30. ଯୀଶୁ ପାଶା ହାଜାର୍ ଲୋକୁଣି ତିହ୍ନେସି

ହାରେକା ର ର ନାଟାତା ପର୍ଚାର୍ କିହାଲିତାକି ଅଡ଼େ ଜାପ୍ହାଲିତାକି ଯୀଶୁ ତାନି ଶିଷ୍ୟଁଣୀ ପାଣ୍ଡିତେସି । ଯୀଶୁ ଏମିନିତାଣା ମାଚେସି ଏମ୍ବାଆଁ ଏୱାରି ଏଚିବେଲା ୱେଣ୍ଦିତେରି ଏନା ଏନାଆଁ ଆତେ ଏଦାଣୀ ଏୱାରି ତାଂଗେ ୱେସ୍ତେରି । ଏଦାଆଁ ଜେଚ ଯୀଶୁ କାଡାତି ଅରୱାକି ମାନି ର ହିତିଡି ଟାୟୁତା ହାଜାଲି ତାକି ହାଟିତେସି । ଏଦାଆଁ ତାକି ଏୱାରି ର ଡଂଗାତା କୁଗିତେରି ଅଡ଼େ କାଡା ଆତାଲା ହାଚେରି ।

ମାତ୍ର ଏ ଟାୟୁତା ହାରେକା ଲୋକୁ ମାଚାକି ଯୀଶୁ ଅଡ଼େ ତାନି ଶିଷ୍ୟୟାଁ ଡଂଗାଇଁ ପିସାହାଁ ହାଚେରି । ଇ ଲୋକୁ ତାମି ଡାଗେ ହାଜାଲିତାକି ନକେଏ କାଡା ଗାଟାତା ହଟେରି । ଏଦାଆଁ ତାକି ଯୀଶୁ ଅଡ଼େ ତାନି ଶିଷ୍ୟୟାଁ ଏଚେବେଲା ଏତେରି, ହାରେକା କାଜା ଲୋକୁମାନ୍ଦା କାଡାତି ଆତାଲା ତାଂଗେ କାଚି ମାଚେରି ।

ଏୱାରି ୫୦୦୦ ଆବାଟିଁ ମାଚେରି, ଆୟାଟିଁସ୍କା ଅଡ଼େ କକାରିଁପଦାଁ ଏଜି କିୱି ଆହାଲାଃତେ । ଯୀଶୁ ଇ ଲୋକୁତି ବାରେ ହାରେକା କାର୍ମା ମେସ୍ତେସି । ଯୀଶୁଇଲୋକୁ ବାରେ ଗଡ଼୍କା ହିଲାଃତି ଲେହେଁ ମାଚେରି । ଏଦାଆଁ ତାକି ଏୱାସି ତାମ୍ଗେ ଜାପ୍ହେସି ଅଡ଼େ ତାମି ବିତ୍ରା ଏମିନିଗାଟାରି ରୋଗ ମାଚେରି ଏୱାରାଇଁ ନେହି କିତେସି ।

ୱେଡ଼ା ହାନିବେଲା, ଶିଷ୍ୟୟାଁ ଯୀଶୁଇଁ ଏଲେଇଚେରି “ୱେଡ଼ା ଗାଡି ଆହା ହାଚେଇ ଏ ଅଡ଼େ ଡାଗେ ଏନି ଗାଡ଼ା ହିଲେଏ । ଲୋକୁଣି ପାଣ୍ଡାତୁହ୍ମୁ ଏନିକିକି ଏୱାରି ଏନାଆପାଟେ ବେଟା ଆନେରି ।”

ମାତ୍ର ଯୀଶୁ ଶିଷ୍ୟଁଣୀ ଏଲେଇଚେସି “ମିରୁ ଏୱାରାଇଁ ଚିଞ୍ଜାଲି ହିଦୁ !” ଏୱାରି ଏଲେଇଚେରି “ମାମ୍ବୁ ଏଦାଆଁ ଏନିକି କିହାଲି ଆଡିନମି ? ମା ଡାଗେ ୱାର୍ଇ ପାଶା ଗଟା ରୁଟି ଅଡ଼େ ରିଣ୍ଡି ମିଣ୍‌କା ମାନୁ ।”

ଯୀଶୁ ତାନି ଶିଷ୍ୟଁଣୀ ଏଲେଇଚେସି ଲୋକୁଣି ଏଲେ ଇଞ୍ଜୁ ଜାଡ଼ା ଲାକ ପଚାଶ ପଚାଶ ଦଲ ଆହାଁ କୁଗାଦୁ ।

ଏଦାଆଁଜେଚ ଯୀଶୁ ଏ ପାଶା ଗଟା ରୁଟି ଅଡ଼େ ରିଣ୍ଡି ମିଣ୍‌କାଇଁ ଅହାଁ ହାଗୁୱାକି ମେସାହାଁ, ଅଡ଼େ ଏ କାଦି ତାକି ମାହାପୁରୁ ତାଣା ଧନ୍ୟବାଦ ହିତେସି ।

ଏଦାଆଁ ଜେଚ ଯୀଶୁ ରୁଟି ଅଡ଼େ ଏ ମିଣ୍‌କାଇଁ ରି କାଣ୍ଡା କିହାଁ ଡିକ୍ହେସି । ଏୱାସି ଏ କାଣ୍ଡାଁଣୀ ଲୋକୁଣି ହିହାଲି ତାନି ଶିଷ୍ୟଁଣୀ ହିତେସି । ଶିଷ୍ୟଁୟାଁ ଏ କାଦିଇଁ ବାଟି କିହାଲି ମାଠ୍ହେରି, ଅଡ଼େ ଏଦି ରାଃଆତେ ଦେହେଁ । ବାରେ ଲୋକୁ ଚିଞ୍ଜାହାଁ ପାଞ୍ଜା ହାଚେରି ।

ଏଦାଆଁ ଜେଚ, ଶିଷ୍ୟୟାଁ ଲୋକୁତି କାଦିଟି ହାରାମାନି କାଣ୍ଡାଁଇଁ କୁଡ଼ି କିତେରି ଅଡ଼େ ବାର ଗଟା ଡାଲିତା କୁଡ଼ି କିତେରି । ବାରେ କାଦି ୱାର୍ଇ ପାଶା ଗଟା ରୁଟି ଅଡ଼େ ରିଣ୍ଡି ମିଣ୍କାଟି ହଚା ମାଚେ ।