38. ଯୀଶୁଇଁ ମିଚି ଜଲିତେରି

ସବୁ ବାର୍ଷା ଯିହୁଦୀୟାଁ ନିସ୍ତାର ପାର୍ବୁ ନାମିମାଚେରି । ଇଦି ଆହିମାନେ ଏ ପାର୍ବୁ ଏମିନିଗାଟାଇ ଶହେ ବାର୍ଷା ନକେଏ ଟିଏ ମାହାପୁରୁ ଏନିକି ତାମି ଆକୁଁଆବାଁଟିଏ ହଲିଆଁଟିଏ ଗେଲ୍ପା ଚାଚାମାଚେସି । ଯୀଶୁ ଏମ୍ବାତି ଲୋକୁ ଲେହେଁ ଅଡ଼େ ପ୍ରଚାର କିହାଁ ତିନି ବାର୍ଷା ଜେଚ ଯୀଶୁ ତାମି ଶିଷ୍ୟଁଣୀ ଏଲେଇଚେସି ତାମି ତଲେ ଯିରୁଶାଲମତା ନିସ୍ତାର ପାର୍ବୁ ନାମାଲି ଅଣପିତେସି, ଅଡ଼େ ଏମ୍ବାଆଁ ତାଂଗେ ପାଇୱି ଆନେ ।

ଯୀଶୁ ଶିଷ୍ୟଁ ବିତ୍ରା ଯିହୂଦୀ ଦରୁଗାଟି ଶିଷ୍ୟ ମାଚେସି । ଯିହୂଦୀ ଶିଷ୍ୟଁତି ଡାବୁଁ ଇଟିନି କାମାତା ମାଚେସି, ମାତ୍ର ଏୱାସି ଡାବୁଁଇଁ ଜୀୱୁ ନତେସି ଅଡ଼େ ହାରେକା ବେଲାତା ଡାବୁଁ ଶରି କିହିମାଚେସି । ଯୀଶୁ ଅଡ଼େ ତାନି ଶିଷ୍ୟୟାଁ ଯିରୁଶାଲମତା ଏତି ଜେଚ, ଯିହୁଦା ଡାବୁଁ ବାଟା ଯୀଶୁଇଁ ଶାତ୍ରୁଁ କେୟୁତା ହେର୍ପିାଲି ତାକି ନେତାଁ ତାଣା ହାଚେସି । ଏୱାସି ପୁଞ୍ଜାମାଚେସି ଯେ ଯୀଶୁ ଖ୍ରୀଷ୍ଟ ଇଞ୍ଜି, ଇଦାଆଁ ଯିହୂଦୀ ନେତାୟାଁ ନାମିଲାଃତେରି ଅଡ଼େ ଏୱାରି ତାଙ୍ଗେ(ଯୀଶୁଇଁ) ପାୟାଲିତାକି କାତା ଆହିମାଚେରି ।

ଯିହୂଦୀ ନେତାୟାଁ କାଜା ମହାଯାଜକଟିଏ ଯୀଶୁଇଁ ଶାତ୍ରୁ କେୟୁତା ହେର୍ପାଲିତାକି ତିରିଶ୍ ଗଟା ରୁପା ଡାବୁଁ ହିହାମାଚେସି । ଭାବବାଦୀୟାଁ ଭାବବାଣୀ କିହାନିଁ ଲେହେଁ ଘଟଆତେ । ଯିହୁଦୀ ଏଦାଆଁ କାତାଆହାଁ ଡାବୁଁ ଅହିଁ ହାଚେସି । ଏୱାସି ଏନିକି ଯୀଶୁଇଁ ଆସାହାଁ ଶାତ୍ରୁ କେୟୁତା ହେର୍ପିନେସି ଏଦାଆଁ ତାକି ସୁଯୋଗ ପାରିମାଚେସି ।

ଯିରୁଶାଲମତା ଯୀଶୁ ତାନି ଶିଷ୍ୟଁ ତଲେ ନିସ୍ତାର ପାର୍ବୁ ନାମିତେସି । ନିସ୍ତାର ପାର୍ବୁ ତିନି ବେଲା, ଯୀଶୁ ରୁଟିଇଁ ଅହାଁ ଏଦାଆଁ ଡିକ୍ହେସି । ଏୱାସି ଜଲିତେସି “ଇଦାଆଁ ଅହାଁ ଚିଞ୍ଜୁ । ଇଦି ନା ଆଙ୍ଗା, ଏମିନିଗାଟାଇ ମିତାକି ହିପ୍‌କି ଆହାମାନେ । ନାଙ୍ଗେ ଅଣପାଲିତାକି ଇଦାଆଁ କିଦୁ ।” ଇଲେହେଁ କି, ଯୀଶୁ ଜଲିତେସି, ତାମି ତାକି ତାନି ଆଙ୍ଗା ବଳୀ ହିପ୍‌କିଆନେ ।

ଏଦାଆଁ ଜେଚ ଯୀଶୁ ର ଗହ୍ନିମୁତା ପେର୍ତେସି ଅଡ଼େ ଜଲିତେସି “ଇଦାଆଁ ଗହ୍ ଦୁ । ଇଦି ନା ପୁଃନି ମେରାତି କାସା ଏମିନାଇ ପାପୁକ୍ଷମା ଆହାଲି ତାକି ୱାକ୍ପି ଆହାମାନେ । ମିରୁ ବାରେବେଡ଼ା ଇଦାଆଁ ଗହ୍ନିବେଲା ନାଙ୍ଗେ ଅଣପାଦୁ ।”

ଏଦାଆଁ ଜେଚ ତାନି ଶିଷ୍ୟଁଣୀ ଏଲେଇଚେସି “ମି ବିତ୍ରା ରଅସି ନାମୁ ଡିକ୍ ହାନେସି ।” ଶିଷ୍ୟୟାଁ କାବା ଆହା ହାଚେରି, ଅଡ଼େ ଇଲେତି କାତା ଆମ୍ବାଃସି କିନେସି ଇଞ୍ଜି ୱେଚେରି । ଯୀଶୁ ଏଲେଇଚେସି “ନାନୁ ଅମ୍ବାରାଇଁ ଇ ରୁଟି କାଣ୍ଡା ହିଇଁ ଏୱାସି ନାଂଗେ ନାମୁ ଡିକ୍ ହାନେସି । ”ଏଦାଆଁ ଜେଚ ଏୱାସି ଏ ରୁଟି ଯିହୂଦାଇଁ ହିତେସି ।

ଯିହୂଦା ଏ ରୁଟି କାଣ୍ଡାଇଁ ଅତି ଡାୟୁ, ଶୟତାନ ତାନି ବିତ୍ରା ହଟେ । ଯିହୂଦା ଏ ଟାୟୁ ପିସାହାଁ ଯୀଶୁଇଁ ଦସ୍ପି କିହାଲି ଯିହୂଦୀ ନେତାଁଣୀ ସାୟମି ଆହାଲି ତାମି ତାଣା ହାଚେସି । ଏଚିବେଲା ଲାଁଆ ଆହାମାଚେ ।

ଚିଚି ଜେଚ, ଯୀଶୁ ଅଡ଼େ ତାନି ଶିଷ୍ୟଁ ଜିତ ହରୁତା ତାକି ତାକିହିଁ ହାଚେରି । ଯୀଶୁ ଏଲେଇଚେସି”ମିରୁ ବାରେ ନାଂଗେ ପିସ୍ତୁ ସ୍ତାଦେରି । ରାସ୍କି ଆହାମାନେ “ନାନୁ ଗଡ଼ୁଇଁ ୱେଇଁ ଅଡ଼େ ବାରେ ମେଣ୍ଡା କିଲିବିଲି ଆନୁ ।

ପିତର ଏଲେ ଇଚେସି “ବାରେ ଜାଣା ନିଂଗ ପିସ୍ତା ତିହିଁ ଜିକେଏ, ନାନୁ ପିସ୍ତଅଁ!” ଅଡ଼େ ଯୀଶୁ ଏଲେଇଚେସି “ ଶୟତାନ ମି ବାରେ ତଲେ ଡ଼ୟାଲି ଇଚା କିହିମାନେ, ମାତ୍ର ପିତର ନି ନାମୁ ଏନିକି ହିତିଡ଼ି ଆଆପେ ଏଦାଆଁ ତାକି ନାନୁ ବାତିମାଲିଇଁ ।ଏନିକିକି, ନିଞ୍ଜୁ ଲାଆଁ କୟୁ କ୍‌ଣେକ୍‌ନି ନକେଏ ନିନୁ ନାଙ୍ଗେ ତିନି ଦେବା ନାମୁଇଁ ଡ଼ୁକ୍ ଦି ।”

ଏଦାଆଁ ଜେଚ ପିତର ଯୀଶୁଇଁ ଏଲେଇଚେସି “ନାନୁ ହାତିଁ ଜିକେଏ, ନାନୁ ଏଚେଲା ନାମୁତି ଡ଼ୁକ୍ଅଁ !” ଏଟ୍କା ଶିଷ୍ୟଁ ବାରେ ଜିକେଏ ଏଲେଇଚେରି ।

ଏଦାଆଁ ଜେଚ ତାନି ଶିଷ୍ୟଁ ତଲେ ଗେଥଶିମନୀ ଟାୟୁତା ହାଚେରି । ଶିଷ୍ୟଁ ଏନିକି ପରିକ୍ଷାତା ତର୍ଗଃରି ଏଦାଆଁ ତାକି ଯୀଶୁ ତାନି ଶିଷ୍ୟଁଣୀ ପ୍ରାତନା କିହାଲି ଏଲେଇଚେସି । ଏଦାଆଁ ଜେଚ ଯୀଶୁ ତାନୁଏ ପ୍ରାତନା କିହାଲି ହାଚେସି ।

ଯୀଶୁ ତିନି ଦେବା ପ୍ରାତନା କିତେସି’ ନା ଆବା, ଆହାଲି ଆଡିସାରେ, ଇ ଦୁକୁତା ଇ ଜୀୱୁଇଁ ନାତାଣାଟି ଇଦାଆଁ ହେକ କିମୁ । ମାତ୍ର ଲୋକୁତି ପାପୁଇଁ କ୍ଷମା କିହାଲିତାକି ଅଡ଼େ ଏନି ଉପାୟ ହିଲାଃତେ, ଆତିସାରେ ନି ଇଚା ଆପେ ।” ଯୀଶୁ ହାରେକା ଦୁକୁତା ମାଚେସି ଅଡ଼େ ତାନି ଗାମା କାସା ବନ୍ଦା ଲେହେଁ ମାଚେ । ମାହାପୁରୁ ତାଂଗେ ଶାସା ଆସାଲି ତାକି ର ଦୁତୁଇଁ ତାନି ଡାଗେ ପାଣ୍ଡିତେସି ।

ବାରେ ଦେବା ପ୍ରାତନା କିତି ଡାୟୁ, ଯୀଶୁ ତାନି ଶିଷ୍ୟଁ ତାଣା ହାଜି ମାଚେସି ମାତ୍ର ଏୱାରି ଡୁର୍ତୁସାଂଚେରି । ଏଚିବେଲା ଏୱାସି ତିନି ଦେବା ୱାତେସି, ଯୀଶୁ ଏଲେଇଚେସି” ନିଙ୍ଗାଦୁ! ନା ନାମୁତା ବିଷା ହିନାସି ଇମ୍ଵାଆଁ ମାନେସି ।”

ଯିହୂଦୀ ନେତାୟାଁ, ସୈନ୍ୟୟାଁ ଅଡ଼େ ହାରେକା ଲୋକୁ ତଲେ ଯିହୂଦା ୱାତେସି । ଏୱାରି କାଣ୍ଡା ଅଡ଼େ ହିଚୁ କୁଡୁଲି ଆସାହାଁ ୱାତେରି । ଯିହୁଦା ଯୀଶୁ ଡାଗେ ୱାହାଁ ଏଲେଇଚେସି “ହେ ଗୁରୁ ନମସ୍କାର” ଅଡ଼େ ତାଙ୍ଗେ ନଣ୍ଡାସ୍ତେସି । ଯିହୂଦୀ ନେତାୟାଁ ଏମ୍ବାରାଇ ଏମ୍ବାରାଇଁ ଦସ୍ପିନେରି ଏଦି ର ଚିନ୍ନା ମାଚେ । ଏଦାଆଁ ଜେଚ ଯୀଶୁ ଏଲେଇଚେସି “ଯିହୂଦା, ନଣ୍ଡିତି ତାକି କି ନିନୁ ନାଂଗେ ଶାତ୍ରୁ କେୟୁତା ହେର୍ପି ମାଞ୍ଜାଦି ?”

ଏଚିବେଲା ସୈନ୍ୟଁୟାଁ ଯୀଶୁଇଁ ଦସ୍ପିତେରି, ପିତର ତାନି କାଣ୍ଡା ହପ୍ହେସି ଅଡ଼େ ମହାଜାଯକତି ହଲିଆତି କ୍ରିୟୁଁ ଦାତୁସ୍ତେସି । ଯୀଶୁ ଏଲେଇଚେସି “କାଣ୍ଡାଇଁ ହେକ ଇଟାମୁଁ ! ନାଙ୍ଗେ ଗେଲ୍ପାଲିତାକି ନାନୁ ନା ଆବାତି ଦୂତୁଁତି ର ସୈନ୍ୟଦଲ ରିସାଲି ଆଡିଇଁ । ମାତ୍ର ନାନୁ ନା ଆବାତି ବୋଲୁ ନାମିନାଇ ମାନେ ।” ଏଦାଆଁ ଜେଚ ଯୀଶୁ ଏ ଲୋକୁତି କ୍ରିୟୁଁଇଁ ନେହି କିତେସି । ଯୀଶୁଇଁ ଦସ୍ତି ଡାୟୁ ବାରେ ଶିଷ୍ୟୟାଁ ହଡ଼ତୁ ସ୍ତେରି ।