2. ପାପୁ ଦାର୍ତିତା ହଡା ୱାତେ ।

ମାହାପୁରୁ ତାମିତାକି ତିୟାର୍ କିହାନି ଅଜିତି ବାଡ଼ାତା ଆଦମ ଅଡ଼େ ତାନି ଡକ୍ରୀ ହାରେକା ରାହାଁଗାଟି ଜୀୱୁ ଲେମ୍ବିମାଚୁ । ଏୱି ଆମ୍ବାଇ ଜିକେଏ ହେମ୍ବରି ଦୁକି ହୁଚାଲାଃତୁ, ମାତ୍ର ଇଦି ଏୱାସ୍କା ତାକି ଏନି ଲାଜ୍ଜା ହିଲ୍ଲାଃତେ ଏନ୍ନାଃକି ଇଚିସାରେ, ଦାର୍ତିତା ପାପୁ ହିଲ୍ଲାଃତେ । ଏୱି ସବୁବେଲା ବାଡ଼ାତା ହାଜି ୱାହିଁ ଆହିମାଚୁ ଅଡ଼େ ମାହାପୁରୁ ତଲେ କାତା ଆହିମାଚୁ ।

ମାତ୍ର, ବାଡ଼ାତା ର ଚାଲାକି ରାଚୁ ମାଚେ । ଏଦି ଆୟାଟିଇଁ ୱେଚେ, ମାହାପୁରୁ ସାତେଏ ଇ ବାଡ଼ାତାଇ ଏମିନି ମାର୍ନୁତି ପାଡ଼େଇ ତିନ୍ନାଃଦୁ ଇଞ୍ଜି ମିଙ୍ଗେ ୱେସା ମାଞ୍ଜାମାନେସି କି ?

ଆୟାଟି ୱେସ୍ତେ, ମାହାପୁରୁ ମାଙ୍ଗେ ୱେସାମାଞ୍ଜାନେସି ନେହାୟି ଅଡ଼େ ଲାଗେଃତାୟି ଇଁ ତେଲ୍ପିନି ମାର୍ନୁତି ପାଡ଼େଇ ଇଁ ପିସାହାଁ ଏମିନାଣି ଜିକେଏ ଚିଞ୍ଜାଲି ଆଡିନମି । ମାହାପୁରୁ ମାଂଗେ ୱେସାଞ୍ଜାନେସି, ଅଡ଼େ ମିରୁ ଏ ପାଡ଼େଇ ଚିଂଜେରି କି ଡିଗିଦେରି ଏନେଚୁ ଏ ମିରୁ ହାଦେରି ।

ରାଚୁ ଆୟାଟି ଇଁ ୱେସ୍ତେ, ଏଦି ସାତା ଆଃଏ । ମିରୁ ହାଃଅ ତେରି । ମାହାପୁରୁ ପୁଞ୍ଜାଁଜାନେସି ଯେ, ମିରୁ ଚିଚି ରେଟୁଏ ମାହାପୁରୁ ଲେହେଁ ମିରୁ ଆହା ହାଜେରି ଅଡ଼େ ତାନି ଲେହେଁ ନେହିଁ ଅଡ଼େ ଲାଗେଃତାଣି ଇଁ ତେଲ୍ହାଲି ଆଡିଦେରି ।

ଆୟାଟି ଏଦାଆଁ ମେସ୍ତେ, ଏ ପାଡ଼େଇ ମେସାଲି ଅଜା ହାଚାଇ ମାଚେ ଅଡ଼େ ଚିଞ୍ଜାଲି ହାରେକା ଡ଼ାକ୍ନାଇ ମାଚେ । ଏଦି ଜିକେଏ ବୁଦ୍ଦିଗାଟାଇ ଆହାଲି ଅଣ୍‌ପିତେ, ଏଦାଆଁ ତାକି ଏଦି ର ପାଡ଼େଇ ଏସ୍ତେ ଅଡ଼େ ଚିଚେ । ତାନି ଜେଚ ଏଦି ର ପାଡ଼େଇ ତାନି ଡକ୍ରା ଇଁ ହିତେ, ଆମ୍ବାଃସି ତାନି ତଲେ ମାଚେସି ଅଡ଼େ ଏୱାସି ଜିକେଏ ରଚାଣି ଚିଚେସି ।

ସାଣେକାତାକି, ତାମି କାନୁ ଦେପି ଆତେ, ଅଡ଼େ ତାମ୍ବୁ ପୁଞ୍ଜା କଡିତୁ ଯେ, ତାମ୍ବୁ ନାଗ୍ଡ଼ା ଆହାନୁଁ । ଆକାଁଣିଇଁ ଚାଚିହିଁ ତାମି ଆଂଗାତି ପର୍ହାଲି ଚେଷ୍ଟା କିତୁ ।

ଏଦାଆଁ ଜେଚ ମାହାପୁରୁ ବାଡ଼ା ୱାକି ତାକିଁହିଁ ୱାହିନିଁ କାଲ ଆବାଟି ଅଡ଼େ ତାନି ଡକ୍ରୀ ୱେଞ୍ଜାଲି ଆଡିତୁ । ଏୱା ରିଣ୍ଡି ମାହାପୁରୁଟିଏ । ଏମ୍ବାଟିଏ ମାହାପୁରୁ ଆବାଟିଇଁ ହାଟିତେସି, ନିନୁ ଏମ୍ବି ମାଞ୍ଜି ? ଆଦମ ଜଲିତେସି, ନିନୁ ଏନେଚୁ ବାଡ଼ାତା ତାକିନାଇ ନାନୁ ୱେଚେଏଁ ଅଡ଼େ ନାନୁ ଆଜା ହାଚେଏଁ, ଏନାଃତାକି ଇଚିସାରେ ନାନୁ ନାଗ୍ଡ଼ା ମାଚେଏଁ । ଏଦାଆଁ ତାକି ନାନୁ ଡ଼ୁଗି ତେଏଁ ।

ଏମ୍ବାଟିଏ ମାହାପୁରୁ ୱେଚେସି, ମିରୁ ନାଗ୍ଡ଼ା ମାଞ୍ଜେରି ଇଞ୍ଜି ମିଙ୍ଗ ଆମ୍ବାଃସି ୱେସ୍ତାତେସି ? ଏମିନି ପାଡ଼େଇ ତିନ୍ନାଃଦୁ ଇଞ୍ଜିଁ ୱେସାମାଞ୍ଜାତେଏଁ, ଏ ପାଡ଼େଇ ମିରୁ ଚିଚେରି କି ? ଆବାଟି ଏଲେଇଚେସି , ଇ ଡକ୍ରୀଇଁ ନିନୁ ନାଙ୍ଗେ ହିୟାତି ଅଡ଼େ ଏଦି ନାଂଗେ ପାଡ଼େଇ ହିୟାତେ । ମାହାପୁରୁ ଆୟାଟିଇଁ ୱେଚେସି, ଇଦି ନିନୁ ଏନାଆଁ କିତି ? ଆୟାଟି ଏଲେଇଚେ, ରାଚୁ ନାଂଗେ ବାଣ୍ ବି କିୟାତେ ।

ମାହାପୁରୁ ରାଚୁଇଁ ଏଲେଇଚେସି, ନିନୁ ବାକା ବେଟା ଆହାମାଞ୍ଜି । ନିନୁ ନି ବାଣ୍ଡି ତଲେ ତାକିଦି ଅଡ଼େ ଦୁଡ଼ି ଚିଞ୍ଜି । ନିନୁ ଅଡ଼େ ଆୟାଟି ମିରୁ ଅପ୍‌ୱି ଆଅ ତେରି । ଅଡ଼େ ମି ମିର୍କା ଅଡ଼େ ତାନି ମିର୍କା ବିତ୍ରା ଜୀୱୁ ନୱି ଆଅ ତେରି । ଆୟାଟି ଗଚି ନି ତ୍ରାୟୁଁତା ୱେତାନୁ ଅଡ଼େ ନିନୁ ତାନି ଗୁଃନ୍ନାଇଁ କତ୍ ଦି ।

ତାନିଜେଚ ମାହାପୁରୁ ଆୟାଟିଇଁ ଏଲେଇଚେସି, ନାନୁ ମି ଜାର୍ନି କିନି ବିସା ପାଡିକିୟାଇଁ । ନିନୁ ନି ଡକ୍ରାଇଁ ମନ କିଦି ଅଡ଼େ ଏୱାସି ନିଂଗେ ତାକି କିୟାନେସି ।

ମାହାପୁରୁ ମାଣ୍ସିଇଁ ଏଲେଇଚେସି, ନିନୁ ନି ଡକ୍ରୀତି କାତା ୱେଚି ଅଡ଼େ ନାଦି ନାମାଃତି । ନେଏଁ ବୁମି ବାକା ବେଟା ଆତେ, ଅଡ଼େ ନିଂଗେ ଆର୍ନ୍ନା କାମ୍ବି କିହାଲି ହାରେକା କାମା କିହାଲି ଲାଗିନେ । ନିନୁ ହାଦି ଅଡ଼େ ନି ଆଂଗା ବୁମିତା ୱେଣ୍ଡିନେ । ଆବାଟି ତାନି ଡକ୍ରୀଇଁ ହବା ଦରୁ ଇଟିତେସି, ଆମ୍ନି ଅର୍ତ ଜୀୱୁ ହିନାଇ, ଏନାଆଁ ତାକି ଇଚିସାରେ ଏଦି ହାରେକା ଲୋକୁତି ଆୟା ଆନେ । ଅଡ଼େ ମାହାପୁରୁ ଆଦମ ଅଡ଼େ ହବାଇଁ ପଶୁତି ତଲୁ ଇଁ ତୁର୍ୱି କିତେସି ।

ଏଦାଆଁ ଜେଚ ମାହାପୁରୁ ଏଲେଇଚେସି, ନେଏଁ ନେହାଣି ଅଡ଼େ ଲାଗେଃତାଣି ପୁଚି ତାକି ମାଣ୍ସି ମାଁ ଲେହେଁ ରଅସି ଆହାମାନେସି, ଏୱି ସବୁବେଲା ନିଡାଲି ତାକି ଜୀୱୁ ହିନି ମାର୍ନୁତି ପାଡ଼େଇ ତିନି କାତା ହିଲ୍ଲାଃତେ । ଏଦାଆଁ ତାକି ମାହାପୁରୁ ଆଦମ ଅଡ଼େ ହବାଇଁ ଅଜିତି ବାଡ଼ାଟି ପେର୍ହା ପାଣ୍ଡିତେସି ଅଡ଼େ ହେକ ପାଣ୍ଡାନା ଜୀୱୁହିନି ମାର୍ନୁତି ପାଡ଼େଇଇଁ ଏନିକି ତିନା ଉ ଏଦାଆଁ ତାକି, ମାହାପୁରୁ ବ୍ଡ଼ାୟୁଗାଟି ଦୂତୁଣିଁ ବାଡ଼ାତି ଦୁୱେରିତା କାପି କିତେସି ।