31. ଯୀଶୁ ଏୟୁ ଲାକ ତାକିନେସି

ଏଦାଆଁ ଜେଚ ଯୀଶୁ ତାନି ଶିଷ୍ୟଁଣୀ ଡଂଗାତା ହଚାହାଁ ଡଂଗାଇଁ ଚାଲ କିହିଁ କାଡା ଆତାଲା ହାଜାଲି ତାକି ଏଲେଇଚେସି ଏଚିବେଲା ଏୱାସି ଲୋକୁଣି ପାଣ୍ଡିତେସି । ଯୀଶୁ ଲୋକୁଣି ପାଣ୍ଡିତି ଜେଚ, ଏୱାସି ପାର୍ତନା କିହାଲି ତାକି ଡାଗେ ମାନି ର ହରୁ ଲାକ ହାଚେସି । ଯୀଶୁ ଏମ୍ବାଆଁ ରଅସିଏ ମାଚେସି, ଅଡ଼େ ଏୱାସି ଲାଆଁ ୱେଇନି ପାତେକା ଏମ୍ବାଆଁ ପାର୍ତନା କିହାଲି ମାଠ୍ହେସି ।

ଇବିତ୍ରା, ଶିଷ୍ୟଁୟାଁ ତାମି ଡଙ୍ଗାତା ୱେଣ୍ଡି ମାଚେରି, ମାତ୍ର ଲାଆଁ ଏୱାରି କୁଢ଼୍ହାହାଚି କାଡା ମାଦିତା ଆହାମାଚେରି । ଏୱାରି ବାଡ଼େଃଟିଏ ଡଙ୍ଗା ଚାଲ କିହି ମାଚେରି ଏନାଆତାକି ଇଚିସାରେ ପିୟୁ ଗାଲି ତାମି ୱାକି ୱାହିମାଚେ ।

ଏଦାଆଁ ଜେଚ ପାର୍ତନା କିନାଇ ରାଫ୍ହେସି ଅଡ଼େ ଶିଷ୍ୟଁ ଡାଗେ ହାଚେସି । ଏୱାସି କାଡାତି ଏୟୁ ଲାକ ତାମି ଡଙ୍ଗା ୱାକି ତାକି ତାକିହିଁ ହାଚେସି ।

ଏୱାରି ଏଚିବେଲା ଯୀଶୁଇଁ ମେସ୍ତେରି ଏଚିବେଲା ଶିଷ୍ୟୟାଁ ଆଜା ହାଜାମାଚେରି, ଏନାଆତାକି ଇଚିସାରେ ଏୱାରି ଡୁମ୍ବା ମେସିନମି ଇଞ୍ଜି ଅଣପିତେରି । ଯୀଶୁ ପୁଚେସି ଯେ ଏୱାରି ଆଜାମାନେରି, ଏଦାଆଁ ତାକି ଏୱାସି ତାମ୍ଗେ ହାଟାହାଁ ଏଲେଇଚେସି “ଆଜାଃଦୁ । ଇୱାତେଏଁ ନାନୁ !”

ଏଦାଆଁ ଜେଚ ପିତର ଯୀଶୁଇଁ ଏଲେଇଚେସି, “ଗୁରୁ, ନିନୁ ଏୱାତି ଇଚିସାରେ, ଏୟୁ ଲାକ ତାକାଲି ତାକି ନାଙ୍ଗେ ହୁକୁମ୍ ହିୟାମୁ ।” ଯୀଶୁ ପିତରଇଁ ଏଲେଇଚେସି “ୱାମୁ”!

ଏଦାଆଁ ତାକି ପିତର ଡଙ୍ଗାଟିଏ ପାଙ୍ଗାତା ୱାହାଁ ଯୀଶୁ ତାଣା ଏୟୁ ଲାକ ତାକାଲି ମାଠ୍ହେସି ।ମାତ୍ର ସାଣେକା ହେକ ତାକିତି ଜେଚ,ଏୱାସି ଯୀଶୁଟିଏ କାନୁ ୱେଠ୍ହା ଅତେସି ଅଡ଼େ ଏୟୁ ମେସାଲି ମାଠ୍ହେସି ଅଡ଼େ ଏୱାସି ହାରେକା ଗାଲି ୱାନାଣୀ ପୁଞ୍ଜା କଡିତେସି ।

ଏଦାଆଁତାକି ପିତର ଆଜା ହାଚେସି ଅଡ଼େ ସାମଦୁର୍‌ତା ମୁଞ୍ଜାଲି ମାଠ୍ହେସି । ଏୱାସି କାଲ ଆତେସି “ଗୁରୁ, ନାଙ୍ଗେ ଗେଲ୍ପାମୁ!” ଯୀଶୁ ରେଟୁଲିଏ ହାଜାହାଁ ତାଂଗେ ଆସ୍ତୁସ୍ତେସି । ଏଦାଆଁ ଜେଚ ଏୱାସି ପିତରଇଁ ଏଲେଇଚେସି “ହେ ଉଣା ନାମୁଗାଟାତି, ନିନୁ ଏନାଆତାକି କିଲିବିଲି ଆତି ?”

ଏଚେବେଲା ପିତର ଅଡ଼େ ଯୀଶୁ ଡଙ୍ଗା ବିତ୍ରା ହାଚେରି, ଏଚିବେଲା ଗାଲି ରେଟୁଲିଏ ତିରି ଆତେ ଅଡ଼େ ଏୟୁ ତାମ୍ବୀତେ । ଶିଷ୍ୟୟାଁ କାବା ଆହା ହାଜାମାଚେରି । ଏୱାରି ଯୀଶୁଇଁ ଗାଉରମି କିହିଁ ଏଲେଇଚେରି “ ସାତା, ନିନୁ ମାହାପୁରୁତି ମିର୍ଏତି ।”