6. ଇସାହାକ ତାକି ମାହାପୁରୁ ହିନେସି

ଏଚିବେଲା ଅବ୍ରାହାମ ଗାଡି ବୁଢ଼୍‌ହା ଆହା ମାଚେସି, ତାନି ମିର୍ଏସି, ଇସାହାକ ପାଡା ଆହାଁ ଦାଂଣେଃଏସି ମାଚେସି । ଏଦାଆଁ ତାକି ଅବ୍ରାହାମ ତାନି ମିର୍ଏସି ଇସାହାକତି ତାକି ର ଡକ୍ରୀ ତାକା ହାଜାଲି ତାନି ଇଲୁ କୁଟମି ଏମ୍ନି ତାଣା ବାସା କିହିମାଚେରି ଏ ଟାୟୁତି ହଲିଆଁଟିଏ ରଅଣାଇଁ ପାଣ୍ଡିତେସି ।

ଗାଡି ବେଲା ତାକିତି ଜେଚ ଏମ୍ନି ଟାୟୁତା ଅବ୍ରାହାମ ଗଚିତି ଲୋକୁ ବାସା କିହିମାଚେରି ମାହାପୁରୁ ହଲିଆ ଇଁ ରିବିକାତି ଡାଗେ ଅତେସି । ଏଦି ଅବ୍ରାହାମତି ନାତି ମାଚେ ।

ରିବିକା ତାନି ଇଜତି ଲୋକୁଣି ପିସାହାଁ ଇସାହାକତି ଇଲୁତା ହଲିଆ ତଲେ ୱେଣ୍ଡା ୱାହାଲିତାକି ଆଣ୍ଡିତେ ଅଡ଼େ ଏଦି ଏନି ରେଟୁଏ ତାନି ତଲେ ଇସାହାକ ବିହା ଆତେସି ।

ହାରେକା ଦିନା ଡାୟୁ ଅବ୍ରାହାମ ହାତେସି, ଅଡ଼େ ତାନି ତଲେ ଏମ୍ନି ବାରେ କାତା ଇଟାମାଚେସି ମାହାପୁରୁ ଏ ବାରେ ମେରା ଇସାହାକଇଁ ହିତେସି । ମାହାପୁରୁ କାତା ଇଟାମାଚେସି ଯେ ଅବ୍ରାହାମତି ଗଚି ଏଜିକିହାଲି ଆଡାଃଲେ କିଇଁ, ମାତ୍ର ରିବିକା, ଇସାହାକ ତି ଡକ୍ରୀଇଁ, ମିର୍କା ମାସ୍କା ଆହିଲାଃତେ ।

ରିବିକା ତାକି ଇସାହାକ ପ୍ରାତନା କିତେସି, ଅଡ଼େ ମାହାପୁରୁ ତାଙ୍ଗେ ଜାଣ୍‌ୱାଁ ବାଣ୍ଡିତା ଆହାଲି ଏଲେଇଚେସି । ରି ମିର୍କା ଏଚିବେଲା ରିବିକାତି ବାଣ୍ଡିତା ମାଚେରି, ଏ ବେଲାଟିଏ ଏୱାରି ମାଡା ଆହିଞ୍ଚେରି, ଏଦାଆଁ ତାକି ମାହାପୁରୁଇଁ ରିବିକା ଇଦି ଏନାଇ ଆହିନେ ଇଞ୍ଜି ୱେଚେ ।

ମାହାପୁରୁ ରିବିକାଇଁ ଜଲିତେସି, “ମି ବିତ୍ରା ମାନି ରି ମିର୍କା ଟିଏ ରି ଦେଶା ହିଇଁ । ଏୱାରି ରିଆରି ମାଡା ରିୱି ଆନେରି ଅଡ଼େ କାଜା ମିର୍ଏସି ଇଚାଣାଇଁ ସେବା କିନେସି ।

ଏଚିବେଲା ରିବିକାତି ମିର୍ଏସି ଜାର୍ନା ଆତେସି, କାଜା ମିର୍ଏଣାତି ରଙ୍ଗ ରଙ୍ଗ ଅଡ଼େ ବାଣା ଆଙ୍ଗା ଅଡ଼େ ଏୱାରି ତାନି ଦରୁ ଏଷୌ ଇଟିତେସି । ଏଦାଆଁ ଜେଚ କକାଣିଡାଲୁଇଁ ଆସାହାଁ ୱାତେସି, ଏୱାରି ତାନି ଦରୁ ଯାକୁବ ହିତେସି ।