7. ଯାକୁବଇଁ ମାହାପୁରୁ ବର ହିନେସି

ଏନିକି କକ୍‌କାରି ପାଡା ଆହାଲି ମାଠ୍ହେରି, ଇଲୁତା ଯାକୁବ ଡ଼ୟାଲି ନେହି ହଚିମାଚେ, ମାତ୍ର ଏଷୌଇଁ ବେଟା ହାଜାଲି ବେସି ନେହିଁ ହଚିମାଚେ । ରିବିକା ଯାକୁବଇଁ ଜୀୱୁ ନହିମାଚେ, ମାତ୍ର ଇସାହାକ ଏଷୌଇଁ ଜୀୱୁ ନହିମାଚେସି ।

ର ଦିନା, ଏଚିବେଲା ଏଷୌ ବେଟାଟିଏ ୱାତେସି, ଏୱାସି ଗାଡି ହାକି ଆହାମାଚେସି । ଏଷୌ ଯାକୁବଇଁ ଏଲେଇଚେସି,” ନିନୁ ତିଆର୍ କିହାନି କାଦିଟି ନାଙ୍ଗେ ରଚାଣି ହିୟାମୁ“ । ଯାକୁବ ଜଲିତେସି, ନକେଏ, ନିକାଜା ମିର୍ଏଣା ଅଦିକାରା ନାଂଗେ ହିୟାମୁ । ଏଦାଆଁ ତାକି ଏଷୌ ତାନି କାଜା ମିର୍ଏଣାତି ଅଦିକାରା ଯାକୁବଇଁ ହିହାମାଚେସି । ଏଦାଆଁଜେଚ ଯାକୁବ ରଚାଣି କାଦି ହିତେସି ।

ଏଷୌଇଁ ଇସାହାକ ତାନି ବର ହିହାଲି ଅଣ୍‌ପିତେସି । ମାତ୍ର, ଏୱାସି ଏଦାଆଁ କିନି ନକେଏ, ଯାକୁବ ଏଷୌ ଲେହେଁ ଆହାଲି ରିବିକା ଅଡ଼େ ଯାକୁବ ତାଙ୍ଗେ ଦୁକୁ ହିହାମାଚେସି । ଇସାହାକ ବୁଢ଼୍‌ହା ଆହା ମାଚେସି ଅଡ଼େ ଏୱାସି ମେସାଲି ଆଡିଲାଃତେସି । ଏଦାଆଁ ତାକି ଯାକୁବ ଗରିତି ତଲୁ ହେରକିତା ଅଡ଼େ କେୟୁତା ପ୍‌ଡ଼ିକ୍‌ହା କଡାହାଁ ଅଡ଼େ ଏଷୌତି ହେମ୍ବରି ମେଦିତେସି ।

ଇସାହାକ ଦାରି ହାଜାନା ଯାକୁବ ୱେସ୍ତେସି,” ନାନୁ ଏଷୌତେଏଁ “। ନାନୁ ୱାହା ମାଇଁ, ଏଦାଆଁ ତାକି ନିନୁ ନାଙ୍ଗେ ବର ହିୟାଦି । ଇସାହାକ ଏଚିବେଲା ହେମ୍ବରିତି ଗାଂଦା ଅଡ଼େ ଗରିତି ତଲୁ ଡିଗିତେସି, ଏୱାସି ଏଷୌ ଅଣପିତେସି ଅଡ଼େ ତାଙ୍ଗେ ବର ହିତେସି ।

ଏଷୌ ଯାକୁବଇଁ ଅପାଃତେସି ଏନାଆତାକି ଇଚିସାରେ ଯାକୁବ ତାନି କାଜା ମିର୍ଏଣା ଅଦିକାରା ଅଡ଼େ ତାନି ବର ସରୁ କିହାଁମାଚେସି । ଏଦାଆଁ ତାକି ତାନି ଆବାତି ହାକି ଜେଚ ଯାକୁବଇଁ ପାୟାଲି ତିରି କିତେସି ।

ମାତ୍ର ରିବିକା ଏଷୌତି ତିରି କିତାଇ ପୁଂଜାଲି ଆଡିତେ । ଅଡ଼େ ଏଦି ଅଡ଼େ ଇସାହାକ, ଯାକୁବଇଁ ହେକ ତାମି କୁଟମି ତାଣା ଡ଼ୟାଲି ପାଣ୍ଡିତୁ ।

ଯାକୁବ ରିବିକାତି ଇଜତି ଲୋକୁ ତଲେ ହାରେକା ବାର୍ଷା ଡ଼ଇତେସି । ଏ ବେଲା ଏୱାସି ବିହା ଆତେସି ଅଡ଼େ ତାନି ବାରା ଜାଣା ମିର୍କା ଅଡ଼େ ର ପଦା ମାଚୁ ।

ତାନି ଇଲୁ କିଣାନ ଟିଏ କଡ଼େ ବାର୍ଷା ଡ଼ଇତି ଜେଚ, ଯାକୁବ ତାନି ଇଜତି ଲୋକୁ ତଲେ, ତାନି ହଲିଆଁ ଅଡ଼େ ତାନି କଡି ଗରିଁ ତଲେ ଏମ୍ବାଆଁ ୱେଣ୍ଡିତେସି ।

ଯାକୁବ ହାରେକା ଆଜିମାଚେସି ଏନାଆ ତାକି ଇଚିସାରେ ଏୱାସି ଅଣପିମାଚେସି ଯେ ନେଏ ପାତେକା ଏଷୌ ତାଙ୍ଗେ ପାୟାଲି ଅଣପିମାଚେସି । ଏଦାଆଁ ତାକି ଏୱାସି କଡି ଗରିଁଣିଁ ଏଷୌଇଁ ପାଣ୍ଡିତେସି । ଆମିନି ହଲିଆଁ କଡି ଗରିଁଣି ଚାଚାମାଚେସି ଏଷୌଇଁ ଏଲେଇଚେସି, ”ନି ହଲିଆ, ଯାକୁବ, ନିଙ୍ଗେ ଇ କଡି ଗରିଣିଁ ହିହାମାଚେସି । ଏୱାସି ଜିକି ୱାହିମାନେସି ।

ମାତ୍ର ଏଷୌ ଯାକୁବଇଁ କ୍ଷେମା ହିହାମାଚେସି, ଅଡ଼େ ଏୱାରି ଯାହାର ତାକି ରାହାଁତାଲେ ମେସାଲିତାକି ଅଣପିମାଚେସି । ଏଦାଆଁ ଜେଚ ଯାକୁବ କିଣାନତା ସୁକୁ ତଲେ ବାସା କିତେରି ।ଇଦାଆଁ ଜେଚ ଇସାହାକ ହାତେସି, ଅଡ଼େ ଏଷୌ ଅଡ଼େ ଯାକୁବ ତାଙ୍ଗେ ମୁସ୍ତେରି । ମାହାପୁରୁ ଏମିନି ମେରାତି କାତାଇଟାହାଁ ଅବ୍ରାହାମଇଁ ଜଲାମାଚେସି, ନେଏ ଇସାହାକଟିଏ ଯାକୁବ କେୟୁତା ହିପ୍‌କି ଆତେ ।