36. ବାଦ୍ଲି ଆନାଇ

ର ଦିନା, ଯୀଶୁ ତାନି ଶିଷ୍ୟଁ ବିତ୍ରା ତିନି ଜାଣା ପିତର, ଯାକୁବ ଅଡ଼େ ଯୋହନଇଁ ତାନି ତଲେ ଅତେସି । (ଯୋହନ ଦରୁ ଗାଟାସି ଯୀଶୁତି ଶିଷ୍ୟ ଅଡ଼େ ଯୀଶୁଇଁ ଡୁବନ ହିହାମାନି ଯୋହନ ରଅସିଏ ଆଏ ।) ଏୱାରି ତାମ୍ବୁ ପ୍ରାତନା କିହାଲି ତାକି ର ହାରେକା କାଜା ହରୁତା ହାଚେରି ।

ଯୀଶୁ ଏଚିବେଲା ପ୍ରାତନା କିହି ମାଚେସି, ତାନି ମୁମ୍ବୁ ୱେଡ଼ାଲେହେଁ ଉଜେଡ଼ି ଆତେ ଅଡ଼େ ତାନି ହେମ୍ବରୀ ଉଜେଡ଼ି ଲେହେଁ ଦବ୍ଲା ଚଞ୍ଜା ଆତେ, ଏମିନାରି ଦାର୍ତିତା ମାନି ଏମିନି ଲୋକୁ ଜିକେଏ କିହାଲି ଆଡଃରି ।

ଏଦାଆଁ ଜେଚ ମୋଶା ଅଡ଼େ ଏଲୀୟ ଚଞ୍ଜା ଆତେରି । ଇ ରିଃଆରି ଇ ଘଟଣାତି ଶହେ ଶହେ ବାର୍ଷା ନକେଏ ପୁର୍ତିତା ମାଚେରି । ଏୱାରି ଯୀଶୁ ତଲେ ତାନି ହାକି କାତା କାତା ଆହି ମାଚେରି, ଏମିନିଗାଟାଇ ଯିରୁଶାଲମତା ହାରେକା ଜିକି ଘଟ ଆହାଲି ହାଜି ମାଚେ ।

ଏଚିବେଲା ମୋଶା ଅଡ଼େ ଏଲୀୟ ଯୀଶୁ ତଲେ କାତା ଆହି ମାଚେରି, ପିତର ଯୀଶୁଲଁ ଏଲେଇଚେସି,” ମାମ୍ବୁ ଯେ ଇମ୍ବାଆଁ ମାନାଇ ହାରେକା ନେହିଁ । ମାମ୍ବୁ ତିନିଗଟା ଇଲୁ ତିଆର୍ କିନମି, ନି ତାକି ରଣ୍ଡି, ମୋଶାତାକି ରଣ୍ଡି ଅଡ଼େ ଏଲୀୟତାକି ରଣ୍ଡି ।” ପିତର ଏନାଆଁ ଜଲିମାଚେସି ଏଦାଆଁ ଏୱାସି ପୁନାଃତେସି ।

ଏଚିବେଲା ପିତର କାତା ଜଲିମାଚେସି, ର ଉଜ୍ଜେଡି ହାଗୁ ଡ଼କି ରେଚା ୱାତେ ଅଡ଼େ ଏୱାରାଇଁ ଏଦି ପ୍ଡ଼ିକ୍ହାସ୍ତେ ଅଡ଼େ ହାଗୁଟି ଇବାଣୀ ୱାତେ “ଇୱାସି ନା ମିର୍ଏସି ଏମିନି ଗାଟାଣାଇଁ ନାନୁ ଜୀୱୁ ନଇଁ । ତାନି ତାଣା ନା ରାହାଁ । ତାଙ୍ଗ ୱେଞ୍ଜୁ ।” ଏ ତିନିଜାଣା ଶିଷ୍ୟଁ ଆଜାହାଜାହାଁ ବୁମିତା ତର୍ଗାହାଜା ମାଚେରି ।

ଏଦାଆଁ ଜେଚ ଯୀଶୁ ଏୱାରାଇଁ ଡିଗିତେସି ଅଡ଼େ ଏଲେଇଚେସି “ଆଜାଃଦୁ । ନିଙ୍ଗାଦୁ ।”ଏୱାରି ଏଚିବେଲା ଶାରି ୱାକି ମେସ୍ତେରି, ଏୱାରି ରଅସିଏ ଯୀଶୁଇଁ ମେସ୍ତେରି ।

ଯୀଶୁ ଅଡ଼େ ତାନି ତିନିଜାଣା ଶିଷ୍ୟଁ ହରୁ ଡ଼ଇ ରେଚା ୱାତେରି । ଏଦାଆଁ ଜେଚ ଯୀଶୁ ଏୱାରାଇଁ ଏଲେଇଚେସି “ଏମ୍ବାଆଁ ଏନା ଆତେ ଏଦାଣୀ ଆମ୍ବାରାଇଁ ୱେହ୍ଆଦୁ । ନାନୁ ଜିକି ହାଇଁ ଅଡ଼େ ୱେଣ୍ଡେଏ ନିଡିଇଁ । ଏଦାଆଁ ଜେଚ, ମିରୁ ଲୋକୁଣି ୱେହ୍ ଦେରି ।”