2. ୨. ପାପାମ୍ ସାମ୍ସାରାମ୍ ଲୋଇ ଡ଼ୁଗିତାତ୍
ଆଦମ୍ ମାରି ଦାନି ଆଡ଼୍ସି ମାପ୍ରୁଦି ବାଣାନ୍ ୱାନିୱାନ୍ଦିଙ୍ଗ୍ ତିଆର୍ କିତିମାହିକା ନେଗି ଡଡିଦୁ ସାର୍ଦା ଦାନ୍ ମାନ୍ଜି ମାର୍ହାର। ୱାରିଲୋଇହାନ୍ ଏୟେର୍ବା ସକାପାସିଆ ଆରାଏଜି ମାର୍ହାର୍, ମାରିବା ଆୟାମାଟା ୱାରି ଲୋଇହାନ୍ ଏୟେଙ୍ଗ୍ବା ସେମାର୍ ସିଲେଣ୍ତା ମାର୍ହାତ୍, ମାତର୍ ସାମ୍ସାରାମ୍ଦୁ ପାପାମ୍ ସିଲେଣ୍ଡା ମାର୍ହାତ୍। ୱାରୁ ୱିଜୁୱାଲେ ଡଡିଦୁ ବୁଲାଜି ମାର୍ହାର୍ ମାରି ମାପ୍ରୁଦିୱାଲେ ମାଟା ୱାର୍ଗିଜି ମାର୍ହାର୍।
ମାତର୍ ଆୟା ଡଡିଦୁ ଉଣ୍ଡ୍ରେ ସାରାସୁ ମାର୍ହାତ୍। ଆକାତ୍ ବିସ୍ତାର୍ ସାଲାକି ମାର୍ହାତ୍। ଆକାତ୍ ଆୟା ଆଡ଼୍ସିଙ୍ଗ୍ ୱେନ୍ବାତାତ୍, “ଇନିକା ନିଜାମେନେ ମାପ୍ରୁ ନିଙ୍ଗିଁ ଇୟା ଡଡିଦି ଇନିକାବା ମାରାତି କାଏଙ୍ଗ୍ ତିଣ୍ଡ୍ରେଙ୍ଗ୍ ମନାକିତା ମାର୍ହାନ୍ ନା?”
ଆୟା ଆଡ଼୍ସି ୱେହ୍ତାତ୍, “ମାପ୍ରୁ ମାଙ୍ଗିଁ ୱେତାମାନା ଜେ ମାଡୁ ଆୟା ନେଗେଣ୍ଡ୍ ବା ସେଏଣ୍ଡ୍ଦି ବୁଦିଦି ମାରାନୁ କାଏଙ୍ଗ୍ ଡ଼ିସ୍ସି ଏମେ ମାରାତି କାଏଙ୍ଗ୍ବା ତିନ୍ଡ୍ରେଙ୍ଗ୍ ଆଟ୍ନି। ମାପ୍ରୁ ମାଙ୍ଗିଁ ୱେର୍ତାମାନାନ୍ ଜେ ଜଦି ମିରୁ ଆୟା କାଏଙ୍ଗ୍ ତିନିଙ୍ଗାଁ ବା ମୁଟ୍ନିଦେର୍ ବା ମାରି ମିରୁ ସାନିଦେର୍।”
ଆୟା ସାରାସୁ ଆଡ଼୍ସିଙ୍ଗ୍ ୱେର୍ତାତ୍, “ଇୟାକା ନିଜାମ୍ ସିଲେତ୍! ମିରୁ ସାଇଦେର୍। ମାପ୍ରୁ ନେସ୍ତାମାନାନ୍ ଜେ ଏସ୍ତିୱାଲେ ମିରୁ ଆୟା କାଏଙ୍ଗ୍ ତିନିଦେର୍, ମିରୁ ମାପ୍ରୁ ସମାନ୍ ଆନିଦେର୍ ମାରି ୱାନିୱାଜା ନେଗେଣ୍ଡ୍ ବା ସେଏଣ୍ଡ୍ଦିଙ୍ଗ୍ ନେସ୍ତେଙ୍ଗ୍ ଆଟ୍ନିଦେର୍।”
ଆୟା ଆଡ଼୍ସି ସୁଡ଼୍ତାତ୍ ଜେ ଆୟା ମାରାତିକାୟା ତିନ୍ଣ୍ତ୍ରେଙ୍ଗ୍ ନେଗେଣ୍ଡ୍ ମାରି ସୁଡ଼୍ଦେଙ୍ଗ୍ ମାନ୍ସୁଦିଙ୍ଗ୍ ମୁଟ୍ତିଲେକେନ୍ ମାର୍ହାତ୍। ଆକାତ୍ବା ବୁଦିଆଦେଙ୍ଗ୍ ମାନ୍ସୁକିଜି ମାର୍ହାତ୍, ଇୟାୱାନ୍ଦିଙ୍ଗ୍ ଆକାତ୍ ଆୟା କାଏଙ୍ଗ୍ କଇଜି ତିହାତ୍। ମାରି ନିଜେ ମାନ୍ସିଙ୍ଗ୍ ଏୟେନ୍ଗି ୱାନିୱାଲେ ମାହାନ୍ ଆୟାକାୟା ସିତାତ୍, ମାରି ୱାଣ୍ତ୍ରୁବା ତିହାନ୍।
ଗାଦେମ୍, ୱାରି କାଣ୍କୁ ତୋରିତେ, ମାରି ୱାନିଙ୍ଗ୍ ଜାଣା ପଡ଼େଆତାତ୍ ଜେ ୱାରୁ ଡୁମ୍ଡା ନାଗ୍ଡ଼ା ମାର୍ହାର୍। ୱାରୁ ଆକୁ କୁଡୁପ୍ସି ସକା ସିଲେକିଜି ନିଜେ ମେନ୍ଦଲ୍ଦୁ ଆରାଦେଙ୍ଗ୍ ସେଷ୍ଟାକିତାର୍।
ଆୟାୱେଡ଼ାଦୁ ମାନ୍ସି ମାରି ଦାନିଆଡ଼୍ସି ଆୟା ଡଡିଦୁ ବୁଲାଜିମାହି ୱାଲେ ମାପ୍ରୁଦି ସେଉଡ଼ୁ ୱେହାର୍। ୱାରୁ ରିଏର୍ ମାପ୍ରୁଦିବାଣାନ ମାରାଗିତାର୍। ଆୟାୱେଡ଼ାଦୁ ମାପ୍ରୁ ମାନ୍ସିଙ୍ଗ୍ ସେଉଡ଼ୁ ଆଜି କୁକ୍ତାନ୍, “ ନିନୁ ଏମେମାନି? ” ଆଦମ୍ ଉତର୍ ସିତାନ୍, “ନାନୁ ନିଙ୍ଗିଁ ଡଡିଦୁ ନି ବୁଲାନିକା ୱେହା, ମାରି ନାନୁ ତିଲାତା ମାହା, ମାରି ନାନୁ ଡୁମ୍ଡା ମାହା। ଇୟାୱାନ୍ଦିଙ୍ଗ୍ ମାରାଗିତା। ”
ମାରିଅର୍ସୁ ମାପ୍ରୁ ୱେନ୍ବାତାନ୍, “ନିଙ୍ଗିଁ ଏୟେନ୍ ୱେହ୍ତାନ୍ ନିନୁ ଡୁମ୍ଡା ମାନି ? ଇନିକା ନିନୁ ଆୟାକାୟା ତିହି ନା ଏମେକାଗି ନାନୁ ତିନ୍ଣ୍ଡ୍ରେଙ୍ଗ୍ ୱେହ୍ଏଣ୍ଡା ମାହା?” ମାନ୍ସି ୱେର୍ତାନ୍, ନିନୁ ସିତିମାହି ଏମେ ଆୟା ଆଡ଼୍ସି ଆଦିନେ ନାଙ୍ଗିଁ କାୟା ସିତାତ୍।” ମାରି ମାପ୍ରୁ ଆଡ଼୍ସିଙ୍ଗ୍ ୱେନ୍ବାତାତ୍,“ ନିନୁ ଇୟାକା ଇନିକାକିତି?” ଆୟା ଆଡ଼୍ସି ୱେହ୍ତାତ୍, “ ସାରାସୁ ନାଙ୍ଗିଁ ଦକାସିତାତ୍।”
ମାପ୍ରୁ ନେ ସାରାସୁଦିଙ୍ଗ୍ ୱେର୍ତାନ୍, “ ନିନୁ ଆନାଦୁରିଆ ଆଆ ! ନିନୁ ନିଜେଦି ପଟାସିଜି ବୁଲାନି ମାରି ସିକ୍ଲାତିନି। ନିନୁ ମାରି ଇୟା ଆଡ଼୍ସି ରିଇଦେର୍ କାରାଆନିଦେର୍, ନି ମାରିନ୍ ମାରି ୱାରି ମାରିନ୍ଦି ରିଏର୍ କାରାଇ ଆନାର୍। ଇୟା ଆଡ଼୍ସିଦି କାଲୁ ନି ତାଲାଦିଙ୍ଗ୍ କତ୍ନାତ୍,ମାରି ନିନୁ ୱାନି କାଲୁଦୁ ଟକ୍ନି।”
ଦାନିୱେନ୍କା ମାପ୍ରୁ ଆଡ଼୍ସିଙ୍ଗ୍ ୱେର୍ତାନ୍, “ ନାନୁ ନି କଡ଼ ଜନମ୍ ସିଦେଙ୍ଗ୍ ଇଜି ନାଣ୍ଡୋ କଷ୍ଟାମ୍ କିବିସ୍ନା। ନିନୁ ନିଜେ ମାନ୍ସିଦିଙ୍ଗ୍ ଅଡ଼୍ବିଜିନି, ମାରି ୱାଣ୍ଡ୍ରୁ ନି ମୁସ୍କୁ ସାସନ୍ କିନାନ।”
ମାପ୍ରୁ ମାନ୍ସିଦିଙ୍ଗ୍ ୱେର୍ତାନ୍, “ ନିନୁ ନି ଆଡ଼୍ସି ମାଟା ୱେହିମାନି ମାରି ନା ମାଟା ୱେନ୍ଇ। ଇୟାୱାନ୍ଦିଙ୍ଗ୍ ଭୁମି ଆନାଦୁରିଆ ଆତାତ୍, ମାରି ନିଙ୍ଗିଁ ଉଣିୱାନ୍ଦିଙ୍ଗ୍ ନାଣ୍ତୋ କାଷ୍ଟାମ୍ କିଦେଙ୍ଗ୍ ମାନାତ୍। ମାରି ନିନୁ ସାନିସୋନି, ମାରି ନି ମେନ୍ଦଲ୍ ସିକ୍ଲାଦୁ କୁଡ଼୍ଜି ସନାତ୍।” ଆୟା ମାନ୍ସି ନିଜେ ଆଡ଼୍ସି ଦୋରୁ ହୋବା ଇଟ୍ତାନ୍, ଦାନି ଅର୍ତ “ଜିଉ ସିନି ଲୋକୁ”, ମାତର୍ ୱିଜୁ ଜାତିଦି ୟାୟା ଆନାତ୍। ମାରି ମାପ୍ରୁ ଆଦମ୍ଦିଙ୍ଗ୍ ନି ହୋବାଦିଙ୍ଗ୍ ଜାନ୍ତୁଦି ତୋଲୁଦାନ୍ ତିଆର୍କିତି ସକା ଆରିସ୍ତାନ୍।
ମାରି ମାପ୍ରୁ ୱେର୍ତାନ୍, “ଏୟେଲ୍ ଲୋକୁ ନେଗିଦାନିଙ୍ଗ୍ ମାରି ସେଇଦାନିଙ୍ଗ୍ ନେସ୍ନିୱାନ୍ଦିଙ୍ଗ୍ ମାୱାଜା ଆତାସର୍ହାର୍, ଇୟାୱାନ୍ଦିଙ୍ଗ୍ ୱାରିଙ୍ଗ୍ ଆୟା ଜିଉତି ମାରାନୁତି ଆୟାକାୟା ତିଣ୍ଡ୍ରେଙ୍ଗ୍ ସିଦେଙ୍ଗ୍ ଆଏତ୍ଗି ଆହୁଇହିଙ୍ଗାଁ ୱିଜୁଦିନାମ୍ ଜିଉ ମାନ୍ଜିନାର୍।” ଇୟାୱାନ୍ଦିଙ୍ଗ୍ ମାପ୍ରୁ ଆଦମ୍ଦିଙ୍ଗ୍ ମାରି ହୋବାଦିଙ୍ଗ୍ ଆୟା ଡଡିଦାନ୍ ସପ୍ତାନ୍। ମାରି ମାପ୍ରୁ ଆୟା ଡଡିଦି ଡ଼ୁଗ୍ନି ସାରିଦୁଷ ସାତୁମାନି ସାର୍ଗିଦୂତଙ୍ଗାଁ କାପ୍କିବିସ୍ତାନ୍ ଆୟାୱାଜା ଏମେ ଲୋକୁ ଆୟା ଜିଉଦି ମାରାତି କାୟା ତିନ୍ଣ୍ଡ୍ରେଙ୍ଗ୍ ଆଟ୍ଏନ୍।
ଆଦି ପୁସ୍ତକ୍ ୩ ଦି ଉଣ୍ଡ୍ରେ ବାଇବଲ୍ ଦି କାତାନି
Free to use, adapt, and share under an open license (CC BY-SA 4.0).