5. କାତା ଇଟିତି ମିର୍ ଏସି

ଦଶ ବାର୍ଷା ଡାୟୁ କିଣାନତା ୱାତି ଜେଚ ଜିକେଏ ଅବ୍ରାମ ଅଡ଼େ ସାରୀଇଁ ମିର୍କାମାସ୍କା ହିଲାଃତୁ । ଏଦାଆଁ ତାକି ଅବ୍ରାମତି ଡକ୍ରୀ ସାରୀ ଅବ୍ରାମଇଁ ଏଲେଇଚେ, “ଇ ପାତେକା ମାହାପୁରୁ ନାଙ୍ଗେ ମିର୍କା ହିୟଅଁ ଇଞ୍ଜାତେସି ଅଡ଼େ ନେଏଁ ମିର୍କା ପାଟାଲି ତାକି ନା ବାର୍ଷା ଗାଡି ଆହା ହାଜାମ୍ନେ, ଇଦି ନା ହଲିଏଣି, ହାଗାର ମାନେ । ଏଦି ନା ତାକି ମିର୍କା ଜାର୍ନା କିନେ ।

ଏଦାଆଁ ତାକି ଅବ୍ରାମ ହାଗାରଇଁ ବିହା ଆତେସି । ହାଗାରଟି ର ମିର୍ଏସି ଆତେସି ଅଡ଼େ ଅବ୍ରାମ ଏୱାଣାଇଁ ଇସମାଏଲ ଦରୁ ଇଟିତେସି । ମାତ୍ର ସାରୀ ହାଗାରଇଁ ରିଞ୍ଜିତେ ଆତେ । ଏଚେତା ଇସମାଏଲଇଁ ତେର ବାର୍ଷା ଆତେ ୱେଣ୍ଡେଏ ମାହାପୁରୁ ଅବ୍ରାମଇଁ କାତା ଆତେସି ।

ମାହାପୁରୁ ଜଲିତେସି, ”ନାନୁ ବାରେ ବ୍ଡ଼ାୟୁ ଗାଟାତେଏଁ ।“ ମି ତଲେ ନାନୁ ର ମେରା ତିଆର୍ କିଇଁ । ଅଡ଼େ ଅବ୍ରାମ ମେଣ୍ଡା କୁତାହାଁ ଜହରା କିତେସି ମାହାପୁରୁ ଜିକେଏ ଅବ୍ରାମଇଁ ଜଲିତେସି, “ନିନୁ ହାରେକା ଦେଶାତି ଆବା ଆଦି । “ନାନୁ ନିଂଗେ ଅଡ଼େ ନି ଗଚିତାରାଇଁ କିଣାନ ଦେଶାତି ଅଦିକାରା ହିୟାଇଁ, ଏୱାରି ଏମ୍ବାଆଁ ବାସା କିନେରି । ନାନୁ କାଲାକାଲାତାକି ତାମି ମାହାପୁରୁ ଆହାଁ ଡ଼ଇଇଁ । ମି ଇଜତି ବାରେ ଆବାଟିଁଇଁ ସୁନ୍ନତ କିନାଇ ମାନେ ।

ନି ଡକ୍ରୀ ସାରୀଇଁ ର ମିର୍ଏସି ଆନେସି, ”ଏୱାସି କାତା ଇଟିତି ମିର୍ଏସି ଆନେସି । “ତାନି ଦରୁ ଇସହାକ୍ ଇଟିଦେରି । ତାନି ତଲେ ନାନୁ ର ମେରା ତିଆର୍ କେପିଇଁ ଅଡ଼େ ଏଦି ର କାଜା ଦେଶା ଆନେ । ନାନୁ ଇସମାଏଲଇଁ ଜିକେଏ ର କାଜା ଦେଶା କିଇଁ, ମାତ୍ର ନା ଇଟିତି କାତା ଇସହାକ୍ ତଲେ ଡ଼ଇନେ । ଏଦାଆଁ ଜେଚ ମାହାପୁରୁ ଅବ୍ରାମ ଦରୁଇଁ ଅବ୍ରାହାମ ଦରୁ ତଲେ ବାଦ୍ଲି କିତେସି, ଏମ୍ନି ଅର୍ତ “ହାରେକା ଲୋକୁତି ଆବା”। ମାହାପୁରୁ ସାରୀତି ଦରୁଇଁ ଜିକେଏ ସାରା ଇଞ୍ଜି ବାଦ୍ଲି କିତେସି, ଏମ୍ନି ଅର୍ତ ରାଜାତି ମାଂଗା ।

ଏ ଦିନାତା ଅବ୍ରାହାମ ତାନି ଇଜତି ବାରେ ଅବାଟିଁଇଁ ସୁନ୍ନତ କିତେସି । ର ବାର୍ଷା ହାଚି ଡାୟୁ, ଅବ୍ରାହାମଇଁ ଏଚେତା ୧୦୦ବାର୍ଷା ଆତେ, ଅଡ଼େ ସାରାଇଁ ୯୦ ବାର୍ଷା ଆତେ, ସାରା ଅବ୍ରାହାମଇଁ ର କକ୍କାଣାଇଁ ଜାର୍ନା କିତେସି । ମାହାପୁରୁତି ଜଲିନି ଲେହେଁ ଏୱା ତାଂଗେ ଇସାହାକ ଇଞ୍ଜି ଦରୁ ଇଟିତେରି ।

ଏଚିବେଲା ଇସାହାକ ଦାଂଗ୍ଣେଃସି ଆତେସି, ମାହାପୁରୁ ଅବ୍ରାହାମତି ନାମୁଇଁ ପରୀକ୍ଷା କିତେସି ଅଡ଼େ ଜଲିତେସି, ” ନି ରଣ୍ଡିଏ ରଅସି ମିର୍ଏସି ଇସାହାକଇଁ ଅମୁ ଅଡ଼େ ନା ତାକି ବଳି ହିହାଲି ତାଂଗେ ପାୟାମୁ । ୱେଣ୍ଡେଏ ଅବ୍ରାହାମ ମାହାପୁରୁତି କାତା ମାନ ଆତେସି ଅଡ଼େ ଇସାହାକଇଁ ହିହାଲି ତାକି ତିଆର୍ କିତେସି ।

ଏଚିବେଲା ଅବ୍ରାହାମ ଅଡ଼େ ଇସାହାକ ପୂଜା କିନି ଟାୟୁତା ହାଚେରି, ଇସାହାକ ଆବାଇଁ ୱେଚେସି,” ପୂଜା ହିହାଲି ତାକି, ମା ଡାଗେ ୱେସ୍କା ମାନୁ ମାତ୍ର ମେଣ୍ଡା ଏମ୍ବି ମାନେ ? ” ଅବ୍ରାହାମ ୱେସ୍ତେସି,” ନା ମିର୍ଏଣାଇଁ ପୂଜା ହିହାଲି ମାହାପୁରୁ ର ମେଣ୍ଡା ହିୟାନେସି ।“

ଏଚିବେଲା ଏୱାରି ପୁଜା ହିନି ଟାୟୁତା ଏତେରି,” ଅବ୍ରାହାମ ତାନି ମିର୍ଏସି ଇସାହାକଇଁ ଦୃଶ୍ପାହାଁ ର ବେରମାଣ୍ଡା ଲାକ ତ୍ରିପ୍‌ହେସି । ଏଚିବେଲା ଏୱାସି ତାନି ମିର୍ଏଣାଇଁ ପାୟିନି ଲାକ ମାଚେ, ମାହାପୁରୁ ତାଙ୍ଗେ ଜଲିତେସି,” ହେମୁଁ “। ମିର୍ଏଣାଇଁ ଏନାଆଁ କିଃଆନି ! ନେଏ ନାନୁ ନିଂଗେ ପୁଞ୍ଜାଜାଇଁ ଯେ , ନିନୁ ନାଂଗେ ଆଜିନାଇ ମାନେ । ଏନାଆଁ ଇଚିସାରେ, ନିନୁ ନି ରଣ୍ଡିଏ ରଅସି ମିର୍ଏଣାଇଁ ନା ତାକି ଇଟାଃତି ।

ଡାଗେ ମାନି ବୁଟାତା ଡ଼ୟାନି ର ମେଣ୍ଡାଇଁ ଅବ୍ରାହାମ ମେସ୍ତେସି । ଇସାହାକ ଟାୟୁତା ମାହାପୁରୁ ମେଣ୍ଡାଇଁ ପୂଜା ହିହାଲି ତାକି ହିତେସି । ଅବ୍ରାହାମ ମେଣ୍ଡାଇଁ ର ପୁଜା ହିତିଲେହେଁ ରାହା ତଲେ ହିତେସି ।

ଏଦାଆଁ ଜେଚ ମାହାପୁରୁ ଅବ୍ରହାମଇଁ ଜଲିତେସି, “ ନିଦି ବାରେ ଇଲେହେଁ କି ରଣ୍ଡିଏ ରଅସି ମିର୍ଏଣାଁଇଁ ଜିକେଏ ହିହାଲି ମନ କିହାଂଚି ତାକି ଇଞ୍ଜି, ନାନୁ ନିଙ୍ଗେ ବର ହିହାଲି ତାକି କାତା ହିହିଞ୍ଜାଇଁ ।“ ହାଗୁତି ହୁକାଁଟିଏ ମି କୁଟୁମ୍ ତାରି ହାରେକା ଆନେରି । ଏନାଆଁ ତାକି ଇଚିସାରେ ନିନୁ ନା କାତା ନାମିତି, ନି ତାକି ଦାର୍ତିତି ବାରେ ଇଲୁ କୁଟମି ବର ବେଟା ଆନେରି ।