40. ଯୀଶୁ କ୍ରୁଶତା ଲେଜ୍‌ୱି ଆତେସି

ସୈନ୍ୟୟାଁ ଯୀଶୁଇଁ ଲାଜା କିତି ଡାୟୁ, ଏୱାରି କ୍ରୁଶତା ୱେଚାଲି ତାକି ତାଂଗେ ଅତେରି । ଏୱାସି ଏମିନି କ୍ରୁଶତା ହାନେସି ଏ କ୍ରୁଶ ତାଙ୍ଗେ ଡେକି କିତେରି ।

ସୈନ୍ୟୟାଁ “ମୁନ୍ଜୁତି ଟାୟୁ” ଦରୁ ଗାଟି ଟାୟୁତା ତାତେରି ଅଡେ କ୍ରୁଶତା ତାନି କେୟୁ ଅଡ଼େ ଗୁଃନାଇଁ କୁଟି ତଲେ ୱେତେରି । ମାତ୍ର ଯୀଶୁ ଏଲେଇଚେସି “ଆବା, ଇୱାରାଇଁ କ୍ଷମା କିମୁ, ଏନାଆଁ ତାକି ଇଚିସାରେ ଇୱାରି ଏନାଆଁ କିହିମାନେରି ଏଦାଆଁ ପୁଞ୍ଜି ହିଲଃରି । “ଯିହୂଦୀୟାଁ ରାଜା” କୁତାହାଁ ଏଦାଆଁ ଯୀଶୁ ତ୍ରାୟୁଁ ଲାକ ଲେଚାଲି ତାକି ପିଲାତ ଏଲେ ଇଚେସି ।

ସୈନ୍ୟୟାଁ ଯୀଶୁତି ହେମ୍ବରୀଇଁ ଗୁଲିବାଣ୍ଟ କିତେରି । ଏୱାରି ଏଚିବେଲା ଏଲେ କିତେରି, ୱେସ୍ପି ଆତି ଭାବବାଣୀ ସଫଳ ଆତେ “ଏୱାରି ନା ହେମ୍ବରୀଇଁ ବାଗା କିତେରି ଅଡ଼େ ହେମ୍ବରୀ ତାକି ଗୁଲିବାଣ୍ଟ କିତେରି ।”

ଯୀଶୁଇଁ ରି ଜାଣା ଡାକୁଁ ମାଦି କ୍ରୁଶତାୱେପି ଆତେ । ତାମି ବିତ୍ରା ରଅସି ଯୀଶୁଇଁ ଲାଜା କିତେସି, ମାତ୍ର ଅରଅସି “ ନିଦି ଏନାଇ ମାହାପୁରୁତି ଆଜି ହିଲେଃଏ, ମାର ଦହ ଗାଟାତାଇ, ମାତ୍ର ଇୱାସି ଦହ ହିଲାଃଗାଟାସି ।” ଏଦାଆଁ ଜେଚ ଏୱାସି ଯୀଶୁଇଁ ଏଲେଇଚେସି “କାର୍ମାଁ ମେସାହାଁ ନି ରାଜିତା ନାଙ୍ଗେ ଅଣପାମୁ ।” ଯୀଶୁ ତାଙ୍ଗେ ଏଲେଇଚେସି “ନିନୁ ନିଞ୍ଜୁ ନା ତଲେ ପାରଦିଶତା ଏଦି ।”

ଯିହୁଦା ନେତାୟାଁ ଅଡ଼େ ଲୋକୁ ବିତ୍ରା ହାରେକା ଲାଜା କିତେରି । ଏୱାରି ତାଙ୍ଗେ ଏଲେଇଚେରି “ନିନୁ ମାହାପୁରୁତି ମିର୍ଏତି ଇଚିସାରେ, କ୍ରୁଶଟି ରେଚା ୱାମୁ ଅଡ଼େ ଯାହାରାଇଁ ଗେଲ୍ପାମୁ ! ଆତିସାରେ ମାମ୍ବୁ ନିଙ୍ଗେ ନାମାନମି ।”

ଏଦାଆଁ ଜେଚ ବାରେ ୱାକି ମାନି ହାଗୁ ବାରେ ଆନ୍ଦେରି ଆହା ହାଚେ, ଏଦି ମାଦେନା ବେଲା ମାଚେ । ମାଦେନା ବେଲା ଆନ୍ଦେରୀ ଆତେ ଅଡ଼େ ତିନି ଗଣ୍ଟା ଆହାମାଚେ ।

ଏଦାଆଁ ଜେଚ ଯୀଶୁ କାଜା ହାଡା ତଲେ ଏଲେଇଚେସି “ ରାତେ ! ଆବାଃ, ନି କେୟୁତା ନାନୁ ନା ଜୀୱୁ ହିହିମାଞ୍ଜାଇଁ । ଏଦାଆଁ ଜେଚ ଏୱାସି ତ୍ରାୟୁଁ ଡ଼ଇ କିତେସି ଅଡ଼େ ହାତେସି । ଏଚିବେଲା ଏୱାସି ହାତେସି, ଏଚିବେଲା ବୁମି ତିର୍ଗିତେ ଅଡ଼େ ମନ୍ଦିରତା ମାନି କାଜା ପାର୍ଦା ମାହାପୁରୁ ମାଚିତାଣାଟିଏ ଲୋକୁଇଁ ଏଟ୍କା ଇଟିମାଚେ ଏଦି ଲେକଟିଏ ଡ଼ଇ ପାତେକା ଗେଞ୍ଜାହାଁ ରି କାଣ୍ଡା ଆହାହାଚେ ।

ଯୀଶୁ ତାନି ହାକି ତଲେ ଲୋକୁଣି ମାହାପୁରୁ ତାଣାଟି ୱାନି ଜିରୁ ଦେତୁସ୍ତେସି । ଯୀଶୁଇଁ କାଚାମାନି ସୈନ୍ୟଁ ଏଚିବେଲା ଇ ବାରେ ଆହିମାନାଣୀଇଁ ମେସ୍ତେରି ଏୱାସି ଏଲେଇଚେସି “ସାତେଏ, ଏୱାସି ଦହ ହିଲାଃଗାଟାସି, ମାଚେସି । ଏୱାସି ମାହାପୁରୁତି ମିର୍ଏସି ମାଚେସି ।”

ଏଦାଆଁ ଜେଚ ଯୋଶେଫ ଅଡ଼େ ନିକଦିମ, ଯୀଶୁଇଁ ନାମିଲାଃଗାଟାରିଇଁ ରି ଜାଣା ଯିହୂଦୀ ନେତା ଯୀଶୁତି ମଡ଼ା ଅହାଲିତାକି ଏଲେଇଚେରି । ଏୱାରି ର ହେମ୍ବରୀ ପ୍ଡ଼ିକ୍ହାଁ ବୁମି କାର୍ୱି ଆହାମାନି ର ମାହିଣୀମେଣ୍ଡାତା ଇଟିତେରି । ଏଦାଆଁ ଜେଚ ଏୱାରି ମାହିଣିମେଣ୍ଡା ମୁମ୍ବୁତା ର କାଜା ୱାଲି ଉସି କିତେରି ଅଡ଼େ ଏମ୍ବାତି ମୁମ୍ବୁ ସୁଣ୍ଡିତେରି ।