8. ଈଶ୍ୱରନ୍ ଯୋଷେପନ୍ ଡ ଆକୁତ୍ତମ୍ମାଞ୍ଜି ଅମ୍ମେଙ୍ତଜି।
ଗୋଗୋୟ୍ ବର୍ଷେଙ୍ ଆତିକ୍କି, ଅଙ୍ଗାବେଳା ଜାକୁବନ୍ ବୁଡ୍ଡାଏନ୍, ଜାକୁବନ୍ ଆଡନଙୟମ୍ ଅନନ୍, ଯୋଷେପନ୍ ଆଡଅଙ୍ ଆବୋଞାଙଞ୍ଜି ଗନିଜନଚ୍ ଆସନ୍ ଆମଙଞ୍ଜି ଆପ୍ପାୟେନ୍ ଆନାଜି ଗୋସ୍ସା ଜନ୍ତୁଞ୍ଜି ତୁରେଞ୍ଜି।
ଯୋଷେପନ୍ ଆବୋଞାଙଞ୍ଜି ଆନିନ୍ ଆଡଅଙ୍ ସଙ୍ଗତାଏଞ୍ଜି, ଇନି ଆସନ୍ ଗାମେଣ୍ତେନ୍ ଆବାପ୍ପାଞ୍ଜି ଆନିନ୍ ଆଡଅଙ୍ ଗୋଗୋୟ୍ ଲଡଜେନ୍, ଇନି ଆସନ୍ ଗାମେଣ୍ତେନ୍ ଯୋଷେପନ୍ ଗନୁମ୍ତେନ୍ ଗିଜେନ୍ ଡ ଆନିନ୍ ଆନିଞ୍ଜିଲୋଙ୍ ଡନେମର୍ ଡେତେ। ଏଙ୍ଗାଲେ ଯୋଷେପନ୍ ଆମଙଞ୍ଜି ତୁଞଲାୟ୍, ଆନିଞ୍ଜି ଆମଙନ୍ ଡକୋନ୍ ଅଡକୋନ୍ ରୁଜେଞ୍ଜି ଡ ଆନିନ୍ ଆଡଅଙ୍ କମ୍ୱାରୀନ୍ ଆସନ୍ ବେପାରମର୍ଞ୍ଜି ଆମଙ୍ ତମେଞ୍ଜି।
ଯୋଷେପନ୍ ଆବୋଞାଙଞ୍ଜି ଅସିଙନ୍ ଅର୍ରଙ ଜିରାଞଞ୍ଜି ଆମ୍ମୁଙ୍, ଯୋଷେପନ୍ ଆସିଣ୍ତ୍ରି ପେଏଞ୍ଜି ଡ ତିଆତେ କିମ୍ମେଡନ୍ ଆମିଞାମ୍ ଲୋଙ୍ ଜୋବ୍ଡାଏଞ୍ଜି। ତି ସିଲଡ୍ ତି ଆସିଣ୍ତ୍ରି ଆବପ୍ପାଞ୍ଜି ଅବ୍ତୁଜେଞ୍ଜି, ଏତେଲେ ଡେନ୍ ଆନିନ୍ ଇୟ୍ୟମ୍ତେ ଡ କିନ୍ଡ୍ରେଙନ୍ ଆଜନ୍ତୁ ଯୋଷେପନ୍ ଜୋମ୍ଲାୟ୍। ଯାକୁବନ୍ ଗୋଗୋୟ୍ ଡୁକ୍କଲନ୍ ଡକୋଲନେ।
କମ୍ୱାରି ବେପାରୀଞ୍ଜି ଯୋଷେପନ୍ ମିସରନ୍ ଓରୋଙେଞ୍ଜି। ମିସରନ୍ ଅବୟ୍ ସୋଡା, ବୋର୍ସାଡେସା ନୀଳିଅଲନ୍ ଆତନ୍ନଡ୍ ଡକୋଏନ୍। କମ୍ୱାରି ବେପାରିଞ୍ଜି ଯୋଷେପନ୍ ଆଡଅଙ୍ ଅବୟ୍ କମ୍ୱାରିନ୍ ଅନ୍ତମ୍ ଗମାଙ୍ ସରକାର ସୋଡାମରନ୍ ଆମଙ୍ ତମେଞ୍ଜି। ଯୋଷେପନ୍ ତି ଆସାଉକାରନ୍ ଆଡଅଙ୍ ମନଙ୍ ଗାମଲେ ସାକ୍କେଏନ୍, ଡ ଈଶ୍ୱରନ୍ ଆନିନ୍ ଆଡଅଙ୍ ଅବ୍ସିତ୍ତାଏନ୍।
ଆସାଉକାରନ୍ ଆଡୁକ୍ରି ଆନିନ୍ ସରିନ୍ ଲନୁଡନ୍ ଆସନ୍ ଏରେନ୍ଗୋଜେନ୍ ବନ୍ଡ ତିଲୋଙ୍ ଯୋଷେପନ୍ ଈଶ୍ୱରନ୍ ଆଡଅଙ୍ ସଙ୍ଗତାଲେ ଇର୍ସେନ ଆଲନୁମ୍ ଆସନ୍ ଅଡର୍ରନେ୍। ଆନିନ୍ ବରାବେନ୍ ଡ ଯୋଷେପନ୍ ଆଡଅଙ୍ କାଜ୍ଜାନିୟ୍ ଅବ୍ଡୋସାଏନ୍, ତି ଆସନ୍ ଆନିନ୍ ଜନ୍ନିନ୍ ଡେଏନ୍ ଡ ବଣ୍ତି ସିଙନ୍ ଅନାପ୍ପାୟନ୍ ଡେଏନ୍। ବଣ୍ତି ସିଙଲୋଙନ୍ ନିୟ୍ ଯୋଷେପନ୍ ଈଶ୍ୱରନ୍ ଆଡର୍ନେମର୍ ଡକୋଏନ୍ ଡ ଆନିନ୍ ଆଡଅଙ୍ ଈଶ୍ୱରନ୍ ଅବ୍ସିତ୍ତାଏନ୍।
ଆନିନ୍ ଡୋସାତଡ୍ ଜନଙଡେନ୍, ଡେଲ୍ଜାକିଁ ଡେନ୍ ଯୋଷେପନ୍ ବଣ୍ତିସିଙଲୋଙନ୍ ବାଗୁ ବର୍ଷେଙ୍ ଡକୋଲନେ। ବଃତଗଲ୍ ଫାରୋନ୍, ଆନା ଆଡଅଙ୍ ମିସରବାଜି ଆନିନ୍ ଆଡଅଙ୍ ରାଜା ଗାମେଞ୍ଜି, ବାଗୁ ଗନୁମନ୍ତେନ୍ ଆନିନ୍ ଗୋଗୋୟ୍ ଇବ୍ନିୟ୍ୟମେନ୍। ଆଞଙନଙ୍ ତିୟ୍ ମରଞ୍ଜି ଆଗନୁମତେନ୍ ଆଗରାମ୍ଗାମ୍ ବର୍ରନ୍ ଅର୍ରପ୍ତିଲଜି।
ଯୋଷେପନ୍ ଆଡଅଙ୍ ଈଶ୍ୱରନ୍ ଗନୁମ୍ତେନ୍ ଆଗରାମ୍ଗାମ୍ ବର୍ରନେ ଆସନ୍ ରନପ୍ତିନ୍ ତିୟେନ୍, ତି ଆସନ୍ ଯୋଷେପନ୍ ବଣ୍ତିସିଙନ୍ ସିଲଡ୍ ଓରୋଙଲାଜି। ଆନିନ୍ ଆସନ୍ ଯୋଷେପନ୍ ଗନୁମତେଞ୍ଜି ବାଣ୍ତାଏନ୍ ଡ ବର୍ରନ୍, ସାତ ବର୍ଷେଙ୍ ଈଶ୍ୱରନ୍ ଗୋଗୋୟ୍ ଜବ୍ମଲ୍ଲନ୍ ପତାୟତାୟ୍, ତି ଅନ୍ତମ୍ ସାତ ବର୍ଷେଙ୍ କାନ୍ତାରାତାୟ୍।
ଯୋଷେପନ୍ ଆଡଅଙ୍ ଫାରୋନ୍ ଗୋଗୋୟ୍ ଲଡୟଜେନ୍ ଡ ଆନିନ୍ ଆଡଅଙ୍ ଆତିକ୍କି ବୋର୍ସାମର୍ ଏମେଲେ ଡକୋଏନ୍।
ସାତ ବର୍ଷେଙ୍ ମନଙ୍ ଜବ୍ବମଲ୍ଲେନ୍ ତି ଆଡିନ୍ନା ଗୋଗୋୟ୍ ଜବ୍ବମଲ୍ଲନ୍ ତନୁମ୍ତୁମନ୍ ଆସନ୍ ଯୋଷେପନ୍ ମଡ୍ରାଞ୍ଜି ଆଡଅଙ୍ ବର୍ରେଞ୍ଜି। ଏଙ୍ଗାଲେ ସାତ ବର୍ଷେଙ୍ କନ୍ତାରାନ୍ ଜିର୍ରାୟ୍, ଯୋଷେପନ୍ ଜବ୍ବମଲ୍ଲନ୍ ମଡ୍ରାଞ୍ଜି ଆମଙ୍ଗ୍ ତମେନ୍, ଏଙ୍ଗାଲେ ଆନିଞ୍ଜି ଗଲଡମ୍ ଗାଗାନେନ୍ ଞାଙ୍ତଜି।
ମିସରନ୍ ତୁମ୍ ତଡ୍, ବନ୍ଡ କିଣାନରେଙନ୍ ନିୟ୍ ଅଙ୍ଗାଲୋଙନ୍ ଯାକୁବନ୍ ଡ ଆକୁତ୍ତମ୍ମାନ୍ତଞ୍ଜି ଡକୋଲଞ୍ଜି, କାନ୍ତାରାନ୍ ଗୋଗୋଜେନ୍।
ତି ଆସନ୍ ଯାକୁବନ୍ ଆସୋଡା ଡାଙ୍ଗାଡାଅନନ୍ ଜନ୍ରୋମ୍ ଞିନ୍ ଆସନ୍ ମିସରନ୍ ଆପ୍ପାୟେନ୍। ଏଙ୍ଗାଲେ ଆବୋଞାଙଞ୍ଜି ଜନ୍ରୋମ୍ ଞିନ୍ ଆସନ୍ ଯୋଷେପନ୍ ଆମୁକ୍କାବାଃ ତନଙେଞ୍ଜି ଆନିଞ୍ଜି ଯୋଷେପନ୍ ଆଡଅଙ୍ ଅନବ୍ମଲ୍ଲଜି। ବନ୍ଡ ଯୋଷେପନ୍ ଆନିଞ୍ଜି ଆଡଅଙ୍ ଅବ୍ମଡେନଞ୍ଜି।
ଆନିଞ୍ଜି ଆବଡ୍ଡିବୁଡ୍ଡିଲଞ୍ଜି ଅଳେ ଇଜ୍ଜା ତିଆତେ ଜନନ୍ନାନ୍ ଆସନ୍ ମାଲେଞ୍ଜି। ଯୋଷେପନ୍ ଆନିଞ୍ଜି ଆଡଅଙ୍ ବର୍ରେଞ୍ଜି, “ଞେନ୍ ବୋଞାଙବେନ୍, ଯୋଷେପନ୍!” ବତଙ୍ଡଙବେନ୍। ଆମ୍ୱେଞ୍ଜି ଇର୍ସେଲୁମନ୍ ଆସନ୍ ଏଇସୁମେନ୍ ତାଡିଡ୍ ଆମ୍ୱେଞ୍ଜି କମ୍ୱାରିନ୍ ଆସନ୍ ଏତମ୍ଲିୟ୍, ବନ୍ଡ ଈଶ୍ୱରନ୍ ଇର୍ସେନ୍ ଆତେ ମନଙ୍ ଲୋଙନ୍ ଗବ୍ଡେଲେନ୍। ମିସରନ୍ ଜିର୍ରେ ଆୟଡକୋନବା ତେତେ ଞେନ୍ ଆମ୍ୱେନ୍ ଡ କୁତ୍ତମ୍ମାବେନ୍ ଆସନ୍ ରପ୍ତିତିୟତବେନ୍।
ଏଙ୍ଗାଲେ ଯୋଷେପନ୍ ଆବୋଞାଙଞ୍ଜି ଅସିଙନ୍ ୟର୍ରଞ୍ଜି ଡ ଆବପ୍ପାଞ୍ଜି ବର୍ରେଞ୍ଜି ଡ ନମି ଅନ୍ତାନ୍ ଯୋଷେପନ୍ ଆମେଙ୍ ଗାମଲେ, ଆନିନ୍ ଗୋଗୋୟ୍ ସର୍ଡାଏନ୍।
ଯାକୁବନ୍ ବୁଡ୍ଡାଏନ୍ ଜନଙ୍ଡେନ୍, ଆନିନ୍ ଆକୁତ୍ତମ୍ମାଞ୍ଜି ବାତେ ମିସରନ୍ ଜିର୍ରେନ୍ ଡ ତେତେ ଆନିଞ୍ଜି ବାତେ ଲିୟଡକୋନେ।
ଅବସିଡୟ୍ ବର୍ରନ୍ ଅଙ୍ଗା ଆତେ ଈଶ୍ୱରନ୍ ଅବ୍ରାମନ୍ ବାତେ ତୁବେନ୍ ତିଆତେ ଆନିନ୍ ଇସହାକନ୍ ତିୟେନ୍, ତି ଆତିକ୍କି ଯାକୁବନ୍ ଡ ଆତିକ୍କି, ଯାକୁବନ୍ ବାରଟା ଆଡାଙ୍ଗାଡା ଅନନ୍ ଡ ଆକୁତ୍ତମ୍ମାଞ୍ଜି ଆସିଲୋଙ୍ ତିୟେନ୍। ବାରଟା ଓବ୍ବା ଅନନ୍ ଆକେଜ୍ଜା ଇସ୍ରାଏଲ ଲୋଙ୍ ବାର କେଜ୍ଜା ଡେଲୋଜି।
ବାଇବଲ ଲୋଙନ୍ ଅବୟ୍ ଅନବ୍ ଜଙ୍ ବର୍: ଆଦି ୩୭-୫୦
Free to use, adapt, and share under an open license (CC BY-SA 4.0).