3. କ୍ଡ଼ୁପ୍ନି ୱାରୁ

ହାରେକା ବାର୍ଷା ଡାୟୁ, ହାରେକା ଲୋକୁ ଦାର୍ତିତା ବାସା କିହିମାଚେରି । ଏୱାରି ହାରେକା ଲାଗେଃତାରି ଅଡ଼େ ରିଞ୍ଜିନାରି ମାଚେରି । ଇଚେକା ଲାଗେଃତାଇ ଆତେ ଯେ, ମାହାପୁରୁ ବାରେ ଦାର୍ତିଇଁ କ୍ଡ଼ୁପ୍ନି ୱାରୁ ତଲେ ଇ ଦାର୍ତିଇଁ କ୍ଡ଼ୁପ୍ହାଲି ତିରି କିତେସି ।

ମାତ୍ର ନୋହ ମାହାପୁରୁ ତାଣା କାର୍ମା ବେଟାଆତାସି ମାଚେସି । ଏୱାସି ଲାଗେଃତି ଲୋକୁ ନକିତା ର ଦାର୍ମୁ ଲୋକୁ ଲେହେଁ ଜୀୱୁ କାଟ କିହିମାଚେସି । ମାହାପୁରୁ ନୋହଇଁ କ୍ଡ଼ୁପ୍ନି ୱାରୁ ପାଣ୍ଡିନି କାତା ୱେସ୍ତେସି । ଏୱାସି ନୋହଇଁ ର କାଜା ଜାଜା ତିଆର କେପାଲି ୱେସ୍ତେସି ।

୧୪୦ ମିଟର ଲାମ୍ବା, ୨୩ ମିଟର ଓସାରା ଅଡ଼େ ୧୩.୫ ମିଟର ଲାକ ଡଙ୍ଗା ତିଆର୍ କେପାଲି ମାହାପୁରୁ ନୋହଇଁ ଜଲିତେସି । ଏଦାଆଁ ୱେଗୁ ତଲେ କେପାଲି ଅଡ଼େ ତିନି ତାଲା ହାରେକା ଗନ୍ଦି, ର ଛାତ ଅଡ଼େ ର ଜର୍କା ତିଆର୍ କେପାଲି ଏଲେଇଚେସି । ଏ ଜାଜା କ୍ଡ଼ୁପ୍ନି ୱାରୁ ୱାନି ବେଲାତା ନୋହ ଇଲୁତି ଲୋକୁ ଅଡ଼େ ବାରେ ବୁମିତା ଡ଼ଇନି ଜନ୍ତୁଇଁ ଗେଲ୍‌ପିନେ ।

ନୋହ ମାହାପୁରୁତି ହାଡା ମାନଆତେସି । ମାହାପୁରୁ ଏନିକି ଜଲିତେସି, ଏଲେକିଁଏ ନୋହ ଅଡ଼େ ତାନି ତିନି ଜାଣା ମିର୍କା ଜାଜା ତିଆର୍ କେପାମାଚେରି । ଜାଜା ତିଆର୍ କିହାଲି ହାରେକା ବାର୍ଷା ଲାଗିତେ ଏନାଆ ତାକି ଇଚିସାରେ ଇଦି ହାରେକା କାଜାଇ ମାଚେ । ୱାହିନି କ୍ଡ଼ୁପ୍ନି ୱାରୁ କାତାତି ନୋହ ଲୋକୁଣି ଜାଗାର୍ତା କିହିମାଚେସି, ଅଡ଼େ ମାହାପୁରୁ ତାଣା ୱେଣ୍ଡା ୱାହାଲି ୱେସିମାଚେସି, ଅଡ଼େ ଏୱାରି ତାନିକାତାଇଁ ନାମାଃତେରି ।

ମାହାପୁରୁ ନୋହଇଁ ଅଡ଼େ ତାନି ଇଜତି ଲୋକୁଣି ତାମି ତାକି ଅଡ଼େ ଜନ୍ତୁଁତାକି ସାରିଃଏ କାଦି କୁଡ଼ି କିହାଲି ଜଲିତେସି । ଏଚିବେଲା ବାରେ କାମା ରାତେ, ନୋହଇଁ ମାହାପୁରୁ ଜଲିତେସି, ନେଏଁ ନିନୁ, ନି ଡକ୍ରୀ, ନି ମିର୍କା ଅଡ଼େ ତାମି ଡକ୍ରୀସ୍କା ବାରେ ଆଟା ଜାଣା ଡଙ୍ଗା ବିତ୍ରା ହଡାଲି ତାକି ବେଲା ଆତେ ।

ମାହାପୁରୁ ପଶୁ ଅଡ଼େ ପଟାଁ ବାରେ ଜୋଡ଼ୁଇଁ ନୋହତି ଡାଗେ ପାଣ୍ଡିତେସି ଏନିକିକି ଏୱା କ୍ଡ଼ୁପ୍ନି ୱାରୁ ୱାନି ବେଲାତା ଜାଜା ବିତ୍ରା ହାଜାହାଁ ନେହିକି ଡ଼ଇନୁ । ମାହାପୁରୁତି ଦାନା ତାକି ମାହାପୁରୁ ସାତା ଗଟା ପତୁ ଅଡ଼େ ତାଲି ବାରେ ଜନ୍ତୁଇଁ ନୋହତି ଡାଗେ ପାଣ୍ଡିତେସି ଏଚିବେଲା ଏୱା ଜାଜା ବିତ୍ରା ମାଚୁ, ମାହାପୁରୁ ତାନୁଏ ସୁଣ୍ଡିତେସି ।

ଏଦାଆଁ ଜେଚ ହାରେକା ପିୟୁ, ୱାହାଲି ମାଠ୍ହେ । ୪୦ ଦିନା ଅଡ଼େ ୪୦ ଲାଆଁ ଏପେ ପିୟୁ ଆତେ । ଦାର୍ତି ଲାକ ଏୟୁ ବହାଲି ମାଠ୍ହେ । ଦାର୍ତିତି ବାରେ ଲାକ ଇଲେହେଁ ବାରେକିହାଁ ହାରେକା ଲାକ ହରୁ ଜିକେଏ ଏୟୁତା ମୁଞ୍ଜାଲି ମାଠ୍ହେ ।

ଜାଜା ବିତ୍ରା ମାନି ଲୋକୁ ଅଡ଼େ ଜନ୍ତୁଁଇଁ ପିସାଁ ବାରେ ଦାର୍ତି ଲାକ ମାନି ବାରେ ଜୀୱୁମାନି ଗାଟାଇ ଡ଼ୟି ମାଚୁ ହାହା ହାଚୁ । ଜାଜା ଏୟୁ ଲାକ ତାକିତେ ଅଡ଼େ ଜାଜା ବିତ୍ରା ମାଚି ବାରେ ଜାଣାଇଁ ନିଟ୍ହେ ।

ପିୟୁ ପିସ୍ତି ଡାୟୁ, ଜାଜା ଏୟୁ ଲାକ ପାସା ଲେଞ୍ଜୁ ପତେକା ଡ଼ଇତେ, ଅଡ଼େ ଇ ବେଲାତା ଏୟୁ ସିକାଲି ମାଠ୍ହେ । ତାନିଜେଚ ର ଦିନା ଜାଜା ର ହରୁ ଟିପୁତା ଆଟିତେ, ମାତ୍ର ଇ ପାତେକା ଦାର୍ତି ଏୟୁତା ମୁଞ୍ଜାଁଏ ମାଚେ ଅଡ଼େ ତିନି ଲେଞ୍ଜୁ ଡାୟୁ, ହର୍କାଁତି ଟିପୁ ଟିପୁ ଚଞ୍ଜା ଆତେ ।

ଅଡ଼େ ୪୦ ଦିନା ଡାୟୁ ଏୟୁ ସିକାନେ କି ଆଏ ମେସାଲି ତାକି ନୋହ ର ପଟା କାଃୱାଇଁ ପାଂଗାତା ପାଣ୍ଡିତେସି । କାଃୱା ୱାଇତି ଟାୟୁ ପାରାଲି ୱେଣ୍ଡା ହାଚେ ଇତାଲା ଆତାଲା ଉମ୍ବି ରେତେ, ମାତ୍ର ଏମ୍ନି ଟାୟୁ ବେଟା ଆଆତେ ।

ଡାୟୁ ନୋହ ଅର ର ପଟା କୁଗୁରିଇଁ ପଂଗାତା ପାଣ୍ଡିତେସି । ମାତ୍ର ଏଦି ଜିକେ ଏ ଏନି ୱାଇତି ଟାୟୁ ବେଟା ଆଆତେ, ଏଦାଆଁ ତାକି ନୋହତି ଡାଗେ ୱେଣ୍ଡା ୱାତେ । ର ହାଟା ଡାୟୁ ନୋହ ୱେଣ୍ଡେଏ କୁଗୁରିଇଁ ପଂଗାତା ପାଣ୍ଡିତେସି ଅଡ଼େ ଏଦି ଜିତ ମାର୍ଣ୍ନୁତି କିଲା ଆସାହାଁ ୱେଣ୍ଡିତେ । ଏୟୁ ରଚେକା ରଚେକା ସିକା ହାଚେ ଅଡ଼େ ମାର୍ନୁ ୱେଣ୍ଡେଏ ଗାଲ୍ହାଲି ମାଠ୍ହୁ ।

ନୋହ ଅଡ଼େ ର ହାଟା କାତି ଡାୟୁ କୁଗୁରିଇଁ ତିନି ଦେବା ପାଂଗାତା ପାଣ୍ଡିତେସି । ଇବେଲା ଏଦି ଜମିନି ଟାୟୁ ବେଟା ଆତେ ଅଡ଼େ ୱେଣ୍ଡା ୱାଆତେଦେହେଁ । ଏୟୁ ସିକାଲି ମାଠ୍ହେ ।

ରି ଲେଞ୍ଜୁ ଜେଚ ନୋହଇଁ ମାହାପୁରୁ ଜଲିତେସି, ମି ଇଜତି ଲୋକୁ ଅଡ଼େ ବାରେ ଜନ୍ତୁଁ ଅଡ଼େ ମିରୁ ଜାଜାଟି ହଚାଲି ଆଡିଦେରି । ହାରେକା ମିର୍କା ଅଡ଼େ ନାତିପୁତି ଜାର୍ନା କିହାଁ ଦାର୍ତିଇଁ ଏପା କିଦୁ । ଏମ୍ବାଟିଏ, ନୋହ ଅଡ଼େ ତାମି ଇଜତି ଲୋକୁ ଜାଜାଟିଏ ହଚାୱାତୁ ।

ନୋହ ଜାଜାଟି ପଂଗାତା ୱାହାଲିଏ, ଏୱାସି ର ବେରମାଣ୍ଡା ତିଆର୍ କିତେସି ଅଡ଼େ ଜନ୍ତୁଣୀ ଅହାଁ ପୁଜା ହିନାଇମାନେ, ହାରେକା ରଲେଃତାଇ ଜନ୍ତୁଣୀ ଅହାଁ ପୁଜା ହିତେସି ମାହାପୁରୁ ପୁଜାତା ରାହାଁ ମାଚେସି । ନୋହ ଅଡ଼େ ତାନି ଇଜତି ଲୋକୁଣି ବର ହିତେସି ।

ମାହାପୁରୁ ଜଲିତେସି,”ନାନୁ କାତା ଇଟିଞ୍ଜାଇଁ ଲୋକୁତାକି ବୁମିଇଁ ବାକା ଏଚେଲା ଜିକେଏ ଇଟଅଁ ଅଡ଼େ ଲୋକୁ ତାମି ଜାର୍ନାଟିଏ ପାପୁଗାଟାରି ଆତିଁ ଜିକେଏ ନାନୁ ଦାର୍ତିଇଁ ୱେଣ୍ଡେଏ କ୍ଡ଼ୁପ୍ନି ୱାରୁତଲେ କ୍ଡ଼ୁପ୍ଅଁ ।

କାତା ଇଟିତି ର ଚିନ୍ନା ଲେହେଁ ମାହାପୁରୁ ନକେଏ ହାଗୁ ଗାଡ଼ି କିତେସି । ବାରେ ପାଲି ହାଗୁତା ଏଚେତା ଇନ୍ଦ୍ର ଧନୁ ଚଞ୍ଜା ଆନେ, ମାହାପୁରୁ ତାନି ଇଟିତି କାତାଇଁ ଅଣପିନେସି, ଇଲେହେଁ ଲୋକୁ ଜିକେଏ କିନେରି ।