34. ଯୀଶୁ ଏଟ୍କା ପୁସ୍ପନି ତଲେ ଜାପ୍‌ନେସି

ମାହାପୁରୁ ରାଜି କାତାତି ଯୀଶୁ ଅଡ଼େ ହାରେକା ପୁସ୍ପନି ୱେସ୍ତେସି । ଉଦାହରଣ ତଲେ, ଏଲେଇଚେସି “ଲାକପୁରୁ ଆହିମାନେ ର ହାର୍ସୁ ପାଡ଼େଇ ବିଚା ଲେହେଁ ଏମିନାଣୀ ରଅସି ତାନି ବାଡ଼ାତା ମାଟିତେସି । ମିରୁ ପୁଞ୍ଜାମାଞ୍ଜେରି ଯେ ହାର୍ସୁ ପାଡ଼େଇ ବାରେ ପାଡ଼େଇଟିଏ ଇଚାଇ ।”

“ମାତ୍ର ଏଚିବେଲା ହାର୍ସୁ ପାଡ଼େଇ ମାଟ୍ୱିଆନେ, ଇଦି ବାରେ ଗଚାଁଟିଏ ଇଚେକା କାଜାଇ ଆନେ ଯେ ପଟାୟାଁ ୱାହାଁ ତାନି ଗମାତା ବାସା କିନୁ ।”

ଯୀଶୁ ଅଡ଼େ ର ପୁସ୍ପନି ୱେସ୍ତେସି “ମାହାପୁରୁ ରାଜି ର ଖମିର ଲେହେଁ ଏମିନି ଗାଟାଇ ଆୟାଟି ଆହାଁ ମଇଦାତି ବାରେ ୱାକି ଆନି ପାତେକା ରଚାଇ ମଇଦାତା ଆଣ୍ଡିନେ ।”

“ମାହାପୁରୁ ରାଜି ଅଡ଼େ ଜିକେଏ ଡ଼ୁକ୍ହାମାନି ଦନ ଲେହେଁ ଏନିକି ରଅସି ଅହାଁ ର ବାଡ଼ାତା ଡ଼ୁକ୍ହା ଇଟିତେସି ଅ ରଅସି ଏ ଡ଼ୁକ୍ହାମାନି ଦନଇଁ ବେଟା ଆତେସି ଅଡ଼େ ୱେଣ୍ଡେଏ ମୁସ୍ତେସି ଡ଼ୁକ୍ହାମାନି ଦନ ଏୱାସି ରାହାଁ ତଲେ ଏ ବାରେ ଦିଣ୍ଶୁଇଁ ପାର୍ତେସି ଅଡ଼େ ଏ ବାଡ଼ାଇଁ କଡାଲି ତାକି ଏ ଡାବୁଁଇଁ ଲେମ୍ବିତେସି ।”

“ମାହାପୁରୁ ରାଜି ର ଦାରାଗାଟି ମଣି ଲେହେଁ । ଏଚିବେଲା ର ମଣି ପାର୍ନାସି ଇଦାଣୀ ମେସ୍ତେସି, ଏୱାସି ହାଜାହାଁ ତାନି ବାରେ ପାର୍ଚାହାଁ ଇଦାଣୀଁ କଡାଲି ତାକି ଡାବୁଁଇଁ ଲେମ୍ବିତେସି ।”

ଏଦାଆଁ ଜେଚ ଯୀଶୁ ଲୋକୁଣି, ତାମି ନେହି କାମା ତାକି ନାମୁ ଇଟାହାଁ ଏଟ୍କା ଲୋକୁଣି ଅପିଲାଃତି କାତା ର ପୁସ୍ପନି ୱେସ୍ତେସି । ଏୱାସି ଏଲେଇଚେସି “ରି ଜାଣା ଲୋକୁ ପାର୍ତନା କିହାଲିତାକି ମନ୍ଦିରତା ହାଚେରି । ତାମି ବିତ୍ରା ର କରଗ୍ରାହୀ ଅଡ଼େ ଅ ରଅସି ଦାର୍ମୁ ଗୁରୁ ।”

“ଏ ଦାର୍ମୁ ଗୁରୁ ଇଲେହେଁ ପ୍ରାତନା କିତେସି “ହେ ମାହାପୁରୁ ନାନୁ ନିଂଗ ଧନ୍ୟବାଦ ହିହି ମାଞ୍ଜାଇଁ ଅଡ଼େ ଏଟ୍କା ଲୋକୁ ଲେହେଁ ନାନୁ ପାପୀ ଆଃଏ, ଏନିକି କି ର ଡାକୁ, ଲାଗେଃତାରି,ଦାରୀ ଅଡ଼େ ଇ କରଗ୍ରାହି ଲେହେଁ ଜିକେଏ ଆଃଏ ।”

“ଉଦାହରଣ ଲେହେଁ, ନାନୁ ହାଟାତାକି ରି ଦେବା ଉପବାସ କିଇଁ ଅଡ଼େ ବେଟା ଆହିମାନି ଡାବୁଁ ଅଡ଼େ ଜିନିଷତି ବାରେ ଦଶ ବାଗା ହିହି ମାଇଁ ।”

“ମାତ୍ର କରଗ୍ରାହୀ ଗୁରୁଟିଏ ହାରେକା ହେକ ନିତେସି, ଅଡ଼େ ଲାକାପୁରୁୱାକି ସିନି କିହାଲି ଜିକେଏ ଶାସା କିଃଆତେସି । ଅଡ଼େ ଏୱାସି ତାନି ବକତା କେୟୁତଲେ ବିଦା ୱେଚା କଡିତେସି, ଅଡ଼େ ପ୍ରାତନା କିତେସି,” ହେ ମାହାପୁରୁ, କାର୍ମା ମେସାହାଁ ନା ୱାକି କାର୍ମା ଆମୁ, ଏନାଆତାକି ଇଚିସାରେ ନାନୁ ର ପାପୀ ମାଣ୍ସି ତେଏଁ ।”

ଆତିସାରେ ଯୀଶୁ ଏଲେଇଚେସି, ”ନାନୁ ନିଂଗେ ସାତା ଜଲିମାଂଜାଇଁ, ମାହାପୁରୁ କରଗ୍ରାହୀତି ପ୍ରାତନା ୱେଚେସି ଅଡ଼େ ତାନି ଦାର୍ମୁ ଏଜି କିତେସି । ମାତ୍ର ଏୱାସି ଦାର୍ମୁ ଗୁରୁତି ପ୍ରାତନା ୱେନାଃତେସି । ଏମିନିଗାଟାସି ଯାହାରାଇଁ କାଜାସି ତସା କଡିନେସି, ମାହାପୁରୁ ତାଂଗେ ଉଣା କିନେସି, ଅଡ଼େ ଏମିନିଗାଟାରି ଯାହାରାଇଁ ଉଣା କିନେରି ମାହାପୁରୁ ତାଙ୍ଗେ କାଜାସି କିନେସି ।