7. ଯାକୁବନ୍ ଈଶରନ୍ ଅବସିତ୍ତାତେ

ଏଙ୍ଗାଲେ ପସିଜନଜି ସୋଡାଲେ ପାଙେଞି, ଆସିଙନ୍ ଆଡ଼କୋନେ ଯାକୁବନ୍ ଲଡ଼ଜେନ୍, ବନ୍ଡ଼ ଏଷୌ ବେନ୍ତାନ୍ ଲଡଜେନ୍ । ରିବିକାନ୍ ଯାକୁବନ୍ ଆଡଅଙ୍ ଲୋବଏନ୍, ବନ୍ଡ଼ ଇସାକନ୍ ଏଷୌ ଆଡଅଙ୍ ଲୋବଏନ୍‌ ।

ବମିୟତା, ଅଙ୍ଗାଆବେଡା ଏଷୌନ୍ ବେନ୍ତାନ୍ ସିଲଡ୍ ୟର୍ରନାୟ୍, ଆନିନ୍ ଗୋଗୋୟ୍ ଆଡୋଲୟ୍ ଡକୋଏନ୍ । ଏଷୌନ୍ ଜାକୁବନ୍ ଆଡଅଙ୍ ବରେନ୍, “ଆମନ୍ ଆଡରିଞେନ୍ ଆଜନୋମ୍ ଲୋଙ୍ ସିଲଡ୍ ଅସୋୟ୍ ଜନୋମନ୍ କାନକାରମ୍ ଗାମଲେ ତିୟିଞ୍”। ଜାକୁବନ୍ ଗାମେନ୍ ଆପର୍ତ୍ତମ୍ମୁନ୍, ଆମନ୍ ସୋଡାଅନନ୍ ଆଡନେ ଞେନ୍ ତିୟିଞ୍ । ତି ଆସନ୍ ଜାକୁବନ୍ ଆଡଅଙ୍ ଏଷୌନ୍ ଆସୋଡା ଅନନ୍ ଆଡନେ ତିୟେନ୍ । ତି ଆତିକ୍କି ଆନିନ୍ ଆଡଅଙ୍ ଜାକୁବନ୍ ଅସୋୟ୍ ଜନୋମନ୍ ତିୟେନ୍ ।

ଏଷୌନ୍ ଆଡଅଙ୍ ଇସାକନ୍ ଅନବ୍‌ସିତ୍ତାନ୍ ତନିୟନ୍ ଆସନ୍ ଇସ୍ସୁମେନ୍ । ବନ୍‌ଡ ଆନିନ୍ ତି ଆତେ ଅନଡ୍ରଙ୍ ଲୁମେନ୍ ଜାକୁବନ୍ ଏଷୌନ୍ ଅନ୍ତମ୍ ଏମ୍ମେଲନ୍‌ ରିବିକାନ୍ ଡ ଜାକୁବନ୍ ଆନିନ୍ ଆଡଅଙ୍ କଣ୍ତାୟେଞ୍ଜି । ଇସାକନ୍ ବୁଡାଏନ୍ ଡ ଆନିନ୍ ଗିୟ୍‌ଲେ ଅର୍ରପ୍ତିଲୋ । ତି ଆସନ୍ ଜାକୁବନ୍ ଆଉସାଲ୍‌ମେଡନ୍ ଆସଙ୍କାଲୋଙନ୍ ଡ ଆସିଲୋଙନ୍ ୟୁମ୍‌ଲନେ ଆରି ଏଷୌନ୍ ଆଅଙ୍ଗି ରଲନେ ।

ଇସାକନ୍ ଆମଙ୍ ଜାକୁବନ୍ ଇୟ୍‌ଲେ ବର୍ନେ ଆରି ଗାମେନ୍, “ଞେନ୍ ଏଷୌନ୍”। ଞେନ୍ ଜିର୍ରାୟ୍, ଅଙ୍ଗାବାତ୍ତେ ଆମନ୍ ଞେନ୍ ଆଡଅଙ୍ ଅବ୍‌ସିତ୍ତାତିଞ୍ । ଇସାକନ୍ ଏଙ୍ଗାଲେ ଅଙ୍ଗିନ୍ ଆଲ୍ଲଙିଡ୍ ଡ ଆଉପ୍ପୁର୍ ମେଡନ୍ ଅମ୍‌ଲନେ, ଆନିନ୍ ଏଷୌନ୍ ଗାମେନ୍ ଡ ଆନିନ୍ ଆଡଅଙ୍ ଅବ୍‌ସିତ୍ତାଏନ୍ ।

ଏଷୌନ୍ ଜାକୁବନ୍ ଆଡଅଙ୍ ସଙ୍ଗତ୍ତାଏନ୍, ଇନି ଆସନ୍ ଗାମେଣ୍ତେନ୍ ଜାକୁବନ୍ ଆସୋଡା ଅନନ୍ ଆଡନେ ଡ ଆନବ୍‌ସିତ୍ତା ରୁଜେନ୍ । ତି ଆସନ୍ ଆବାପ୍ପାଞ୍ଜି ରବୁଏନ୍ କି ଜାକୁବନ୍ ଆସନମ୍ବବ୍ ଆସନ୍ ଆନିନ୍ ଇୟ୍ୟମେନ୍ ।

ବନ୍‌ଡ ରିବିକାନ୍ ଏଷୌନ୍ ଆନିୟ୍ୟମ୍ ଜନାଏନ୍ । ତି ଆସନ୍ ଆନିନ୍ ଡ ଇସାକନ୍ ଜାକୁବନ୍ ଆଡଅଙ୍ ସଙାୟ୍ ଆକୁତ୍ତମ୍ମାଞ୍ଜି ସରିନ୍ ଡକୋନେନ୍ ଆସନ୍ ଆପ୍ପାୟେଞ୍ଜି ।

ଜାକୁବନ୍ ରିବିକାନ୍ ଆକୁତ୍ତମ୍ମାଜି ସରିନ୍ ଗୋଗୋୟ୍ ବର୍ଷେଙ୍ ଜାୟ୍ ଡକୋଲନେ । ତି ଆଡିନ୍ନା ଆନିନ୍ ଞାଙ୍‌ବୟ୍ ଲନେ, ଡ ଆନିନ୍ ୧୨ଟା ଓବ୍ବା ଅନନ୍ ଡ ଅବୟ୍ ଆଇ ଅନନ୍ ଡକୋଏନ୍ ଈଶ୍ୱରନ ଆନିନ୍ ଆଡଅଙ୍ ଗୋଗୋୟ୍ ଗମାଙ୍‌ମର୍ ଏମ୍ମେଏନ୍।

ଆସିଙନ୍ କିଣାନନ୍ ସିଲଡ୍ ବକ୍କୁଡି ବର୍ଷେଙ୍ ଡକୋଲନେ ଆତିକ୍କି, ଯାକୁବନ୍ ଆକୁତ୍ତୁମ୍ୱାଞ୍ଜି ସରିନ୍, ଆକମ୍ୱାରୀନଞ୍ଜି, ଡ ଆଜନ୍ତୁ ଗୋସ୍ସାନ୍‌ବାତ୍ତେ ତେତ୍ତେ ୟର୍ରନାଜି।

ଯାକୁବନ୍ ଗୋଗୋୟ୍ ବତଙେନ୍, ଇନିଆସନ୍ ଗାମେଣ୍ତେନ୍ ନମି ଆନ୍ତାନ୍ ଏଷୌନ୍ ଆନିନ୍ ଆଡଅଙ୍ ରନବ୍ବୁନ୍ ଇୟ୍ୟମ୍‌ତେ। ତି ଆସନ୍ ଆନିନ୍ ଗୋଗୋୟ୍ ଜନ୍ତୁଗୋସ୍ସାଞ୍ଜି ଏଷୌନ୍ ଆଡଅଙ୍ ତନିୟତିୟନ୍ ଅନ୍ତମ୍ ପତାୟେନ୍। ଅଙ୍ଗା ଆକମ୍ୱାରୀଜି ଜନ୍ତୁଞ୍ଜି ପାଙ୍‌ଲାଜି ଏଷୌନ୍ ଆଡଅଙ୍ ବରେଞ୍ଜି, “କମ୍ୱାରୀନମ୍ ଜାକୁବନ୍ ଆମନ୍ ଆଡଅଙ୍ କେନ୍ ଆଜନ୍ତୁଜି ତିୟଲମ୍। ଆନିନ୍ ଲଜିର୍ତାୟ୍।

ବନ୍‌ଡ ଏଷୌନ୍ ଜାକୁବନ୍ ଆଡଅଙ୍ ତନମ୍ନାଡନ୍ ତିୟଲେ ସାଡେନ୍, ଆରି ଆନିଞ୍ଜି ବାଗୁଞ୍ଜି ସର୍ଡାନ ବାତ୍ତେ ଗନ୍ନିଜନ୍‌ ଇସୁମେଞ୍ଜି। ତି ଆତିକ୍କି ଜାକୁବନ୍ କିଣାନଲୋଙନ୍ ସନୟୁନ୍ ବାତ୍ତେ ଡକୋଲନେ। ତି ଆତିକ୍କି ଇସାକନ୍ ରବ୍ବୁଏନ୍, ଆରି ଏଷୌନ୍ ଡ ଜାକୁବନ୍ ଆନିନ୍ ଆଡଅଙ୍ ତିଲେଞ୍ଜି। ଈଶ୍ୱରନ୍ ଅଙ୍ଗା ଆସନିବ୍‌ଡେୟ୍‌ବର୍ର ଅବ୍ରାମନ୍ ଆଡଅଙ୍ ବରେନ୍, ନମି ଇସାକନ୍ ଆମଙ୍ ସିଲଡ୍ ଜାକୁବନ୍ ଆସିଲୋଙ ତନିୟନ୍ ଡେନ୍।