙ୍ଗ୍ ରେଙନ୍ ମୋଶାନ୍ ଅବୟ୍ ତୁର୍ମେନ୍ମର୍ ଡେଲୋ। ତେତେ ଆନିନ୍ ଅବୟ୍ ଆଇବୟ୍ ବାତ୍ତେ ଞାଙବୟ୍ ଲନେ ଡ ଆନିଞ୍ଜି ବାଗୁ ପସିଜନ୍ କୋଡେଞ୍ଜି।
ବଡିନ୍ନା ଅଙ୍ଗାବେଳା ମୋଶାନ୍ ତୁର୍ତୁର୍ଲନେ, ଆନିନ୍ ଅବୟ୍ ଅର୍ରାନୁବନ୍ ତଗୋନ୍ ଆଜରୋମ୍ତୋତେନ୍ ଆତେ ଗିଜେନ୍। ବନ୍ଡ ଅର୍ରାନ୍ ଜୋମତୋଲେ ଅକ୍କୋମାବଲୋ। ଏଙ୍ଗାଲେ ଆନିନ୍ ଆଜରୋମ୍ତୋଡ୍ ତେନ୍ ଆର୍ରାରେଙନ୍ ଜିର୍ରେନ୍, ଈଶ୍ୱରନ୍ ଆସରଙ୍ ବର୍ରନେ,“ ମୋଶା, ସିପଲିନମ୍ ତବ୍ବା। ଆମନ୍ ମଡିର୍ ଜାଗାଲୋଙନ୍ ଆତନଙ୍।”
ଈଶ୍ୱରନ୍ ଗାମେନ୍, “ମନ୍ଡ୍ରାଞେଞ୍ଜି ଆଡଣ୍ତ ଞେନ୍ ଗିୟତାୟ୍। ଞେନ୍ ଆମନ୍ ଆଡଅଙ୍ ଫାରୋନ୍ ଆମଙ୍ ଆପ୍ପାୟତମ୍ ଏଙ୍ଗାଲେ ଆମନ୍ ଇସ୍ରାଏଲଞ୍ଜି ମିସରନ୍ ଆକମ୍ୱାରୀ ସିଲଡ୍ ଅମଡୁଙ୍ଲେ ଓରୋଙତାଜି। ଆନିଞ୍ଜି ଆଡଅଙ୍ ଞେନ୍ କିଣାନ୍ ଡେସାନ୍ ତିୟତାଜି, ଅଙ୍ଗା ଆଡେସା ଞେନ୍ ଅବ୍ରାମନ୍, ଇସାହାକନ୍ ଡ ଯାକୁବନ୍ ଆଡଅଙ୍ ସିବଡେୟ୍ବର୍ରନାୟ୍।
ମୋଶାନ୍ ଗାମେନ୍, “ମନ୍ଡ୍ରାଞ୍ଜି ଜନନାନ୍ ଆସନ୍ ସାଜେଞ୍ଜି ଡେନ୍ ଞେନ୍ ଆନା ପତାୟଲିଞ୍ ଗାମଲେ, ଞେନ୍ ଇନି ଆନିଞ୍ଜି ଆଡଅଙ୍ ଇୟଗାମନାୟ୍?” ଈଶ୍ୱରନ୍ ଗାମେନ୍, “ଞେନ୍ ଆନା ଡକୋ ଆନିନ୍ ଡକୋତନାୟ୍।” ଆନିଞ୍ଜି ଇୟବର୍ରାଜି ଡ “ମଙବାବେନ୍ ଞେନ୍ ସ୍ୱୟଂଭୂନ୍ ପତାୟଲିଞ୍।” ଡ ଆନିଞ୍ଜି ଇବର୍ରାଜି, ଞେନ୍ ଅଡକୋଡିନ୍ନାନ୍ ଡକୋନ୍ ଆଈଶ୍ୱର, ପୁର୍ବାନ୍ ବାପ୍ପାଲେନ୍; ଅବ୍ରାହାମନ୍, ଇସାହାକନ୍, ଯାକୁବନ୍, ଆଈଶ୍ୱର। ଅକୋଡିନ୍ନା ଆସନ୍ କେନ୍ ଆତେ ଅଞୁଞେନ୍ ଡେତେ।
ମୋଶାନ୍ ବତଙେନ୍ ଡ ଫାରୋନ୍ ଆମଙ୍ ଅନିୟନ୍ ଆସନ୍ ଅସାଏନ୍, ଇନି ଆସନ୍ ଗାମେଣ୍ତେନ୍ ଆଅନିନ୍ ଇୟମେନ୍, ଆନିନ୍ ରୟଲଙ୍ ବର୍ରନ୍ ଅରପ୍ତିଏ, ତି ଆସନ୍ ଈଶ୍ୱରନ୍ ମୋଶାନ୍ ଆବୋଞାଙ୍ ହାରୋଣନ୍ ଆଡଅଙ୍ ଆନିନ୍ ଆସନାୟୁମ୍ ଆସନ୍ ଆପ୍ପାୟେନ୍। ଈଶ୍ୱରନ୍ ମୋଶାନ୍ ଡ ହାରୋଣନ୍ ବର୍ରେତିୟେଞ୍ଜି ଡ ଫାରୋନ୍ ରଡୋଡମ୍ତନେ।
ବାଇବଲ୍ ଲୋଙନ୍ ଅବୟ୍ ଅନବ୍ଜଙ୍ବର୍: ଯାତ୍ରା ୧-୪
Free to use, adapt, and share under an open license (CC BY-SA 4.0).