46. Saulus Menjedi Pengekot Yesus

Adek soang jenten bename Saulus nang tidek pecaye kat Yesus. Sebegei soang pemude, diek menjage jubah u'ang-u'ang nang munoh Stefanus. Abes etok diek nyikse u'ang-u'ang pecaye. Diek pegi da'i umah ke umah kat Yerusalem ontok nangkap jenten dan betine dan memenjaekan mikek diek. abes etok imam besa megi ijin kat Saulus ontok pegi kat kote Damsyik. Diek nyuoh Saulus nangkap pa'a pengikot Yesus kat sane dan mawak mikek diek belek ke Yerusalem.

Make Saulus pon bengket ke Damsyik. Tepat sebelom diek samoai kat kote etok, sebueh cahaye teang kat langet besina kat sekelileng diek, dan diek pon jetoh ke tanah. Saulus kedenga seseoang becakap, "Saulus! Saulus! ngapek dikau nyike Aku?" Saulus betanye, "Sapek dikau, Guru?" Yesus nyewab, "Akula Yesus, Dikau nyikse Aku!"

Sa'at Saulus bangon, diek tidek depet nengok. Kawan-kawan diek a'us mapah diek ka Damsyik. Saulus tidek makandan minom selame tige a'i.

Kat Damsyik ade seoang murid nang bename Ananias. Allah bekate kepade diek, "Pegilah kat umah tempat Saulus tinggal. taroklah tangan dikau kat kepale diek supaye diek depet nengok lagi." tetapi Ananias becakap, "Guru, aku sudeh kedenga macam mane u'ang ekek nyikse u'ang-u'ang pecaye." Allah nyaweb. "Pegilah, aku sudeh mileh diek ontok ngaba name-Ku deket u'ang-u'ang Yahudi dan deket u'ang-u'ang da'i suku-suku bangse laen. Diek akan menderite benyak hal kene name-Aku."

Abes etok Ananias pegi kat Saulus dan numpang tangan diek kat atas Saulus dan becakap. "Yesus, nang telah nampak kan di'i kat dikau delem pejalanan dikau kat sini, sudeh nyuoh aku kat dikau, supaye dikau depet nengok legi , dan supaye Roh Kudus menoh dikau." Sa'at etok juge Saulus depet nengok belek, dan Ananias membaptis diek. Abes etok Saulus makan dan menjedi kuat belek.

Saat etok jugek, Saulus mulei bekotbah kat u'ang-u'ang Yahudi kat Damsyik. Diek becakap, "Yesus adelah Anak Allah!" U'ang-u'ang Yahudi kagom kene Saulus telah nyobe munoh u'ang-u'ang pecaye, dan seka'ang diek pecaey kat Yesus! Saulus bedebat dengen u'ang-u'ang Yahudi. Diek nunjokkan bahwe Yesus adelah Mesias.

Abes bebeape a'i, u'ang-u'ang Yahudi muet rencane ontok munoh Saulus. Mikek diek ngirem u'ang ontok ngawas diek kat gerbang kote ontok memunoh diek. Tetapi Saulus nenga tentang rencane etok, dan kawan-kawandiek nolong diek melai di'i pade suatu malam mikek diek nuronkan diek lewat tembok kote dengen sebueh age. Abes Saulus melai di'i da'i Damsyik, diek te'os bekotbah tentang Yesus.

Saulus pegi kat Yerusalem ontok bejumpe dengenpa'a rasul, tetapi mikek diek takot kat diek. Kemudien seu'ang pecaye bename Barnabas mawak Saulus kat pa'a rasul. DIek nyitekan kat mikek diek macam mane Saulus telah bekotbah dengen berani kat Damsyik. Abes etok, pa'a rasul menime Saulus.

Bebeape u'ang pecaye nang melai di'i da'i penyikse kat Yerusalem pegi jaoh kat kote Antiokhia dan bekotbah tentang Yesus. Sepaoh besa u'ang kat Antiokhia bukenla u'ang Yahudi, tetapi ontok petame kali diek, u'ang-u'ang nang bukan Yahudi menjedi u'ang pecaye. Barnabas dan Saulus pegi kat sane ontok mengaja u'ang-u'ang nang ba'u pecaye lebeh benyak lagi tentang Yesus petame kali desebot sebegei u'ang-u'ang Kristen.'

Suatu a'i, pa'a pengikot Yesus kat Antiokhia sedang bepuase dan bedoa. Roh Kudus becakap kat mikek diek, "Khususkanlah begi-Ku Barnabas dan Saulus ontok muet keje nang aku suoh ontok mikek diek buet. "Make jemaat kat Antiokhia mendoakan Barnabas dan Saulus dan numpangken tangan kat atas mikek diek. Abes etok mikek diek mengutos keduenye ontok ngabakan kaba be'ek tentang Yesus kat mane-mane tempat. Barnabas dan Saulus ngaja u'ang-u'ang nang menjedi pecaye kat Yesus.