33. କୃଷକତି ପୁସ୍ପନି

ର ଦିନା, ଯୀଶୁ କାଡା ଗାଟାତା ର ମାନ୍ଦାଲୋକୁଇଁ ଜାପ୍ହି ମାଚେସି । ହାରେକା ଲୋକୁ ୱେଞ୍ଜାଲି ତାକି ଯୀଶୁ ଡାଗେ ୱାତେରି ଅଡ଼େ ଲୋକୁଣି ଏନି ଟାୟୁତା ଏନିକି ଜାପ୍ହାଲି ଆଡିନେସି ଏଦାଆଁ ତାକି ଏୱାସି ଗାଟାତା ର ଡଂଗା ଲାକ କୁଗିତେସି । ଏୱାସି ଡଂଗାତା ଅଡ଼େ ଲୋକୁଣିଏ ଜାପ୍‌ହେସି ।

ଯୀଶୁ ର ପୁସ୍ପନି ଏଲେ ଇଚେସି । “ର କୃଷକ ରଚାଣି ବିଚା ମାଟାଲି ତାକି ହତେସି । ଏୱାସି ଏଚିବେଲା କେୟୁତା ବିଚାଇଁ ମାଟାଲି ମାଠ୍ହେସି, କଚେକା ବିଚା ଜିରୁତା ତର୍ଗିତେ, ଅଡ଼େ ପଟାୟାଁ ୱାହାଁ ଏ ବିଚାଇଁ ତିନ୍ତୁସ୍ତୁ ।”

“ଏଟ୍କା ବିଚା କରଡ଼ା ବୁମିତା ତର୍ଗିତେ, ଏମିନି ତାଣା ରଚାଇଁ ବୁମି ମାଚେ । କରଡ଼ା ବୁମିତା ମାନି ବିଚା ଜିକି ଗଜା ଆତେ, ମାତ୍ର ଏୱା ହିର୍କା ବୁମିତା ହଡାଲି ଆଡାଃତୁ । ଏଚିବେଲା ୱେଡ଼ା ୱାତେ ଅଡ଼େ କାରା ଆତେ, ଗଚାଁ ମୁଚା ହାଚୁ ଅଡ଼େ ହାହା ହାଚୁ ।”

“ଆତିହିଁ ଜିକେଏ ବିଚା ହାପ୍କାବୁଟାଁ ବିତ୍ରା ତର୍ଗିତେ । ଇ ବାରେ ବିଚା ଗଜା ଆହାଲି ମାଠ୍ହୁ, ମାତ୍ର ହାପ୍କାୟାଁ ଏୱାଆଁ ନାବ୍ଗା ତୁସ୍ତୁ । ଏଦାଆଁତାକି ହାପ୍କା ଗଚାଁ ବିତ୍ରା ମାନି ଗଚାୟାଁ ଏମିନି ଗାଟାଇ ବିଚାଟି କାଜାଇ ଆହାମାଚୁ, ଏନାଇ ଜିକେଏ ଆଆତୁ ।”

“ଏଟ୍କା ବିଚାୟାଁ ନେହି ବୁମିତା ତର୍ଗିତୁ । ଯେତେ ବିଚା ମାଟ୍ୱି ଆହା ମାଚେ, ଏ ବାରେ ବିଚା କାଜାଇ ଆହାଁ ୩୦,୬୦ ଅଡ଼େ ଇଲେହେଁକି ୧୦୦ ଗୁଣୁ ପାତେକା ପାଡ଼େଇ ଆତେ । ଆମ୍ବାଃର୍ ୱାଇ କ୍ରୀଉଁ ମାନେ, ଏୱାତେରି ୱେଞ୍ଜୁ !”

ଇ ପୁସ୍ପନି ଶିଷ୍ୟଣୀଁ ବିଲ୍‌କି କିହାସ୍ତେ । ଏଦାଆଁ ତାକି ଯୀଶୁ ତେଲ୍‌ପି କିହାଁ ଜଲିତେସି,”ବିଚା ଆହିମାନେ ମାହାପୁରୁତି ବୋଲୁ । ଜିରୁ ଆହିମାନେ ଏ ଲୋକୁ ଏମିନି ଗାଟାରି ମାହାପୁରୁତି ବୋଲୁଇଁ ୱେନେରି, ମାତ୍ର ଏଦାଆଁ ତେଲ୍‌ହାଲି ଆଡଃରି, ଅଡ଼େ ଶୟତାନ ତାମି ତାଣାଟି ବୋଲୁ ଶରୁ କିହାଁ ଅନେ ।”

“କରଡ଼ା ବୁମି ଆହିମାନେ ଏ ଲୋକୁ ଏମିନିଗାଟାରି ମାହାପୁରୁତି ବୋଲୁ ୱେନେରି ଅଡ଼େ ରାହାଁ ତଲେ ହିୟାଁତା ଇଟିନେରି । ଏଚିବେଲା ଏୱାରି କଷ୍ଟ ଅଡ଼େ ତାଡ଼ନା ବେଟା ଆନେରି, ଏୱାରି ତର୍ଗାହାନେରି ।”

“ହାପ୍କା ବୁମି ଆହିମାନେ ଏ ଲୋକୁ ଏମିନି ଗାଟାରି ବୋଲୁ ୱେନେରି, ମାତ୍ର ଏଚିବେଲା ବେଲା ୱାନେ, ସେବା କିନାଇ, ଦନ ଅଡ଼େ ଜୀୱୁତା ସୁକୁ ଅଡ଼େ ବ୍ଡ଼ାୟୁ ମାହାପୁରୁ ତଲେ ମାନି ଜୀୱୁ ନନାଣୀଇଁ ନାବ୍‌ଗା ଇଟିନେ ।“ ଡାୟୁ, ଏୱାରି ଏନାଆଁ ୱେଞ୍ଜାମାଚେରି ଏଦୀ ପାଡ଼େଇ ହିହାଲି ଆଡେଏ ।”

“ମାତ୍ର ନେହି ବୁମି ଆହିମାନେ ଏ ଲୋକୁ ଏମିନି ଗାଟାରି ମାହାପୁରୁତି ବୋଲୁ ୱେନେରି ,ନାମିନେସି ଅଡ଼େ ପାଡ଼େଇ ହିନେରି ।”