10. ଦଶଗଟା ମର୍ଡି

ମୋଶା ଓ ହାରଣ ଫାରୋ ତାଣା ହାଚେରି । ଏୱାରି ୱେସ୍ତେରି, ”ଇସ୍ରାଏଲତି ମାହାପୁରୁ ଏଲେହେଁ ଜଲିମାଞ୍ଜାନେସି,ନା ଲୋକୁଣି ପିସା ହିୟାମୁ,” ଫାରୋ ତାମି କାତା ୱେନାଆତେସି । ଇସ୍ରାଏଲ ଲୋକୁଣି ପିସା ହିନି ବାଟା, ଏୱାରାଇଁ ଗାଡି କାମା କିହାଲି ଟାଣ୍ଡିତେସି ।

ଲୋକୁଣି ତାମି ଇଚା ତଲେ ତାକାଲି ଫାରୋ ହିହାଲାଃତେସି, ଏଦାଆଁ ତାକି ମାହାପୁରୁ ଦଶଗଟା ସାମ୍ଲ ଆଆ ଗାଟି ମର୍ଡି, ମିଶରଇଁ ପାଣ୍ଡିତେସି । ଇ ମର୍ଡିତାକି, ମାହାପୁରୁ ଫାରୋଇଁ ତସିମାଚେସି ଯେ ଏୱାସି ଫାରୋତି ଅଡ଼େ ମିଶରତି ପେଣ୍କାୟାଁଟିଏ ଗାଡି ବ୍ଡ଼ାୟୁଗାଟାୟି ।

ମାହାପୁରୁ ନିଲିକାଡାତି ଏୟୁଇଁ କାସାତା ବାଦ୍ଲିକିତେସି, ମାତ୍ର ଫାରୋ ଇପାତେକା ଇସ୍ରାଏଲ ଲୋକୁଣି ପିହ୍‌ଆତେରି ।

ମହାପୁରୁ ବାରେ ମିଶର ଦେଶାତା ପାନାଣିଁ ପାଣ୍ଡିତେସି । ପାନାଣିଁ ହେକ କିହାଲିତାକି ମୋଶାଇଁ ଫାରୋ ବାତି ରିସ୍‌ତେସି । ମାତ୍ର ବାରେ ପାନା ହାତି ଜେଚ, ଫାରୋ ତାନି ହିୟାଁଇଁ ଆଣ୍ଟ୍ୱା କିତେସି ଅଡ଼େ ଇସ୍ରାଏଲତିଲୋକୁଣି ମିଶରଟିଏ ପିହ୍‌ଆତେସି ।

ଏଦାଆଁତାକି ମାହାପୁରୁ ଦୁଡ଼ି ପ୍ଡ଼ିଉଲି ମର୍ଡିତା ପାଣ୍ଡିତେସି । ଏଦାଆଁ ଜେଚ ଏ ୱିହାଁତି ମର୍ଡି ପାଣ୍ଡିତେସି । ଫାରୋ ମୋଶା ଅଡ଼େ ହାରଣଇଁ ହାଟାହାଁ ଅଡ଼େ ଏଲେ ଇଚେସି, ଅଡ଼େ ଏୱାରି ମର୍ଡି ଇଁ ସୁଣ୍ଡିତେସି, ଏ ଇସ୍ରାଏଲତି ଲୋକୁ ମିଶରଟିଏ ହାଜାଲି ଆଡିନେରି । ଏଚେତା ମୋଶା ପ୍ରାତନା କିତେସି, ମାହାପୁରୁ ୱିହାଁ ମିଶରଦେଶାଟି ଗୁଚି କିତେସି । ମାତ୍ର ଫାରୋ ତାନି ହିୟାଁଇଁ ଆଣ୍ଟ୍ୱା କିତେସି ଅଡ଼େ ଲୋକୁଣି ପିହ୍ଆତେସି ।

ଏଦାଆଁ ଜେଚ ମାହାପୁରୁ ବାରେ ବାଡ଼ାତି ଏମିନାଇ ମିଶର ଲୋକୁଁୱାଇ ମାଚେ, ଲାଗେ କିହାଁ ହାକି ପାଣ୍ଡିତେସି । ମାତ୍ର ଫାରୋତି ହିୟାଁ ଆଟ୍ୱା ଆତେ, ଅଡ଼େ ଏୱାସି ଇସ୍ରାଏଲ ଲୋକୁଣି ପିହ୍ଆତେସି ।

ଏଦାଆଁ ଜେଚ ମୋଶାଇଁ ଫାରୋତି ନକେଏ ଦ୍ରାମ୍ବୁ କୁତୁସାଲି ଏଲେଇଚେସି । ଏଚେତା ଏୱାସି କିତେସି, ମିଶରତିଲୋକୁଣି ତଲୁ ଲାକ ହାରେକା ନନି ଗାହୟଁ ମେସ୍ପିଆତେ, ମାତ୍ର ଇସ୍ରାଏଲ ଲୋକୁଣି ଆଆତେ । ମାହାପୁରୁ ଫାରୋତି ହିୟାଁଇଁ ଆଣ୍ଟ୍ୱା କିତେସି, ଅଡ଼େ ଫାରୋ ଇସ୍ରାଏଲ ଲୋକୁଣି ପିହ୍ଆତେସି ।

ଏଦାଆଁ ଜେଚ, ମାହାପୁରୁ ହାଗୁଟି ୱାଲ୍‌କା ପାଣ୍ଡାହାଁ ମିଶରତି ହାରେକା ଦିଣସୁ ଇଁ ଲାଗେଏ କିତେସି, ଅଡ଼େ ଏମିନିଗାଟାରି ପଙ୍ଗାତା ହାଚେରି ଏୱାରି ହାତେରି । ଫାରୋ ମୋଶା ଅଡ଼େ ହାରଣଇଁ ହାଟିତେସି ଅଡ଼େ ଜଲିତେସି,” ନାନୁ ପାପୁ କିହାମାଇଁ । ନିନୁ ହାଜାଲି ଆଡିଦି “। ଏଦାଆଁତାକି ମୋଶା ପାର୍ତନା କିତେସି, ଅଡ଼େ ହାଗୁଟି ୱାଲ୍କା ପାଣ୍ଡାଲି ସୁଣ୍ଡି କିତେସି ।

ମାତ୍ର ୱେଣ୍ଡେଏ ଫାରୋ ପାପୁ କିତେସି ଅଡ଼େ ତାନି ହିୟାଁଇଁ ଆଣ୍ଟ୍ୱା କିତେସି । ଏୱାସି ଇସ୍ରାଏଲ ଲୋକୁଣି ହାଜାଲି ତାକି ପିହ୍ଆତେସି ।

ଏଦାଆଁ ତାକି ମାହାପୁରୁ ଉମ୍ବୀନି ପିଡ୍କା ମର୍ଡି ପାଣ୍ଡି ତେସି ଅଡ଼େ ମିଶରଦେଶାତା ଏଗାହାଚେ । ଏ ଦିଣ୍‌ସୁ ବାରେ ହାଗୁଟିତର୍ଗିନି ୱାଲ୍‌କା ତାଲେ ଲାଗେ ଆହାଲାଆତୁ ଏୱି ବାରେ ଇ ଉମ୍ବୀନି ପ୍ଡ଼ିକା ଲାଗେଏ କିତୁ ।

ଏଦାଆଁ ଜେଚ ମାହାପୁରୁ ଆନ୍ଦେରୀତି ପାଣ୍ଡିତେସି ଏଦି ତିନି ଦିନା ପାତେକା ଡ଼ଇତେ । ଇଦି ଇଚେକା ଆନ୍ଦେରୀ ମାଚେ ଯେ ମିଶରତିଲୋକୁ ତାମି ଇଲୁକାଣ୍ଡା ପିସାଲି ଆଡିଲାଆତେରି । ମାତ୍ର ଏମିନି ଟାୟୁତା ଇସ୍ରାଏଲଲୋକୁ ବାସା କିହିମାଚେରି ଏମ୍ବାଆଁ ଉଜେଡି ମାଚେ ।

ଇ ନଅ ଗଟା ମର୍ଡି ଆତି ଡାୟୁ ଜିକେଏ ଫାରୋ ଇସ୍ରାଏଲତି ଲୋକୁଣି ପିହ୍ଆତେସି । ଫାରୋ ୱେନାଆତି ତାକି, ମାହାପୁରୁ ର ଶେଷା ମର୍ଡି ପାଣ୍ଡାଲିତାକି ଅଣ୍‌ପିତେସି । ଇଦି ଫାରୋତି ହିୟାଁଇଁ ବାଦ୍ଲିକିନେ ।