28. ବାତ୍କୁ ଦାଂଣେଃସି ତାକିକିନାସି

ର ଦିନା, ର ବାତ୍କୁ ଦାଂଣେଃ ଗାଟାସି ଯୀଶୁ ତାଣା ୱାତସି ଅଡ଼େ ୱେଚେସି “ନେହିଁ ଗୁରୁ, କାଲାକାଲାତି ଜୀୱୁ ତାକି ଏନାଆଁ କିଇଁ ?” ଯୀଶୁ ତାଂଗେ ଏଲେଇଚେସି”ନାଂଗେ ଏନାଃତାକି ନେହାସି ଇଞ୍ଜି ମାଞ୍ଜାଦି ?” ରଅସିଏ ନେହାସି ମାନେସି ଅଡ଼େ ଏୱାସି ଆହିମାନେସି ମାହାପୁରୁ । ମାତ୍ର ନିନୁ କାଲାକାଲାତି ଜୀୱୁ(ହାଃଆ ଗାଟି ଜୀୱୁ) ବେଟା ଆହାଲି ତାକି ଅଣପିମାଞ୍ଜି ଆତିସାରେ ମାହାପୁରୁତି ବାରେ ପାଣ୍ଇମେରା ନାମାମୁ ।”

ଏୱାସି ୱେଚେସି “ଏମିନି ଏମିନି ବୋଲୁଇଁ ନାନୁ ନାମିନାଇ ମାନେ ?” ଯୀଶୁ ଉତ୍ତର ହିତେସି “ନରଇଁ ପାୟାଃନି । ଦାରି କିଃଆନି । ଶୋରୁ କିଃଆନି । ମିଚି କାତା ଜଲାଃନି । ମି ଆବା ଅଡ଼େ ଆୟାଇଁ କାତା ନାମାଦୁ, ଅଡ଼େ ମି ଇଲୁ ଗାଟାତାରାଇଁ ଜାହାରା ଜୀୱୁ ଲେହେଁ ଜୀୱୁ ନମୁ ।”

ମାତ୍ର ଏ ଦାଂଣେଃସି ତାଂଗେ ଜଲିତେସି “ନାନୁ ଇ ବାରେ ଉଣାୱେଡ଼ାଟିଏ ନାମା ୱାହିମାଇଁ । ହାଃଆ ଗାଟି ଜୀୱୁ ବେଟା ଆହାଲି ତାକି ନାଂଗେ ଅଡ଼େ ଏନାଆଁ କିହାଲି ଲାଗିନେ ?” ଯୀଶୁ ତାନିୱାକି ସିନି କିହାଁ ତାଙ୍ଗେ ଜୀୱୁ ନତେସି ।

ଯୀଶୁ ଏଲେଇଚେସି “ନିନୁ ନେହାତି ଆହାଲି ଅଣପିମାଚିସାରେ, ଆତିସାରେ ହାଲାମୁ ଅଡ଼େ ନି ବାରେ ପାର୍ମୁ ଅଡ଼େ ହିଲାଃଗାଟାରିଇଁ ଦନ ଦାନା ହିମୁ, ଅଡ଼େ ନିନୁ ଲାକପୁରୁତା ଦନ ବେଟା ଆଦି । ଏଦାଆଁଜେଚ ୱାହାଁ ନା ଜେଚ ତାକାମୁ ।“

ଯୀଶୁ ଜଲାମାନି କାତାଇଁ ଦାଂଣେଃସି ଏଚିବେଲା ୱେଚେସି, ଏୱାସି ହାରେକା ଦୁକୁ ଆତେସି, ଏନାଆଁତାକି ଇଚିସାରେ ଏୱାସି ହାରେକା ବାତ୍କୁଗାଟାସି ମାଚେସି ଅଡ଼େ ଏୱାସି ଅର୍ଜ ଆହାନି ବାରେଇଁ ପିସାଲିତାକି ଇଚା କିଃଆତେସି । ଏୱାସି ମୁମ୍ବୁଇଁ ୱେଠ୍ହାଁ ଯୀଶୁ ତାଣାଟି ହାତୁସ୍ତେସି ।

ଏଦାଆଁ ଜେଚ ଯୀଶୁ ତାନି ଶିଷ୍ୟଁଣୀ ଏଲେଇଚେସି “ବାତ୍କୁ ଗାଟାରି ମାହାପୁରୁତି ରାଜିତା ହାଜାଲିତାକି ହାରେକା କଷ୍ଟ ମାନେ!ହଁ, ବାତ୍କୁଗାଟି ଲୋକୁ ଲାକପୁରୁ ହଡିନି ବାଟା ସୁଜା ତି କାଣିଟି ଉଁଟୁ ହଡ଼୍ନାଇ ସହଜ ।”

ଯୀଶୁ ଜଲାମାନି କାତାଇଁ ଏଚିବେଲା ଶିଷ୍ୟୟାଁ ୱେଚେରି ଏୱାରି କାବା ଆହାଁ ୱେଚେରି “ଆତିସାରେ ଅମ୍ବାଃସି ଗେଲ୍ପି ଆନେସି ?”

ଯୀଶୁ ଶିଷ୍ୟୟାଁ ୱାକି ମେସାହାଁ ଜଲିତେସି “ମାଣ୍ସିତି ମେସ୍ପୁ ଇଦି ଆହାଲି ଆଡେ ଏ, ମାତ୍ର ମାହାପୁରୁତି ମେସ୍ପୁତା ବାରେ କାତା ଆହାଲି ଆଡିନେ ।”

ପିତର ଯୀଶୁଇଁ ଏଲେଇଚେସି “ମାମ୍ବୁ ବାରେ ପିସାହାଁ ନି ଜେଚ ୱାହାମାନମି । ମା ତାକି ଏନି ପୁରଷ୍କାର ମାନେ ?”

ଯୀଶୁ ଏଲେଇଚେସି “ଏମିନିଗାଟି ଲୋକୁ ନାତାକି ଇଲୁ,ତାଇ, ତାଂଗି, ଆୟା, ଆବା, ମିର୍କା, ମାସ୍କା ଅଡ଼େ ସମ୍ପତି ପିହ୍ନେରି ଅଡ଼େ ତାନି ୧୦୦ ଗୁଣୁ ଇ ଦାର୍ତିତା ଅଡ଼େ ହାଃଆ ଗାଟି ଜୀୱୁ ବେଟା ଆନେରି । ମାତ୍ର ନକେଏ ମାନାରି ହାରେକା ଡାୟୁ ଡ଼ଇନେରି ଅଡ଼େ ଡାୟୁ ମାନାରି ହାରେକା ନକେଏ ଆନେରି ।”