1. ୧. ମାପ୍ରୁ ଦେଶେମ୍ଦିଙ୍ଗ୍ ତିଆର୍ କିତି କାତାନି
ଇୟାୱାଜା ମାପ୍ରୁ ଆରାମ୍ଦାନ୍ ୱିଜୁ ବିଷୟ୍ଦିଙ୍ଗ୍ ତିଆର୍ କିତାନ୍ ଗାନି। ମାପ୍ରୁ ଆରୁ ଦିନାମ୍ ଦୁନିୟା ମାରି ଆବେମାନି ୱିଜୁ ବିଷୟଦିଙ୍ଗ୍ ତିଆର୍ କିତାନ୍। ଏସେଙ୍ଗ୍ ମାପ୍ରୁ ଦୁନିୟାଦିଙ୍ଗ୍ ତିଆର୍ କିତାନ୍, ତିଆର୍କିତି ୱେନ୍କା ଦୁନିୟା ସିକାଟି ମାରି ୱିଡ଼ିମାହାତ୍, ମାତର୍ ମାପ୍ରୁ ଇୟେଲ୍ ବା ଆବେନୁ ଏମେ ବିଷୟ୍ ବା ତିଆରକିଏଣ୍ତା ମାର୍ହାନ୍। ମାରି ମାପ୍ରୁଦି ଆତ୍ମା ଏରୁ ମୁସ୍କୁ ବୁଲାଜି ମାର୍ହାନ୍।
ଦାନିୱେନ୍କା ମାପ୍ରୁ ୱେର୍ତାନ୍, “ ଜାୟିଆପିତ୍!” ମାରି ଜାୟି ଆତାତ୍। ମାପ୍ରୁ ସୁଡ଼୍ତାନ୍ ଜେ ଜାୟି ନେଗେଣ୍ଡ୍ ମାର୍ହାତ୍ ମାରି ଆୟା ଜାୟିଦିଙ୍ଗ୍ “ଦିନାମ୍” ଇଜି ଦରୁ ସିତାନ୍। ମାରି ୱାଣ୍ତ୍ରୁ ଜାୟିଦିଙ୍ଗ୍ ସିକାଟିଦାନ୍ ୱେହେକିତାନ୍ ଦାନିଙ୍ଗ୍ ୱାଣ୍ଡ୍ରୁ “ନାଡ଼ା” ଇଜି ଦରୁ ସିତାନ୍। ତିଆର୍ କିତି ପର୍ତୁମ୍ ଦିନାମ୍ ଜାୟିଦିଙ୍ଗ୍ ମାପ୍ରୁ ତିଆର୍ କିତାନ୍।
ତିଆର୍ କିତି ରୁଣ୍ଡି ଦିନାମ୍ ମାପ୍ରୁ ୱେର୍ତାନ୍, “ ଏରୁ ମୁସ୍କୁ ଉଣ୍ଡ୍ରେ ୱିଡ଼ି ବାଡି ଆପିତ୍।” ମାରି ୱିଡ଼ି ବାଡି ଆତାତ୍। ମାପ୍ରୁ ଆୟା ୱିଡ଼ି ବାଡିଦିଙ୍ଗ୍ “ବାଦଡ଼୍” ଇଜି ଦରୁ ସିତାନ୍।
ତିଆର୍ କିତି ରୁଣ୍ଡି ଦିନାମ୍ ମାପ୍ରୁ ୱେର୍ତାନ୍, “ ଏରୁ ଉନ୍ଡ୍ରେବାନୁ ଉଣ୍ତାପିତ୍ ମାରି ୱାହ୍ତିବୁମି ତରିତ୍” ୱାଣ୍ତ୍ରୁ ଆୟା ୱାହ୍ତିବୁମିଦିଙ୍ଗ୍ “ପୁର୍ତିବି” ମାରି ଏରୁଦିଙ୍ଗ୍ “ସାମ୍ଦୁର୍” ଇଜି ଦରୁ ସିତାନ୍। ମାପ୍ରୁ ସୁଡ଼୍ତାନ୍ ଜେ ୱାଣ୍ତ୍ରୁ ଏମେକେଙ୍ଗ୍ ତିଆର୍ କିତାମାର୍ହାନ୍ ଆୟାକେଙ୍ଗ୍ ୱିଜୁ ନେଗେଣ୍ତ୍ ମାହେ।
ମାରି ମାପ୍ରୁ ୱେର୍ତାନ୍, “ପୁର୍ତିବି ୱିଜୁ ରୋକମ୍ତି ମାରାକୁ ଲାଟାବୁଟେଙ୍ଗ୍ ନେରିତ୍।” ମାରି ଇୱାଜାନେ ଆତାତ୍। ମାପ୍ରୁ ସୁଡ଼୍ତାନ୍ ଜେ ୱାଣ୍ତ୍ରୁ ଏମେକା ତିଆର୍କିତା ମାର୍ହାନ୍ ଆକା ନେଗେଣ୍ଡ୍ ମାର୍ହାତ୍।
ତିଆର୍କିଜି ନାଲ୍ଗି ଦିନାମ୍ ମାପ୍ରୁ ୱେର୍ତାନ୍, “ବାଦଢ୍ଦୁ ଜାୟି ଆପିତ୍” ମାରି ୱେଡ଼ା, ଲେନ୍ଜୁ ମାରି ସୁକେଙ୍ଗ୍ ତରିତେ। ମାପ୍ରୁ ୱାନ୍କାଙ୍ଗ୍ ପୁର୍ତିବିମୁସ୍କୁ ଜାୟି ସିନି ୱାନ୍ଦିଙ୍ଗ୍ ମାରି ୱେଡ଼େ ନାଡ଼ା, କାଡ଼ା ମାରି ବର୍ଷଦିଙ୍ଗ୍ ଆଇକା କିନିୱାନ୍ଦିଙ୍ଗ୍ ତିଆର୍ କିତାନ୍।
ଆଇଦୁ ଦିନାମ୍ ମାପ୍ରୁ ୱେର୍ତାନ୍, ଏରୁଦୁମାନି ଜାନ୍ତୁଙ୍ଗ୍, ମାରି ବାଦଢ୍ଦୁ ପଟିଙ୍ଗ୍ ଇମିଉ”। ଇୱାଜାନେ ୱାଣ୍ଡ୍ରୁ ଏରୁଦୁ ପଙ୍ଗ୍ରାନି ୱିଜୁ ଜାନ୍ତୁଦିଙ୍ଗ୍ ମାରି ପଟିଙ୍ଗ୍ ତିଆର କିତାନ୍। ମାପ୍ରୁ ସୁଡ଼୍ତାନ୍ ଜେ ଇକେଙ୍ଗ୍ ନେଗେଣ୍ଡ୍ ମାର୍ହାତ୍ ମାରି ୱାନ୍କାଙ୍ଗ୍ ଆର୍ଶିବାଦ୍ କିତାନ୍।
ତିଆର୍କିତି ଆରୁ ଦିନାମ୍ ମାପ୍ରୁ ୱେର୍ତାନ୍, “ଭୁମିଦୁ ମାନ୍ଜିନି ୱିଜୁ ରୋକମ୍ତି ଜନ୍ତୁଙ୍ଗ୍ ଆପିଉ।” ମାରି ମାପ୍ରୁ ୱେର୍ତି ଇସାବ୍ଦାନ୍ ଆୟାୱାଜା ଆତାତ୍। ଏସୋ ଜାନ୍ତୁଙ୍ଗ୍ ଇଣ୍ଡ୍ର ପସା କିନିକେଙ୍ଗ୍ ମାହେ, ମାରି ଭୁମିଦୁ ବୁଲାନିକେଙ୍ଗ୍, ମାରି ଗରୋତୁ ମାନ୍ଜିନି ଜାନ୍ତୁଙ୍ଗ୍ ମାହେ। ମାରି ମାପ୍ରୁ ସୁଡ଼୍ତାନ୍ ଜେ ଇକା ନେଗେଣ୍ଡ୍ ମାର୍ହାତ୍।
ମାରି ମାପ୍ରୁ ୱେର୍ତାନ୍, “ରାଆ ମାଡୁ ଲୋକାଙ୍ଗ୍ ନିଜେ ମୁର୍ତିଦାନ୍ ମାରି ନିଜେ ସମାନ୍ଦାନ୍ ତିଆର୍କିନାଟ୍। ୱାରୁ ପୁର୍ତିବି ମୁସ୍କୁ ମାରି ୱିଜୁ ଜାନ୍ତୁଙ୍ଗାଁ ମୁସ୍କୁ ଶାସନ୍ କିନାନ୍।”
ଆୟାୱାନ୍ଦିଙ୍ଗ୍ ମାପ୍ରୁ ସିକ୍ଲା ଅସି ଲୋକୁଦିଙ୍ଗ୍ ତିଆର୍କିତାନ୍ ମାରି ୱାନିଡାଗ୍ରୁ ଜିଉଦି ଫୁଣ୍ଡା ତୁବିତାନ୍। ଇଆ ଲୋକୁଦି ଦୋରୁ ଆଦମ ମାର୍ହାତ୍। ଆଦମ୍ ମାଣ୍ଡ୍ରେଙ୍ଗ୍ ମାପ୍ରୁ ଉଣ୍ଡ୍ରେ ପେରି ଡଡି ତିଆର୍ କିତାନ୍ ମାରି଼ ଦାନିଙ୍ଗ୍ ଜାତୁନ୍ କିଦେଙ୍ଗ୍ ଆଦମ୍ଦିଙ୍ଗ୍ ଆବେ ଇଟ୍ତାନ୍।
ଆୟା ଡଡି ନାଣ୍ମି ମାପ୍ରୁ ରୁଣ୍ଡି ନେଗି ମାରାକୁ ଉହ୍ତାନ୍ - ଜୀଉଦି ମାରାନୁ ମାରି ନେଗେଣ୍ଡ୍ ମାରି ସେଏଣ୍ଡ୍ଦି ବୁଦିଦି ମାରାନୁ। ମାପ୍ରୁ ଆଦମଦିଙ୍ଗ୍ ୱେର୍ତାନ୍ ଗାନି ୱାଣ୍ଡ୍ରୁ ଡଡିଦି ଜିଉଦି ମାରାନୁ ମାରି ନେଗେଣ୍ଡ୍ ମାରି ସେଏଣ୍ଡ୍ଦି ବୁଦିଦି ମାରାନୁଦିଙ୍ଗ୍ ଢିସ୍ସି ଆଇ ମାରାକାଣି ୱିଜୁ କାଏଙ୍ଗ୍ ତିନିଦେର୍। ଜଦି ୱାଣ୍ଡ୍ରୁ ଆୟା ମାରାତି କାଏଙ୍ଗ୍ ତିନାନ୍ ମାରି ୱାଣ୍ତ୍ରୁ ସାନାନ୍।
ମାରି ମାପ୍ରୁ ୱେର୍ତାନ୍, “ଲୋକୁ ଅରେନ୍ଡ୍ରେ ମାନ୍ଣ୍ଡ୍ରେଙ୍ଗ୍ ନେଗେଣ୍ଡ୍ ସିଲେ।” ମାରି ଏମେକେଙ୍ଗ୍ବା ଜାନ୍ତୁଙ୍ଗ୍ ୱାନି ୱାଲେ ତଡ଼ୁ ଆଦେଙ୍ଗ୍ ଆଟ୍ଉତେ।
ଇୟାୱାଜା ମାପ୍ରୁ ଆଦମ୍ଦିଙ୍ଗ୍ ନାଣ୍ଡ ସୁଷ୍କାଣ୍କାଙ୍ଗ୍ ତେର୍ପ୍ତାନ୍। ଦାନିୱେନ୍କା ମାପ୍ରୁ ଆଦମ୍ଦି ଉଣ୍ଡ୍ରି ପାଞ୍ଜ୍ରା ପେଡ଼େନୁ ଅସି ଦାନିଙ୍ଗ୍ ଉଣ୍ଡ୍ରି ଆଇଲି କଢଦିଙ୍ଗ୍ ତିଆର୍ କିତାନ୍ ମାରି ଆଇଲି କଢୋଦିଙ୍ଗ୍ ଆଦମ୍ ଡାଗ୍ରୁ ତାତାନ୍।
ମାରି ଆଦମ୍ ଦାନିଙ୍ଗ୍ ସୁଡ଼୍ତାନ୍ ନେ ୱେର୍ତାନ୍, “ଇଏଲ୍ ଆତାତ୍! ୱାଦୁ ବା ନାୱାଜା ନେ! ଦିନିଙ୍ଗ୍ ଆଇମା ଇଜି ୱେହ୍ନାର୍, ମାତର୍ ୱାଦୁ ମେମାର୍ କୋଢଦାନ୍ ତିଆର୍ ଆତାତ୍।” ଇୟାୱାନ୍ଦି୍ଗ୍ ମେମାର୍ କୋଢ ନିଜେ ୟାୟା ବୁବାଦିଙ୍ଗ୍ ଢିସ୍ସି ସିଜି ମାରି ନିଜେ ଆଡ଼୍ସିୱାଲେ ଉଣ୍ଡ୍ରେ ଆଜିନାର୍।
ମାପ୍ରୁ ମେମାରଦିଙ୍ଗ୍ ମାରି ଆଇଲି କୋଢଦିଙ୍ଗ୍ ନିଜେ ରୁପ୍ଦାନ୍ ତିଆର୍ କିତାନ୍। ୱାଣ୍ତ୍ରୁ ୱାରିଙ୍ଗ୍ ଆର୍ଶିବାଦ୍ କିଜି ମାରି ୱେର୍ତାନ୍, “ନାଣ୍ଡ କୋଢ କକ୍ରାର୍ ମାରି ମାରିନ୍ ନି ଗାଡ଼୍ସି ଜନମ୍ କିଦୁ ମାରି ପୁର୍ତିବିଦୁ ପୁରା କିଦୁ!” ମାରି ମାପ୍ରୁ ସୁଡ଼୍ତାନ୍ନେ ଏମେୱିଜୁ ତିଆର୍ କିତାମାର୍ହାନ୍ ଆକା ୱିଜୁ ନେଗେଣ୍ଡ୍ ମାର୍ହାତ୍, ମାରି ୱାଣ୍ତ୍ରୁ ୱିଜୁଦାନିଙ୍ଗ୍ ନାଣ୍ଡ ସାର୍ଦା ମାର୍ହାନ୍। ଇୟା ୱିଜୁ ଆରୁ ଦିନାମ୍ ଲୋଇ ତିଆର୍ ଆତାମାର୍ହାତ୍।
ଏସେଙ୍ଗ୍ ଏଢୁ ଦିନାମ୍ ଆତାତ୍ ମାରି ଇନିକା ୱିଜୁ ମାପ୍ରୁ କିଜିମାର୍ହାନ୍ ୱାଣ୍ତ୍ରୁ ଆୟାୱିଜୁ ପାଣିଦିଙ୍ଗ୍ ୱିସ୍ତାନ୍। ୱାଣ୍ତ୍ରୁ ଏଢୁ ଦିନାମ୍ଦିଙ୍ଗ୍ ଆର୍ଶିବାଦ୍ କିତାନ୍ ମାରି ଦାନିଙ୍ଗ୍ ପବିତ୍ର କିତାନ୍, ମାରି ଆୟା ଦିନାମ୍ ୱାଣ୍ଡ୍ରୁ ୱିଜୁ ଜିନିସ୍ ତିଆର୍ କିଜି ୱିସ୍ତା ମାର୍ହାନ୍। ଇୟାୱାଜା ମାପ୍ରୁ ଦୁନିୟାଦୁ ମାରି ଆବେନୁ ମାହି ୱିଜୁ ବିଷୟ୍ଦିଙ୍ଗ୍ ତିଆର୍ କିତାନ୍।
ଆଦି ପୁସ୍ତକ ୧-୨ ଦାନ୍ ବାଇବଲ୍ଦି ଉଣ୍ଡ୍ରି କାତାନି
Free to use, adapt, and share under an open license (CC BY-SA 4.0).