43. ମଣ୍ଡଳୀତି ମାଠ୍ହୁ

ଯୀଶୁ ଲାକପୁରୁ ହାଚି ଜେଚ, ଯୀଶୁ ଏନିକି ବୋଲୁ ଜଲାମାଚେସି ଏଲେକିଁଏ ଶିଷ୍ୟଁୟାଁ ଯିରୁଶାଲମତା ଡ଼ଇତେରି । ନାମିତାରି ଏମ୍ବାଆଁ ପ୍ରାତନା କିହାଲି ତାକି ସବୁବେଲା କୁଡ଼ାଆହାଁ ଡ଼ଇତେରି ।

ନିସ୍ତାରପାର୍ବୁତି ୫୦ ଦିନା ଡାୟୁ ଯିହୂଦୀୟାଁ ପେଣ୍ଟିକଷ୍ଟ ଦରୁଗାଟି ର ଗାଡି ୱେଂଗିତି ଦିନା ନାମି ମାଚେରି । ପେଣ୍ଟିକଷ୍ଟ ଆହିମାନେ ଏ ବେଲା ଏଚିବେଲା ଯିହୂଦୀୟାଁ ଆର୍ନା କୁଡ଼ିକିନି ପାର୍ବୁ ନାମି ମାଚେରି । ପେଣ୍ଟିକଷ୍ଟ କୁଡ଼ା ଆହାଁ ନାମାଲି ତାକି ବାରେ ଦାର୍ତିଟି ଯିରୁଶାଲମତା ୱାତେରି । ଇ ବାର୍ଷା, ଯୀଶୁ ଲାକପୁରୁ ହାଜାହାଁ ର ହାଟା ଜେଚ ପେଣ୍ଟିକଷ୍ଟ ଦିନା ୱାତେ ।

ନାମିତାରି ଏଚିବେଲା କୁଡ଼ା ଆହାଁ ମାଚେରି, ଏମିନି ଇଲୁତା ଏୱାରି ମାଚେରି ହାରେକା ଗାଲି କାଲ ଏ ଟାୟୁତା ନେଞ୍ଜିତେ । ଏଦାଆଁ ଜେଚ ହିଚୁ ଲେହେଁ ୱେନ୍ଦରିୟାଁ ବାରେ ନାମିତାରା ତ୍ରାୟୁଁ ଲାକ ଚଞ୍ଜା ଆତେ । ଏୱାରି ବାରେ ପବିତ୍ରଆତ୍ମା ତଲେ ନେଞ୍ଜା ହାଚେରି ଅଡ଼େ ଏଟ୍କା ଏଟ୍କା ବାସା ତଲେ କାତା ଆହାଲି ମାଠ୍ହେରି ।

ଏଚିବେଲା ଯିରୁଶାଲମତା ମାନି ଲୋକୁ ଇ ହାଡାଇଁ ୱେଚେରି, ଏନାଆଁ ଘଟ ଆତେ ଏଦାଆଁ ମେସାଲି ତାକି ଲୋକୁ କୁଡ଼ା ଆତେରି । ମାହାପୁରୁ କାବା ଆନି କାମାଇଁ ନାମିତାରି ୱେକ୍ନି ଲୋକୁ ଏଚିବେଲା ୱେଚେରି, ଏୱାରି କାବା ଆତେରି ଏନାଆଁ ତାକି ଇଚି ସାରେ ଏୱାରି ଏୱାଆଁ ତାମି ବାଷା ତଲେ ଜଲି ମାନାଣିଇଁ ୱେଚେରି ।

କଚେକା ଲୋକୁ ଶିଷ୍ୟଁ ହଚିତାରି ଇଞ୍ଜି ମାଚେରି । ମାତ୍ର ପିତର ନିଚାହାଁ ଏୱାରାଇଁ ଏଲେଇଚେସି “ନା କାତା ୱେଞ୍ଜୁ ! ଇ ବାରେ ଲୋକୁ ହଚାଲଃରି !ଇଦାଆଁ ଯୋୟେଲ ଭାବବାଦୀ କିହାମାନି ଭାବବାଣୀ ସଫଳ ଆତେ, ଏମିନିତାଣା ମାହାପୁରୁ ଜଲାମାଚେସି “ଶେଷାବେଲାତା, ନାନୁ ନା ଆତ୍ମା ୱାକ୍ଇଁ ।”

“ହେ ଇସ୍ରାୟେଲତି ଲୋକୁ, ଯୀଶୁ ର ଲକୁ ମାଚେସି ଏମିନିଗାଟାସି ମାହାପୁରୁତି ବ୍ଡ଼ାୟୁ ତଲେ ହାରେକା କାଜା କାମା ଅଡ଼େ କାବା ଆନି କାମା ବାରେ କିତେସି, ଏମିନାଣୀ ମିରୁ ମେସାମାଞ୍ଜେରି ଅଡ଼େ ପୁଞ୍ଜାମାଞ୍ଜେରି । ମାତ୍ର ମିରୁ ତାଂଗେ କ୍ରୁଶତା ପାଇତେରି !”

“ଯୀଶୁ ହାତିହିଁ ଜିକେଏ, ମାହାପୁରୁ ତାଂଗେ ହାକିଟି ନିଟ୍ହେସି । ଇଦି ଏ ଭାବବାଣୀ ସଫଳ କିନେ, ଏନାଆଁ ଜଲିନେ ‘ନିନୁ ନି ଦାର୍ମୁ ଲୋକୁ ନକିତା ଉଣା ଆହାଲି ହିଃଅତି ।‘ ମାହାପୁରୁ ଯେ ଯୀଶୁଇଁ ୱେଣ୍ଡେଏ ଜୀୱୁ ହିହାମାନେସି, ମାମ୍ବୁ ସାକୀ ମାନମି ।‘

“ନେଏଁ ଯୀଶୁ ଆବାତି ଟିଇନି ଟଟ କୁଗା ମାନେସି । ଅଡ଼େ ଯୀଶୁ ଏନିକିହିଁ ପବିତ୍ରଆତ୍ମାଇଁ ପାଣ୍ଡାନେସି ଇଞ୍ଜି ଜଲାମାଞ୍ଜାତେସି, ଏଲେକିଁଏ ପବିତ୍ରଆତ୍ମାଇଁ ପାଣ୍ଡାତେସି । ନେଏଁ ମିରୁ ଏମିନି କାତା ମେସିମାଞ୍ଜେରି ଅଡ଼େ ୱେଞ୍ଜିମାଜେରି ଇ ବାରେ ପବିତ୍ରଆତ୍ମା କିହାମାନେ ।”

“ଇ ଯୀଶୁଇଁ ମିରୁ କ୍ରୁଶତା ପାୟାମାଞ୍ଜେରି । ମାତ୍ର ସାତେଏ ପୁଞ୍ଜୁ ଯେ ମାହାପୁରୁ ଯୀଶୁଇଁ ରିଆରି ମାହାପୁରୁ ଅଡ଼େ ଖ୍ରୀଷ୍ଟ କିହାମାନେରି !”

ଲୋକୁ ପିତରତି କାତାଇଁ ୱେଚେରି ଅଡ଼େ ଏୱାସି ଜଲାମାନି କାତା ତାକି ହାରେକା ବିତ୍ରା ହଟେ । ଏଦାଆଁ ତାକି ଏୱାରି ପିତର ଅଡ଼େ ଏଟ୍କା ଶିଷ୍ୟଁଇଁ ୱେଚେରି “ତାଇୟାଁ, ମାର ଏନାଆଁ କିନ ?”

ପିତର ଏୱାରାଇଁ ଏଲେଇଚେସି “ମିରୁ ବାରେ ଜାଣାତେରି ଯୀଶୁ ମାହାପୁରୁ ଦରୁ ତଲେ ଡୁବନ ଅଦୁ ଏନିକିକି ମାହାପୁରୁ ମି ପାପୁଟି କ୍ଷମା କିୟାନେସି । ଏଦାଆଁ ଜେଚ ଏୱାସି ପବିତ୍ରଆତ୍ମାତି ଦାନା ହିୟାନେସି ।”

୩୦୦୦ଲୋକୁ ଆନେରି, ପିତର ଜଲାମାନି କାତାଇଁ ନାମାହାଁ ଯୀଶୁତି ଶିଷ୍ୟଁ ଆତେରି । ଏୱାରି ନାମାହାଁ ଯିରୁଶାଲମତା ମାନି ମଣ୍ଡଳୀତି ର ବାଗା ଆତେରି ।

ଶିଷ୍ୟଁୟାଁ ସବୁବେଲା ନକେଃତି ଶିଷ୍ୟଁତି ଜାପ୍ନାଣୀଁଇଁ ୱେଞ୍ଜାଲି ମାଠ୍ହେରି, ରହେଁଏ ଜୀୱୁ ତାକି କିତେରି, ରହେଁଏ ଚିଚେରି, ଅଡ଼େ ରହେଁଏ ପ୍ରାତନା କିତେରି । ଏୱାରି ରହେଁଏ ମାହାପୁରୁତି ଗାଉରମି କିହାଲି ରାହାଁ ଆତେରି ଅଡ଼େ ତାମି ୱାଇ ଏନା ଏନାଇ ମାଚେ ଏଦାଆଁ ତାମି ତାମି ବିତ୍ରା ବାଟି କିତେରି । ବାରେ ଜାଣା ନେହାଆଁ ଅଣପି ମାଚେରି । ସବୁଦିନା ହାରେକା ଲୋକୁ ନାମି ମାଚେରି ।