8. ૦૮. પરમેશ્વર યુસફ ને એનજે કોટમ કે ભચાયતા.

ગચ વરે પોય, જડે યાકુબ ગઢો થ્યો, ઈ એનજે ચાગલે પોત્તર યુસફ કે એનજા ભા જોકો રઢુ ચરાઈન્ધા વા ઓનીજી ખભર કઢેલા હલાય.

યુસફ જા ભા એનકે નફરત કેન્ધા વા કોલાય કે, એનીજો પે યુસફ કે મણી નું જજો ચાગ કેન્ધો વો ને યુસફ કે સોણો આયો વો કે ઈ ઓનીજે મથા અધીકાર હલાઈન્ધો. જડે યુસફ એનજે ભા વટે આયો, ઉ એનકે જલી ગના ને એનજો કતરાક ગોલે જે વેપારી ભેરો સોદો કઈ છડયા.

યુસફ જા ભા ઘરે પાછા વને એન પેલે ઉ યુસફ જો જભો ફાડી વધા ને ઈ બકરે જે લુઈ મેં બોરી છડ્યા. તે પોય ઉ ઈ જભો પેન્ઢ જે પે કે વતાયા, કે ઈ એડો વીચાર કેં કે જંગલી જનાવર યુસફ કે મારી વધે આય. યાકુબ બોરો ડોખી થ્યો.

ગોલે જા વેપારી યુસફ કે મીસર ખણી વ્યા. મીસર વડો ને બરુકો ડેસ વો ને નાઇલ નાંય જે કંઠે અચેલો વો. ગોલે જા વેપારી યુસફ કે સાઉકાર સરકારી અધીકારી કે ઓતે વકી છડ્યા. યુસફ એનજે માલીક જી સેવા બોરી ખાસી રીતા કેં ને પરમેશ્વર યુસફ કે આસીરવાધ ડના

એનજે માલીક જી ઘરવારી યુસુફ ભેરો સુમેલા મંગે, પણ યુસફ એન રીતા પરમેશ્વર જી સામા પાપ કરેજો નાં ચઈ ડને. એતરે ઈ બોરી ખારી થઈ વઈ ને યુસફ મથા ખોટો ભધ વધે જેસે એનજી ધરપકડ કરે મેં અચે ને એનકે જેલ મેં પુરી છડે મેં અચે. જેલ મેં પણ યુસફ પરમેશ્વર કે વેસ્વાસુ રયો ને પરમેશ્વર એનકે આસીરવાધ ડના.

જો ક ઈ નીરધોસ વો તીં છતાં ઈ જેલ મેં વો. બ વરે પોય પણ યુસફ જેલ મેં વો. હકડી રાત ફારુન જેકે મીસર ડેસ જી પરજા રાજા મનધી વઈ, એનકે બ સોણા લધા. એતરે ઈ બોરો બેચેન ભની વ્યો. એનકે સલા ડને વારા કો પણ એનજે સોણે જો અરથ ચઈ સક્યા ન.

પરમેશ્વર યુસફ કે સોણે જો અરથ કરે જી સકતી ડના વા એતરે ફારુન યુસફ કે જેલ મેં નું બારા ગની આયો. યુસફ સોણે જો અરથ ચોન્ધે એન કે ચેં કે, “પરમેશ્વર ધાંઈ જે પાક જા ખાસા સત વરે ડને વારા આય ને તે પોય ડકાર જા સત વરે.”

ફારુન યુસફ નું બોરો રાજી થ્યો ને ઈ સજે મીસર મેં યુસફ કે મણી નું વડો અધીકારી ભનાય!

યુસફ માડુએ કે ધાંઈ જે ખાસે સત વરે મેં ખાધે લા ધાંઈ ભેરો કરેજો હોકમ ડને. તે પોય યુસફ ઉ ધાંઈ ડોકાર જે ટેમ તે વકાન્ધો ડને જેસે કરે ને ઓની વટે ગચ મડે ખાધે જો વે.

હી ડોકાર ફકત મીસર ડેસ લા જ ઓખો ન વો, પણ ક્નાન કે જતે યાકુબ ને એનજો કોટમ વસધો વો ઓતે પણ એતરોજ ઓખો વો.

એતરે યાકુબ એનજે વડે પોત્તરે કે ખાધે જો વકાન્ધો ગને લા મીસર હલાય. એનજા ભા જડે ધાંઈ વકાન્ધો ગને લા યુસફ અગીયા ઓભા વા તડે ઉ યુસફ કે ઓરખી સક્યા ન. પણ યુસફ ઓનીકે ઓરખી વ્યો.

એનજે ભા જી કસોટી કેઈ હી જાણેલાં કે ઉ ભધલાઈ વ્યા આય કે ન, યુસફ ઓનીકે ચેં આંઉ “આંજો ભા યુસફ અયાં! ધરજજા ન. આંઈ જડે મુંકે ગોલે વારે વકી ડના તડે આંઈ મુંજો ભોછડો કરેજો મંગ્યા,પણ પરમેશ્વર ઉ ભોછડાઈ કે ખાસે લા ઉપયોગ ક્યા આય! આંઈ અચો ને મીસર મેં રયો કે આંઉ આંજી ને આંજે કોટમ જી ખપ્ધી પુરી કેઈ સકા.”

જડે યુસફ જા ભા ઘરે પાછા આયા ને એનીજે પે યાકુબ કે ચ્યાં કે, “યુસફ જીરો આય.” તડે ઈ બોરો રાજી થ્યો.

જ કે યાકુબ બોરો ગઢો માડુ વો. ઈ પેન્ઢ જે કોટમ ભેરો મીસર મેં વ્યો ને ઓતે રયો. યાકુબ મરી વ્યો એન પેલે એનજે મડે પોત્તરે કે આસીરવાધ ડને.

કરાર જા વચન જકો પરમેશ્વર અભરામ કે ડનાં વા ઉ ઇસાક વટે આયા ને તે પોય યાકુબ વટે ને યાકુબ પોય એન જે બારો પોત્તર ને ઓનીજે કોટમ વટે આયા બારો પોત્તર જા વન્સ બાર ગોત્ર ભન્યા.