3. ୩. ବନ୍ୟାଦାନ୍ ସାମ୍ସାରାମ୍ ବିନାଶ ଆତାତ୍
ନାଣ୍ଡୋ ୱେଡା ୱେନ୍କା, ଦେଶେମ୍ଦୁ ନାଣ୍ଡୋ ଲୋକୁ ମାନ୍ଜି ମାହାର୍। ଆକାର୍ ନାଣ୍ଡୋ ଦୁଷ୍ଟାମ୍ ମାରି ଅନ୍ୟାୟ୍ ଆତାମାହାର୍। ଇୟାୱିଜୁ ବେସି ଖରାପ୍ ମାହାତ୍ଜେ ମାପ୍ରୁ ଉଣ୍ଡ୍ରେ ପେରି ବାତ୍ୟାଦାନ୍ ୱିଜୁ ଦେଶେମ୍ଦିଙ୍ଗ୍ ସେଏଣ୍ଡାକିଦେଙ୍ଗ୍ ଇଛା କିତାନ୍।
ମାତର୍ ମାପ୍ରୁ ନୋହଦି ଡାଗ୍ରୁ ସାର୍ଦା ମାହାନ୍। ଆକାନ୍ ଆରେନ୍ ଧାର୍ମୁଦି ଲୋକୁ ମାହାନ୍, ଦୁଷ୍ଟାମ୍ ଲୋକାଡାଗରୁ ମାନ୍ଜି ମାହାନ୍। ମାପ୍ରୁ ନୋହଦିଙ୍ଗ୍ ୱେହ୍ତାନ୍ ଜେ ଆକାନ୍ ଉଣ୍ଡ୍ରେ ପେରି ବାତ୍ୟା ତାନାନ୍ଲେ। ଇୟାୱାନ୍ଦିଙ୍ଗ୍, ଆକାନ୍ ନୋହଦିଙ୍ଗ୍ ଉଣ୍ଡ୍ରେ ପେରି ଡଙ୍ଗା ତିଆର୍ କିଦେଙ୍ଗ୍ ୱେହ୍ତାନ୍।
ମାପ୍ରୁ ନୋହଦିଙ୍ଗ୍ ଡଙ୍ଗା ତିଆର୍ କିଦେଙ୍ଗ୍ ୱେହେତାନ୍ ଇନିକାଗି ପାକାପାକି ୧୪୦ ମିଟର୍ ନିହି,୨୩ ମିଟର ଆସାର୍, ମାରି ୧୩.୫ ମିଟର ନିହି। ନୋହ ଦିନିଙ୍ଗ୍ ମାରାନୁଦାନ୍ ତିଆର୍କିଦେଙ୍ଗ୍ ମାହାତ୍ ମାରି ଆବେନୁ ମୁଣ୍ଡ୍ରି ମାଲା, ନାଣ୍ଡୋ ବାକ୍ରା, ଉଣ୍ଡ୍ରେ ଛାତ୍ ମାରି ଉଣ୍ଡ୍ରେ କିଟିକି। ଆୟା ଡଙ୍ଗା ବନ୍ୟା ୱେଡାଦୁ ନୋହା ମାରି ୱାନି ପରିବାର୍ ମାରି ୱିଜୁ ପର୍କାର୍ ଜାନ୍ତୁଙ୍ଗ୍ ନେଗେଣ୍ଡ୍ ଇଡ୍ନାନ୍।
ନୋହ ମାପ୍ରୁଦି ମାଟା ମାନାତାର୍। ଆକାନ୍ ମାରି ୱାରି କଢୋର୍ ଆୟା ୱାଜା ଡଙ୍ଗା ତିଆର୍ କିତାର୍ ଏନେଟ୍ଗି ମାପ୍ରୁ ୱେହ୍ତାମାହାନ୍। ମାତର୍ ଆୟା ଡଙ୍ଗା ନାଣ୍ଡୋ ପେରି ଡଙ୍ଗା ମାର୍ହାତ୍ ଇୟାୱାନ୍ଦିଙ୍ଗ୍ ଆକା ତିଆର୍ କିଦେଙ୍ଗ୍ ନାଣ୍ଡୋ ପାଟେଙ୍ଗ୍ ଆସ୍ତାତ୍। ନୋହ ଲୋକାଙ୍ଗ୍ ୱାଜିମାହି ବାତ୍ୟା ମାଟାଦାନ୍ ଜାଗାର୍ତା କିବିସ୍ତାନ୍ ମାରି ୱାରିଙ୍ଗ୍ ମାପ୍ରୁ ତରିଣ୍ଡ୍ ୱାଦେଙ୍ଗ୍ ୱେହ୍ତାନ୍, ମାତର୍ ଆୟାକାର୍ ନୋହଦିଙ୍ଗ୍ ବିଶ୍ବାସ୍ କିଏତାର୍।
ମାପ୍ରୁ ନୋହ ମାରି ୱାରି ଇଣ୍ଡ୍ରଣି ଲୋକାଙ୍ଗ୍ ନିଜେଦିୱାନ୍ଦିଙ୍ଗ୍ ମାରି ଜାନ୍ତୁଙ୍ଗାଁୱାଦିଙ୍ଗ୍ ନାଣ୍ଡୋ ତିନିକା ଉଣ୍ଡ୍ରେବାନେ ଆସ୍ସିମାଡ୍ରେ ଆଦେଶ୍ ସିତାନ୍। ନାସ୍ତିୱାଲେ ୱିଜୁ ତିଆର୍ ଆତା ମାରାହାତ୍, ମାରି ମାପ୍ରୁ ନୋହଦିଙ୍ଗ୍ ୱେହ୍ତାନ୍ ଗାନି ଇୟାୱେଡ଼ାଦୁ ୱାରିଦି,ୱାରି ଆଡ଼୍ସିଦି, ୱାରି ମୁଣ୍ଡ୍ରି କଡ଼ର୍,ମାରି ୱାରି ଆଡ଼୍ସିକାଦି - ୱିଜୁ ମଟେଙ୍ଗ୍ ଏନିମେଦିଲୋକା ଡଙ୍ଗାଦୁ ସନ୍ଣ୍ଡ୍ରେଙ୍ଗ୍ ମାରାହାତ୍।
ମାପ୍ରୁ ୱିଜୁ ରେକାମ୍ ଜାନ୍ତୁଙ୍ଗ୍ ମାରି ପଟିଙ୍ଗାଁ ମେମାରି କଡ଼ ମାରି ପଟିଙ୍ଗାଁ ଆଇଲି କଡ଼ ନୋହଦି ଡ଼ାଗ୍ରୁ ପକ୍ତାନ୍ ମାରି ବାତ୍ୟା ୱେଡାଦୁ ନେଗେଣ୍ଡ୍ ମାନ୍ଜିନାର୍। ମାପ୍ରୁ ଇୟାୱାଜା ୱିଜୁ ରେକାମ୍ତି ଜାନ୍ତୁଙ୍ଗ୍ ଏଡୁ ଆଇଲି ମାରି ଏଡୁ ମେମାରି ପକ୍ତାନ୍ ୱାରିଙ୍ଗ୍ ଦାନ୍ସିଦେଙ୍ଗ୍ ବ୍ୟବହାର୍ କିଦେଙ୍ଗ୍ ଆଟ୍ନାର୍। ଏସ୍ତିୱେଡ଼ାଦୁ ୱିଜେରେ ଡଙ୍ଗାଦୁ ଏକ୍ତାର୍ ମାରି ନିଜେ ମାପ୍ରୁ ଡଙ୍ଗାଦି ସେର୍ଲା ବନ୍ଦ୍ କିତାନ୍।
ଏସ୍ତିୱେଡ଼ାଦୁ ପିରୁ ଆରାମ୍ ଆତାତ୍, ମାରି ପିରୁ ୱାଜି ୱାଜିନେ ମାର୍ହାତ୍। ବନ୍ଦ୍ `ଆଏଣ୍ଡା ନାଲାପାଇ ଦିନାମ୍ ନାଲାପାଇ ନାଡା ପିରୁ ୱାଜିନେ ମାର୍ହାତ୍। ଭୁମିଲୋଇରାଣ୍ ପାଡ଼୍ଜି ଏରୁ ସତେ। ୱିଜୁ ସଂସାରାମ୍ ମାରି ଦେଶେମ୍ଦି ୱିଜୁ ମାଟା, ଇୟେଲ୍ବା ନିର୍ହିବାଣାନ୍ ନିର୍ହିଗରୋକୁ ଏରୁଦୁ ମୁଡ୍ଗିତେ।
ୱାର୍ହ୍ତି ଭୁମି ମୁସ୍କୁ ମାନ୍ଜିନି ୱିଜୁ ରେକାମ୍ କାଣ୍କେଙ୍ଗ୍ ସାତେ, ମାରି ଆୟାଲୋକୁ ମାରି ଜାନ୍ତୁଙ୍ଗ୍ ଡଙ୍ଗାଦୁ ମାର୍ହେ ଆକେଙ୍ଗ୍ ଜିତେ। ଆୟା ଡଙ୍ଗା ଏରୁ ମୁଷ୍କୁ ଦେଲ୍ଜି ମାର୍ହାତ୍ ମାରି ଡଙ୍ଗାଲୋଇ ମାନ୍ଜିନି ୱିଜୁ ବିଷୟ ମୁଡ୍ଗ୍ନି ବାଣାନ୍ ଜୀତାର୍।
ପିରୁ ଢିସ୍ତି ୱେନ୍କା, ଆଇଦୁ ଲେସ୍କୁ ଏରୁ ମୁଷ୍କୁ ଡଙ୍ଗା ଦେଲ୍ଜି ମାହାତ୍, ମାରି ଆୟା ୱେଡାଦୁ ଏରୁ କୋକଆଦେଙ୍ଗ୍ ଆସ୍ତେ। ନାସ୍ତିୱାଲେ ଉଣ୍ଡ୍ରେ ଦିନାମ୍ ଆୟା ଡଙ୍ଗା ଉଣ୍ଡ୍ରେ ଗରୋତି ତାଲାଦୁ ସନ୍ସି ଆସ୍ତାତ୍, ମାରି ସଂସାରାମ୍ ଇଏଲ୍ବା ଏରୁଦୁ ମୁଡ୍ଗିତା ମାହାତ୍। ମୁଣ୍ଡ୍ରି ଲେସ୍କୁ ୱେନ୍କା, ଗରୋତି କାଡା ତରିତାତ୍।
ମାରିଅର୍ସୁ ଚାଲିସ୍ଦିନାମ୍ ୱେନ୍କା, ନୋହ ଉଣ୍ଡ୍ରେ କାକିଦିଙ୍ଗ୍ ଆୟାକା ସୁଡ୍ଦେଙ୍ଗ୍ ପକ୍ତାନ୍ ଜେ ଇନିକା ଏରୁ ୱାହ୍ତାମାହାତ୍ ନା ସିଲେ। ଆୟା କାକି ୱାହ୍ତି ଭୁମି ରେବାଜି-ରେବାଜି ଇନିଙ୍ଗାଁ ଆନିଙ୍ଗାଁ ଇମ୍ଜି ମାହାତ୍, ମାରି ଦାନିଙ୍ଗ୍ ୱାହ୍ତି ଭୁମି ତୋର୍ଏତାତ୍।
ମାରି ୱେନ୍କା ନୋହ ଉଣ୍ଡ୍ରେ ପାଉରାଦିଙ୍ଗ୍ ପକ୍ତାନ୍। ମାତର୍ ଦାନିଙ୍ଗ୍ବା ୱାହ୍ତି ଭୁମି ପୁଟ୍ଏତାତ୍,ଆୟାନୁଣ୍ଡିଙ୍ଗ୍ ଆୟା ନୋହଦିଡାଗ୍ରୁ ମାରି ଢେସି ୱାତାତ୍। ଉଣ୍ଡ୍ରି ୱାରାମ୍ ୱେନ୍କା ନୋହ ଆୟା ପାଉରା ମାରି ପକ୍ତାନ୍ ମାରି ଆକାତ୍ ନିଜେ ୱେୟୁଦାନ୍ ଜିତୋ ମାରାନ୍ ଆକୁ ଆସ୍ସି ମାରି ଢେସି ୱାତାତ୍। ଏରୁ କମେଆଜି ମାହେ, ମାରି ନିସ୍ରି ନିସ୍ରି ମାରାକୁ ପିରିଜି ୱାତେ।
ମାରି ନୋହ ଉଣ୍ଡ୍ରେ ୱାରାମ୍ କାପ୍କିତାନ୍ ମାରି ମୁଣ୍ଡ୍ରି ଜାରିଙ୍ଗ୍ ଆୟା ପାଉରାଦିଙ୍ଗ୍ ପକ୍ତାନ୍। ଇଏଲ୍, ମାଣ୍ଡ୍ରେଙ୍ଗ୍ ବାଡି ପୁଟ୍ତାତ୍ ମାରି ଆକାତ୍ ଢେସି ରେଏତାତ୍। ଏରୁ ୱାର୍ସିମାର୍ହେ।
ରୁଣ୍ଡି ଲେସ୍କୁ ୱେନ୍କା ମାପ୍ରୁ ନେ ନୋହଦିଙ୍ଗ୍ ୱେହ୍ତାନ୍, “ଇୟେଲ୍ ନିନୁ ମାରି ନି ପରିବାର ମାରି ଜାନ୍ତୁଙ୍ଗ୍ ଡଙ୍ଗାଦାନ୍ ସଶିରାଦୁ। ନାଣ୍ଡୋ କଢୋର୍ ମାରି ମାରିନ୍ ତଡାନ୍ ଜନମ୍ କିଦୁ ମାରି ପୁର୍ତିବିଦୁ ଭର୍ତି କିଦୁ।” ଇୟାଲିକେନ୍ନେ ନୋହ ମାରି ୱାନି ପରିବାର୍ ଡଙ୍ଗାଦାନ୍ ସଶି ୱାତାର୍।
ନୋହ ଡଙ୍ଗାଦାନ୍ ସଶିୱାତି ୱେନ୍କା, ଆକାନ୍ ଉଣ୍ଡ୍ରେ ସାମ୍ଡା ତିଆର୍ କିତାନ୍ ମାରି ଦାନ୍ୱାନ୍ଦିଙ୍ଗ୍ ବ୍ୟବହାର କିଦେଙ୍ଗ୍ଇଜି ୱିଜୁ ପ୍ରକାର୍ ଜାନ୍ତୁଙ୍ଗା ବାଣାନ୍ ଏସଡ୍ୱେନ୍କାଙ୍ଗ୍ ଅସି ଦାନ୍ ସିତାନ୍। ମାପ୍ରୁ ଆୟା ଦାନ୍ଦୁ ସାର୍ଦା ଆତାନ୍ ମାରି ନୋହ ମାରି ୱାରି ପରିବାରଦିଙ୍ଗ୍ ଆର୍ଶିବାଦ୍ ସିତାନ୍।
ମାପ୍ରୁ ୱେହ୍ତାନ୍, “ନାନୁ ପ୍ରାମାଣାମ୍ କିଜିନା ଜେ ଲୋକୁଦିବାଣାନ୍ କିଜିମାହି ପାପାମ୍ ପାଣିନୁଣ୍ଡିଙ୍ଗ୍ ନାନୁ ମାରି ଏସେଙ୍ଗ୍ବା ଭୁମିଦିଙ୍ଗ୍ ଆନାଦୁରିଆ କିଏ ମାରି ବାତ୍ୟାଦିଙ୍ଗ୍ ସଂସାରାମ୍ଦିଙ୍ଗ୍ ସେଏଣ୍ଡା କିଏ, ଆତିଙ୍ଗାଁବା ଲୋକୁ ଜନମ୍ଦାନ୍ନେ ପାପାମ୍।
ମାରି ମାପ୍ରୁ ନିଜେଦି ନିୟମ୍ତି ଚିନ୍ଦି ରୁପ୍ଦାନ୍ ପର୍ତୁମ୍ କୁର୍ୱେଲିଦିଙ୍ଗ୍ ତିଆର୍କିତାନ୍। ଏସେଙ୍ଗ୍ବା ବାଦଡ୍ଦୁ କୁର୍ୱେଲି ତର୍ନାତ୍, ଏସେଙ୍ଗ୍ ମାପ୍ରୁ ଆଡ଼ବିନାନ୍ ଜେ ୱାଣ୍ଡ୍ରୁ ଇନିକା ପ୍ରାମାଣାମ୍ କିତାନ୍ ମାରି ଆୟାୱାଜା ୱାରି ଲୋକୁ ଅଡ଼୍ବିନାର୍।
ଆଦି ପୁସ୍ତକ୍ ୬ – ୮ ଦି ଉଣ୍ଡ୍ରେ ବାଇବଲଦି କାତାନି
Free to use, adapt, and share under an open license (CC BY-SA 4.0).