37. ଯୀଶୁ ଲାଜାରଇଁ ହାକିଟି ନିଟ୍‌ନେସି

ର ଦିନା, ଯୀଶୁ ର କାବ୍ରୁ ୱେଚେସି ଯେ ଲାଜାର ହାରେକା ଆଡିଲଃସି । ଲାଜାର ଅଡ଼େ ତାନି ରି ତାଂଗୀସ୍କା, ମରିୟମ ଅଡ଼େ ମାର୍ଥା, ଯୀଶୁତି ତଡୁ ମାଚୁ । ଯୀଶୁ ଏଚିବେଲା ଇ କାବ୍ରୁ ୱେଚେସି, ଏୱାସି ଜଲିତେସି “ଇ ଆଡାଃଗାଟାଇ ହାକି ତଲେ ରାଏ, ମାତ୍ର ଇଦି ମାହାପୁରୁତି ଗାଉରମି ତାକି ଆନେ ।” ଯୀଶୁ ତାନି ତଡ଼଼ୁଗାଟାରିଇଁ ଜୀୱୁ ନହି ମାଚେସି, ମାତ୍ର ଏୱାରି ଏମିନି ଟାୟୁତା ମାଚେରି ଏମ୍ବାଆଁ ରିଦିନା ଡ଼ୟସ୍ତେରି ।

ରିଦିନା ରାତି ଜେଚ, ଯୀଶୁତାନି ଶିଷ୍ୟଁଣୀ ଏଲେଇଚେସି, ”ୱାଦୁ, ମାର ଯିହୁଦା ଦେଶାତା ହାନ ।“ ଶିଷ୍ୟୟାଁ ଉତ୍ତର ହିତେରି”ଗୁରୁ, ସାଣେକା ନକେଏ ଲୋକୁ ନିଂଗ ପାୟାଲି ତାକି ଅଣପିମାଚେରି!” ଯୀଶୁ ଏଲେଇଚେସି “ମା ତଡୁ ଲାଜାର ଇଦା କିହାମାନେସି, ଅଡ଼େ ନାନୁ ତାଂଗେ ସାତେଏ ଇଦାଟି ନିକ୍ହାଲି ଲାଗିନେ ।”

ଯୀଶୁତି ଶିଷ୍ୟଁ ଏଲେ ଇଚେରି “ଗୁରୁ, ଲାଜାର ଇଦା କିହାମାଚିସାରେ, ଏୱାସି ନିଂଗୀନେସି ।”ଏଦାଆଁ ଜେଚ ଯୀଶୁ ଏୱାରାଇଁ ନେହିକି ଜଲିତେସି “ଲାଜାର ହାହା ହାଜା ମାନେସି । ନାଙ୍ଗେ ରାହାଁ ଯେ ନାନୁ ଏମ୍ବାଆଁ ହିଲାଃତେଏଁ, ଏନିକିକି ମିରୁ ନାତାଣା ନାମାଦେରି ।”

ଯୀଶୁ ଏଚିବେଲା ଲାଜାରତି ଗାଡ଼ାତା ୱାତେସି, ଲାଜାର ହାହାଁ ମୁସ୍ପି ଆହାଁ ଶାରିଦିନା ଆହାମାଚେ । ମାର୍ଥା ଯୀଶୁଇଁ ବେଟା ଆହାଲି ହାଜାହାଁ ଏଲେଇଚେ “ମାହାପୁରୁ, ନିନୁ ଇମ୍ବାଆଁ ମାଚିଁମା, ନା ତାଇ ହାଃଆତେସିମା । ମାତ୍ର ନାନୁ ନାମି ମାଇଁ ନିନୁ ମାହାପୁରୁଇଁ ଏନାଆଁ ରିହ୍ଦି ଏୱାସି ନିଂଗ ହିୟାନେସି ।”

ଯୀଶୁ ଏଲେଇଚେସି “ନାନୁ ୱେଣ୍ଡେ ନିଙ୍ଗିତାତେଏଁ ଅଡ଼େ ଜୀୱୁତେଏଁ । ଏମିନି ଗାଟାସି ନାଙ୍ଗେ ନାମାନେସି, ଏୱାସି ହାତିଁଜିକେଏ ନିଡିନେସି । ଏମିନିଗାଟାସି ନାଂଗେ ନାମାନେସି ଏୱାସି ଏଚେଲା ହାଃଅସି । ନିନୁ ଇଦାଆଁ ନାମିମାଞ୍ଜି କି ? ”ମାର୍ଥା ଏଲେଇଚେ, “ହଁ,ଗୁରୁ! ନାନୁ ନାମିମାଇଁ ଯେ ନିନୁ ମାହାପୁରୁତି ମିର୍ଏତି ଖ୍ରୀଷ୍ଟ।”

ଏଦାଆଁ ଜେଚ ମରିୟମ ଏତେ । ଏଦି ଯୀଶୁତି କଡାଁ ଡ଼ଇ ତର୍ଗାହାଁ ଏଲେଇଚେ “ମାହାପୁରୁ, ନିନୁ ଇମ୍ବାଆଁ ମାଚିମାଁ, ନା ତାଇ ହାଃଆତେସିମା । “ଯୀଶୁ ଏୱାରାଇଁ ୱେଚେସି “ମିରୁ ଲାଜାରଇଁ ଏମ୍ବିୟା ଇଟାମାଞ୍ଜେରି ?” ଏୱାରି ଏଲେଇଚେରି “ମାହିଣି ମେଣ୍ଡାତା । ୱାଦୁ ସିନିକିନ । “ଏଦାଆଁ ଜେଚ ଯୀଶୁ ଡ଼ିତେସି ।

ମାହିଣିମେଣ୍ଡାତା ର ପାଉ ମାଚେ ଅଡ଼େ ଏ ମୁମ୍ବୁତା ର ୱାକି ଉସ୍ପି ଆହି ମାଚେ ।ଯୀଶୁ ଏଚିବେଲା ମାହିଣିମେଣ୍ଡାତା ଏତେସି, ଏୱାସି ଏୱାରାଇଁ ଏଲେଇଚେସି “ୱାଲି କୁତ୍ ଦୁ ଅଡ଼େ ହେକ କିଦୁ । “ମାତ୍ର ମାର୍ଥା ଏଲେଇଚେ “ଏୱାସି ହାହାଁ ଶାରି ଦିନା ଆତେଇ ଏ । ଏମ୍ବାଆଁ ଗାଂଦା ଆନେ ।”

ଯୀଶୁ ଏଲେଇଚେସି “ନାନୁ ଏନାଆଁ ମିଙ୍ଗ ୱେସା ମାଞ୍ଜଅଁ କି ଯେ ମିରୁ ନା ତାଣା ନାମିସାରେ ମାହାପୁରୁତି ଗାଉରମି ମେହ୍ ଦେରି ?” ଏଦାଆଁ ତାକି ଏୱାରି ୱାଲିଇଁ ଉସି କିହାଁ ହେକ କିତେରି ।

ଏଦାଆଁ ଜେଚ ଯୀଶୁ ଲାକପୁରୁୱାକି ସିନିକିହାଁ ଏଲେଇଚେସି “ଆବାଃ,ନା ପ୍ରାତନା ୱେଞ୍ଜିନାକି ଧନ୍ୟବାଦ । ନାନୁ ପୁଞ୍ଜା ମାଇଁ ନିନୁ ସବୁବେଲା ନା କାତା ୱେଞ୍ଜିମାଞ୍ଜାଦି,ବାରେ ଲୋକୁ ଇମ୍ବାଆଁ ନିଚା ମାନେରି ଏ ଲୋକୁତାକି ନାନୁ ଇଦାଆଁ ଜଲି ମାଞ୍ଜାଇଁ ।“ଏଦାଆଁ ଜେଚ ଯୀଶୁ ଗାଡି କାଲ ତଲେ ଏଲେ ଇଚେସି “ଲାଜାର, ପାଙ୍ଗାତା ହଚା ୱାମୁ!”

ଏଦାଆଁ ତାକି ଲାଜାର ହଚା ୱାତେସି ! ଏ ବେଲାତା ଜିକେଏ ମୁସ୍ପିଆନି ହେମ୍ବରୀ ପ୍ଡ଼ିକ୍ୱି ଆହାମାଚେ । ଯୀଶୁ ଏୱାରାଇଁ ଏଲେଇଚେସି “ଇ ମୁସ୍ପି ଆନି ହେମ୍ବରି ତାନିତାଣାଟିଏ କଡାହାଁ ଦସ୍ପି ଆତାଣିଇଁ ହୁକ୍ ଦୁ!” ଯୀଶୁତି ଇ କାବା ଆନି କାମାତାକି ହାରେକା ଯିହୁଦୀ ତାନି ତାଣା ନାମି ତେରି ।

ମାତ୍ର ଯିହୁଦୀୟାଁ ଦାର୍ମୁ ନେତାଁୟାଁ ଇର୍ଷା ଆହିମାଚେରି, ଏଦାଆଁ ତାକି ଏୱାରି ଏନିକି ଯୀଶୁ ଅଡ଼େ ଲାଜାରଇଁ ପାଇନେରି ଏଦାଆଁ କୁଡ଼ା ଆହାଁ କାତା ଆହି ମାଚେରି ।