42. ଯୀଶୁ ଲାକପୁରୁ ହାନାଇ

ଯୀଶୁ ଏମିନି ଦିନା ହାକିଟିଏ ନିଂଗିତେସି, ରି ଜାଣା ଶିଷ୍ୟଁ ଡାଗେ ର ଲାକ ହାଜି ମାଚେସି । ଏୱାରି ତାକିନି ବେଲାତା, ଯୀଶୁଇଁ ଏନାଆଁ ଘଟ ଆହାମାଚେ ଏ କାତାତି ଏୱାରି କାତା ଆହିମାଚେରି । ଏୱାରି ଅଣପିମାଚେରି ଯେ ଏୱାସି ଖ୍ରୀଷ୍ଟ ମାଚେସି ମାତ୍ର ତାଂଗେ ପାଇୱି ଆହା ମାଚେ । ନେଏଁ ଏ ଆୟାଟି ଏଲେଇଚେ ଯେ ଏୱାସି ୱେଣ୍ଡେଏ ନିଡାମାନେସି । ଏୱାରି ପୁଞ୍ଜାଲି ଆଡାଃତେରି ଆମ୍ବାରାଇଁ ନାମିନେରି ।

ଯୀଶୁ ତାମି ଡାଗେ ୱାତେସି ଅଡ଼େ ତାମି ତଲେ ତାକାଲି ମାଠ୍ହେସି, ମାତ୍ର ଏୱାରି ତାଂଗେ ପୁଞ୍ଜାଲି ଆଡାଃତେରି । ଏୱାରି ଏମିନି କାତାଇଁ କାତା ଆହିମାନେରି ଇଞ୍ଜି ଏୱାସି ଏୱାରାଇଁ ୱେଚେସି, ଅଡ଼େ ସଣେକା ଦିନା ନକେଏ ଯୀଶୁ ତଲେ ଏନାଆଁ ଘଟ ଆହାମାଚେ ଏ କାଜା କାବ୍ରୁ ଏୱାରି ତାଂଗେ ୱେସ୍ତେରି । ଏୱାରି ଅଣପିତେରି ଯେ ଏୱାରି ର ରେଗା ୱାହାମାନି ଲକୁ ତଲେ କାତା ଆହିମାନେରି ଏମିନି ଗାଟାସି କି ଯିରୁଶାଲମତି କାତା ପୁନାଃତାସି ।

ଏଦାଆଁ ଜେଚ ଯୀଶୁ ତାମ୍ଗେ ତେଲ୍ପି କିହାଲି ମାଠ୍ହେସି ଯେ ମାହାପୁରୁ ଖ୍ରୀଷ୍ଟତି କାତାତି ଏନାଆଁ ଜଲାମାଚେସି । ଏୱାସି ତାମ୍ଗେ ଭବିଷ୍ୟତ କାତାଇଁ ଅଣପିକିହାଁ ଏଲେଇଚେସି ଯେ ଖ୍ରୀଷ୍ଟ ଦୁକୁ ବେଟା ଆନେସି ଅଡ଼େ ପାଇୱି ଆନେସି ଅଡ଼େ ତିନି ଦିନାତା ୱେଣ୍ଡେଏ ନିଂଗିନେସି ଏ ରିଆରି ଏମିନି ଗାଡ଼ାତା ଡ଼ୟାଲିତାକି ଅଣପାମାଚେରି, ଏୱାରି ଏଚିବେଲା ଏମ୍ବାଆଁ ଏତେରି, ଏଚିବେଲା ମିଲ୍ଅଡ଼ା ଆହା ହାଜାମାଚେ ।

ଏ ରିଆରି ତାମି ତଲେ ଡ଼ୟାଲି ଯୀଶୁଇଁ ହାଟିତେରି, ଏଦାଆଁ ତାକି ତାମି ତଲେ ଡ଼ଇ ହାଚେସି । ଏୱାରି ଏଚିବେଲା ଲାଆଁ ଚିଞ୍ଜାଲି ତାକି ତିଆର୍ ଆତେରି, ଯୀଶୁ ର ରୁଟି କଡାହାଁ ମାହାପୁରୁଇଁ ପ୍ରାତନା କିତେସି ଅଡ଼େ ଏଦାଆଁ ଡିକ୍‌ହେସି । ରେଟୁଏ ଏୱାରି ଇୱାସି ଯୀଶୁ ଇଞ୍ଜି ପୁଚେରି । ମାତ୍ର ଏ ବେଲାତା ଏୱାସି ତାମି ତାଣାଟି ମେଣ୍‌ଗା ହାଚେସି ।

ଏ ରିଆରି ତାମ୍ବୁ ଜଲ୍କି ଆତେରି “ଏୱାସି ଯୀଶୁ ମାଚେସି ! ଏଦାଆଁ ତାକି ଏୱାସି ମାଂଗ ମାହାପୁରୁତି ବୋଲୁ ତେଲ୍ପି କିନି ବେଲାତା ମା ହିୟାଁ ଉଜେଡ଼଼ି ଆହି ମାଚେ !” ରେଟୁଲିଏ ଏୱାରି ଯିରୁଶାଲମତା ୱେଣ୍ଡା ୱାତେରି । ଏୱାରି ଏଚିବେଲା ଏତେରି, ଏୱାରି ଶିଷ୍ୟଁଣୀ ଏଲେଇଚେରି “ଯୀଶୁ ନିଡାମାନେସି ! ମାମ୍ବୁ ତାଙ୍ଗେ ମେସାମାନମି !”

ଶିଷ୍ୟୟାଁ ଏଚିବେଲା କାତାବାର୍ତା କିହିମାଚେରି, ଯୀଶୁ ଏୱାରି ଡ଼ଇମାନି ଗନ୍ଦିତା ତାମି ନକିତା ଚଞ୍ଜାଆତେସି ଅଡ଼େ ଏଲେଇଚେସି “ମି ତାଣା ଶାନ୍ତି ୱାପେ !” ଶିଷ୍ୟଁୟାଁ ଅଣପିତେରି ଯେ ଏୱାସି ର ଡୁମ୍ବା, ମାତ୍ର ଯୀଶୁ ଏଲେଇଚେସି ଯେ “ମିରୁ ଏନାଃତାକି ଆଜିମାଞ୍ଜେରି ଅଡ଼େ ନାମିଲଃତେରି ?ନା କେୟୁ ଅଡ଼େ ଗୁଃନା ସିନିକିଦୁ । ନାଦି ଏନିକି ଆଂଗା ମାନେ ଡୁମ୍ବାଁ ୱାଇ ଏଲେକି ଆଙ୍ଗା ଡ଼ୟେଏ ।“ ଏୱାସି ର ଡୁମ୍ବା ଆଃଏ ପାର୍ମାଣା କିହାଲିତାକି, ଏୱାସି ଚିଞ୍ଜାଲିତାକି ରଚାଇଁ ରିସ୍ତେସି । ଏୱାରି ତାଙ୍ଗେ ୱାଜ୍‌ୱି ଆତି ରାନ୍ଦା ମିଣ୍‌କା ହିତେରି, ଅଡ଼େ ଏୱାସି ଇଦାଆଁ ତିନେସି ।

ଯୀଶୁ ଏଲେଇଚେସି “ନାନୁ ମିଙ୍ଗ ୱେସାମାଞ୍ଜାତେଏଁ ଯେ ନା କାତାତି ମାହାପୁରୁତି ବୋଲୁତା ରାସ୍କି ଆହାମାନି ବାରେ କାତା ସଫଳ ଆନେ । “ଏଦାଆଁ ଜେଚ ଏୱାସି ତାମି ହିୟାଁଇଁ ଦେତେସି ଏନିକିକି ତାମ୍ବୁ ମାହାପୁରୁତି ବୋଲୁ ତେଲ୍ହାଲି ଆଡିନେରି । ଏୱାସି ଏଲେଇଚେସି “ନକେଏ ରାସ୍କି ଆହାମାନେ ଯେ ଖ୍ରୀଷ୍ଟ ଦୁକୁ ବେଟା ଆହାଁ ହାନେସି ଅଡ଼େ ତିନି ଦିନାତା ୱେଣ୍ଡେଏ ନିଙ୍ଗିନେସି ।“

“ଶାସ୍ତ୍ରତା ଅଡ଼େ ଜିକେଏ ରାସ୍କି ଆହାମାଚେ ଯେ ବାରେ ଜାଣା ତାମି ପାପୁଟି ଗେଲ୍ପି ଆହାଲିତାକି ଅଣପା କଡିନେରି ଏମିନାଇକି ଶିଷ୍ୟଁୟାଁ ୱେକ୍ନେରି । ଏୱାରି ଇଦାଆଁ ଯିରୁଶାଲମଟିଏ ମାଠ୍ହାହାଁ ବାରେ ଟାୟୁତା ମାନି ଲକୁ ଦଲ ତାଣା ହାନେରି । ମିରୁ ଇ ବାରେ କାତାତି ସାକ୍ଷି ମାଞ୍ଜେରି ।

ଡାୟୁ ଚାଲିଶ୍ ଦିନା ପାତେକା, ଯୀଶୁ ହାରେକା ଦେବା ତାନି ଶିଷ୍ୟଁଣୀଁ ଚଞ୍ଜାଆତେସି । ର ଦେବା, ଏୱାସି ଏକାବେଡ଼େଏ ୫୦୦ଟିଏ ଗାଡି ଲୋକୁଇଁ ଚଞ୍ଜା ଆତେସି ! ଏୱାସି ଯେ ନିଡିତାସି ଇ କାତାଇଁ ଏୱାସି ହାରେକାଦେବା ତାନି ଶିଷ୍ୟଁୟାଁ ତାଣା ପାର୍ମାଣା କିତେସି, ଅଡ଼େ ଏୱାସି ମାହାପୁରୁତି ରାଜିତି କାତା ଜାପ୍ହେସି ।

ଯୀଶୁ ତାନି ଶିଷ୍ୟଁଣୀ ଏଲେଇଚେସି “ଲାକପୁରୁ ଅଡ଼େ ଦାର୍ତିତି ବାରେ ଅଦିକାରା ନାଙ୍ଗେ ହିପ୍‌କି ଆହାମାନେ । ହାଲାମୁ, ବାରେ ଲୋକୁଦଲ ତାଣା ହାଜାହାଁ ଆବା, ମିର୍ଏସି ଅଡ଼େ ପବିତ୍ରଆତ୍ମାତି ଦରୁତଲେ ତାଙ୍ଗେ ଡୁବନ ହିଦୁ ଅଡ଼େ ନାନୁ ମିଙ୍ଗ ଏମିନି ଏମିନିଗାଟି ହୁକମ୍ ହିହା ମାଞ୍ଜାଇଁ ଏ ବାରେ ବୋଲୁ ତଲେ ତାକାଲି ତାକି ଜାପ୍‌ହା ହାଁ ଶିଷ୍ୟ କିଦୁ । ଅଣପା ଇଟାଦୁ, ନାନୁ ସବୁବେଲା ମି ତଲେ ମାଇଁ ।”

ଯୀଶୁ ହାହାଁ ନିଂଗିତି ଚାଲିଶ୍ ଦିନା ଜେଚ, ଏୱାସି ତାନି ଶିଷ୍ୟଁଣୀ ଏଲେଇଚେସି “ପବିତ୍ରଆତ୍ମା ମି ତାଣା ରେଚା ୱାନି ବେଲା ନା ଆବା ମିଂଗେ ଏମିନି ପାତେକା ବ୍ଡ଼ାୟୁ ହିୟଃସି ଏ ପାତେକା ଯିରୁଶାଲମତା ମାଞ୍ଜୁ । ”ଏଦାଆଁ ଜେଚ ଯୀଶୁ ଲାକପୁରୁ ହାଚେସି, ଅଡ଼େ ର ହାଗୁ ତାମି କାଣ୍କାଟି ଡ଼ୁକ୍‌ହାତେ । ଯୀଶୁ ବାରେ କାତାଇଁ ତାକି କିହାଲି ତାକି ମାହାପୁରୁତି ଟିଇନି ଟଟ କୁଗିତେସି ।