41. ମାହାପୁରୁ ଯୀଶୁଇଁ ହାକିଟି ନିକ୍‌ନେସି

ସୈନ୍ୟୟାଁ ଯୀଶୁଇଁ କ୍ରୁଶତା ପାଇତି ଜେଚ, ନାମାଃଗାଟି ଯିହୂଦୀ ନେତାୟାଁ ପିଲାତଇଁ ଏଲେଇଚେରି “ଏ ମିଚି ଗାଟି ଯୀଶୁ ଜଲାମାନେସି ଯେ ଏୱାସି ତିନି ଦିନା ଡାୟୁ ନିଂଗିନେସି । ଏମ୍ବାଃରି ପାଟେ ମାହିଣୀମେଣ୍ଡାଇଁ କାଃନାଇମାନେ ଅଡ଼େ ସାତା ୱେସ୍ତା ନାଇ ମାନେ ଯେ ଏନିକି ଶିଷ୍ୟଁୟାଁ ତାନି ହାତି ମାଡ଼ାଇଁ ଶରି କିହାଁ ୱେସ୍ତାନେରି ଯେ ଏୱାସି ହାକିଟି ନିଂଗା ମାନେସି ।”

ପିଲାତ ଏଲେଇଚେସି “କଚେକା ସୈନ୍ୟଁଣୀ ଅହାଁ ମି ଆଡିନିଏଚେକା ମାହିଣୀମେଣ୍ଡାଇଁ ସିନିକିଦୁ ।” ଏଦାଆଁ ତାକି ଏୱାରି ମାହିଣୀମେଣ୍ଡାତି ହଡିନି ଟାୟୁତା ମାନି ୱାଲ୍କାଇଁ ଚିନ୍ନା କିତେରି ଅଡ଼େ ଏମ୍ବାଆଁ ସୈନ୍ୟଁଣୀ ଇଟିତେରି ଏନିକିକି ଏମ୍ବାଃରି ଜିକେଏ ତାନି ମଡ଼ାଇଁ ଶରୁ କିହାଲି ଆଡଃରି।

ଯୀଶୁ ମୁସ୍ପି ଆତି ର ନେଚୁ ଡାୟୁତି ଦିନା ଜମିନି ଦିନା ମାଚେ, ଅଡ଼େ ଏ ଦିନା ମାହିଣୀମେଣ୍ଡା ହାଜାଲି ତାକି ଯିହୂଦୀୟାଁଇଁ ଅନୁମତି ହିଲାଃତେ । ଏଦାଆଁ ତାକି, ଜମିନି ଦିନାତି ଡାୟୁତି ଦିନାତି ଲାଇସେଏ ହାରେକା ଆୟାସ୍କା ଯୀଶୁତି ମଡ଼ାତା ନେହି ଗାଂଦା ଆନି ଜିନିଷ ହିହାଲି ତାକି ମାହିଣୀମେଣ୍ଡାତା ହାଜାଲି ତାକି ତିଆର୍ ଆତୁ ।

ସାଣେକାଜେଚ ବୁମି ଗାଡି ତିର୍ଗିତେ । ବିଜା ଉଜେଡି ଲେହେଁ ଡ଼ିଞ୍ଜିମାନି ର ଦୂତୁ ହାଗୁଟି ଚଞ୍ଜା ଆତେ ଅଡ଼େ ମାହିଣୀମେଣ୍ଡା ହଡିନି ଟାୟୁତା ପ୍ଡ଼ିକ୍ୱି ଆହାମାନି ୱାଲିଇଁ ଗୁଚି କିହାନା ଏ ଲାକ କୁଗିତେ । ଏମିନି ସୈନ୍ୟୟାଁ ମାହିଣୀମେଣ୍ଡା କାଚା ମାଚେରି ଏୱାରି ଆଜାହାଁ ହାତି ଲକୁ ଲେହେଁ ବୁମିତା ତର୍ଗା ହାଚେରି ।

ଏଚିବେଲା ଆୟାଟିସ୍କା ମାହିଣୀମେଣ୍ଡା ତା ଏତୁ, ଦୂତୁ ଏୱସ୍କାଣୀ ଏଲେଇଚେ “ଆଜାଃଦୁ । ଯୀଶୁ ଇମ୍ବାଆଁ ହିଲଃସି । ଏୱାସି ଏନିକି ଜଲା ମାଚେସି, ଏଲେକିଁଏ ହାକିଟିଏ ନିଡାମାନେସି ! ୱାଦୁ ଅଡ଼େ ମାହିଣୀମେଣ୍ଡାଇଁ ସିନିକିଦୁ ।” ଏମିନି ଟାୟୁତା ଯୀଶୁତି ଆଙ୍ଗା ଇଟ୍‌କି ଆହାମାଚେ, ଆୟାଟିସ୍କା ମାହିଣୀମେଣ୍ଡା ବିତ୍ରା ହାଜାହାଁ ସିନିକିତୁ । ତାନି ଆଙ୍ଗା ଏମ୍ବାଆଁ ହିଲାଃତେ ।

ଏଦାଆଁ ଜେଚ ସର୍ଗଦୂତୁ ଏ ଆୟାଟିସ୍କାଣୀ ଏଲେଇଚେ “ହାଜାହାଁ ଶିଷ୍ୟଁଣୀ ୱେହ୍ ଦୁ,’ଯୀଶୁ ନିଂଗା ମାନେସି ଅଡ଼େ ମି ତଲିଃଏ ଗାଲିଲୀତା ହାନେସି ।”

ଏ ଆୟାଟିସ୍କା ହାରେକା ଆଜାହାଜା ମାଚୁ ଅଡ଼େ ହାରେକା ରହାଁ ଆହାମାଚୁ । ଶିଷ୍ୟଁଣୀ ନେହି କାବ୍ରୁ ୱେସାଲି ତାକି ଏୱି ହଟିଁ ହଟିଁ ହାଚୁ ।

ଏଚିବେଲା ଏ ନେହି କାବ୍ରୁଇଁ ଶିଷ୍ୟଁଣୀ ୱେସାଲି ତାକି ଜିରୁତା ମାଚୁ, ଯୀଶୁ ଏୱାସ୍କାଣୀ ଚଞ୍ଜା ଆତେସି ଅଡ଼େ ଏୱା ତାଙ୍ଗେ ଜହାରା କିତୁ । ଯୀଶୁ ଏଲେଇଚେସି “ଆଜାଃଦୁ ।” ହାଜୁ ଅଡ଼େ ଗାଲିଲୀତା ହାଜାଲି ତାକି ନା ଶିଷ୍ୟଁଣୀ ଜଲାଦୁ । ଏମ୍ବାଆଁ ଏୱାରି ନାଙ୍ଗେ ମେସ୍ତାନେରି ।”