9. ମାହାପୁରୁ ମୋଶାଇଁ ହାଟିତେସି ।

ଯୋଶେଫତି ହାକି ଜେଚ, ତାମି ବାରେ କୁଟୁମି ମିଶରତା ଡ଼ଇତେରି । ଏୱାରି ଅଡ଼େ ତାମି ଗଚିତାରି ଏମ୍ବାଆଁ ହାରେକା ବାର୍ଷା ଡ଼ଇତେରି ଅଡ଼େ ତାମି ହାରେକା ମିର୍କା ମାସ୍କା ଜାର୍ନା ଆତେରି । ଏୱାରାଇଁ ଏଇସ୍ରାଏଲ ଗାଟାରି ଇଂଜି ଦରୁ ହାଟ୍କି ଆତେ ।

ଶହେ ଶହେ ବାର୍ଷା ଡାୟୁ, ଇସ୍ରାଏଲତି ଜାନା ଲୋକୁ ଆତେରି । ମିଶର ହଲିଏଣିସ୍କା ଯୋଶେଫଇଁ ଅଡ଼େ ଏୱାସି ଏୱାସ୍କାଣି କିହାମାନି କାମା ଏଚେଲା ଜିକେଏ ଅଣପାଃତେସି । ଏୱାରି ଏଇସ୍ରାଏଲ ଲୋକୁଣି ଆଜାଲିମାଠ୍ହେରି, ଏନାଆତାକିଇଚିସାରେ ଏୱାରି ଗାଡି ଜାଣା ମାଚେରି । ଏଦାଆଁ ତାକି ଏବେଲାତା ଏମିନି ଫାରୋ ମିଶରଇଁ ଚାଲ କିହି ମାଚେସି ଏୱାସି ଇସ୍ରାଏଲ ଲୋକୁଣୀ ମିଶର ତାରାତି ହଲିଆ କିତେସି ।

ମିଶର ଲୋକୁ ଇସ୍ରାଏଲ ଲୋକୁଣି ଇଲ୍‌କାଣିଁ ଅଡ଼େ ବାରେ ଗାଡ଼ାଣି ଜିକେଏ ତିଆର୍ କିହାଲି ଏଲେଇଚେସି । କଷ୍ଟ କାମା ଏୱାରା ଇଁ ହାରେକା ଦୁକୁ ହିତେ, ଏୱାରାଇଁ ମାହାପୁରୁ ବର ହିତେସି, ଅଡ଼େ ଏୱାରାଇଁ ହାରେକା ମିର୍କା ଅଡ଼େ ମାସ୍କା ଆତେରି ।

ଫାରୋ ମେସାଲି ଆଡିତେସି ଯେ ଇସ୍ରାଏଲତି ହାରେକା ମିର୍କା ମାନେରି ଏଦାଆଁ ତାକି ଏୱାସି ତାନି ଲୋକୁଣି, ବାରେ ଇସ୍ରାଏଲତି ମିର୍କାୟାଁଇଁ ନିଲିକାଡାତା କୁତୁସାହାଁ ପାୟାଲି ତାକି ହୁକୁମ୍ ହିତେସି ।

ର ଇସ୍ରାଏଲତି ଆୟାଟି ର ମିର୍ଏଣାଇଁ ଜାର୍ନା ହିତେ । ଏଦି ଅଡ଼େ ତାନି ଡକ୍ରା ଡାଲୁଇଁ ଆଡିନି ଏଚେକା କଚେକା ଦିନା ଡ଼ୁକ୍‌ହାଁ ଇଟିତୁ ।

ଏଚିବେଲା ଆବା ଅଡ଼େ ଆୟା ଗାଡି ଦିନା ଡ଼ୁକ୍‌ହାଲି ଆଡାଃତୁ, ଏୱା ଏୱାଣାଇଁ ହାକିଟି ଗେଲ୍ପାଲି ତାକି ନିଲିକାଡା ଗାଟାତା ଏୟୁତା ନାଡା ବିତ୍ରା ର ଟିପ୍ପିଣୀ ବିତ୍ରା ତାଙ୍ଗେ ଇଟିତୁ । ତାନି କାଜା ନାନା ତାଙ୍ଗେ ଏନାଆଁ ଆନେ, ମେସାଲିତାକି ହେକ ଡ଼ୟାହାଁ ସିନିକିହିମାଚେ ।

ଫାରୋତି ମାଙ୍ଗା ଟିପ୍ପିଣୀଇଁ ଅଡ଼େ ଏ ବିତ୍ରା ଜିକେଏ ସିନିକିତେ । ଏଚିବେଲା ଏଦି ର ଡାଲୁଇଁ ସିନିକିତେ, ଏଦି ତାନି ମିର୍ଏଣା କିହା କଡିତେ । ଏଦି ଇସ୍ରାଏଲ ଗଚିତି ର ଆୟାଟିଇଁ ଡାଲୁତି ଆୟା ଇଂଜି ପୁନାଆନାରାଂଗୁ ଉଟ୍‌ହାଲି ଇଟିତେ । ଏଚିବେଲା ଡାଲୁ କାଜାସି ଆତେସି ତାଙ୍ଗେ ଆୟାତି ପାଲୁ ଅଡ଼େ ଲାଗାଃତେ, ତାଙ୍ଗେ ଏଦି ଫାରୋତି ମାଙ୍ଗାଇଁ ୱେଟ୍‌ହାସ୍ତେ, ଆମିନି ଗାଟାଇକି ତାନି ଦରୁ ମୋଶା ଇଂଜି ଇଟିତେ ।

ର ଦିନା, ଏଚିବେଲା ମୋଶା କାଜାସି ଆତି ଡାୟୁ, ଏୱାସି ମେସ୍ତେସି, ର ମିଶରତାସି ଇସ୍ରାଏଲତାଣାଇଁ ୱେଚିମାଚେସି । ମୋଶା ତାନି ଇସ୍ରାଏଲତାଣାଇଁ ଗେଲ୍ପାଲି ତାକି ଚେଷ୍ଟା କିତେସି ।

ଏଚେବେଲା ମୋଶା ପୁନ୍ଜାଲି ଆଡିତେସି, ଏମ୍ବାଆରି ମେସିମାଞ୍ଜଃରି, ଏୱାସି ମିଶର ତାଣାଇଁ ପାଇତେସି ଅଡ଼େ ତାନି ମଡ଼ାଇଁ ମୁସ୍ତୁସ୍ତେସି । ମାତ୍ର ରଅସି ମୋଶା ଏନାଆଁ କିହାମାଚେସି, ମେସାମାଚେସି ।

ଏଚିବେଲା ଫାରୋ, ଏନାଆଁ ମୋଶା କିହାମାଚେସି, ୱେଚେସି, ଏୱାସି ପାୟାଲିତାକି ଅଣପିତେସି । ମୋଶା ଫାରୋତି ସୈନ୍ୟଟିଏ ଗେଲ୍ପି ଆହାଲିତାକି ମିଶର ବୁମୀଇଁ ଏମିନିତାଣା ଏୱାସି ଗେଲ୍ପି ଆନେସି, ହେକ ହାତୁସ୍ତେସି ।

ମିଶରଟିଏ ହାରେକା ହେକ ଡାହାରାବୁମିତା ମୋଶା ର ଗଡ଼ୁ ଆତେସି । ଏ ଟାୟୁତା ର ପଦା ତଲେ ବିହା ଆତେସି ଅଡ଼େ ତାଙ୍ଗେ ରିଣ୍ଡି ମିର୍କା ମାସ୍କା ଆତୁ ।

ର ଦିନା ଏଚିବେଲା ମୋଶା ତାନି ମେଣ୍ଡାଁତି ସେବା କିନି ବେଲା, ର ବୁଟାତା ହିଚୁ ଡ଼ିଂଜି ମାଚାଣିଇଁ ମେସ୍ତେସି । ମାତ୍ର ଏବୁଟା ଡ଼ିଞ୍ଜାହାଁ ପୁୟାଁ ଆଆତୁ । ମୋଶା ବୁଟା ୱାକି ନେହିକି ସିନିକିହାଲି ହାଚେସି । ଏଚିବେଲା ଏୱାସି ଡ଼ିଞ୍ଜିମାନି ବୁଟା ୱାକି ହାଜିମାଚେସି, ମାହାପୁରୁତି ହାଡା ୱେସ୍ତେ, ମୋଶା, ନି ପାଣ୍ଡେଇ ହୁକ୍‌ହାଁ । ନିନୁ ଦାର୍ମୁ ଟାୟୁତା ନିଚାମାଂଜି ।

ମାହାପୁରୁ ଜଲିତେସି, “ନା ଲୋକୁତି ଦୁକୁ ନାନୁ ମେସାମାଇଁ । ଫାରୋ ଡାଗେ ପାଣ୍ଡାଇଁ ଏନାଆ ତାକି ଇଚିସାରେ ନିନୁ ଇସ୍ରାଏଲ ଲୋକୁଣି ତାମି ମିଶର ହଲିଆଟିଏ ହପ୍‌ହା ତାଦି । ଏୱାରାଇଁ ନାନୁ କିଣାନ ଦେଶା ହିଇଁ, ଆମିନି ଦେଶା ନାନୁ ଅବ୍ରାହାମ, ଇସାହାକ ଅଡ଼େ ଯାକୁବଇଁ କାତା ଇଟାମାଚେଏଁ ।

ମୋଶା ୱେଚେସି, “ଅଡ଼େ ଲୋକୁ ପୁଂଜାଲି ଇଚାକିନୁ ନାଙ୍ଗେ ଆମ୍ବାସି ପାଣ୍ଡାଜାନେସି, ନାନୁ ଏୱାରାଇଁ ଏନାଆଁ କାତା ଆଇଁ?” ମାହାପୁରୁ ଜଲିତେସି, “ନାନୁ ଅମ୍ବାଆତେଏଁ ମାଇଁ ଏୱାତେଏଁ ନେଏଁ ଡ଼ଇଇଁ”। ଏୱାରାଇଁ ୱେହ୍‌ମୁ, “ମି ତାଣା ମାହାପୁରୁ ନାଙ୍ଗେ ପାଣ୍ଡାମାଂଜାନେସି; ଅବ୍ରାହାମ, ଇସାହାକ, ଅଡ଼େ ଯାକୁବତି ମାହାପୁରୁ ତେଏଁ । ବାରେଦିନାତାକି ଇଦି ନା ଦରୁ ।

ମୋଶା ଆଜିମାଚେସି ଅଡ଼େ ଫାରୋତାଣା ହାଲଅଁ ଇଂଜିମାଚେସି, ମାତ୍ର ଏୱାସି ଅଣ୍‌ପିତେସି, ଏୱାସି ନେହିକି କାତା ଜଲାଲି ଆଡଅଁ, ଏଦାଆଁତାକି ମାହାପୁରୁ ମୋଶାତି ତାଇ, ହାରଣଇଁ, ତାଙ୍ଗେ ତଡ଼ୁ ଆହାଲି ପାଣ୍ଡିତେସି । ମାହାପୁରୁ ମୋଶା ଅଡ଼େ ହାରଣଇଁ ତେଲ୍ପି କିହାମାଚେସି, ଯେ ଫାରୋ ରିଂଜିନାସି ।